དྲིས་ལན་འབེལ་གཏམ་སྐབས་ལྔ་བ་པུཎྜ་རཱི་ཀའི་ཕྲེང་བ་ཞེས་བྱ་བ་བཞུགས་སོ། །༼ལྟ་ཀློག་སྐོར ༽

བསྙེན་གནས་དང་དགེ་བསྙེན་གཉིས་སོ། བསྙེན་གནས་ཀྱི་བསླབ་བྱ་གང་ཡིན། དེ་ལ་ཡན་ལག་བརྒྱད་ཡོད་དེ། རྩ་བ་བཞི། ཁ་ཟས་བཞི། ལུས་ངག་ཡིད་ཀྱི་མ་དག་པའི་སྤྱོད་པ་གསུམ། རྒྱན་གྱི་རིགས་བཅས་སྤོངས་པའོ། དགེ་བསྙེན་གྱི་བསླབ་བྱ་གང་ཡིན། དགེ་བསྙེན་འདིར་ལྔ་ལས། སྐྱབས་གསུམ་འཛིན་པ་ནི་སྐྱབས་སྡོམ་ལ་གནས་པ་དང་། སྣ་འགའ་སྤྱོད་པ་ནི་སྲོག་གཅོད་སོགས་ཅི་ནུས་སྤོང་བ་དང་། ཡོངས་རྫོགས་དགེ་བསྙེན་ནི་འདོད་ལོག་གཞིར་བཞག་གི་རྩ་བ་བཞི་བོ་སྤོང་བ་དང་། ཚངས་སྤྱོད་དགེ་བསྙེན་ནི་མི་ཚངས་སྤྱོད་སྤོང་བའི་རྩ་བཞི་དང་ཁ་ཟས་གང་རུང་གཅིག་སྤོང་བ་དང་། ཕལ་ཆེར་བསྲུང་བ་ཞེས་མི་ཚངས་སྤྱོད་སྤོང་བའི་རྩ་བཞི་དང་ཁ་ཟས་བཞི་བཅས་གཏན་ནས་སྤོང་བའོ། རབ་བྱུང་གི་ཕྱོགས་ཀྱི་བསླབ་བྱ་ལ་གང་ལྟར་མཆིས། གཙང་གཙུག་དང་དྲང་སྲོང་གི་བསླབ་བྱ་གཉིས་མཆིས་སོ། གཙང་གཙུག་པའི་བསླབ་བྱ་གང་ཡིན། དེ་ལ་ཉི་ཤུ་རྩ་ལྔ་ཡོད་དེ། རྩ་བ་བཞི། ལྷག་མ་མི་དགེ་བའི་སྡེ་དྲུག་སྟེ་བཅུ། ཁ་ཟས་བཞི་སྟེ་བཅུ་བཞི། སིལ་བུའི་སྡེ་གསུམ་དང་། ཁྲི་སྟན་གྱི་སྡེ་གསུམ་དང་དྲུག་སྡེ་ཉི་ཤུ། དེ་སྟེང་རྗེས་སྲུང་ལྔ་བསྣན་པས་ཉེར་ལྔའོ། དྲང་སྲོང་གི་སྡོམ་པའི་བསླབ་བྱ་གང་ཡིན། འདི་ལ་སྤྱི་དང་བྱེ་བྲག་གཉིས་མཆིས་སོ། སྤྱིའི་བསླབ་བྱ་གང་ཡིན། དེ་ལ་ལྔ་སྟེ། གང་ཟག་གཞན་ལ་བརྟེན་ནས་བསྲུང་བ། རང་གི་བསམ་པ་ལ་བརྟེན་ནས་བསྲུང་བ། མི་མཐུན་པའི་ཕྱོགས་ངོ་ཤེས་པས་བསྲུང་བ་། བསླབ་པ་ཡོངས་སྦྱོང་གི་སྒོ་ནས་བསྲུང་བ། བདེ་བར་གནས་པའི་རྐྱེན་ལ་བརྟེན་ནས་བསྲུང་བ་རྣམས་སོ། བྱེ་བྲག་གི་བསླབ་བྱ་གང་ཡིན། དེ་ལ་དགག་སྒྲུབ་ཀྱི་བསླབ་བྱ་གཉིས་མཆིས་སོ། དགག་པའི་བསླབ་བྱ་གང་ཡིན། དེ་ལ་ཕྱི་ཁྲིམས་དང་ནང་ཁྲིམས་གཉིས་མཆིས་སོ། དེ་ལ་ཕྱི་ཚུལ་གྱི་བསླབ་བྱ་ཇི་ལྟར་ཡིན། ཕྱི་ཚུལ་ལ་ལྔ་སྟེ། བཞར་བྲེག་དང་། ཁྲུས་དང་། གོས་དང་། རྫས་དང་། སྤྱོད་ཚུལ་གྱི་རྗེས་སྲུང་དང་ལྔ་སྟེ་ནང་གསེས་སུ་ཕྱེ་ན་བརྒྱ་དང་བདུན་ཅུ་རྩ་དྲུག་ཏུ་མཆིས་སོ། ནང་གི་ཁྲིམས་ལ་ཇི་ལྟར་མཆིས། རྩ་བ་དང་ཡན་ལག་གཉིས་མཆིས་སོ། རྩ་བ་གང་ཡིན། སྲོག་གཅོད་པ་སོགས་བཞིའོ། ཡན་ལག་ནི་གང་ཡིན། ཡན་ལག་ལ་སྡེ་བདུན་སྟེ། དང་པོ་མི་དགེ་བའི་སྡེ་ངག་འཁྱལ། ཚིག་རྩུབ། དབྱེན་ཕྲ། མངན་སེམས། གདུག་སེམས། ལོག་ལྟ་དྲུག་ལ་ནང་གསེས་སུ་དྲུག་ཅུ་རྩ་གསུམ། གཉིས་པ་ཉོན་མོངས་པའི་སྡེ་གཏི་མུག ཞེ་སྡང་། འདོད་ཆགས། ཕྲག་དོག ང་རྒྱལ་ལྔ་ལ་ནང་གསེས་སུ་དྲུག་ཅུ་རྩ་བརྒྱད། གསུམ་པ་འཁྲུལ་བའི་སྡེ་ལ་རྔམ་སེམས། འདོད་སེམས། སེར་སྣ། འཇུངས་གེགས། བྱུང་ཚོར། ཉོན་མོངས་པའི་ཡིད་ལྡང་བ། ལེ་ལོ། ཕྱིན་ཅི་ལོག་གི་སྨོན་པ། རེ་དོགས། འཁོར་བར་ཆགས་པ་དང་། གཡེང་བ། འཁྲུལ་བའི་བློ་སྟེ་བཅུ་གཉིས་ལ་ནང་གསེས་བརྒྱ་དང་བཅུ་གཉིས། བཞི་བ་ཁྲིམས་ཆེན་གྱི་སྡེ་ལ་ནང་གསེས་བདུན་ཡོད་པ་གཅིག་ཏུ་བརྩིས་བ་དང་། ལྔ་བ་ཁ་ཟས་ཀྱི་སྡེ་ལ་བཞི། དྲུག་པ་ཁྲི་སྟན་གྱི་སྡེ་ལ་གསུམ། བདུན་པ་སིལ་བའི་སྡེ་ལ་གསུམ་ཡོད་པ་གཅིག་ཏུ་བརྩིས་པ་བཅས་བསླབ་པ་ཉིས་བརྒྱ་དང་ལྔ་བཅུའོ། ། 
         གཉིས་པ་སྒྲུབ་པའི་བསླབ་བྱ་ཇི་ལྟར་ཡིན། གསོ་སྦྱོང་དབྱར་གནས་དགག་དབྱེའི་སྒོ་ནས་བསླབ་བྱ་བསྲུང་ཞིང་དགེ་སྦྱོར་ལ་འབད་པའོ། །    

 གསུམ་པ་ཉམས་ན་ཕྱིར་བཅོས་པའི་ཚུལ་གང་ཡིན། བསྙེན་གནས་དང་དགེ་བསྙེན་ལ་རྩ་ལྟུང་བྱུང་ན་སྡོམ་པ་བསྐྱར་བ་དང་རབ་བྱུང་ལ་རྩ་ལྟུང་འཆབ་བཅས་གསོར་མི་རུང་ཞིང་འཆབ་མེད་གསོ་བ་དང་ལྟུང་བ་གཞན་རྣམས་ཚོགས་ཀྱིས་ཕྱིར་བཅོས་དང་རང་གིས་བཤགས་སྡོམ་བྱེད་པའོ། གཉིས་པ་ཐེག་ཆེན་གྱི་སོ་ཐར་ཇི་ལྟར་ཡིན། སོ་ཐར་གྱི་བསླབ་པ་ལ་བསམ་པ་དང་སེམས་བསྐྱེད་ཀྱིས་ཟིན་པ་སྟེ། ཆོ་ག་ཉན་ཐོས་དང་ཐུན་མོང་ཐེག་དམན་སོ་ཐར་ལ་སེམས་བསྐྱེད་ཀྱིས་ཟིན་པ་སྟེ། ཐེག་ཆེན་ཐུན་མིན་གྱི་སོ་ཐར་འདུལ་བ་རྒྱུད་དྲུག་གི་སོ་ཐར་ལྟ་བུ་དང་། ཆོ་ག་གོང་མ་དང་ཐུན་མོང་བ་བྱང་སྡོམ་སྐབས་ཐོབ་པ་དང་། གསང་སྔགས་དང་ཐུན་མོང་བ་ཕྱི་རྒྱུད་ཀྱི་གསོ་སྦྱོང་གི་ཆོ་ག་དང་། དབང་གི་སྟ་གོན་སྐབས་སུ་ཐོབ་པའི་སོ་ཐར་ལྟ་བུའོ། འོ་ན་བོན་ལུགས་ཀྱི་སོ་ཐར་འདི་ཐེག་ཆེན་དང་ཐེག་དམན་གང་ཡིན། ད་ལྟའི་སྡོམ་རྒྱུན་འདི་ནི་ཐེག་ཆེན་སོ་ཐར་ཡིན་ཏེ་བླ་ཆེན་གྱི་སྡོམ་རྒྱུན་འདི་ཐེག་ཆེན་ཡིན་པར་མཉམ་མེད་སོགས་ཀྱིས་བཞེད་དོ། འོ་ན་རང་ལུགས་ལ་ཐེག་དམན་སོ་ཐར་ཡོད་དམ། ཉན་ཐོས་ཀྱི་སྡོམ་པ་ཡིན་ན་ཐེག་དམན་སོ་ཐར་ཡིན་པས་ཡོད་མོད་ཀྱི། ཐེག་པ་ཐམས་ཅད་ཉམས་ལེན་གྱི་རིམ་པར་བཞེད་པས་བསྟན་པའི་སྤྱི་ལྡོག་ནས་ཐེག་པ་ཐམས་ཅད་ཐེག་ཆེན་གྱི་བསྟན་པའི་ཡན་ལག་ཡིན་པར་བཞེད་དོ། དེ་ལྟར་སོ་ཐར་གྱི་སྡོམ་པ་ཞུས་ནས་བོན་ལ་ལག་ལེན་ཇི་ལྟར་བགྱི། དེ་ཡང་སྟོན་པའི་རྗེས་སུ་འཇུག་པ་རྣམས་གནས་གཞི་གཅིག་ཏུ་འདུས་ཏེ་སྒྲིག་ལམ་གྱི་གཞི་བཟུང་། ཐོག་མར་མི་རྟག་པ་བསམ་པ་སོགས་ཀྱིས་རང་རྒྱུད་ལེགས་པར་སྦྱངས། ཟས་གོས་སྣོད་སྤྱད་གནས་མལ་སོགས་མཐའ་གཉིས་སུ་མ་ལྷུང་བར་བྱ། འདུལ་བ་དང་མི་མཐུན་པ་བྱུང་ན་ཐབས་ཀྱིས་ཚར་བཅད། ཉེས་སྐྱོན་བྱུང་རིགས་རྣམས་བཤགས་སྡོམ་གྱིས་སོར་ཆུད་པར་བྱ། དྲན་ཤེས་བག་ཡོད་ཀྱི་སྒོ་ནས་རང་ས་ཟིན་ཅིང་བསླབ་པ་གཙང་བར་བྱ། རྒྱུན་དུ་ཞི་གནས་གསོ་སྦྱོང་དང་འབྲེལ་བར་དྲན་པ་ཉེར་བཞག་སོགས་ལ་ཉམས་ལེན་བྱས་ནས་རིམ་གྱིས་ཐར་བའི་གོ་འཕང་ཐོབ་པ་ཞིག་བྱ་དགོས་པ་ཡིན་ནོ། ། འོ་ན་ནང་བྱང་སེམས་ཀྱི་སྡོམ་པ་ལ་ཐོག་མར་བརྒྱུད་པ་ནི་ཇི་ལྟ་བུ། བརྒྱུད་པ་ནི་བདག་ཅག་གི་སྟོན་པ་ཐུགས་རྗེ་ཅན་ནས་རྒྱལ་ཚབ་བྱམས་པ། འ་ཞ་གསང་ཐུབ། མུ་ཆོ་ལྡེམ་དྲུག འཛམ་གླིང་རྒྱན་དྲུག ལོ་ཙཱ་མི་བཞི། བླ་ཆེན་དྲན་པ། ལོ་པཎ་གཤེན་བརྒྱད། གཤེན་གྱེར་རྨ་དབྱིལ། བྲུ་ཞུ་སྤ་རྨེའུ། དྲན་པ་ཡབ་སྲས། གཙང་བ་སྙིང་རྗེ་ཅན། སྨན་གོང་བ། ཁྱུང་སྒོམ་ཇོ་གཡུང་། དམ་པ་ཚུལ་ཤེས། གཡོར་བོ་མེ་དཔལ། བདུད་རྩི་རྒྱལ་མཚན། བློ་གྲོས་རྒྱལ་མཚན། འདུལ་བ་རྒྱལ་མཚན། རྒྱལ་བ་གཡུང་དྲུང་། ནམ་མཁའ་འོད་ཟེར། བསོད་ནམས་རྒྱལ་མཚན། བསོད་ནམས་བློ་གྲོས། རྣམ་རྒྱལ་ཀ་ར། རིན་ཆེན་བློ་གྲོས། མཉམ་མེད་ཆེན་པོ། དེ་ནས་ཤེས་རབ་གཡུང་དྲུང་བར་དུ་བརྒྱུད་ནས། སུམ་ལྡན་བསམ་གཏན་ཡེ་ཤེས། དེ་ནས་དབལ་མདོ་ཁམས་པ་ཆེན་པོ་ཤར་རྫ་བ་གཞན་ཕན་ནོར་བུ། དེ་ནས་བདག་ཅག་གི་དགེ་བའི་བཤེས་གཉེན་དབྲ་སྟོན་རྒྱལ་སྲས་གཞན་ཕན་ཕྲིན་ལས་རྒྱ་མཚོའི་བར་དུ་བརྒྱུད་པའོ། དེ་ལས་བྱུང་བའི་བྱང་ཆུབ་སེམས་སྡོམ་ལ་སྡོམ་པའི་ངོ་བོ་ཇི་ལྟར་ཡིན། ངོ་བོ་ནི་གཞན་དོན་དུ་སངས་རྒྱས་ཐོབ་འདོད་ཀྱིས་ཀུན་ནས་བསླངས་ཏེ་སྒོ་གསུམ་གྱི་ཉེས་སྤྱོད་ཆ་དང་བཅས་པ་སྤོང་བའི་སེམས་པ་མཚུངས་ལྡན་དང་བཅས་པའོ། ། དེ་ལ་དབྱེ་བ་ཇི་ལྟར་མཆིས། ཀུན་རྫོབ་སེམས་བསྐྱེད་དང་དོན་དམ་སེམས་བསྐྱེད་གཉིས་སུ་མཆིས་སོ། དང་པོ་ཀུན་རྫོབ་སེམས་བསྐྱེད་ལ་འཇུག་ཚུལ་ཇི་ལྟར་ཡིན། དེ་ལ་གསུམ། སྡོམ་པ་མ་ཐོབ་པ་ཐོབ་བྱེད། ཐོབ་པ་མི་ཉམས་པར་སྲུང་ཐབས།