༄༅། །ས་ལམ་དོན་གསལ་རིན་ཆེན་སྒྲོན་མེ་ཞེས་བྱ་བ་བཞུགས་སོ། ༼ལྟ་ཀློག་གི་སྐོར༽
| གསུམ་གྱིས་སངས་རྒྱས་པའི་བོན་ཅིག་ཞུས་པས། བླ་མའི་ཞལ་ནས། སྐྱེ་མེད་དུ་ལྟོས། འགག་མེད་དུ་གློད། འཛིན་མེད་དུ་སྒོམ། དེས་སངས་རྒྱས་པའོ། ཚིག་གིཅག་གིས་སངས་རྒྱས་པའི་བོན་ཞིག་ཞུ་བྱས་པས། སྣང་སྲིད་ལ་གཟའ་གཏད་མེད་པར་ཤེས་ན་དེས་སངས་རྒྱས་པ་ཡིན་གསུངས། ཡང་ཞུས་པ། བླ་མ་ལགས། ཁྱེད་ཀྱིས་འཇིག་རྟེན་ཁམས་ན་ངོ་མཚར་ཆེ་བ་ཅི་འདྲ་གཟིགས་ཞུས་པས། བླ་མས་ངོ་མཚར་ཆེ་བ་མང་པོ་མཐོང་གསུངས། ཅི་ཙམ་གཟིགས་ཞུས་པས། བླ་མའི་ཞལ་ནས། སངས་རྒྱས་ངོ་མཚར་ཆེ་བ་འདི་འདྲ་མཐོང་། སྐུ་སྤྲུལ་བའི་སྐུ་རུ་སངས་རྒྱས། གསུང་ལོངས་སྐུ་རུ་སངས་རྒྱས། ཐུགས་བོན་སྐུ་རུ་སངས་རྒྱས། སྐུ་གསུམ་ལྷུན་གྲུབ་ཀྱི་འཕྲིན་ལས་ཀྱིས། སེམས་ཅན་འཁོར་བ་ནས་སྒྲོལ་བའི་སངས་རྒྱས་མང་པོ་མཐོང་གསུངས། ྋ སློབ་དཔོན་ངོ་མཚར་ཆེ་ཅི་ཙམ་གཟིགས་ཞུས་པས། རྟོགས་པས་རང་དོན་ཕུལ་དུ་ཕྱིན། ཐུགས་རྗེ་གཞན་དོན་ཤུགས་ལས་འབྱུང་། རང་འདོད་ཟད་དེ་ཅི་བྱེད་གཞན་དོན་དུ་བྱེད་པ། སངས་རྒྱས་ཀྱི་བོན་ཕྱིན་ཅི་མ་ལོག་པས་འགྲོ་བ་མཐར་ཕྱིན་ལམ་ལ་བཀོད་པ། འབྲེལ་ཚད་དོན་དང་ལྡན་པའི་སློབ་དཔོན་མང་པོ་མཐོང་གསུངས། ྋ སྟོན་པ་ངོ་མཚར་ཆེ་བ། ཚིག་ལ་མཁས་པ་དོན་ལ་དྲིལ་བ། སྒྲ་དོན་གཉིས་མེད་དུ་ཉམས་སུ་མྱོང་བ། མ་དག་པ་སོ་སོར་སྐྱེ་བོ་ཐམས་ཅད་དག་པ་སངས་རྒྱས་ཀྱི་སར་འདྲེན་པར་བྱེད་པ། གདམས་ངག་ཆ་ལག་ཚང་བ་མི་ནོར་བར་སྟོན་པ་མང་པོ་མཐོང་གསུངས། ྋ མཁས་པ་ངོ་མཚར་ཆེ་བ་ཐ་སྙད་ཀྱི་ཚིག་ལ་མ་རྨོངས་པ། བོན་ཉིད་ཀྱི་དོན་ཉམས་སུ་མྱོང་བ། སྒྲོ་འདོགས་སེམས་སུ་ཆོད་པ། རྒྱལ་བ་གཤེན་རབ་བྱོན་ཡང་ངོ་མི་གནོང་བ། སྨྲ་བའི་སེང་གེ་བྱོན་ཡང་ཉམས་མི་ང་བ། དབང་ཕྱུག་ཆེན་པོ་བྱོན་ཡང་གྲུབ་མཐའ་མི་འཆོར་བ། གཅིག་ཤེས་ཀུན་ལ་མཁས་པ་མང་པོ་མཐོང་། རྟོགས་ལྡན་ངོ་མཚར་ཆེ་བ། ལྟ་བ་གདེང་དང་ལྡན་པས་འཁོར་འདས་སེམས་སུ་ཤེས་པ། ཀུན་རྫོབ་ཀྱི་རྫུན་ཁུང་རྡིབ་པ། སྟོང་བས་རྟག་མཐའ་སེལ་བ། སྙིང་རྗེས་ཆད་མཐའ་སེལ་བ། ཟུང་འཇུག་དབུ་མ་ཆེན་པོའི་དོན་ཉམས་སུ་མྱོང་བ། བདུད་བཞི་ལ་ཉམ་མི་ང་བའི་རྟོགས་ལྡན་མང་པོ་མཐོང་གསུངས། ྋ གྲུབ་ཐོབ་ངོ་མཚར་ཆེ་བ་མཆོག་གི་དངོས་གྲུབ་སྟོང་ཉིད་སྙིང་རྗེའི་རྩལ་རྫོགས་པ། ཐུན་མོང་གི་དངོས་གྲུབ་སྣང་སྲིད་བྲན་དུ་འཁོར་བ། རྣལ་འབྱོར་བའི་སྟོབས་ཀྱིས་ཕ་རོལ་སུན་འབྱིན་པ། བདེན་པའི་སྟོབས་ཀྱིས་བརྗོད་པ་ཙམ་གྱིས་དུཿ ཁ་ཞི་ནུས་པ། སེམས་ཅན་བདེ་བ་ལ་བཀོད་ནུས་པ། རྒྱ་མཚོ་སྐེམ་ནུས་པ། རི་རབ་བསྙིལ་ནུས་པ། དུས་གཅིག་ལ་སྤྲུལ་བ་བྱེ་བ་བརྒྱ་ཕྲག་འགྱེད་ནུས་པའི་གྲུབ་ཐོབ་མང་པོ་མཐོང་གསུངས། ྋ རྣལ་འབྱོར་ངོ་མཚར་ཆེ་བ། འདུག་ས་དུར་ཁྲོད་ནགས་ཁྲོད་དུ་འདུག་པ། རྟོགས་པ་མཁའ་ལྟར་དག་པ། ཐབས་ཁྱད་པར་འཕགས་པ། ལྟད་མོ་སེམས་ལ་ལྟ་བ། སྐྱེ་མེད་དུ་ཐག་ཆོད་པ། འགག་མེད་དུ་རྩལ་རྫོགས་པ། གཉིས་མེད་དུ་ལ་བཟླ་བ། ཉམས་དབྱངས་མགུར་མ་རྒྱུན་ལེན་པ། སེམས་དང་བོན་ཉིད་འབྱོར་བའི་རྣལ་འབྱོར་བ་མང་པོ་མཐོང་གསུངས། སྒོམ་ཆེན་ངོ་མཚར་ཆེ་བ། ཚུལ་རྒྱལ་བ་གཤེན་རབ་ཀྱི་ཚུལ་འཛིན་པ། ཉམས་སུ་ཚད་མེད་འོད་ལྡན་གྱི་གདམས་ངག་ལེན་པ། འདུག་ས་གཡའ་རི་དང་གངས་རི་ལ་བྱེད་པ། ཟས་སུ་ཟག་མེད་ཀྱི་བདུད་རྩི་ཟ་བ། གྲོགས་སུ་རང་རིག་ཡེ་ཤེས་བསྟེན་པ། ཉམས་སུ་བློ་བྲལ་ལེན་པ། དགེ་བ་སེམས་ཅན་དོན་དུ་བསྔོ་བ། དུས་རྟག་ཏུ་ཟག་པ་མེད་པའི་ཏིང་འཛིན་བོན་ཉིད་ལ་མཉམ་པར་འཇོག་ནུས་པའི་སྒོམ་ཆེན་མང་པོ་མཐོང་གསུངས། ྋ ཞིག་པོ་ངོ་མཚར་ཆེ་བ། ནང་དུ་འཁྲུལ་བ་ཞིག་པ། ཕྱི་རུ་བོན་བརྒྱད་ཞིག་པ། བར་དུ་བྱར་མེད་རྟོགས་པ་ལོ་ཀའི་བྱ་བ་མི་བྱེད་པ། སྨྲ་བསམ་བརྗོད་མེད་རྟོགས་པ། ཡིན་མིན་གྱི་རྩིས་གདབ་མི་གཏོང་བ། གཟའ་གཏད་ཐམས་ཅད་དང་བྲལ་བ། ངོ་ཚ་དང་ཚུལ་འཆོས་མི་ཤེས་པ། ཐམས་ཅད་སྟོང་ཉིད་དུ་ཤེས་པ། རྐྱེན་ངན་གྱིས་མི་ཚུགས་པ། གནས་མི་གདམ་པ། གར་བསྡད་ཀྱང་གཞལ་ཡས་ཁང་དུ་རྟོགས་པ། གྲོགས་མི་གདམ་པ་འགྲོགས་ཚད་ལྷ་སྐུ་རུ་མཐོང་བ། ཟས་མི་གདམ་པ་ཟས་ཚད་བདུད་རྩི་རུ་ཤེས་པ། ཅི་བྱས་བོན་སྐུ་རུ་ཤེས་པ། སྤྱོད་ལམ་ལ་ངེས་པ་མེད་པ། མཚན་མའི་བོན་ཐམས་ཅད་སེམས་ཉིད་ཀྱི་སྟེང་དུ་ཞིག་པས་ཞིག་པོ་མང་པོ་མཐོང་གསུངས། ྋ དྲང་སྲོང་ངོ་མཚར་ཆེ་བ། རྒྱལ་བ་གཤེན་རབ་ཀྱི་སྲས་པོ། སངས་རྒྱས་བསྟན་པའི་རྒྱལ་མཚན། ཐར་བ་བྱང་ཆུབ་སྒྲུབ་པའི་དམིགས་རྟེན། འགྲོ་བས་བསོད་ནམས་བསགས་པའི་ཞིང་ས། སྡོམ་པ་གསུམ་གྱི་རྒྱན་གྱིས་བརྒྱན་པ། ལྟ་བ་རྣལ་འབྱོར་བ་སྙོག་པ། སྤྱོད་པ་དགེ་དྲང་གཉིས་སྙོག་པ། ཕན་སེམས་གཡུང་དྲུང་སེམས་དཔའ་དང་མཐུན་པ། ཡོན་ཏན་སངས་རྒྱས་དང་མཉམ་པ། སངས་རྒྱས་བསྟན་པའི་བྱ་བ་བྱེད་པའི་དྲང་སྲོང་མང་པོ་མཐོང་གསུངས། ྋ གཙང་གཙུག་ངོ་མཚར་ཆེ་བ། སངས་རྒྱས་ཀྱི་བཀའ་སྒྲུབ་པ། མི་དགེ་བཅུ་ཕྱིར་དོར་བ། དགེ་བ་བཅུ་སངས་རྒྱས་ཀྱི་ཚུལ་བཞིན་སྒྲུབ་པ། ཕ་ཡུལ་རྒྱབ་ཏུ་བོར་བ། དགོན་པ་དང་མི་འབྲལ་བ། བླ་མ་གཙུག་ཏུ་ཁུར་བ། གདམས་ངག་བདུད་རྩི་བཞིན་བསྟེན་པ། ཉོན་མོངས་དགྲ་ལྟར་འཛེམ་པ། སྡོམ་པ་མིག་འབྲས་བཞིན་བསྲུང་བ། ཉིན་མཚན་མེད་པར་བོན་ལ་བློ་སྦྱང་བ། དགེ་བ་ཚུལ་བཞིན་བྱེད་པའི་གཙང་གཙུག་མང་པོ་མཐོང་གསུངས། ྋ དགེ་བསྙེན་ངོ་མཚར་ཆེ་བ། ཆ་ལུགས་སྐྱེ་བོ་སེམས་དཀར་པོ། རྣམ་སྨིན་ལ་བཙུན་པ་ལས་འཛེམ་ཤེས་པ། དགེ་བར་འགྱུར་ཚད་སྤེལ་བ། སྡིག་པར་འགྱུར་ཚད་སྤོང་བ། ལུས་ཕྱག་དང་སྐོར་བ་ལ་བརྩོན་པ། ངག་འདོན་པ་དང་བཟླས་བརྗོད་བྱེད་པ། སེམས་ལྷའི་ཏིང་འཛིན་བསྒོམ་པ། རྟེན་དམན་པས་ང་རྒྱལ་ཆུང་བ། སྲུང་སྡོམ་ཉུང་བས་ཉེས་ལྟུང་གིས་མ་གོས་པ། བྱ་བ་ཐམས་ཅད་བླ་མ་སྤྱི་བོར་ཁུར་ནས་གཡོག་བྱེད་པ། སངས་རྒྱས་ཀྱི་འཁོར་རྣམ་བཞིའི་ཡང་འཁོར་དུ་གྱུར་བའི་དགེ་བསྙེན་མང་མཐོངས་གསུངས། ྋ སྒོམ་པ་ངོ་མཚར་ཆེ་བ། བླ་མ་སངས་རྒྱས་སུ་མཐོང་བ། གདམས་ངག་བདུད་རྩི་རུ་མཐོང་བ། འཁོར་བ་ལ་དུཿ ཁ་རུ་མཐོང་བ། དད་གུས་ཆེ་བས་བྱིན་རླབས་འཇུག་མྱུར་བ། ང་རྒྱལ་ཆུང་བས་ཡོན་ཏན་སྐྱེ་མྱུར་བ། ཅི་ཡོད་ལྷ་ཆོས་ཀྱི་ཕྱོགས་སུ་གཏོང་བ། གྱོང་ལྟོ་གོས་ལ་སྐུར་བ། ཐམས་ཅད་གཙུག་ཏུ་ཁུར་བ། སྐྱེ་བ་དམའ་ཡང་དགོས་པ་མཐོ་བ། སྒྲུབ་པ་ལ་རེམ་པ། ངེས་ཤེས་ཆེ་བ། སྣང་བ་དག་པ། ལུས་སྤྲང་བོ་ལ་སངས་རྒྱས་ཀྱི་དགོངས་པ་ཡོད་པ། དུགས་པོའི་འོག་ན་སྟག་ཉལ་བ་མང་པོ་མཐོང་གསུངས། ྋ སྐྱེ་བོ་ངོ་མཚར་ཆེ་བ། སྐྱེ་བ་སྔོན་མ་ལ་ཚུལ་ཁྲིམས་བསྲུངས་པས་མི་ལུས་ཐོབ། སྦྱིན་པ་བཏང་བས་འབྱོར་བ་དང་ལྡན། བསོད་ནམས་བསགས་པས་བོན་ལ་མོས་པ། དད་པ་དང་སྙིང་རྗེ་ཆེ་བ། ངོ་ཚ་ཆེ་བ། རང་ཟས་ཟ་བ། རང་གོས་གོན་པ། ཡར་བླ་མ་བདེར་བཤགས་ལ་ཞབས་ཏོག་བྱེད་པ། མར་སྤྲང་ལོང་ལ་སྦྱིན་པ་གཏོང་བ། འབྱོར་ཚད་དགེ་ཕྱོགས་སུ་གཏོང་བ། སྡིག་པ་མི་བྱེད་པ། དགེ་སྦྱོར་ལ་བརྩོན་པ། བཤེས་གཉེན་དམ་པས་ཞབས་ནས་འདེགས་པ། སངས་རྒྱས་ཀྱི་བཀའ་བྲིས་ཀློག་འདོན་གསུམ་བྱེད་པ། བཙུན་པ་བས་ཀྱང་དོན་ལ་འབྱོར་བའི་སྐྱེ་བོ་མང་པོ་ |
<< ༄༅། །ཞང་བོད་ལོ་རྒྱུས་ཏི་སེའི་འོད། ༼ངོ་སྤྲོད་ཀྱི་སྐོར༽༄༅།།ནམ་མཁའི་ནོར་བུའི་གསུང་རྩོམ་ཕྱོགས་བསྒྲིགས།༼ངོ་སྤྲོད་ཀྱི་སྐོར༽ >>
དཔྱད་གཏམ་ཡོངས་ལ་གཟིགས་པ།
