༄༅། །ས་ལམ་དོན་གསལ་རིན་ཆེན་སྒྲོན་མེ་ཞེས་བྱ་བ་བཞུགས་སོ། ༼ལྟ་ཀློག་གི་སྐོར༽
| མཐོང་གསུངས། ྋ ཡང་ཞུས་པ་བླ་མ་ལགས་ལོ་ཀའི་ཁམས་ན་ངོ་མཚར་ཆུང་བ་ཅི་འདྲ་གཟིགས་ཞུས་པས། བླ་མའི་ཞལ་ནས། བསྐལ་བ་སྙིགས་མ་ལ་ངོ་མཚར་ཆུང་བའང་མང་དུ་གདའ་གསུངས། ལྷག་པར་འགྲོ་དོན་བྱེད་པ་ལ་ངོ་མཚར་ཆུང་བ། རང་ལ་དགོས་པའི་རྟོགས་པ་མེད་པ། གཞན་ལ་ཕན་པའི་ཐུགས་རྗེ་མེད་པ། བྱར་མེད་ཀྱི་དོན་ལ་གོམས་པ་མེད་པ། བྱས་པའི་བོན་ཐམས་ཅད་རང་དོན་དུ་བྱེད་པ། བོན་བརྒྱད་ཀྱིས་མགོ་གཡོག་ནས་རྒྱལ་ཁམས་ཀྱི་དད་ཟས་ཟ་བ། རང་ལ་ཡོན་ཏན་མེད་པར་གཞན་གྱི་སློབ་དཔོན་བྱེད་པ། རང་འཆི་བ་ལ་མི་འཇིགས་པ་གཞན་ལ་མི་རྟག་པ་བཤད་པ། ཁོ་རང་ལ་ཉམས་མྱོང་བག་ཙམ་མེད་པར་བླ་མར་བཏགས་པ། ལུས་ལ་སྣལ་མའི་རྒྱན་གྱིས་བརྒྱན་པ། སེམས་རང་རྒྱུད་དུ་ལུས་པ། མིས་སངས་རྒྱས་ཡིན་སྐད་གདའ་སྟེ། བསམ་ན་བློ་མི་བདེ་བར། ཤི་ཙམ་ན་གར་འགྲོ་ཆ་མེད་པ། འཕགས་པའི་ཐུགས་ཀྱིས་ཁྲེལ་བའི་འགྲོ་དོན་བྱེད་མི་ཚོ་ངོ་མཚར་ཆུང་བ་གདའ་གསུངས། ྋ མཁས་པ་ལ་ངོ་མཚར་ཆུང་བ་ནི། བོན་ཉིད་དོན་མ་རིག་པ། སྒྲ་དང་གཏན་ཚིགས་མི་ཤེས་པ། ལས་རྒྱུ་འབྲས་མ་གོ་བ། ཚིག་སྟོང་བ་འགའ་རེ་ཤེས་ཀྱང་། བཤད་ན་ཉན་མཁན་མེད་པ། དུག་ལྔ་ཐ་མ་བས་ཀྱང་རགས་པ། རང་གི་རྒྱུད་རེངས་པ། གཞན་ལ་ཡིད་མི་ཆེས་པ། མུ་སྟེགས་ཚར་མི་ཆོད་པ། ཡིན་པའི་ཚིག་གཅིག་བྱུང་ཡང་། མིན་ཟེར་ནས་སྐྱོན་འགེལ་བ། དེ་ནི་རྣམ་སྨིན་གྱི་མི་སྟོང་མདོག་སྐྱ། སྐབས་སྐབས་སུ་རང་ལ་ཐེ་ཚོམ་ཟ་བ། ཐ་སྙད་ཀྱི་ཚིག་པོ་ཏི་རེ་ཙམ་ཤེས་པ་ལ། མཁས་པ་ཡིན་ཟེར་ནས་ང་རྒྱལ་བྱེད་པ་གདའསྟེ། དེ་འདྲས་མཁས་པའི་གོ་མི་ཆོད་གསུངས། ྋ རྟོགས་ན་ལྡན་ངོ་མཚར་ཆུང་བ། སྟོང་ཉིད་ལ་གོ་བ་ཙམ་ནི་ཡོད། རྒྱུད་ལ་ནི་མ་སྐྱེས། ཐབས་ཀྱི་བོན་རྣམས་ནི་ཁྱད་དུ་གསོད། ཁ་ལྟ་ནི་ཆེ། གཏད་སོ་ནི་མེད། སྒོམ་ཆེན་པ་དང་རི་ཁྲོད་པ་ལ་སེམས་གྲོལ་ཚུལ་དགོས་པ་ཡིན། སྡུག་སྒུར་བྱས་པའི་ཁ་ན་མེད་ཟེར། ཁ་ལྟ་ལ་ཤོར་བ། དུག་ལྔ་ཡེ་ཤེས་ཡིན་པར་སྐད་ཟེར་། དྲེད་པོ་དྲེད་ནས་དགེ་སྦྱོར་ནི་མི་བྱེད། བྱར་མེད་ཀྱི་དོན་ནི་མ་གོ་འཆི་བ་ལ་ནི་མཚེར། རྐྱེན་ངན་ལ་ནི་འཇིགས། འདོད་ཡོན་ལ་ནི་ཆགས། ཁ་ནས་ཐམས་ཅད་སྟོང་བར་རྟོགས་པ་སྐད་ཟེར་བར་གདའ་སྟེ། གོང་མ་རྣམས་ཀྱི་ཞེ་ཁྲེལ་ནི་འགྲོ་གསུངས། ྋ གྲུབ་ཐོབ་ངོ་མཚར་ཆུང་བ། མཆོག་གི་དོན་མ་གྲུབ། ཐུན་མོང་གི་སི་ཏུ་མ་བསྙེམས་པ། ལོ་ཀའི་ལྷ་འདྲེ་བསྒྲུབས་ནས། མི་སྙིང་འགུལ་དུ་འཇུག ཡེ་ཤེས་དྲག་སྔགས་བསྒྲུབས་ནས་མངོན་ཤེས་བཤད་པ། མོ་རྩིས་བསླབས་ནས་ལྷ་མཐོང་འདྲེ་མཐོང་ཟེར་བ། དབེན་གནས་སུ་ཞག་གཅིག་མི་ཚུགས་པར་ལོ་མང་པོ་བསྡད་པ་སྐད་ཟེར་བ། གྲུབ་རྟགས་སྟོན་རྒྱུ་མེད་པར་གྲུབ་མཐའ་ལ་མེད་པའི་རྟགས་འདོན་པ། མགོ་སྐོར་བ་བྱུང་ན་བླ་མའི་མགོ་ཡང་བསྐོར་བ། བསླུ་བ་བྱུང་ན་ཡོན་བདག་ཕོ་མོ་ཡང་བསླུ་བ། ཉོ་མཁན་བྱུང་ན་ལྷ་རྟེན་ཡང་བཙོང་ནས་ཟ་བ། ཟོག་པོའི་གྲུབ་ཐོབ་མང་པོ་་གདའ་སྟེ། ལས་ལོག་པར་ཤོར་དོགས་གདའ་གསུངས། ྋ རྣལ་འབྱོར་ངོ་མཚར་ཆུང་བ། བླ་མའི་ཐུགས་དཀྲུག་པ། གྲྭ་ས་རུ་མི་ཚུགས་པ། མི་ཆོས་པའི་ནོར་ལ་རྐུ་བ། དད་པ་ཡལ་བ། སྙིང་རྗེ་མེད་པ། བོན་ལ་ཡིད་མི་ཆེས་པ། མི་ནག་གི་མགོ་སྐོར་བ། རྒྱལ་ཁམས་རྫུན་གྱིས་འགེང་བ། ལྟོ་ཕྱིར་བླ་མའི་གདམས་ངག་མགུར་དུ་ལེན་ཅིང་ངས་ཡིན་སྐད་ཟེར་བ། རྨོངས་པ་མཐོང་ན་འུར་སྡིགས་བྱེད་པ། མཁས་པ་མཐོང་ན་བྱོལ་ནས་འགྲོ་བ། ཚེ་ཕྱི་མ་ལ་དགོས་པའི་ལྷ་ཆོས་མེད། འདི་ལ་དགོས་པའི་ལྟོ་གོས་མེད། སེམས་འགྱོད་པ་དང་བཅས་ནས་སྲང་ལམ་དུ་ཤི་བ། དེ་འདྲ་བའི་རྣལ་འབྱོར་བ་ཐ་མ་བས་མེད་པར་གདའ་གསུངས། ྋ འཁྲུལ་ཞིག་ངོ་མཚར་ཆུང་བ། ངོ་ཚ་ཞིག་པ་གཅེར་བུ་ལ་དགའ་བ། དོན་མ་རིག་པ་ཕཊཿསྒྲ་འདེབས་པར་རེམ་པ། བོན་མི་ཤེས་པར་སྟོང་སྐད་འདོན་པར་རེམ་པ། ལས་རྒྱུ་འབྲས་མ་གོ་བ། སྤྱོད་ལོག་བྱེད་པ། འཇིག་རྟེན་པ་མོས་སུ་རེ་ནས་ཐོ་ཅོ་བྱེད་པ། འདོད་ཆགས་བྱ་བས་ཆེ། བུད་མེད་ཁྱི་བས་མང་པ། སེམས་མ་ཞིག་པར་ལུས་ཞིག་པ། རྒྱལ་ཁམས་རྫུན་གྱིས་འགེང་བ། ཉོན་མོངས་མ་ཞིག་པར་སྤྱོད་ལམ་ཞིག་པ། འཁྲུལ་བ་མ་ཞིག་པར་ཕྱིའི་ཚུལ་ཞིག་པ། གོང་མ་རྣམས་ཀྱི་ཞེ་ཁྲེལ་བས། འདིའང་འཁོར་བར་འཁྱམས་དགོས་འདུག་གསུངས། ྋ སྒོམ་ཆེན་ངོ་མཚར་ཆུང་བ། ཤེས་རབ་ཆུང་བས་ཚིག་ལ་མི་དགའ་བ། བསོད་ནམས་མ་བསགས་པས་དོན་མ་རྟོགས་པ། གཞན་ལ་ཡིད་མི་ཆེས་པ། རང་ལ་གོ་བ་ནི་མེད། ཐོས་པ་ཆུང་བས་སྒོམ་མི་ཤེས་པ། བོན་སྐུ་སྒོམ་པས་རྣམ་རྟོག་ལངས། རི་ལ་བསྡད་པས་ང་རྒྱལ་སྐྱེས། འདོད་ནི་དྲན་མེད་འདོད། སྐྱེས་ནི་ཞི་གནས་ཀྱང་མ་སྐྱེས། སྐྱེས་ཀྱང་ཉམས་ལ་ཆགས་ནས་གོལ་སར་ལྟུང་། དྲན་རིག་ནི་བཀག་ན་ནི་མ་ཁེག རང་གྲོལ་ནི་མ་ཤེས། སྟན་ཐོག་ཏུ་དུག་གསུམ་བསགས། གཞན་ལ་མ་སྒོམ་པར་སངས་མི་རྒྱས་ཟེར། དེ་འདྲའི་སྒོམ་ཆེན་པས་ལོ་བརྒྱར་བསྒོམས་ཀྱང་ས་མི་ཆོད་གསུངས། ྋ དྲང་སྲོང་ངོ་མཚར་ཆུང་བ། ཆ་ལུགས་སེར་མོ་བ་སེམས་ནག་པོ་སྤྱོད་པ་ཁྲ་བོ་རང་རྒྱུད་སྐམ་པོ། ཟ་མདོ་རེ་ཡང་མི་འདོན་པ། ལྟད་མོར་དགའ་བ། ཁེ་ཡོད་ན་ཚོང་དུས་ལན་དགུ་སྐོར་བ། ཡོན་དན་མེད་པར་གྲལ་མཐོ་བ། བླ་མའི་ཞབས་འདྲེན་བསྟན་པའི་བླ་འཚོང་བ། བླ་མ་བས་ཀྱང་མི་ཆོས་པ་ལ་རྩི་བ། གཙོ་བོ་ལྟོ་གོས་བསྒྲུབ་པ། བོན་ཁལ་གཅིག་བས་ནོར་ཕུལ་གང་གིས་དགའ་བར་བྱེད་པའི་དྲང་སྲོང་མང་པོ་མཐོང་གསུངས། ྋ གཙང་གཙུག་ངོ་མཚར་ཆུང་བ། གྲྭ་སར་ཕྱིན་ནས་སྡོམ་པ་བླངས། སྐྲ་བཞར་མིང་སྤོར། བོན་ཡིད་ལ་མི་བྱེད་ནོར་ཡིད་ལ་བྱེད། བླ་མ་སློབ་དཔོན་ཡིད་ལ་མི་བྱེད་པ་ཕ་མ་ཉེ་འབྲེལ་ཡིད་ལ་བྱེད། བསོད་སྙོམས་བྱེད་ན་རྐུ་ཞིང་འཕྲོག སེར་དམག་བྱེད་ན་སྣ་ལ་རྒྱུག གྲོང་དུ་སྡོད་ན་བུད་མེད་འདེད། གདམ་ངག་བས་འདོད་ཆགས་ལ་རྩི་བ། བླ་བོ་གཏམ་ན་ཉོན་མོངས་གླེང་། ཞེ་སྡང་ཐ་མལ་བས་ཀྱང་ཆེ་བ། གཙང་གཙུག་གམ་དགེ་བསྙེན་ཐ་མ་བས་ཀྱང་ངན་འགྲོར་འགྲོ་བར་མགྱོགས་གསུངས། ྋ སྒོམ་མ་ངོ་མཚར་ཆུང་བ། ཕོག་པའི་སྡོམ་པ་དམ་ཚིག་མི་བསྲུང་། བཞག་པའི་དགོན་པར་མི་སྡོད། གཞི་གྲོང་ཡུལ་དུ་བཅའ། ཕྱོགས་མི་ཆོས་པ་ལ་བྱེད། མི་ཁྱིའི་གཡོག་བྱེད་པ། ལས་སུ་འཐག་བྱེད་ཡོས་འཐག་ཕྲེང་བ་གདངས་ལ་འགེལ། བོན་ཡིད་ལ་མི་འགྱུ་བ། བསམ་བློ་ཉོན་མོངས་པ་ལ་གཏོང་བ། དགེ་བའི་ཀེག་ཤིང་བྱེད་པ་། གཡར་ངོ་བླ་མ་ལ་བྱེད། སྐྱོན་མཆེད་གྲོགས་ལ་འགེལ། ཟས་བྱི་ཕོ་ལ་སྟེར། འབུལ་བ་ཟོག་པོ་ལ་བྱེད། བོད་ལ་ཁྲིམས་མེད་པས་དེ་འདྲ་ལ་སྒོམ་མ་ཟེར་བ་གདའ་གསུངས། ྋ མི་སྐྱེ་བོ་ངོ་མཚར་ཆུང་བ། མི་ལུས་ཐོབ་ནས་དགེ་བ་མི་དྲན། མིག་ཅེར་རེ་འདུག་ཀྱང་ལོང་བས་སྐྱེ་ཤི་མི་མཐོང་། རྣ་བ་གྲོང་ངེ་འདུག་ཀྱང་འོན་པས་གདམ་ངག་མི་གོ སྡིག་པ་ནི་ནུས་ཚད་བྱེད་པ། དགེ་བ་ལ་ཡིད་མི་འཇུག་པ། ཚེ་ཕྱི་མ་བྱ་བ་ག་ལ་ཡོད་ཤི་བའི་ཡུལ་ན་སུ་ཕྱི་ནས་འོངས། བོན་མི་བདེན་རྫུན་ཡིན་ཟེར། འདི་ལ་སྐྱིད་ན་ཕྱི་མར་གང་ལྟར་སོང་ཡང་སོང་ཁ་རུ་བཟའ་བཏུང་བྱུང་ན་དམྱལ་བ་ད་ལྟ་རང་ལྟུང་ན་ཡང་ལྟུང་ཟེར། ངོ་ཚ་ཆུང་བ་ཁྲེལ་མེད་དེ་འདྲ་མང་ |
<< ༄༅། །ཞང་བོད་ལོ་རྒྱུས་ཏི་སེའི་འོད། ༼ངོ་སྤྲོད་ཀྱི་སྐོར༽༄༅།།ནམ་མཁའི་ནོར་བུའི་གསུང་རྩོམ་ཕྱོགས་བསྒྲིགས།༼ངོ་སྤྲོད་ཀྱི་སྐོར༽ >>
དཔྱད་གཏམ་ཡོངས་ལ་གཟིགས་པ།
