༄༅། །བསྟན་འབྱུང་རིག་པའི་ཤན་འབྱེད་ནོར་བུ་ཀེ་ཏ་ཀའི་དོ་ཤལ་ཞེས་བྱ་བ་བཞུགས།

སྒོ་གསུམ་ལང་ཚོ་ཉོན་མོངས་ཆུས་མྱོས་ནས།།
བག་མེད་དུག་ལྔའི་སྣ་ཞགས་རིང་དུ་བརྐྱང༌།།
ཕན་བདེའི་པད་རྩ་ལག་པས་འཇོམས་པའི་སྐྱོན།།
གང་མཆིས་མི་ཡི་གདོང་ལྔ་ཡོངས་ལ་བཟོད།།

ངོ་མཚར་ལུང་རིག་ལྷ་ཡི་གཞལ་མེད་ཁང༌།།
སྲིད་འབྱོར་མ་ལུས་སྤུངས་འདྲའི་ལེགས་བཤད་འདིས།།
བློ་གྲོས་འདོད་རྒུའི་དབུལ་བའི་ལེགས་བྲིས་རྣམས།།
ཟད་མེད་རིན་ཆེན་འཚོ་བས་ཅིས་མི་རྒྱགས།།
ཞེས་པ་ནི་བར་སྐབས་ཀྱི་ངལ་གསོའོ།།
    ད་ནི་བསྟན་པ་བཅོས་དང་མ་བཅོས་ཀྱི་དབྱེ་བ་ནི། མཛོད་ལས། བཀའ་ནི་ཚད་མར་འཛིན་པ་ལ།། མ་བཅོས་མ་བསླད་མཚན་ཉིད་འཛིན།། ཞེས་གསུངས་པ་ལྟར་སྔོན་ཚེ་སྟོན་པ་གཤེན་རབ་ཀྱི་བཀའ་ལ་བདུད་ཀྱི་བསླུ་ཚིག་དང༌། སྲིན་གྱི་ལོག་ཚིག་སོགས་ཀྱིས་འཆོས་ཚུལ་དུ་མར་བྱས་ཀྱང་སྐྱོན་དུ་མ་ཞུགས་པ་ནི་སངས་རྒྱས་ཀྱི་ཕྲིན་ལས་ཡིན་ལ། དེ་ནས་གྲི་གུམ་བཙད་པོའི་དུས་གསང་སྔགས་ཀྱི་བོན་ལ་བཅོས་བསླད་མང་དུ་སོང་བས་བྱིན་རླབས་ཆ་གཅིག་དེ་ནས་བྲི་ཟེར། དེ་ཡང་བཅོས་སྔ་བ་ཐུ་མི་སམ་བྷོ་ཊས་བོན་གྱི་ཡི་གེ་བཅོས་ཏེ་སྔོན་ཆད་བོད་ལ་ཡི་གེ་མེད་ཟེར་བའི་སྐུར་བ་བཏབ། ཀླུ་འབུམ་ནང་ནས་གཟུངས་ཆེན་དང་གྲྭ་ལྔ་བཅོས་པར་བཤད། ཕྱིས་བོན་ཆོས་དར་ནུབ་ཀྱི་སྐབས་སུ་བི་མ་ལ་མི་ཏྲ་དང༌། པདྨ་སམ་བྷ་བས་རྗོགས་ཆེན་བསྒྲགས་པ་སྐོར་གསུམ་ཆོས་སུ་བསྒྱུར། དེ་ལ་བརྟེན་ནས་གྲུབ་པ་ཐོབ་པ་མང་དུ་བྱུང༌། མངོན་པར་རོལ་པའི་རྒྱུད་སྡེ་གསང་འདུས་དང་བདེ་མཆོག་སོགས་སུ་བཅོས། ཞི་ཁྲོ་དང་ཕུར་པ་དག་ཀྱང་ལྷ་རྐང་འདྲ་བས་བཅོས་པར་མངོན། ཀོང་ཙེས་མཛད་པའི་མོ་རྩིས་གཏོ་གསུམ་གྱི་སྐོར་ཡང་མང་དུ་བཅོས། བཻ་རོ་ཙ་ནས་སྨན་འབུམ་དཀར་ནག་ཁྲ་གསུམ་བཅོས་ཏེ་རྒྱུད་བཞིར་བསྒྱུར། དྲང་སྲོང་དང༌། ཅུར་ནིས། ཏྲེས་སམ་སོགས་ནི་བཀའ་རྟགས་སུ་བཞག་ཟེར། ལོ་ཙཱ་བ་སྐ་ཅོག་གཉིས་ཀྱིས་རིག་པ་རྩེ་འབུམ་བསྒྱུར་ཡང་རྫོགས་དུམ་ཞང་སྐད་མ་ཁྲོལ་བས་ཁྱུང་འཕགས་ཀྱིས་བསྒྱུར་རོགས་བྱས་ཀྱང་ཟེར། དོན་དུ་སྟོང་ཕྲག་བརྒྱ་པ་ལ་རྒྱ་དཔེ་མེད་པས་བོན་འཆོས་པའི་རྟགས་སོ།། བསྟན་པ་ཕྱི་དར་གྱི་ཁོངས་འདིར་རྗེ་འབྲུག་དང༌། གཉེན་སྟོན་སོགས་ཀྱི་བོན་རྒྱུད་མང་པོ་ཆོས་སུ་སོང་ལ། ཁུ་ཚ་དང༌། ཁྱུང་རྒོད། བོན་ཞིག་སོགས་ལ་ནི་བོན་ཆོས་གཉིས་ཀྱི་གཏེར་ཡོད་པ་ཤེས་དགོས་སོ།། བླ་མ་གཤེན་གྱིས་ལྷོ་གཏེར་ཐོན་པ་རྣམས། ཕྱིས་ཅོག་ལ་གཡུ་སྐྱིད་ཀྱིས་ཁམས་ཆེན་ལ་སྤྲོ་བསྡུ་བྱས། དེ་བཞིན་དུ་སློབ་མ་རྣམས་ཀྱིས་ཞི་བ་ལ་ཞི་ཆུང༌། ཁྲོ་བོ་ལ་ཁྲོ་ཆུང༌། རྣམ་དག་ལ་རྣམ་ཆུང་སོགས་བོན་ཐམས་ཅད་ཚོང་དུས་ཀྱི་འོ་མ་བཞིན་དུ་བསླད་པ་ལ། དབང་ལྡན་ཞུ་ཡས་ལེགས་པོས་བཅོས་བསླད་མ་མཛད་པའི་ཐུགས་རྗེས། རྨེའུ་སྟོན་སྒོམ་གཉིས་ཀྱིས་ཞུ་ཡི་གཏེར་དཔེ་ལ་གཏུགས་ནས་ཐེ་ཚོམ་གྱི་དག་གཤེར་བྱས་པས་དེང་དུས་བཀའ་ལྷོ་གཏེར་བྱིན་རླབས་མ་ཡལ་བར་སྤྱོད་རྒྱུ་ཡོད་པ་འདི་དེའི་བཀའ་དྲིན་ཡིན་འདུག་གོ།། གླང་སྟོན་བརྩོན་གྲུས་སེང་གེས་བདལ་འབུམ་དང་དྲི་མེད་འབུམ་གཉིས་ཀྱི་འགྲེས་ལ་སྤྲོ་བསྡུ་བྱས་ཀྱང་ཟེར། གྲུབ་ཐོབ་འོན་སྒོམ་ཕུག་པའི་ཕྱག་ཏུ་རྒྱུང་སྲུབ་བྲག་གི་གཏེར་འཕྲོར་གྱུར་པའི་ཤོག་སེར་འགའ་ཞིག་བྱུང་བ་རྣམས་དོན་ལ་གཏེར་ཡིན་ཡང་གྲུབ་ཐོབ་རང་གིས་ཐོན་པ་མིན་ཞེས་གྲགས། དམ་པ་རང་གྲོལ་གྱི་སྙན་བརྒྱུད་རྣམས་ཤར་པ་རྣལ་འབྱོར་ལ་བཀའ་བབ། ཕྱིས་ཤར་པ་རང་གི་སྙན་བརྒྱུད་ཡིན་རྒྱུར་མཛད་པའི་དྲི་མེད་མཆོག་བྱང་སོགས་ནི་དགོངས་པ་ཀློང་བརྡོལ་གྱི་ཚིག་ཡིན་