ཐེག་པའི་རིམ་པ་མངོན་དུ་བཤད་པའི་མདོ་རྒྱུད་ཅེས་བྱ་བ་བཞུགས་སོ། །༼ལྟ་ཀློག་གི་སྐོར།༽
| ་པའི་བོན་ཉིད་རྟོགས་པ་ཡི། །བྱིན་རླབས་རོལ་བའི་མཚན་མ་ལྷ་རུ་བལྟ། །སྤྱི་དང་ཁྱད་པར་གཉིས་ཀྱི་དམ་ཚིག་བསྲུང་། ༧ །མངོན་པར་དྲི་མེད་བདལ་བ་ཆེན་པོ་ཡི། །གཡུང་དྲུང་སྐྱེ་མཆེད་ཆེན་པོ་རྣམ་ལྔ་བསྒོམ། ༧ །ཡོ་བྱད་རྫས་དང་ཏིང་འཛིན་གཉིས་འཚོགས་ལས། །དེ་བསྒྲུབ་ཕྱག་རྒྱ་བཞི་ཡི་དངོས་གྲུབ་འཐོབ། ༧ །ཕྲིན་ལས་བཞིས་ཀྱང་གཉིས་དོན་རྫོགས་པར་སྤྱོད། །ཐུགས་རྗེ་གར་ཆེན་ཚེ་འདས་གཞན་དོན་སྤྱོད། ༧ །གཡུང་དྲུང་བདེར་གཤེགས་ས་བཅུ་གཉིས་པ་འཐོབ། ༧ །ལྟ་སྒོམ་སྤྱོད་འབྲས་འཐོབ་བྱའི་ཁྱད་པར་འཕགས། །དེ་ལྟར་རྣམ་པ་ལྔ་ཡིས་ལ་བཅད་ཤན་དབྱེའོ། །སྐབས་བརྒྱད་པའོ། ༧ །གསང་སྔགས་འབྲས་བུ་དག་པའི་ཐེག་པ་ནི། །རྟེན་ལྷ་ཕྱིས་འབྱུང་སྤྱོད་པ་ལྟ་བ་མཉམ་ཉིད་དང་། །འབྲས་བུ་རང་གཞན་འབྱུང་བ་རྣམ་པ་བཞི། །ཕྱི་དང་ནང་ཞེས་ཁྱད་པར་རྣམ་པར་བཞག ༧ །དངོས་བསྐྱེད་ཐུགས་རྗེ་རོལ་པའི་ཐེག་པ་ནི། ༧ །དོན་དམ་ཀུན་རྫོབ་བདེན་པ་གཉིས་མེད་ཀྱི། །ལྷག་པའི་བདག་ཉིད་ཆེན་པོ་མཉམ་པ་ཉིད། ༧ །དམ་ཚིག་སྒོ་གསུམ་གྲངས་མེད་མ་ཉམས་སྲུང་། ༧ །ཏིང་འཛིན་རིམ་པ་བཞི་ལྔ་གསུམ་སྒོ་ནས། །བདག་ཉིད་ཆེན་པོ་ལྷ་ཡི་དཀྱིལ་འཁོར་བསྒོམ། ༧ །རྟོགས་པ་དང་ནི་ཏིང་ངེ་འཛིན་སྒོ་ནས། །སྐུ་གསུང་ཐུགས་ཀྱི་དངོས་གྲུབ་ཐོབ་པར་བསྒྲུབ། ༧ །ཕྲིན་ལས་རྣམ་བཞི་སྦྱོར་སྒྲོལ་གཉིས་པོ་ཡིས། །བདག་དོན་གཞན་དོན་ཕུན་སུམ་ཚོགས་པར་བྱེད། །ཚེ་འདས་ཐུགས་རྗེས་གཟུང་ནས་འབྲས་བུ་སྦྱོར། ༧ །ཡི་གེ་འཁོར་ལོ་ཚོགས་ཆེན་ས་ཡང་ནོན། ༧ །ཐུགས་རྗེ་ལ་སོགས་རྣམ་པ་ཀུན་ལྡན་པར། །ཐེག་ཆེན་ཕྱི་པ་ལས་ནི་ཁྱད་པར་བདུན་གྱིས་འཕགས། །ལྟ་བ་སྤྱོད་པ་དབང་དམ་ཕྲིན་ལས་དང་། །སྒྲུབ་ཐབས་དཀྱིལ་འཁོར་འབྲས་བུ་ཚུལ་མཐུན་སྦྱོར། །གནས་སྐབས་ཐེག་པ་དེ་ལས་ཁྱད་པར་ཆེ། །སྐབས་དགུ་པའོ། ༧ །ཤིན་ཏུ་དོན་ལྡན་ཀུན་རྫོགས་ཐེག་པ་ནི། ༧ །རྒྱུ་ནི་དག་པའི་དབྱིངས་ཆེན་ནས། །འབྲས་བུ་ཡེ་ཤེས་དཀྱིལ་འཁོར་ཤར། །ཡེ་ནས་ལྷུན་གྲུབ་འདུས་མ་བྱས། །བདག་ཉིད་ཡབ་ཡུམ་སྲས་བཅས་རྟོགས། ༧ །དམ་ཚིག་ཡུལ་ལ་སྦྱོར་བ་དང་། །དེ་ལ་སྙིང་རྗེ་འབྱུང་གཉིས་མེད། །བོན་ཉིད་ཐ་མི་དད་པར་བསྲུང་། ༧ །དཀྱིལ་འཁོར་ཕྱག་རྒྱ་མ་ལུས་ཀུན། །རྒྱུ་རྐྱེན་མ་ཡིན་རྫོགས་ཚུལ་བསྒོམ། ༧ །འབད་རྩོལ་དག་གིས་སྒྲུབ་མི་དགོས། །ཡིན་པ་ཡིན་པར་ངོ་ཤེས་ན། །མཚོ་ལ་གཟིངས་འགྲོའི་ཚུལ་བཞིན་སྒྲུབ། ༧ །སྤྱོད་པ་བྱེད་སྤྱོད་སྣ་ཚོགས་ཀུན། །གང་ཡང་མ་འགག་ལྷུན་ལ་རྫོགས། ༧ །འབྲས་བུ་ཐོབ་པའི་རང་བཞིན་ནི། །ཡེ་ཤེས་བླ་ན་མེད་པའི་ས་ཆེན་ནོན། ༧ །འོག་མ་དེ་ལས་ཁྱད་པར་འཕགས་པའི་ཚུལ། །ལྟ་སྤྱོད་བསྒྲུབ་པའི་རྩལ་གྱིས་ཁྱད་པར་འཕགས། །འབད་རྩོལ་རྒྱུ་རྐྱེན་སོགས་ལ་རག་མ་ལུས། །རྒྱ་མཚོ་ཆེན་པོའི་གྲུ་བཞིན་ཤུགས་ཀྱིས་འགྲོ། །རྩོལ་མེད་ལྷུན་གྲུབ་ཡེ་ཤེས་དབྱིངས་དང་ལྡན། །སྐབས་བཅུ་པའོ། ༧ །ཡེ་ནས་རྫོགས་ཆེན་ཡང་རྩེ་བླ་མེད་ཐེག་པ་ནི། ༧ །གཞི་ཉིད་ཀ་དག་ཆེན་པོ་ལ། །ལྷུན་གྲུབ་ངང་ལྡན་གཏན་ཚིགས་ཀྱིས། །རང་བཞིན་རོལ་པ་ངོ་བོ་ཉིད། །ཀ་དག་ལྷུན་གྲུབ་དངོས་མི་བདེན། །ཐ་སྙད་དེར་བཏགས་མི་འགལ་ཙམ། །ཇི་བཞིན་ཉིད་ཀྱི་སྐྱེ་མཆེད་བལྟ། ༧ །གཅིག་པུ་ལྷུན་གྲུབ་མེད་པ་དང་། །རང་བཞིན་གནས་དག་ཡེ་བསྲུང་དམ། ༧ །མ་བཅོས་ཇི་བཞིན་དེ་བཞིན་པ། ༧ །གཞན་ནས་བཙལ་མེད་ལྷུན་གྱིས་གྲུབ། ༧ །ཐུགས་རྗེ་ཕྱོགས་དང་རིས་མེད་པའི། །སྤྱོད་པ་བླང་དོར་མེད་པའོ། ༧ །དབྱེར་མེད་གཡུང་དྲུང་ཐིག་ལེ་ཡི། །ས་ཆེན་འབྲས་བུ་དེར་རྫོགས་ཡིན། ༧ །ལྟ་སྤྱོད་འབྲས་བུ་ཁྱད་པར་འཕགས། །ཏིང་འཛིན་རྩལ་གྱིས་ཡོངས་ཀྱང་འཕགས། །གཏན་ཚིགས་ཆེན་པོས་དེ་བཞིན་འཕགས། ༧ །དེ་ལྟ་བུ་ཡི་ཐེག་པ་དེ། །ཇི་བཞིན་ངང་དུ་རྟོགས་ན་ལྟ་སྒོམ་འབྲས་བུ་གཅིག །ཡེ་ནས་ཡོངས་རྫོགས་ད་གཟོད་བཙལ་དུ་མེད། །མཐའ་དབུས་མེད་པས་ཡེ་བདལ་ཆེན་པོ་ཡིན། །ཕྱི་ནང་མེད་པས་ཡེ་ཤེས་ཟངས་ཐལ་ཡིན། །སྐྱོན་ཡོན་མེད་པས་ལྷུན་གྱིས་གྲུབ་པ་ཡིན། །གཟུངས་འཛིན་མེད་པས་དམིགས་དང་བྲལ་བ་ཡིན། །དགག་སྒྲུབ་མེད་པས་རྩོལ་སེམས་བྲལ་བ་ཡིན། ༧ །དེ་ལྟར་གནས་པའི་ཡང་རྩེ་བླ་མེད་ལ། །ཐེག་པ་འོག་མ་རྣམས་ཀྱིས་འདི་སྐད་སྨྲས། ༧ །སྣང་བའི་བོན་རྣམས་སེམས་ལ་མ་གཏོགས་པ། །གཅིག་ཀྱང་མ་མཆིས་དེ་ལས་ཇི་ལྟར་འཕགས། ༧ །ཡང་དག་ཉིད་ཀྱིས་མ་གྲུབ་ཁྱད་པར་འཕགས། །དོན་དམ་ཀུན་རྫོབ་བདེན་འཁྲུལ་ངང་ལ་གནས། །ཡུལ་སེམས་དངོས་པོར་མ་གྲུབ་བོན་ཉིད་ལས། །མ་བྱུང་མ་སྐྱེས་དེ་ལས་ཇི་ལྟར་འཕགས། །ཀུན་རྫོབ་ཡུལ་སེམས་གཉིས་འདོད་དེ་མ་ཡིན་པར་འཕགས། ༧ །ཡེ་ཤེས་སེམས་དཔའ་དམ་ཚིག་རྣམ་གཉིས་ལས། །དཔོན་གཡོག་ཚུལ་བཅོས་དངོས་གྲུབ་ཀུན་འབྱུང་བའི། །དེ་ལས་འཕགས་པའི་ལྟ་སྤྱོད་ཇི་ལྟར་ལགས། ༧ །གཉིས་མེད་མ་ཤེས་རེས་འཇོག་དེ་མེད་འཕགས། །ལྟ་བ་རང་རིག་སྒོ་ནས་སྤྱོད་པ་བླང་དོར་མེད། །ལྟ་བ་མཉམ་རྟོགས་སྤྱོད་པ་ཡོངས་སུ་གཞོལ། །ཅི་སྐྱེས་ཕྱག་རྒྱའི་ཚོགས་ལས་ཇི་ལྟར་འཕགས། །དམིགས་མེད་བཞིན་དུ་འདུ་ཤེས་དེ་མ་བྲལ། །མཚན་མའི་རྟོགས་པ་སྣ་ཚོགས་དེ་མེད་འཕགས། ༧ །རྒྱུ་འབྲས་དབྱིངས་ལས་ཡེ་ཤེས་དཀྱིལ་འཁོར་ཤར། །འཕྲོ་འདུ་རྩོལ་སྒྲུབ་རྟོག་པས་མི་གཡོ་སྟེ། །ཡོན་ཏན་ཡེ་ནས་དེ་གྲུབ་ཇི་ལྟར་འཕགས། ༧ །དཀྱིལ་འཁོར་འཇོག་ཕྱིར་རྩོལ་བའི་སེམས་མ་བྲལ། །རྒྱུ་འབྲས་ཁས་བླང་ཕྱིར་ན་རྩོལ་བ་དྲུག་གིས་ཟིན། །བརྩལ་མེད་དབྱིངས་སུ་མ་ཆུད་ཁྱད་པར་འཕགས། །དེ་ཕྱིར་ཡིན་ལ་ཡིན་པར་འཇོག་མ་ཤེས། །ཐེག་པ་འོག་མ་རྩོལ་བའི་ནད་ཀྱིས་ཟིན། །འདི་དོན་རྩོལ་བྲལ་ཐེག་པའི་ཡང་རྩེ་ཡིན་པར་བཤད། ༧ །སྟོན་པའི་རྒྱལ་པོ་གཤེན་ལྷ་འོད་དཀར་གྱིས། །ཐེག་པ་བསམ་ཡས་རྣམ་པ་དགུ་རུ་བསྡུས། །མ་ངེས་གཅིག་གཉིས་གནས་ཀྱང་དགུ་རུ་བྱེས། །གོང་མ་ལ་བཅད་འོག་མ་ཤན་དབྱེ་བའི། །ལ་ཤན་ཐེག་པའི་བོན་མདོ་བཤད་དེ་བཀྲོལ། །དགོངས་པ་བརྡ་ཡིས་སྤྲུལ་པའི་སྐུ་ལ་བསྒྲགས། །འཛམ་གླིང་སྤྱི་ཡི་འཁོར་ལོ་འཇིག་རྟེན་དུ། །ང་ཡི་ཐེག་ཆེན་གཡུང་དྲུང་བོན་བསྟན་མཆོག །རྒྱས་ཤིང་འཕེལ་ཏེ་མི་ནུབ་རྒྱལ་མཚན་ཚུགས། ༧ །ཐེག་པའི་རིམ་པ་བཤད་པའི་མདོ་རྒྱུད་འདི། །གཤེན་ལྷ་འོད་དཀར་སྟོན་པ་ང་ཡིས་བསྒྲགས། །ཐེག་པའི་རིམ་པ་མངོན་དུ་བསྟན་པའི་མདོ་རྒྱུད་སྐབས་བཅུ་གཅིག་པའོ། །རྫོགས་སོ། །བདག་འདྲར་བེེ་རོ་ཙ་ན་ཡིས། །དཀའ་བ་སྲོག་དང་བསྡོས་པའི་གཡུང་དྲུང་བོན་ཆེན་བསྒྱུར། །མངའ་བདག་རྗེ་ལ་གཏད་དེ་ནམ་ཞིག་གཏེར་དུ་བཞག །དབུས་ཀྱི་བསམ་ཡས་ཀྱི་ཡང་དབེན་ཡེར་བའི་རྫོངས་ལ་སྦས་སོ། ཀྲང་ཡེ་སིག ཨུ་དེ་ཁྲལ་ཁྱུང་ཡེ་ཝང་ཅལ་ཀྲི་ས་ཏེ་ཡ་ཨག་ཐམ། སྨྲས་པ། །ལེགས་བྱས་འདི་སོགས་རྣམ་དཀར་མཆིས་སོ་ཅོག །དཔག་མེད་དྲིན་གྱིས་བསྐྱངས་པའི་མ་རྒན་རྣམས། །རྣམ་མཁྱེན་གོ་འཕང་མངོན་དུ་བྱེད་པ་ཡིས། །རྒྱུ་རུ་དམིགས་པ་མེད་པས་ཡོངས་སུ་བསྔོ། ། ། །ས་རྦ་མངྒ་ལམ། ། |
<< གཡུང་དྲུང་བོན་གྱི་བསྟན་འབྱུང་ཕྱོགས་བསྡུས། ༼ངོ་སྤྲོད་ཀྱི་སྐོར ༽འོལ་གླིང་ལ་དཔྱད་པ་བཀའ་ལུང་རིག་པའི་ཚད་མས་ལོག་སྨྲའི་རྨོངས་ཚོགས་འཇོམས་པའི་ལེགས་བཤད་གསེར་གྱི་ཉི་མ།༼ལྟ་ཀློག་སྐོར༽ >>
དཔྱད་གཏམ་ཡོངས་ལ་གཟིགས་པ།
