དྲིས་ལན་འབེལ་གཏམ་སྐབས་ལྔ་བ་པུཎྜ་རཱི་ཀའི་ཕྲེང་བ་ཞེས་བྱ་བ་བཞུགས་སོ། །༼ལྟ་ཀློག་སྐོར ༽

ཅིང་། ཚོགས་ལམ་གྱིས་སྡུག་བསྔལ་གྱི་རྒྱུ་ལས་ཉོན་རགས་པ་རྣམ་པར་སུན་འབྱིན་པའི་ཚུལ་དུ་སྤོང་ཞིང་། བདག་མེད་གཉིས་དོན་སྤྱིའི་ཚུལ་དུ་རྟོགས། སྦྱོར་ལམ་གྱིས་སྒྲིབ་གཉིས་ཀུན་བཏགས་རྣམས་རྣམ་པར་གནོན་པའི་ཚུལ་དུ་སྤོང་ཞིང་། བདག་མེད་གཉིས་སྒོམ་བྱུང་གི་ཚུལ་དུ་རྟོགས་པ་སྟེ་སོ་སྐྱེས་ཀྱི་སྐབས་ཡིན་ལ། མཐོང་ལམ་གྱིས་ཉོན་ཤེས་ཀྱི་སྒྲིབ་པ་ཀུན་བཏགས་མཐོང་སྤོང་རྣམས་སྤོང་ཞིང་། བདག་མེད་གཉིས་མངོན་སུམ་དུ་རྟོགས་པས་ས་དང་པོ་བགྲོད་དེ་འཕགས་པའི་སྐབས་ཡིན་ཅིང་། སྒོམ་ལམ་གྱིས་ཉོན་སྒྲིབ་ལྷན་སྐྱེས་ཕྲ་རགས་དང་ཤེས་སྒྲིབ་ལྷན་སྐྱེས་རགས་པ་སྤོང་ཞིང་། གནས་ལུགས་མངོན་དུ་གྱུར་ནས་ས་གཉིས་པ་ནས་བཅུ་པའི་བར་བགྲོད་ལ། མི་སློབ་པའི་ལམ་ནི་སངས་རྒྱས་ཀྱི་ས་སྟེ་སྒྲིབ་གཉིས་བག་ཆགས་དང་བཅས་པ་སྤོངས་ནས་མཁྱེན་གཉིས་ཀྱི་རྩལ་ཡོངས་སུ་རྫོགས་ནས་སངས་རྒྱས་པའོ། དེ་དག་གསང་སྔགས་ཀྱི་དབང་དུ་བྱས་ན་ཇི་ལྟར་ཡིན། མདོར་བསྡུ་ན་ཐབས་བསྐྱེད་རིམ་གཙོ་བོར་བྱས་ནས་ལམ་ལྔ་དང་ས་བཅུ་བོ་རིག་འཛིན་རྣམ་པ་བཞིའི་སྒོ་ནས་བགྲོད་ལ། ཤེས་རབ་རྫོགས་རིམ་གཙོ་བོར་བྱས་ན་ཐབས་ལམ་ལ་བརྟེན་ནས་དཔེ་དོན་གྱི་ཡེ་ཤེས་སྐྱེ་ཞིང་རྩ་འཁོར་ལྔའི་མདུད་པ་གྲོལ་ཚུལ་གྱིས་ས་ལམ་གྱི་ཡོན་ཏན་འཆར་བ་དང་ཁྱད་པར་དུ་དག་པ་ས་གསུམ་བཅས་བཅུ་གསུམ་འཁོར་ལོ་ཚོགས་ཆེན་གྱི་ས་ནོན་པ་དང་། རྫོགས་ཆེན་ལྟར་ན་ཁྲེགས་ཆོད་ཀྱིས་རིག་པ་ཟང་ཐལ་གྱི་ངང་ནས་ས་ལམ་བགྲོད་པ་དང་ཐོད་རྒལ་གྱིས་སྣང་བ་བཞིས་ས་ལམ་མངོན་དུ་བགྲོད་ནས་འབྲས་བུ་མངོནདུ་བྱེད་པའོ། དེ་ལྟར་ས་ལམ་བགྲོད་ནས་འབྲས་བུ་སངས་རྒྱས་པའི་རྣམ་བཞག་ཇི་ལྟར་ཡིན། རྒྱུ་མཚན་ཉིད་ཐེག་པ་ལྟར་ན་སྤྱིར་ཐེག་པ་གསུམ་གྱི་འབྲས་བུ་མྱང་འདས་ཡིན་ལ། ཁྱད་པར་ཐེག་ཆེན་པས་སྐུ་གསུམ་མམ་བཞི་དང་ཡེ་ཤེས་ལྔའི་བདག་ཉིད་ཅན་བྲལ་སྨིན་གྱི་ཡོན་ཏན་ཡོངས་སུ་རྫོགས་ཤིང་མཛད་པའི་ཕྲིན་ལས་མཐའ་ཡས་པའི་བདག་ཉིད་དང་། གསང་སྔགས་ལྟར་ན་གནས་སྐབས་སུ་ཐུན་མོང་གི་དངོས་གྲུབ་ལྔ་དང་། མཐར་ཐུག་མཆོག་གི་དངོས་གྲུབ་སངས་རྒྱས་སྐུ་ལྔ་ཡེ་ཤེས་ལྔའི་རང་བཞིན་འབྲས་བུའི་བོན་ཉེར་ལྔ་ཡོངས་སུ་རྫོགས་པ་དང་། རྫོགས་ཆེན་ལྟར་ན་ཁྲེགས་ཆོད་ཀྱི་རགས་ལུས་རྡུལ་ཕྲན་དུ་དེངས་ཤིང་ཐོད་རྒལ་གྱིས་འཇའ་ལུས་འཕོ་ཆེན་གྱི་སྐུར་བཞེངས་ནས། སྐུ་གཅིག་ནས་ལྔའི་བར་དང་ཡེ་ཤེས་ལྔའི་རྩལ་རྫོགས་ཏེ་ཇི་སྲིད་འཁོར་བ་མ་སྟོང་གི་བར་དུ་འགྲོ་བའི་དོན་རྒྱ་ཆེན་པོར་མཛད་པར་འགྱུར་བའོ། འོ་ལགས་ཏེ་དེ་ལྟར་ཐོས་བསམ་ལས་བྱུང་བའི་དོན་འོལ་སྤྱི་ཙམ་དུ་མི་འཇོག་པར་དབེན་པའི་གནས་སུ་རྩེ་གཅིག་ཏུ་བསྒོམ་ནས་ཉམས་སུ་ལེན་པ་ནི་ཉམས་རྟོགས་ཀྱི་ཡོན་ཏན་དང་དངོས་གྲུབ་ཐམས་ཅད་ཀྱི་རྩ་བ་ཡིན་པར་ལེགས་པར་ཡིད་ལ་ངེས་སོ། དེ་ལྟར་ལགས་པས་ཐོས་བསམ་ཅི་བྱས་པ་ཐམས་ཅད་སྒོམ་སྒྲུབ་ཀྱི་གཞིར་སོང་བ་ཞིག་མེད་ན་བོན་གཞུང་ཐོག་ཏུ་ལུས་ནས་དགོས་པའི་དུས་སུ་མི་ཕན་ཞིང་མཐར་དལ་འབྱོར་སྟོང་ལོག་ཏུ་འགྱུར་བ་ཡིན་པས་རང་ལ་ལེགས་པར་བསམ་ནས་སྒོམ་སྒྲུབ་ལ་ཚུལ་བཞིན་དུ་འབད་ན་འདི་ཕྱིའི་དོན་འབྲས་ཡིད་བཞིན་དུ་འཇོ་བར་འགྱུར་བས་བདག་ལེགས་སུ་འདོད་པ་རྣམས་ཀྱིས་དེ་ལྟར་བརྩོན་པ་ཤིན་ཏུ་གལ་ཆེ་བ་ཡིན་ནོ། དེ་ལྟར་སྒོམ་བྱུང་གི་ཤེས་རབ་བསྐྱེད་ཚུལ་ལས་བརྩམས་པའི་འབེལ་མཆིད་ཀྱི་རིམ་པ་ཆ་ཙམ་གླེང་བ་འདིས་ཀྱང་ཉམས་ལེན་ལ་ཇི་ལྟར་འཇུག་པའི་ངེས་ཤེས་ཀྱི་གསལ་འདེབས་ཅིར་ཡང་ཐོབ་པས་ཁྱེད་ཀྱིས་དམ་པ་གོང་མའི་གསུང་སྒྲོས་དང་མཐུན་པར་ལེགས་པར་སྨྲས་པའི་གསུངས་རྣམས་ལའང་གུས་པས་རྗེས་སུ་ཡི་རང་ངོ་། ། ཞེས་གླེང་ངོ་། སྒོམ་པ་དྲི་བའི་གནས་ཏེ་ལྔ་བའོ། ། 
      སྨྲས་པ། རྒྱལ་བའི་བསྟན་པ་ཚུལ་ཁྲིམས་སྒོར་ཞུགས་ནས། ། མང་དུ་ཐོས་དང་ཚུལ་བཞིན་བསམ་པ་དང་། ། ཡང་དག་དོན་ལ་སྒོམ་པས་ཉམས་ལེན་པ། ། སྐྱེས་བུ་དམ་པ་རྣམས་ཀྱི་འཇུག་ངོགས་ཡིན། ། ཡུལ་དུས་གང་དུ་གང་གིས་དྲིས་ཤིང་ལན། ། ཇི་བཞིན་ལྡོན་པའི་གནས་སྐབས་འགའ་ཙམ་ཞིག ། དཔེ་རུ་མཚོན་པའི་འབེལ་གཏམ་འདི་ལྟ་བུ། ། བོན་རྣམས་ཀུན་གྱི་སྤྲོ་བསྡུའི་གཞི་རུ་བརླིང་། ། སྡོམ་ཚིག་ས་བོན་འདི་ལ་བརྟེན་ནས་ཀྱང་། ། བཀའ་མཆིད་མྱུ་གུ་རྒྱས་པའི་སྐབས་ཕྱེ་ནས། ། ངོ་མཚར་ཚིག་གི་མེ་ཏོག་རབ་བཞད་པས། ། མདུན་ས་མཛེས་པའི་རྒྱན་དུ་སྤྲོ་བར་མཛོད། ། སྤྱི་ཆིངས་ངག་གི་ལྡེའུ་མིག་ཆུང་ངུ་ཡིས། ། མདོ་སྔགས་དོན་གྱི་སྒོ་བརྒྱ་འབྱེད་ནུས་པའི། ། གསུང་རབ་ཀུན་གྱི་བརྗོད་དོན་མ་ལུས་པ། ། འདི་འདྲ་སྟོན་ཤེས་དེ་ཡང་བླ་མའི་དྲིན། ། དེ་ལས་ཐོབ་པའི་རྣམ་དཀར་དགེ་བའི་མཐུས། ། གནས་སྐབས་རྒྱལ་བསྟན་པད་ཚལ་རབ་ཏུ་རྒྱས། ། གཤེན་སྡེའི་འཆད་ཉན་རྒྱལ་རྔ་ཕྱོགས་བཅུར་བརྡུང་། ། དོན་གཉིས་ལྷུན་གྲུབ་དཔལ་ལ་རེག་གྱུར་ཅིག ། ། །
    ཅེས་པ་འདི་ནི་ས་ཡོས་ལོར་སྒྲུབ་སྡེ་བྱང་ཆུབ་གླིང་དུ་བོན་སྡེ་ཅི་རིགས་ལ་འཆད་ཉན་བགྱིད་སྐབས། འཛིན་གྲྭ་པ་འགའ་ལ་ཉེར་མཁོའི་ཆེད་དུ་བསླབ་པ་དྲིས་ལན་ཞིག་བྲིས་ནས་ཚོགས་ལངས་སྐབས་ཀྱི་འཛིན་ཐོར་སྤེལ་མཚམས། སྡེ་དགེ་ནས་མདོ་ཁམས་བསྟན་པའི་བདག་པོ་འཇིགས་བྲལ་གྱི་སློབ་དཔོན་ཆེན་པོ་འཇམ་དབྱངས་མཁྱེན་བརྩེ་དབང་བོའི་ཡང་སྲིད་རིན་པོ་ཆེ་འཇམ་དབྱངས་ཆོས་ཀྱི་བློ་གྲོས་ཀྱི་ཞལ་སྔ་ནས། བོན་གྱི་བསྟན་པ་དང་བསྟན་འཛིན་བྱོན་ཚུལ་དང་འབྲེལ་བའི་ལྟ་སྒོམ་སྤྱོད་འབྲས་ཀྱི་རྣམ་བཞག་དང་གཞུང་ལུགས་གཙོ་ཆེ་བཞུགས་ཚུལ་རྣམས་གསལ་བའི་རྣམ་བཤད་ཅིག་གྱིས་ཤིག་པའི་བཀའ་སྩལ་བ་བཞིན་ཁོད་སྤུངས་ཀྱི་རུས་སུ་བྱུང་བའི་གཤེན་གྱི་དྲང་སྲོང་རིགས་པ་སྨྲ་བ་དབྲ་སྟོན་བསྐལ་བཟང་བསྟན་རྒྱལ་ཞེས་འབོད་པས་སྐབས་ལྔ་པོ་རྫོགས་པར་སྦྱར་ནས་བཞེད་སྐོང་དུ་བགྱིས་པ་སྟེ་གཤེན་བསྟན་མཛེས་པའི་རྒྱན་དུ་གྱུར་ཅིག ། སྨར་རོ། །