བརྡ་སྤྲོད་བློ་གསལ་མགུལ་རྒྱན། ༼ལྟ་ཀློག་གི་སྐོར༽
༄༅། ། བདེར་གཤེགས་གསུང་གི་ངོ་བོ་ཉིད། །རྗེ་བཙུན་ཕྱྭ་ལ་གུས་བཏུད་ནས། །མགོན་ཁྱོད་མཁྱེན་བརྩེའི་འོད་དཀར་གྱིས། །བདག་བློའི་ཀུ་མུད་རྒྱས་པར་མཛོད། །བོད་ཀྱི་བརྡ་ལ་མཁས་འདོད་ཀྱི། །བློ་གསར་རྣམས་ལ་ཕན་བྱའི་ཕྱིར། །ཕྲད་དང་རྣམ་དབྱེའི་སྦྱོར་ཚུལ་ནི། །གོ་སླ་ཉུང་ངུར་བཤད་པར་བྱ། །ཨི་ཡིག་གི་ནི་རྐྱེན་རྣམས་ནི། །ཀྱི་གི་གྱི་འི་ཡི་དང་ལྔ། །རྗེས་འཇུག་མཐའ་དང་མཐུན་ལུགས་བཤད། །ད་བ་ས་ཀྱི་ག་ང་གི། །ན་མ་ར་ལ་བཞི་པོར་གྱི། །འ་མཐའ་ཅན་དང་མཐའ་རྟེན་མེད། །ཕྲད་ཀྱི་སྦྱོར་བ་གཅིག་པའི་ཕྱིར། །ཚིགས་བཅད་ཚང་ན་འི་སྦྱོར་ཞིང༌། །ཚིག་རྐང་མ་ཚང་ཡི་ཐོབ་བོ། །དེ་ནི་དྲུག་པ་འབྲེལ་སྒྲ་སྟེ། །སྐབས་འགར་ཚིག་རྒྱན་གཉིས་ལའང་འཇུག །དེ་ལྔ་ལ་ནི་ས་མཐའ་སྦྱར། །རྣམ་དབྱེ་གསུམ་པ་བྱེད་པའི་སྒྲ། །སྐབས་འགར་རྒྱུ་མཚན་ལ་ཡང་འཇུག །ཨུ་ཡིག་རྐྱེན་ནི་ཏུ་དུ་རུ། །སུ་ར་ན་ལ་དང་བཅས་པ། །ག་བ་ད་དྲག་ཅན་མཐར་ཏུ། །ང་ད་ན་མ་ར་ལ་དུ། །འ་མཐའ་ཅན་དང་མཐའ་རྟེན་མེད། །ཀུན་ལ་ཚིག་རྐང་ཚང་ན་ར། །ཚིག་རྐང་མ་ཚང་རུ་ཐོབ་བོ། །ས་མཐར་སུ་སྦྱར་ན་ལ་གཉིས། །རྗེས་འཇུག་ཡི་གེར་ལྟོས་པ་མེད། །དེ་དག་རྣམ་དབྱེ་གང་ཞེ་ན། །གཉིས་པ་ལས་དང་བཞི་བ་ཆེད། །བདུན་པ་གནས་གཞི་འམ་རྟེན་གནས། །ཚེ་སྐབས་དང་ནི་དེ་ཉིད་དོ། །ཨེ་ཡིག་རྐྱེན་ནི་སྟེ་ཏེ་དེ། །ག་ང་བ་མ་འ་མཐར་སྟེ། །ན་ར་ལ་ས་བཞི་པོར་ཏེ། །ད་དེ་དེ་དག་ལྷག་བཅས་ཡིན། །དེ་ནི་ཐ་སྙད་དབང་དུ་གསུམ། །འདས་དང་ལྷག་བཅས་རྣམ་གྲངས་བརྗོད། །དངོས་པོའི་དབང་དུ་བཞི་ཡིན་ཏེ། །བདག་གི་བ་དང་ཕ་རོལ་པོ། །གསང་བའི་དངོས་དང་དེ་ཉིད་དངོས། །དུས་ཀྱི་དབང་དུ་འདས་མ་འོངས། །ཨོ་ཡིག་གི་ནི་རྐྱེན་བཅུ་གཅིག །གོ་ངོ་དོ་ནོ་བོ་མོ་འོ། །རོ་ལོ་སོ་དང་ཏོ་རྣམས་ཏེ། །རྗེས་འཇུག་རང་རང་ཡོད་རྗེས་སུ། །རང་རང་ཨོ་ལྡན་སྦྱོར་བ་དང༌། །ད་དྲག་ཅན་ལ་ཏོ་སྦྱོར་རོ། །དེ་ནི་སླར་བསྡུ་འམ་རྫོགས་ཚིག །ཨཾ་རྐྱེན་གམ་ངམ་དམ་ནམ་བམ། །མམ་འམ་རམ་ལམ་སམ་ཏམ་བཅས། །བཅུ་གཅིག་རྣམ་པར་བརྟག་པ་ཅན། །དྲི་བ་ཐེ་ཚོམ་གདམ་ང་དང༌། །འབྱེད་སྡུད་ལ་ཡང་སྐབས་འགར་འཇུག །རྗེས་འཇུག་མཐའ་དང་མཐུན་ལུགས་ནི། །རྫོགས་ཚིག་སྐབས་དང་འདྲ་བར་ཤེས། །ཨང་ཡིག་རྐྱེན་ནི་ཀྱང་འང་ཡང༌། །ག་ད་བ་ས་ད་དྲག་ཅན། །རྗེས་སུ་ཀྱང་དང་ང་འ་ན། །མ་ར་ལར་ཡང་མཐའ་རྟེན་མེད། །འང་དང་ཚིག་རྐང་མ་ཚང་ཡང༌། །དེ་ནི་ཚིག་རྒྱན་མཐུན་མི་མཐུན། །སྡུད་པ་རྣམས་སུ་ཤེས་པར་བྱ། །པ་བ་གཉིས་ཀྱི་ཐོབ་ཚུལ་ནི། །ག་ད་ན་བ་མ་ས་དང༌། །ད་དྲག་ཅན་ལ་པ་སྦྱོར་ཞིང༌། །ང་འ་ར་ལ་མཐའ་མེད་མཐར། །བ་ཕྱེད་ཝར་འབོད་རྣམས་ལ་བ། ། དེ་མིན་གཞན་ལ་པ་སྦྱོར་རོ། ། དེ་དག་བདག་པོའི་སྒྲ་རུ་འགྱུར། །ཅི་རིགས་རྐྱེན་ནི་འདི་རྣམས་ཏེ། །ཅིང་ཞིང་ཤིང་གསུམ་འཕྲོ་མཐུད་ཡིན། །ཅེས་ཞེས་ཤེས་གསུམ་བརྗོད་པའི་ཚིག །སྔོན་མ་དེ་ཡི་ངོས་བཟུང་ཡིན། །དེ་དང་འདྲ་བའི་ཚིག་ཕྲད་ནི། །ཅེ་ན་ཞེ་ན་ཤེ་ན་དང༌། །ཅེ་འོ་ཞེ་འོ་ཤེ་འོ་རྣམས། །ལན་དང་བཅས་པའི་སྒྲ་རུ་འགྱུར། །ཅིག་ཞིག་ཤིག་ནི་བསྐུལ་ཚིག་གམ། །གསལ་བྱེད་ཡིན་ནོ་དེ་རྣམས་ནི། །རྗེས་འཇུག་མཐའ་དང་མཐུན་ལུགས་ནི། །ག་ད་བ་མཐར་ཅིང་སོགས་སྦྱོར། །ང་ན་མ་འ་ར་ལ་དང༌། །མཐའ་རྟེན་སྤང་རྗེས་ཞིང་སོགས་སྦྱོར། །ས་མཐར་ཤིང་ཤེས་སོགས་ལྔ་སྦྱོར། །མ་དང་མི་ནི་མིང་གང་གི། །ཐོག་མར་སྦྱར་བ་དགག་པ་སྟེ། །མ་ནི་འདས་དང་མ་འོངས་པ། །མི་ནི་ད་ལྟ་བ་ཡིན་ནོ། །པུ་བུ་འུ་དང་པོ་བོ་འོ། །བདག་པོའི་སྒྲ་དང་ཆ་མཐུན་ཡིན། །ག་མཐར་པུ་དང་གཞན་རྣམས་བུ། །འུ་ནི་མཐའ་རྟེན་མེད་ལ་འོ། །པོ་ནི་ག་ང་ད་ན་བ། །མ་ར་ལ་སའི་མཐའ་རུ་སྦྱར། །བོ་དང་འོ་ནི་རྟེན་མེད་དང༌། །འ་ཡི་རྗེས་སུ་ཐོབ་པ་སྟེ། །གསལ་འགྱུར་འ་ནི་ཀུན་གྱིས་དོར། །བདག་པོའི་དངོས་སྒྲ་པོ་འདི་ཉིད། །རྗེས་འཇུག་མཐའ་ལ་ལྟོས་པ་མེད། །ཀྱེ་དང་ཀྭ་ནི་བོད་པའི་བརྡ། །མིང་དང་ཚིག་གི་ཐོག་མཐར་འཇུག །ཀྱེ་ནི་ཡུལ་མཆོག་རྣམས་ལ་ཐོབ། །ཀྭ་ནི་མཆོག་མིན་རྣམས་ལ་འོ། །གང་སུ་ཅི་ཇི་སྤྱི་ཁྱབ་སྒྲ། །སྙེད་སྲིད་ལྟར་བཞིན་སྐད་ལ་ཇི། །ཞིག་སྟེ་སླད་འདྲ་ཕྱིར་ལ་ཅི། །ཞིག་ལ་ཅི་དང་ཇི་ཡང་རུང། །གང་སུ་ཅི་གསུམ་མིང་གང་གི། །ཐོག་མཐའ་ཀུན་ཏུ་འབྱུང་བ་ཡིན། །ཇི་ནི་ཐོག་མ་ཁོ་ན་འོ། །གང་དང་ཅི་ནི་དངོས་ཀུན་ལ། །འཇུག་ཅིང་སུ་ནི་གང་ཟག་ལའོ། །ནི་ཞེས་ཚིག་གི་ཁ་སྐོང་དང༌། །ངོས་བཟུང་དང་ནི་བརྣན་པའོ། །དང་ནི་འབྱེད་དང་སྡུད་པ་དང༌། །རྒྱུ་མཚན་ཚེ་སྐབས་གདམས་ངག་ལྔའོ། །ཨ་ལྡན་ནས་ལས་འབྱུང་ཁུངས་དང༌། །དགར་སྡུད་ལྷག་བཅས་རྒྱུ་མཚན་ནོ། །ན་ར་ལ་གསུམ་ཤམ་བུ་རུ། །སྒྲ་བསྒྱུར་སྔ་མས་ད་དྲག་བཞེད། །ཕྱི་མས་དངོས་སུ་མི་སྦྱོར་ཡང། །ད་དྲག་ཐོབ་ངེས་རྣམས་ལ་ནི། །ཕྲད་དང་རྣམ་དབྱེ་གང་སྦྱོར་ཡང༌། །ད་མཐའ་ཡོད་པ་ཇི་བཞིན་སྦྱར། །མཐའ་རྟེན་མེད་པའི་མིང་ཚིག་ཕྲད། །འ་མཐའ་ཅན་དང་ཐོབ་ཐང་འདྲ། །ཅི་ཕྱིར་རྗེས་འཇུག་མེད་པ་ཡི། །ཡི་གེའི་སྦྱོར་བ་མི་སྲིད་ཅིང༌། །འ་མཐའ་འགའ་ཙམ་མ་གཏོགས་པ། །ཡིག་ཚོགས་ཉུང་ཕྱིར་བསྡུས་པའོ། །གསུང་རབ་རྒྱ་མཚོའི་གོས་ཅན་ལ། །འབད་རྩོལ་དཔྱིད་དཔལ་རབ་དར་བས། །བརྡ་སྦྱོར་རྐང་འཐུང་རྒྱས་པའི་རྩེར། ། ལེགས་བཤད་གཡུར་ཟའི་ཕྱུག་འདི་མཚར། །འདི་ལ་སྡེབས་ཉེས་གྱུར་སྲིད་ན། །སྐྱབས་གནས་གསུམ་ལ་བཟོད་པར་གསོལ། །རྣམ་དཀར་དགེ་ཚོགས་གང་མཆིས་ཀྱིས། །དོན་གཉེར་བློ་གྲོས་རྒྱས་གྱུར་ཅིག །ཁོ་བོ་ཚུལ་ཁྲིམས་རྒྱལ་མཚན་གྱིས། །གཞན་ཕན་བསམ་པས་ |
