|
ཉམས་ན་ཕྱིར་བཅོས་པའི་ཚུལ་ལོ། དང་པོ་མ་ཐོབ་པ་ཐོབ་བྱེད་ཀྱི་ཚུལ་གང་ལྟར་ཡིན། ཡུལ་བླ་མའམ་རྟེན་གྱི་དྲུང་དུ་སྐྱབས་འགྲོ་དང་ཐར་སྡོམ་ཅི་རིགས་དང་ལྡན་པའི་གང་ཟག་གིས། ཆོ་ག་ཕྱི་རྒྱུད་ལས་བྱུང་བ་དྲི་མེད་ཀྱི་སེམས་སྡོམ་དང་ནང་རྒྱུད་ལས་བྱུང་བ་སེམས་ལུང་དང་བཀའ་རྟེན་ལས་བྱུང་བ་ཐེག་ཆེན་ལྷའི་མེ་ལོང་སོགས་ལྟར་འགལ་རྐྱེན་མེད་ཅིང་མཐུན་རྐྱེན་ཚང་བས་སྨོན་འཇུག་གི་སྡོམ་པ་ཚུལ་བཞིན་ལེན་པའོ། ། གཉིས་པ་ཐོབ་པ་མི་ཉམས་པར་སྲུང་ཚུལ་གང་ལྟར་ཡིན། འདི་ལ་སྨོན་སེམས་དང་འཇུག་སེམས་ཀྱི་བསླབ་བྱ་གཉིས་མཆིས་སོ། དང་པོ་སྨོན་པའི་བསླབ་བྱ་གང་ཡིན། དཀར་ནག་བོན་བརྒྱད་ལ་བླང་དོར་བྱ་བ་དང་ཚད་མེད་བཞི་ལ་བློ་སྦྱོང་བའོ། འཇུག་པའི་བསླབ་བྱ་གང་ཡིན། དེ་ལ་སྡེ་བཞི་ཡོད་དེ། དང་པོ་ཐུགས་རྗེ་སེམས་དཔའི་ལུགས་སྡོམ་པ་ཉི་ཤུ། གཉིས་པ་གཡུང་དྲུང་སེམས་དཔའི་ལུགས་ལ་ཐུན་མིན་གྱི་བསླབ་བྱ་བོན་གྱི་མདོ་བཞི། ཐུན་མོང་གི་བསླབ་བྱ་ལ་བསྡུས་པ་ཉེར་བརྒྱད། ཡོངས་བསྡུས་སེམས་བསྐྱེད་མ་བཞི། ཡང་དག་བསྡུས་པ་སྣ་གཅིག་པ་དང་སྦྱིན་སོགས་ཕར་ཕྱིན་དྲུག་རྣམས་སོ། གསུམ་པ་མདོ་ཁུངས་ཀྱི་བསླབ་བྱ་བཙུན་མོ་མ་འགུ་ལིང་མའི་བཅས་ལྟུང་བདུན། གཏོ་བུ་དོད་དེའི་བཅས་ལྟུང་བདུན། དགེ་བསྙེན་ཁྱབ་པའི་བཅས་ལྟུང་བདུན་རྣམས་སོ། བཞི་བ་ཟབ་མོ་གཞུང་གི་བསླབ་བྱ་ལ་སྤང་བྱ་བཞི། བླང་བྱ་བཞི། སེམས་བསྐྱེད་མ་བཞི་རྣམས་ཏེ་དེ་དག་ནི་བསླབ་བྱའོ། གསུམ་པ་ཉམས་ན་ཕྱིར་བཅོས་པའི་ཚུལ་གང་ཡིན། སྨོན་སེམས་ཉམས་པ་དང་རྩ་ལྟུང་ཆེན་པོ་བྱུང་ན་སྡོམ་པ་སླར་ཡང་བསྐྱར་དགོས་ཤིང་། རྩ་ལྟུང་འབྲིང་དང་ཆུང་ངུའི་རིགས་རྣམས་ལ་ཕྱིར་བཅོས་དང་བཤགས་སྡོམ་ཅི་རིགས་པས་དག་པར་བྱ་དགོས་སོ། གཉིས་པ་དོན་དམ་སེམས་བསྐྱེད་ཀྱི་ཚུལ་གང་ལྟར་ཡིན། དོན་དམ་སེམས་བསྐྱེད་དངོས་འཕགས་པའི་མཉམ་བཞག་གི་ཡེ་ཤེས་ཡིན་ཅིང་། རྗེས་མཐུན་པ་ལས་དང་པོ་བའི་སྟོང་ཉིད་མོས་པས་རྣམ་པ་ལམ་བྱེད་ཚུན་ཆད་དེར་གཏོགས་ལ། དེ་ཉིད་མ་བསྒོམ་ན་ཇི་བཞིན་པ་མི་སྐྱེ་ཡང་དབང་བཞི་པའི་ཡེ་ཤེས་ཚིག་ཙམ་ལས་སྐྱེ་བ་དང་བྱང་སྡོམ་གྱི་ནང་གསེས་རིག་པའི་ཡེ་ཤེས་ཀྱི་སེམས་བསྐྱེད་བཞིན་རྗེས་མཐུན་ཙམ་ཆོ་གས་བསྐྱེད་པའང་མཆིས་སོ། དེ་ལྟར་བྱང་སྡོམ་ཞུས་ནས་བོན་ལ་ལག་ལེན་ཇི་ལྟར་བགྱི། དེ་ཡང་དད་དང་སྙིང་རྗེ་སོགས་ཐེག་ཆེན་གྱི་རིགས་ཡོད་པའི་གང་ཟག་རྣམས་ཀྱིས་ཐོག་མར་སེམས་སྡོམ་བླང་ནས་བཟུང་། སྐྱབས་སེམས་སྔོན་དུ་བཏང་ནས་ཚད་མེད་བཞི་སོགས་ལ་བློ་སྦྱངས་བྱ། རྒྱུན་དུ་སྦྱིན་པ་སོགས་ཕར་ཕྱིན་དྲུག་སོ་སོ་ལ་གནས་སྐབས་ཀུན་ཏུ་ཐབས་སྣ་ཚོགས་ཀྱི་སྒོ་ནས་བརྩོན། བསྡུ་དངོས་བཞིའི་སྒོ་ནས་གཞན་ཕན་ཅི་ནུས་བྱས་ནས་དགེ་བ་ལས་སེམས་གཞན་གྱིས་མི་འཕྲོག་པ་ནས་ཚོགས་ལམ་གྱི་སྣེ་ཟིན་པ་ཡིན་པས། རིམ་གྱིས་ཞི་ལྷག་གི་ཏིང་འཛིན་དང་འབྲེལ་བར་བྱང་ཕྱོགས་ཀྱི་བོན་རྣམས་ལ་ཉམས་ལེན་བྱས་ནས་རྣམ་མཁྱེན་གྱི་གོ་འཕང་ཐོབ་པ་ཞིག་བྱ་དགོས་པ་ཡིན་ནོ། །
འོ་ན་གསང་བ་སྔགས་ཀྱི་སྡོམ་པ་ལ་ཐོག་མར་བརྒྱུད་པ་ནི་ཇི་ལྟ་བུ། བརྒྱུད་ཚུལ་ཤིན་ཏུ་མང་ཡང་ཡེ་གཤེན་ཆེན་པོ་སྤྱི་སྤུངས་ལྟར་ན། སྐུ་གསུམ་སངས་རྒྱས། གོང་མ་ཆེ་དྲུག གདུང་བརྒྱུད་བཅུ་གསུམ། མཁས་པ་མི་བཞི། འཆི་མེད་དྲན་པ། གཤེན་གྱེར་རྨ་དབྱིལ། བྲུ་ཞུ་སྤ་རྨེའུ། གཙང་གི་སྟོན་པ་བཅོ་བརྒྱད། རྗེ་མཉམ་མེད་ཆེན་པོ། ལུང་ཟིན་མཁན་རབས་ཉེར་ལྔ། གཏེར་ཆེན་ཚེ་དབང་གྲགས་པ། ཤར་རྫ་བ་ཆེན་པོ་འཇིགས་མེད་དབང་བོ། གར་དབང་གསང་སྔགས་གླིང་བ། དེ་ནས་བདག་ཅག་གི་དཔོན་གསས་བླ་མ་དམ་པ་དབྲ་སྟོན་རིག་འཛིན་འཆི་མེད་རྣམ་རྒྱལ་དབང་བོའི་བར་དུ་བརྒྱུད་པའོ། དེ་ལས་བྱུང་བའི་གསང་སྔགས་ཀྱི་སྡོམ་པ་ལ་སྡོམ་པའི་ངོ་བོ་ཇི་ལྟར་ཡིན། ཐ་མལ་གྱི་རྣམ་རྟོག་ཐབས་ཤེས་ཁྱད་པར་ཅན་གྱིས་སྡོམ་པར་དམ་བཅས་ནས་དེ་ལ་སློབ་པའི་སེམས་པ་དབང་སོ་སོ་ལས་བྱུང་བའི་ཚུལ་ཁྲིམས་སོ། དེ་ལ་དབྱེ་བ་ཇི་ལྟར་མཆིས། ཕྱི་རྒྱུད་ནང་རྒྱུད་གསང་རྒྱུད་ཀྱི་སྡོམ་པ་གསུམ་དུ་མཆིས་སོ། དེ་དག་ལ་འཇུག་ཚུལ་ཇི་ལྟར་ཡིན། དེ་ལ་གསུམ། སྡོམ་པ་མ་ཐོབ་པ་ཐོབ་བྱེད། ཐོབ་པ་མི་ཉམས་པར་བསྲུང་ཐབས། ཐ་མ་ཉམས་ན་ཕྱིར་བཅོས་པའི་ཚུལ་ལོ། དང་པོ་མ་ཐོབ་པ་ཐོབ་བྱེད་ཀྱི་ཚུལ་གང་ལྟར་ཡིན། དཔོན་གསས་མཚན་ལྡན་གྱི་མདུན་ནས་རྟེན་གྱི་གང་ཟག་སྐལ་བ་དང་ལྡན་པས་ཕྱི་ནང་གསང་བའི་དབང་བསྐུར་རིམ་པར་ཞུས་པས་དང་པོ་སྟ་གོན་ནས་དཀྱིལ་འཁོར་དུ་འཇུག་པ་དང་དངོས་གཞི་མཐའ་རྟེན་བཅས་རྫོགས་པ་ལས་སྡོམ་པ་ཅི་རིགས་སུ་ཐོབ་པའོ།
གཉིས་པ་ཐོབ་པ་མི་ཉམས་པར་བསྲུང་བའི་ཚུལ་གང་ལྟར་ཡིན། འདི་ལ་རྒྱུད་སྡེ་ཕྱི་ནང་གསང་གསུམ་གྱི་དམ་ཚིག་གསུམ་དུ་མཆིས་སོ། ཕྱི་རྒྱུད་ཀྱི་དམ་ཚིག་ཇི་ལྟར་ཡིན། བྱ་རྒྱུད་ཀྱི་དམ་ཚིག་ལ་རྣམ་པ་དྲུག་དང་། སྤྱོད་རྒྱུད་ཀྱི་དམ་ཚིག་ལ་རྣམ་གྲངས་བཞི། ཡེ་གཤེན་གྱི་དམ་ཚིག་ལ་རིག་ལྔའི་དམ་ཚིག་དང་རྩ་ལག་གི་དམ་ཚིག་རྣམས་མཆིས་སོ། ནང་རྒྱུད་ཀྱི་དམ་ཚིག་ཇི་ལྟར་ཡིན། འདི་ལ་བསྐྱེད་རིམ་དང་རྫོགས་རིམ་གྱི་དམ་ཚིག་གཉིས་མཆིས་སོ། བསྐྱེད་རིམ་གྱི་དམ་ཚིག་ཇི་ལྟར་ཡིན། རྩ་བ་དང་ཡན་ལག་གི་དམ་ཚིག་གཉིས་ཏེ། རྩ་བའི་དམ་ཚིག་ལ། དཔོན་གསས། ཡི་དམ་གྱི་ལྷ། སྔགས་དང་ཕྱག་རྒྱ། མཆེད་གྲོགས་དང་འགལ་བ། གསང་བ་བསྒྲགས་པ་སྟེ་ལྔ་དང་། ཡན་ལག་གི་དམ་ཚིག་ལ་སྤྱད་བྱ་ལྔ། མི་སྤོང་བ་ལྔ། དང་དུ་བླང་བ་ལྔ། ཤེས་བྱ་ལྔ། བསྒྲུབ་བྱ་ལྔ་བཅས་ཉེར་ལྔ་སྟེ་བསྡོམས་པས་སུམ་ཅུའོ། གཉིས་པ་རྫོགས་རིམ་གྱི་དམ་ཚིག་གང་ལྟར་ཡིན། འདི་ལ་རིམ་པ་དྲུག་ལས། དང་པོ་རྩ་བའི་དམ་ཚིག་བླ་མ་མི་སྨོད་པ་སོགས་ལྔ་དང་། གཉིས་པ་ཡན་ལག་གི་དམ་ཚིག་ལ་བཞི་ཚན་ལྔ་སྟེ་ཉི་ཤུ་དང་། གསུམ་པ་སྤྱི་དམ་ལ་དྲུག་སྟེ། དུག་སྐྱོན་ལྔ། དུག་སྐྱོད་ལྔ། སྤོང་བ་ལྔ། མི་འདའ་བ་ལྔ། བསྒྱུར་བ་ལྔ། སྤྱོད་པ་ལྔ་སྟེ་སུམ་ཅུ་དང་། བཞི་བ་སྦོམ་པོ་ལ་བཅུ་དྲུག་དང་། ལྔ་བ་ཉེས་བྱས་ལ་དགུ། དྲུག་པ་རྣམ་གྲངས་གཞན་ལ་ཆེ་བ་བཞི། རྣལ་འབྱོར་དྲུག སྐྱོན་དགུ། ཉམས་པའི་ཡན་ལག་བདུན། དབང་མ་ཞུས་པ་བདུན། གདར་ཤ་མ་ཆོད་པ་བཅུ་གཉིས་ཏེ་རྩ་བ་ལྔ་ནས་ཉམས་པ་བདུན་ཡན་ཆད་བརྒྱ་དང་རྩ་དྲུག དབང་མ་ཞུས་པ་དང་གདར་ཤ་མ་ཆོད་པ་གཉིས་བསྣན་པས་བརྒྱ་དང་རྩ་བརྒྱད་དོ། གསུམ་པ་གསང་རྒྱུད་ཀྱི་དམ་ཚིག་གང་ལྟར་ཡིན། འདི་ལ་ཐུན་མོང་གི་དམ་ཚིག་བཅུ་ཚན་གསུམ་སྟེ་སུམ་ཅུ། མཐར་ཐུག་གི་དམ་ཚིག་ཏུ་མེད་ཕྱལ་སོགས་བཞི་སྟེ་དམ་ཚིག་གི་རྐང་གྲངས་ཙམ་ནི་དེ་དག་གོ། །
གསུམ་པ་ཉམས་ན་ཕྱིར་བཅོས་བྱ་ཚུལ་ཇི་ལྟར་ཡིན། སྔགས་ཀྱི་དམ་ཚིག་ཉམས་པ་མ་བཤགས་ན་ངན་སོང་མནར་མེད་དུ་སྐྱེ་ཡང་བཤགས་ན་ནི་རང་གིས་ཀྱང་གསོ་ནུས་པས་རྩ་ལག་གི་ཉམས་ཆགས་སོ་སོར་བཤགས་ཚུལ་རང་གཞུང་ལས་བྱུང་བ་ལྟར་དང་ཁྱད་པར་ཚོགས་མཆོད་བསྐང་བཤགས་ཡིག་བརྒྱ་རྣམས་ལ་སྙིང་ནས་འབད་ཅིང་གསོ་བར་བྱའོ། དེ་ལྟར་སྔགས་སྡོམ་ཞུས་ནས་བོན་ལ་ལག་ལེན་ཇི་ལྟར་བགྱི། དེ་ཡང་བླ་
|
