ཐེག་པའི་རིམ་པ་མངོན་དུ་བཤད་པའི་མདོ་རྒྱུད་ཅེས་བྱ་བ་བཞུགས་སོ། །༼ལྟ་ཀློག་གི་སྐོར།༽
༄༅། །ཞང་ཞུང་སྐད་དུ། རྐཐ།བྦརཱཀེཐདཱབཱཐྭེ། །ཐོ་ཡོ་དེ་ཅུ་ཤེལ་ཞི་ཏན་ཏྲ་ད་དོད་ཅི། །སང་སྐྲྀ་ཏའི་སྐད་དུ། །ཡ་མན་ཀྲ་མ་ཏི་སུ་ཏྲ་ན་མ། །བྲུ་ཤའི་སྐད་དུ། །ཧ་པང་རིལ་ཏི་ཏང་ཞེ་མ་ཧམ། །བོད་སྐད་དུ། །ཐེག་པའི་རིམ་པ་མངོན་དུ་བཤད་པའི་མདོ་རྒྱུད་ཅེས་བྱ་བ། །སྟོན་པ་ཀུན་ཏུ་བཟང་པོ་ལ་ཕྱག་འཚལ་ལོ། །༧ །འོག་མིན་བོན་ཉིད་དབྱིངས་ཀྱི་གནས་ཆེན་ན། །གཤེན་ལྷ་འོད་དཀར་སྟོན་མཆོག་བཞུགས་པ་དེས། །ཡེ་ཤེས་ཡོངས་སྤྲུལ་སྐུ་ཡི་འཁོར་རྣམས་ལ། །ཐེག་པ་རིམ་རྫོགས་བཤད་མདོ་བསྟན་པ་འདི། །དུས་བཞི་མཉམ་པ་ཉིད་ཀྱི་དུས་ན་བསྒྲགས། །མཚན་མ་སྒྲ་ཡི་གསུང་རྣམས་མི་མངའ་བར། །དགོངས་པ་དོན་རྫོགས་གསུང་གིས་འཇལ་བར་སྤྲད། །སྐབས་དང་པོའོ། ༧ །དེ་ལ་ཐེག་པ་རིམ་པ་མཐའ་དག་ཀུན། །བསྡུས་ཏེ་བཤད་ན་རྣམ་པ་གཉིས་སུ་འདུས། །ཕྱི་བ་མུ་སྟེགས་པ་དང་ནང་པ་གཤེན་རབས་པ། ༧ །མུ་སྟེགས་ལྟ་བ་བསྡུས་ན་རྣམ་པ་གཉིས། །སྔོན་བྱུང་སྟེང་གི་ལྷ་ཡུལ་གྲགས་པ་དང་། །རྗེས་འཇུག་འོག་ནི་མི་ཡུལ་གྲགས་པའོ། ༧ །སྔོན་བྱུང་སྟེང་དུ་གྲགས་པའི་ལོག་ལྟ་ནི། །ལྷ་བུ་དྲང་སྲོང་ཤེས་དགའ་རབ་ལྡན་དེས། །སེམས་ཅན་ཚེ་འཕོས་གཟུགས་མི་ལེན་པ་གཅིག །ཁོ་ཡི་མངོན་པར་ཤེས་པས་བརླག་མཐོང་སྟེ། །གཏན་གྲོགས་འཁོར་མོ་དེ་ལ་འདི་སྐད་སྨྲས། ༧ །ཀྱེ་གཏན་གྲོགས་བཟང་མོ་རྒྱལ་ཁྱེད་འཁོར་དང་བཅས། །མ་ཤི་བར་དུ་དགའ་དགུར་བརྩེ་མཛོད་ཅིག །ཤི་ནས་དེ་ཡི་སྤྱོད་ཡུལ་མ་ལགས་ཏེ། །ལུས་བརླགས་ཐལ་བ་བཞིན་དུ་སོང་བས་ན། །སླར་འཚོ་བ་ནི་ག་ལ་འགྱུར་ཏེ་དེ་ལ་ཡང་། །སེམས་དེ་ཐེར་ཟུག་མི་འགྱུར་ལུས་རྒྱུན་འཆད། །དེ་སྐད་ཟེར་བ་དེ་ལ་ལོག་པར་བཟུང་། ༧ །རྗེས་འཇུག་འོག་ཏུ་གྲགས་པའི་ལོག་ལྟ་ནི། མང་པོ་གཉིས་སུ་བསྡུས་པས་གཞན་དུ་ཞིབ་པར་བཤད། ༧ །ནང་པ་གཤེན་རབས་ཐེག་པ་བསྡུས་ན་གཉིས། །རྒྱུ་དང་འབྲས་བུ་གཉིས་སུ་བཤད་པ་ཡིན། ༧ །རྒྱུ་ཡི་ཐེག་པ་དེ་ལ་རྣམ་པ་གཉིས། །ཐེག་པ་ཆེན་པོ་དང་ནི་ཆུང་ངུན་ནོ། ༧ །འབྲས་བུའི་ཐེག་པ་ལ་ཡང་གཉིས་ཡིན་ཏེ། །ཕྱི་པ་དང་ནི་ནང་པ་གཉིས་སུ་བཤད། །དེ་ལ་ཕྱི་ནང་གསང་བའི་ཐེག་པ་གསུམ་ཞེས་བྱ། ༧ །ཐེག་པ་ཆུང་ངུན་ལ་ནི་རྣམ་པ་གཉིས། །ལྷ་མི་གཞན་བརྟེན་ཐེག་པ་དང་། རང་རྟོགས་གཤེན་རབས་ཐེག་པའོ། ༧ །ཐེག་པ་ཆེན་པོ་ལ་ཡང་རྣམ་པ་གཉིས། །ཐུགས་རྗེ་སེམས་དཔའི་ཐེག་པ་ཆེན་པོ་དང་། །གཡུང་དྲུང་སེམས་དཔའི་ཐེག་པ་སྤྲོས་མེད་དོ། ༧ །འབྲས་བུ་སྔགས་ཕྱིའི་ཐེག་པ་གཉིས་ཡིན་ཏེ། །བྱ་བ་གཙང་སྤྱོད་ཡེ་བོན་ཐེག་པ་དང་། །རྣམ་པ་ཀུན་ལྡན་མངོན་ཤེས་ཐེག་པའོ། ༧ །གསང་སྔགས་ནང་གི་ཐེག་པ་གསུམ་ཡིན་ཏེ། །དངོས་བསྐྱེད་ཐུགས་རྗེ་རོལ་བའི་ཐེག་པ་དང་། །ཤིན་ཏུ་དོན་ལྡན་ཀུན་རྫོགས་ཐེག་པ་དང་། །ཡེ་ནས་རྫོགས་ཆེན་ཡང་རྩེ་བླ་ན་མེད་པའོ། ༧ །དེ་ནས་ཐེག་པ་ཀུན་ལ་སྤྱི་དོན་བདུན་གྱིས་བསྟན། །རྟོགས་པའི་ལྟ་བ་དང་ནི་བསྲུང་བའི་དམ་ཚིག་དང་། །སྒོམ་པའི་རིམ་པ་དང་ནི་སྒྲུབ་པའི་ཐབས་དག་དང་། །སྤྱོད་པའི་ཕྲིན་ལས་དང་ནི་གྲུབ་པའི་འབྲས་བུ་དང་། །གོང་འོག་ཐེག་པའི་ལ་བསྒྲལ་ཤན་དབྱེའོ། །སྐབས་གཉིས་པའོ། ༧ །དེ་ལ་ལྷ་མི་གཞན་བརྟེན་ཐེག་པ་ནི། །དངོས་པོ་སྣ་ཚོགས་སྣང་བ་བདེན་པར་རྟོག །ཡུལ་སེམས་མི་འབྱེད་འདི་ཁ་ལྟ་བུར་ཤེས། ༧ །དགེ་སྤྱོད་བོན་སྤྱོད་དུས་བཟང་མ་ལུས་བསྲུང་། ༧ །གོང་མ་ལ་སེམས་རང་གི་བསྒྲུབ་བྱ་བསྒོམ། ༧ །ལུས་ངག་ཡིད་གསུམ་ངན་སྤང་བཟློག་སྟེ་བསྒྲུབ། ༧ །དགེ་བ་རང་གི་དོན་སྤྱོད་སྡིག་སྤྱོད་སྤང་། །སྡུག་བསྔལ་ལས་བསོག་འཇིག་རྟེན་འདི་ཡང་སྤྱོད། ༧ །ཁམས་གསུམ་གོང་འོག་འཕར་བ་དེ་ཡི་འབྲས། །ཐོབ་པར་ངེས་པ་ཡིན་ཏེ་དམན་པར་ལོག་སྤྱད་ན། །ངན་སོང་འོག་ནས་འོག་འཕར་དམྱལ་བའི་འབྲས། །ཐེག་པ་དེ་ལ་མ་ངེས་གཉིས་སུ་བཤད། །སྐབས་གསུམ་པའོ། ༧ །རང་རྟོགས་གཤེན་རབས་ཐེག་པའི་འདོད་གཞུང་ནི། །ཕྱི་ཡུལ་དངོས་པོ་མེད་དེ་ནང་ཤེས་རྒྱུ་དང་འབྲས། །རྟག་ཆད་གཉིས་གྲོལ་ཡུལ་སེམས་དོན་དམ་རྫོབ། ༧ །དགེ་སྤྱོད་མ་ཉམས་ཁྲིམས་ཆེན་དགུ་པོ་བསྲུང་། ༧ །དེ་དོན་འདུ་འཛི་ཀུན་སྤང་མཚན་མ་ཕྱི་ཡུལ་འགོག །ཡེ་ཤེས་ཆ་ཡིས་ཁམས་གསུམ་ཉོན་མོངས་འཇོམས། །རྟེན་འབྲེལ་དུར་ཁྲོད་རོ་ལ་ལྡོག་སྟེ་བལྟ། །དེ་ཡི་སྒོ་ནས་བོན་ཉིད་ཟབ་རྟོགས་བསྒྲུབ། ༧ །རང་རྟོགས་འབའ་ཞིག་རང་དོན་དེ་ཉིད་དུ། །རྫུ་འཕྲུལ་སྣ་འགའི་སྒོ་ནས་འགྲོ་དོན་ཤས་ཙམ་སྤྱོད། ༧ །རྫུ་འཕྲུལ་ཆེར་སྤྱོད་ཤེས་རབ་མགྱོགས་ཆེན་ཐོབ། ༧ །རྟོགས་སྤྱོད་སྒོམ་ལམ་ཀུན་གྱིས་ཁྱད་པར་འཕགས། །སྐབས་བཞི་བའོ། ༧ །ཐུགས་རྗེ་ཆེན་པོ་སེམས་དཔའི་ཐེག་པ་ནི། །གཏན་ཚིགས་ཆེན་པོའི་སྦྱོར་བ་རྣམ་པ་བཞིས། །ཕྱི་ནང་ལོག་ན་མེད་པས་གཟུང་འཛིན་བྲལ་བའི་སེམས། །ཉམས་མྱོང་ཤེས་པའི་རྣམ་པ་འདུག་བཅས་བལྟ། ༧ །སྡོམ་པ་ལུས་ངག་ཡིད་གསུམ་སྒོ་ནས་བསྲུང་ ། ༧ །གསལ་ལ་རིག་པ་ཉམས་སུ་མྱོང་བ་སྟེ། །རྣམ་རིག་དེ་དམིགས་ཤེས་པ་དེ་ཙམ་སྒོམ། ༧ །ལམ་ལྔ་སྤྱད་པས་ཡེ་ཤེས་བསོད་ནམས་རྫོགས། ༧ །བདག་གཞན་གཉིས་དོན་ཐུགས་རྗེའི་ཤུགས་ཀྱིས་སྤྱོད། ༧ །ཡེ་ཤེས་སྐྱེ་མེད་ཀུན་ཏུ་འོད་ཀྱི་ས། ༧ །དེ་ལས་ཐོབ་པའི་ཁྱད་པར་རྣམ་པ་བདུན། །རྟོགས་སྤྱོད་ཡེ་ཤེས་བརྩོན་འགྲུས་ཐབས་ཆེན་པོ། །འབྲས་བུ་ཕྲིན་ལས་དེ་ཙམ་ཁྱད་པར་འཕགས། །སྐབས་ལྔ་བའོ། ༧ །གཡུང་དྲུང་སེམས་དཔའི་ཐེག་པ་སྤྲོས་མེད་ནི། །དོན་ལྔ་ཁྱད་པར་བཞག་པའི་ཚད་མ་ཡིས། །དོན་དམ་ཀུན་རྫོབ་གཉིས་འཇལ་ཤེས་པ་དེས། །བོན་རྣམས་བདག་མེད་སྤྲོས་དང་བྲལ་བར་བལྟ། །སྤྲོས་ལ་གནོད་བྱེད་ཚད་མས་དེ་སེམས་བཟློག ༧ །སྒོ་གསུམ་ཟོལ་སོགས་མེད་པའི་སྡོམ་ཁྲིམས་དམ་པར་བསྲུང་། །གཟུང་ཆ་ཅིར་མ་གྲུབ་པས་འཛིན་ཆ་ཅིར་མི་རྟོག །བོན་རྣམས་རང་བཞིན་མེད་པས་མ་ཡེངས་གསལ་བར་བསྒོམ། ༧ །ཕ་རོལ་ཕྱིན་བཅུའི་ས་བཅུ་རིམ་གྱིས་བགྲོད། ༧ །བདག་གཞན་གཉིས་དོན་ཐུགས་རྗེ་ཆེན་པོ་སྤྱོད། ༧ །གཡུང་དྲུང་ལྟ་བུའི་ཡེ་ཤེས་འོད་ལྡན་པས། ༧ །ལྟ་བ་སྒོམ་པ་སྒྲུབ་ཐབས་ཁྱད་པར་འཕགས། །སྐབས་དྲུག་པའོ། ༧ །འབྲས་བུར་འཇོག་པའི་རྒྱུ་མཚན་རྣམ་པ་བཞི། །མྱུར་དུ་ཐོབ་བྱེད་རྣམ་པ་གཡར་ལམ་བྱེད། །མ་ཡིན་བཏགས་ནས་བསྒོམ་དང་དེ་ཉིད་རང་ལ་སྤྱོད། །དེ་ཕྱིར་འབྲས་བུའི་ཐེག་པ་ཞེས་བྱའོ། ༧ །བྱ་བ་གཙང་སྤྱོད་ཡེ་བོན་ཐེག་པ་ནི། །གཏན་ཚིགས་དང་བཅས་དག་པའི་བོན་ཉིད་ལྟ། །སྒོ་གསུམ་ལས་ཀྱི་དམ་ཚིག་རྣམ་བདུན་སྲུང་། །ཀུན་རྫོབ་བཏགས་པའི་སྒྱུ་གཟུགས་ཆེན་པོ་བསྒོམ། །གཟའ་སྐར་དུས་ཚིགས་གཙང་སྦྲ་རྫས་དང་ཡོ་བྱེད་བརྟེན། །འཛབ་གྲངས་ཚང་བས་ཐབས་ལྡན་བསྒྲུབ་པའི་དོན། །རང་དང་དེ་སྟོབས་དག་གིས་དེ་སྤྱོད་ཅིང་། །ཡས་སྟག་མཐུན་བཅས་གྱེར་གྱིན་གཞན་དོན་སྤྱོད། ༧ །གཡུང་དྲུང་འཛིན་པའི་ས་ཆེན་ཡང་དག་སེམས་ཤེས་ཐོབ། ༧ །རྟེན་དང་ལས་དང་བསྒྲུབ་པ་འབྲས་བུ་ལྟ། །ཁྱད་པར་རྣམ་པ་ལྔ་དང་ལྡན་པ་ཡིན། །སྐབས་བདུན་པའོ། ༧ །རྣམ་པ་ཀུན་ལྡན་མངོན་ཤེས་ཐེག་པ་ནི། ༧ །མཚན་མའི་དངོས་པོ་དག་ལ་ཚད་མས་བརྟག །མཚན་མ་མེད |
