༄༅། །ཡེ་དབང་སྲིད་པའི་རྒྱལ་པོ་རིགས་ལྔ༼གཙོ་བོ་སྲིད་པ་སངས་པོ་འབུམ་ཁྲི། ཡེ་མཁྱེན་སྒྲ་བླའི་རྒྱལ་པོ། ཡེ་དབལ་མཐུ་སྟོབས་རྒྱལ་པོ། ཡེ་རྗེ་སྨན་ལྷའི་རྒྱལ་པོ། ཡེ་དབང་ས་ཡི་རྒྱལ་པོ་དང་ལྔའོ། འདི་ལྔ་ནི་རིག་པའི་གནས་ལྔའི་བདག་ཉིད་ཀྱི་ལྷ་ལྔའོ༽ལ་སྒོ་གསུམ་གུས་པ་ཆེན་པོས་ཕྱག་འཚལ་ལོ། ཤེས་དང་ཤེས་བྱ་ཆེན་པོའི་སྣང་བ་དུས་རྣམ་ཀུན་ཏུ་ཉམས་པ་མེད་པའི་དགེ་ལེགས་ཤིས་པ་སྩོལ།།ཚོགས་གཉིས་སྨོན་ལམ་འཛིན་མ་ལས་འཁྲུངས་ཤིང་། །སྤངས་རྟོགས་ཡོན་ཏན་ཡལ་འདབ་ཡོངས་སུ་རྫོགས། །མཁྱེན་བརྩེའི་གྲིབ་བསིལ་སྲིད་ཞིའི་དབྱིངས་ཀུན་ཁྱབ། །རྣམ་མཁྱེན་དཔག་བསམ་ལྗོན་པར་ཕྱག་འཚལ་ལོ། །༼མཐའ་དག་གཟུགས་ཅན༽ཐབས་མཆོག་སངས་པོ་ཁྲི་བཞི་ནམ་ཏིང་དང་། །ཀུ་བྱི་མང་སྐེ་སྲིད་པའི་དཀའ་ཐུབ༼ལྷ་རྒོད་ཐོག་པ་ཕྱ་སྲས་ཀེང་ཙེ་འཇམ་པའི་དབྱངས༽སོགས། །ངོ་བོ་གཅིག་ལས་ཆུ་ཟླའི་གར་བཞིན་དུ། །སྟོན་མཛད་སྨྲ་སེང་མཁྱེན་པའི་གཏེར་གྱིས་སྐྱོངས། །༼དོན་བསྐོར༽གྲུབ་མཐའི་རྒྱལ་པོ་འཕྲུལ་ངག་ གཡུང་དྲུང་བོན། །འཛམ་གླིང་ཐ་གྲུ་ཀུན་ཏུ་སྤེལ་མཛད་པའི། །གདུང་སོབ་སྟོན་པ་འཛམ་གླིང་རྒྱན་དྲུག་སོགས། །འཁོར་ལོ་གསུམ་གྱི༼ཀློག་པ་ཐོས་བསམ་གྱི་འཁོར་ལོ། སྒྲུབ་པ་ནན་ཏན་གྱི་འཁོར་ལོ། བྱ་ལས་ཀྱི་འཁོར་ལོ༽བདག་ཉིད་ཆེ་རྣམས་བསྟོད། །༼བྱ་བའི་རང་བཞིན༽སྒྲ་སྐད་ཀུན་ལ་མཁས་པ་ཕུལ་དུ་ཕྱིན། །བརྡ་སྐད་གཞུང་བརྒྱའི་སྲོལ་འབྱེད་ཤིང་རྟ་ཆེ། །མཁས་བཞི་དྲན་པ་ལོ་པཎ་གཤེན་བརྒྱད་སོགས། །ཞང་བོད་སྐད་གཉིས་སྨྲ་རྣམས་ཕྱག་གི་ཡུལ། །༼རྨད་བྱུང་གི་ཉམས།༽ ཕྱི་དར་ལམ་འདིའི་གསལ་བྱེད་བཀའ་དྲིན་ཅན། །མཁས་མཆོག་དཔལ་ཆེན་རྒྱལ་བ་མཉམ་མེད་དང་། །ཀུན་གྲོལ་གྲགས་པ་ཤཱི་ལ་དྷྭ་ཛ་སོགས༼སྒ་སྟོན་ཚུལ་རྒྱན། གཤེན་ཉི་མ། ཉི་མ་བསྟན་འཛིན། བསོད་བསྟན༽སོགས། །སྨྲ་བའི་དབང་ཕྱུག་རྣམས་ལའང་གུས་པས་འདུད། །༼བྱ་བ་ཐོག་གསལ༽གསུང་རབ་དགོངས་དོན་གངས་ཅན་བོད་སྐད་དུ། །བརྡ་སྤྲོད་ལེགས་བཤད་ཉི་ཤུ་བདུན་པ་ལས། །ལེའུ་དང་པོའི་མིང་གཞིའི་བྱེ་བྲག་རྣམས། །ཅུང་ཟད་རྒྱས་པར་ཕྱེས་ཏེ་འཆད་ལ་སྤྲོ།། ༼བྱ་བའི་རང་བཞིན༽
དེ་ཡང་བསྟན་པ་རྣམ་པར་དག་པ་ལ། །བྱུང་ཁུངས་སྟོན་པ་རྣམ་པར་དག་དགོས་ཕྱིར། །བདག་ཅག་སྟོན་པ་རྫོགས་པའི་སངས་རྒྱས་མཆོག །སྲིད་གསུམ་སྐྱོབ་པ་རྣམ་མཁྱེན་གཤེན་རབ་དེས། །དང་པོ་རིགས་དང་ལྡན་པར་སེམས་བསྐྱེད་ཅིང་། །སྐྱེ་བ་དུ་མར་ཉོན་མོངས་སྒྲིབ་པ་སྦྱངས། །དེ་དུས་འོག་ཕྱོགས་སྟོང་གསུམ་ཞིང་ཁམས་སུ། །སྤྲུལ་སྐུ་སྟོན་པ་བསོད་ནམས་དབང་ལྡན་བྱོན། །སྒྲིབ་སྦྱངས་སྟོབས་ཀྱིས་སྟོན་པའི་ཞལ་ཡང་མཇལ། །དེ་དྲུང་བྱང་ཆུབ་མཆོག་ཏུ་ཐུགས་རབ་བསྐྱེད། །བདག་མཐར་གྲུབ་པ་རྫོགས་པའི་དུས་རྟིང་ལ། །ཤིན་ཏུ་མི་མཇེད་རབ་ཏུ་གདུལ་དཀའ་བའི། །རྩོད་པ་ཅན་ཞིག་བདག་གིས་འདུལ་བར་ཤོག །ཅེས་པའི་སྨོན་ལམ་ས་བོན་རྒྱ་ཆེར་བཏབས། །གྲངས་མེད་གསུམ༼ཚོགས་ལམ་ནས་མཐོང་ལམ་བར་གྲངས་མེད་གཅིག དེ་ནས་ས་བརྒྱད་པའི་བར་གཅིག དེ་ནས་ས་བཅུའི་རྒྱུན་མཐའི་བར་གཅིག་དང་གསུམ་མོ༽དུ་ཚོགས་ཀྱི་ལམ་ལ་ཞུགས། །ས་ལམ་སྤངས་རྟོགས་ཡོན་ཏན་ཡོངས་སུ་རྫོགས། །རྣམ་པ་ཐམས་ཅད་མཁྱེན་པའི་ཡེ་ཤེས་བརྙེས། །མི་གཡོ་མཉམ་གསལ་སྐུ་གསུམ་དགོངས་པར་ཆིབས། །བྱང་ཆུབ་ཆེན་པོའི་ལྷུམས་སུ་མངོན་ཞུགས་ཀྱང་། །མི་མཇེད་རྩོད་ལྡན་ཚེ་ལོ་བརྒྱ་བའི་སྐབས། །སྨོན་ལམ་ས་བོན་དུས་སུ་སྨིན་པ་དང་། །གདུལ་དཀའ་འདུལ་བའི་རྟེན་འབྲེལ་ཤར་བའི་ཚེ། །ཕྱོགས་བཅུའི་སངས་རྒྱས་བསྔགས་བསྟོད་རོལ་མོའི་སྒྲས། །བསྐུལ་ཏེ་བོན་ཉིད་དབྱིངས་ལས་རྫོགས་སྐུར་བཞེངས། །བློ་གསལ་འཆི་མེད་ཅེས་ནི་མཚན་དུ་གྲགས། །འོག་མིན་རྫོགས་སྐུ་གཤེན་ལྷའི་དྲུང་དུ་བྱོན། །འགྲོ་བ་ཇི་ལྟར་འདུལ་བའི་བོན་ལུང་མནོས། །ཡེ་སངས་ཡུལ་དུ་ཐབས་མཆོག་སངས་པོའི་དྲུང་། །གདུལ་དཀའ་འདུལ་བའི་ཐབས་ཤེས་ཟུང་དུ་བསྡེབས། །མགོན་བཙུན་ཕྱྭ་ལ་སྲིད་པ་སྟོང་རྩིས་ཀྱིས། །བོན་གྱི་དེ་ཉིད་གཟིགས་ནས་གཏན་ལ་ཕབ། །བར་ལྷའི་གནས་སུ་སེམས་དཔའི་ཤེས་སྒྲིབ་སྦྱངས། །ས་བཅུའི་མཐར་ཐུག་བསྟན་ནས་དབུགས་དབྱུང་མཛད། །དེ་ལྟར་གནས་རིས་བཞི་ནས་ཡས་མར་བྱོན། །དགའ་ལྡན་གནས་སུ་ཁྱེའུ་ཤེས་པ་ལ། །ཉིད་ཀྱིས་གསོལ་བའི་རྫོགས་སྐུའི་ཆས་རྣམས་གཏད། །མ་འོངས་སྟོན་པ་བྱམས་ལྡན་མགོན་པོར་གསོལ། །ལྷ་ཁམས་འགྲོ་བ་འདུལ་བའི་བོན་ལུང་དབོག །དེ་ནས་རྩ་གསུམ་རྣམ་རྒྱལ་ཁང་བར་བྱོན། །ཁམས་གསུམ་ལྷ་ལ་བོན་གྱི་འཁོར་ལོ་བསྐོར། །རྩ་གསུམ་ལྷོ་ནུབ་རྩུབ་འགྱུར་དྲེགས་ཚལ་དུ། །ཁྲོ་བོ་རྟ་མགྲིན་གར་གྱི་དབང་པོར་སྤྲུལ། །དྲེགས་པ་སྤྱི་འདུལ་ཏིང་འཛིན་བརྟུལ་ཞུགས་ཀྱིས། །སྟོང་ཁམས་ས་ཆེན་རྣམ་པ་དྲུག་ཏུ་གཡོས། །གཡེན་ཁམས་དྲེགས་ཚོགས་སྙིང་གིས་མ་བཟོད་དེ། །དྲུང་དུ་འཁོད་དེ་སོ་སོའི་སྲོག་སྙིང་ཕུལ། །ཁས་བླངས་དམ་བཅས་བཀའ་ལ་ཉན་པར་ཆད། །གཡེན་འདུལ་བོན་པོ་སོ་གསུམ་སྐུ་ལས་སྤྲུལ། །གཡེན་ཁམས་ལྷ་མིན་འདུལ་བའི་ཁ་གནོན་བཞག།
དེ་ནས་སྤྲུལ་པའི་སྐུ་རུ་སྟོན་པར་དགོངས། །རི་རབ་བང་རིམ་བཞི་བའི་ཁ་ཁྱེར་གྱི། །རྒྱལ་ཆེན་ལྷ་གནས་ལྷོ་ཕྱོགས་འཕགས་སྐྱེས་པོའི། །རྒྱལ་ས་གོང་མ་ཛ་ལེན་དྷ་རའི་རྩེར། །བྱོན་ཏེ་གཟིགས་ཚད་ལྔ༼གདུལ་ཞིང་མི་མཇེད་འཇིག་རྟེན། གདུལ་བྱ་མི། གླིང་འཛམ་གླིང་བ། འཁོར་འཛམ་གླིང་སོག་ཁའི་མི། རིགས་རྒྱལ་རིགས་དམུ་ལ་གཟིགས་པའོ།༽དང་དགོངས་ཚད་ལྔ༼ཡུལ་འོལ་མོ་ལུང་རིང་། མཁར་བར་པོ་སོ་བརྒྱད། ནོར་རིན་པོ་ཆེའི་གཏེར། ཡབ་རྒྱལ་བོན་ཐོད་དཀར། ཡུམ་རྒྱལ་བཞད་མ་ལ་དགོངས་སོ།༽། །ཐུགས་ལ་བཀྲམ་སྟེ་འཛམ་གླིང་སོག་ཁའི་དམིག །རྟག་གཟིགས་འོལ་མོ་ལུང་རིང་ཞིང་ཁམས་སུ། །འདབ་ཆགས་དུས་ཀྱི་ཕོ་ཉར་སྤྲུལ་ནས་བྱོན། །འགྲོ་བ་རབ་འདྲེན་མཆོད་རྟེན་རྩེ་མོར་བབས། །ཐེངས་གསུམ་གསུང་བསྒྲགས་ཁམས་གསུམ་སྤྲོ་བ་བསྐྱེད། །དེ་ནས་དམུ་རིགས་གཤེན་ལྷའི་གདུང་གི་རྒྱུད། །རྒྱལ་བོན་ཐོད་དཀར་ཡབ་ཀྱི་རྟ་ལ་བརྒྱུད། །ཡོ་ཕྱི་རྒྱལ་བཞད་ཡུམ་གྱི་སྐུ་ལ་བརྟེན། །ཟླ་དགུ་ངོ་བཅུ་འབྱུང་བཞིའི་བསྐྱེད་ཚུལ་བསྟན། །ལོ་རྒྱལ་ཤིང་ཕོ་བྱི་བ་དཔྱིད་ར་སྟག །བཅོ་ལྔའི་ནམ་ལངས་རྒྱལ་གྱི་རུ་གོང་ལ། །འབྱུང་བཞིའི་ལྷ་མོས་འབྱུང་བའི་སྦུབས་ཕྱེས་ཏེ། །ལྷ་མོ་རྒྱལ་བཞད་ཡུམ་གྱི་གློ་སྐར་ནས། །འགྲོ་བ་རང་མཐུན་ཆ་ལུགས་ཚུལ་དུ༼སློབ་དཔོན་རྒྱལ་མཚན་དཔལ་དང་སྤ་སྟོན་བསྟན་རྒྱལ་བཟང་པོ་སོགས་ཀྱི་བཞེད་པར་སྟོན་པའི་སྐུ་གསུང་ཐུགས་ཀྱི་བསྟན་པ་མི་ལོ་ཁྲི་ཕྲག་གཅིག་ཏུ་གནས་པའི་ལུགས་ཏེ་སྤྱི་ལོ་སྔོན༥༡༥༧ལ༽བལྟམས། །འཇིག་རྟེན་གསུམ་གྱི་དབང་པོ་ཆེ་ཀུན་འཚོགས། །ལྟས་མཁན་བྲམ་ཟེ་བློ་གསལ་མཚན་ལྟས་བརྟག །མཚན་བཟང་སོ་གཉིས་དཔེ་བྱད་བརྒྱད་ཅུ་དང་། །འཕྲུལ་ཡིག་བཞི་བཅུ་ཚངས་དབྱངས་དྲུག་ཅུ་དང་། །འོད་ཟེར་ཕུང་པོ་བྱེ་བ་སྟོང་དྲུག་ཅུ། །མཁྱེན་པའི་ཡེ་ཤེས་དྲུག་ཅུ་རྩ་གཅིག་དང་། །ལེགས་པའི་ཡོན་ཏན་བརྒྱ་རྩ་
|
