|
གྱིས་བསྡུས་པའི་སྙན་ངག པྲྀ་ཏ་ཛཱ་ཏིས་བསྡུས་པའི་སྡེབ་སྦྱོར། རྗོད་བྱེད་མིང་གི་མངོན་བརྗོད། ཡན་ལག་ཟློས་གར་དང་བཅས་པ་རྣམས་སོ། །
གསུམ་པ་ཚུར་མཐོང་འཇིག་རྟེན་པའི་ལམ་རིམ་གང་ལྟར་ཡིན། ལམ་ལ་ཞུགས་པ་ནི་འཇིག་རྟེན་ཐ་མལ་བ་ཡིན་པ་ལ། ཞུགས་པ་ལམ་ལོག་པ་ཕྱི་རོལ་བ་དང་། མངོན་མཐོའི་རང་ལམ་སྲིད་པའི་བོན་དང་གཉིས་སོ། ཕྱི་རོལ་བ་ལ་ཇི་ལྟར་མཆིས། ལྷ་དང་མིའི་ཡུལ་དུ་བྱུང་བའི་ཕྱི་རོལ་པ་མང་ན་ཡང་གྲགས་ཆེ་བ། བྱེ་བྲག་པ་སོགས་རིགས་པར་སྨྲ་བ་བཞི། བྱེད་པོར་སྨྲ་བ་གཅིག དབུ་མར་སྨྲ་བ་གཉིས། སེམས་སུ་སྨྲ་བ་གཉིས་ཏེ་རྟག་ལྟ་སྡེ་དགུ། རྣམ་མཁྱེན་དགེ་སྡིག་ཚེ་སྔ་ཕྱི་མེད་པ་སྟེ་ཆད་ལྟ་སྡེ་གསུམ་བཅས་བཅུ་གཉིས་མཆིས་སོ། མངོན་མཐོའི་རང་གཞུང་གི་ལམ་ལ་ཇི་ལྟར་མཆིས། ལྷ་མིའི་ཐེག་པ་དང་ཚངས་པའི་ཐེག་པ་གཉིས་མཆིས་ཏེ། ལྷ་མིའི་ཐེག་པ་ནི་དགེ་སྡིག་ལ་བླང་དོར་བྱས་ནས་གནས་སྐབས་སུ་མངོན་མཐོ་ལྷ་དང་མིའི་གནས་ཐོབ་པ་དང་། ཚངས་པའི་ཐེག་པ་ནི་ཚད་མེད་བཞི་དང་བསམ་གཏན་བཞི་དང་གཟུགས་མེད་བཞིའི་ཏིང་འཛིན་སོགས་ལ་བརྟེན་ནས་ཁམས་གོང་མ་ནས་སྲིད་རྩེའི་བར་དུ་བགྲོད་བྱེད་ཀྱི་ལམ་ཡིན་ལ། དེ་དག་ལ་ཞི་གནས་ཡོད་ཀྱང་ལྷག་མཐོང་ཞི་རགས་ཀྱི་རྣམ་པ་སོགས་ལས་སྟོང་ཉིད་ཀྱི་ལྟ་བ་མེད་པས་ཐར་ལམ་མ་ཡིན་ཀྱང་འདི་ལ་བརྟེན་ནས་མངོན་ཤེས་དང་རྫུ་འཕྲུལ་སོགས་འགྲུབ་པས་ཕྱི་ནང་ཐམས་ཅད་ཀྱི་ཐུན་མོང་གི་ལམ་ཡིན་ཅིང་རྒྱལ་བའི་བསྟན་པ་ལ་འཇུག་པའི་སྔོན་འགྲོའང་ཡིན་ནོ། །
གཉིས་པ་ཐེག་པ་སྤྱིའི་ཤེས་བྱའི་རྣམ་གྲངས་ལ་ཇི་ལྟར་མཆིས། ཐུན་མོང་སྤྱིའི་ལུགས་ཕུང་ཁམས་སྐྱེ་མཆེད་ཀྱི་རྣམ་བཞག ཐེག་ཆེན་ཐུན་མིན་གྱི་ལུགས་འཁོར་འདས་བོན་གྱི་རྣམ་གྲངས། ཐེག་པ་སྤྱི་བསྡུས་རྟེན་འབྲེལ་གྱི་རྣམ་བཞག་དང་གསུམ་དུ་མཆིས་སོ། དང་པོ་ཕུང་ཁམས་སྐྱེ་མཆེད་ཀྱི་རྣམ་བཞག་གང་ལྟར་ཡིན། འདི་ལ་ཕུང་བོ་དང་སྐྱེ་མཆེད་དང་ཁམས་གསུམ་ལས། དང་པོ་ཕུང་བོ་ལ་ཟག་བཅས་དང་ཟག་མེད་གཉིས་ལས། དང་པོ་ཟག་བཅས་ཀྱི་ཕུང་བོ་ལ་ལྔ་ལས། དང་པོ་གཟུགས་ལ་བཅོ་ལྔ། གཉིས་པ་ཚོར་བ་ལ་གསུམ། གསུམ་པ་འདུ་ཤེས་ལ་གསུམ། བཞི་བ་འདུ་བྱེད་ལ་ལྔ་བཅུ་ང་གཅིག ལྔ་བ་རྣམ་ཤེས་ཚོགས་བརྒྱདཡོད་ལ། གཉིས་པ་ཟག་མེད་ཀྱི་ཕུང་བོ་ལའང་ལྔ་ལས། དང་པོ་ཚུལ་ཁྲིམས་ཀྱི་ཕུ་བོ་ལ་ཉིས་བརྒྱ་ལྔ་བཅུ། གཉིས་པ་ཏིངངེ་འཛིན་གྱི་ཕུང་བོ་ལ་བཅུ་དྲུག གསུམ་པ་ཤེས་རབ་ཀྱི་ཕུང་བོ་ལ་དགུ། བཞི་བ་རྣམ་གྲོལ་གྱི་ཕུང་བོ་ལ་བརྒྱད། ལྔ་བ་རྣམ་པར་གྲོལ་བའི་ཡེ་ཤེས་ཀྱི་ཕུང་བོ་ལ་དྲུག་མཆིས་སོ། གཉིས་པ་སྐྱེ་མཆེད་ལ་ནང་དང་ཕྱིའི་སྐྱེ་མཆེད་བཅུ་གཉིས་ལས། དང་པོ་ལ་མིག་རྣ་བ་སྣ་ལྕེ་ལུས་ཡིད་ཀྱི་སྐྱེ་མཆེད་དེ་རེ་རེ་ལ་དྲུག་རེ་ཕྱེ་བས་སོ་དྲུག གཉིས་པ་ལ་གཟུགས་སྒྲ་དྲི་རོ་རེག་བོན་གྱི་སྐྱེ་མཆེད་དེ་རེ་རེ་ལ་དྲུག་རེ་ཕྱེ་བས་སོ་དྲུག་གོ། གསུམ་པ་ཁམས་ལ་འབྱུང་བ་དང་དབང་བོ་དང་སེམས་ཅན་གྱི་ཁམས་གསུམ་ལས། དང་པོ་ལ་ནམ་མཁའ་རླུང་མེ་ཆུ་ས་ལ། གཉིས་པ་དབང་བོའི་ཁམས་ལ་རྟེན་མིག་སོགས་དབང་བོ་དྲུག དམིགས་པ་གཟུགས་སོགས་ཡུལ་དྲུག དེ་ལས་མིག་གི་རྣམ་ཤེས་སོགས་དབང་ཤེས་དྲུག་དང་བཅོ་བརྒྱད་དོ། གསུམ་པ་སེམས་ཅན་གྱི་ཁམས་ལ་ཁམས་གསུམ་ལས། དང་པོ་འདོད་ཁམས་ལཉི་ཤུ། གཉིས་པ་གཟུགས་ཁམས་ལ་བཅུ་བདུན། གསུམ་པ་གཟུགས་མེད་ལ་བཞིར་དབྱེར་ཡོད་པ་ཡིན་ནོ། གཉིས་པ་ཐུན་མིན་འཁོར་འདས་བོན་གྱི་རྣམ་གྲངས་གང་ལྟར་ཡིན། འདི་ལ་འཁོར་འདས་ཀྱི་བོན་གྱི་རྣམ་གྲངས་གཉིས་ལས། དང་པོ་འཁོར་བའི་བོན་ལ་སྡེ་ཚན་དྲུག་ཡོད་དེ། དང་བོ་གཟུགས་སོགས་ཕུང་བོ་ལྔ། གཉིས་པ་མིག་དང་གཟུགས་ཀྱི་སྐྱེ་མཆེད་སོགས་བཅུ་གཉིས། གསུམ་པ་མིག་གི་རྣམ་ཤེས་སོགས་རྣམ་ཤེས་དྲུག བཞི་བ་མིག་གི་འདུས་ཏེ་རེག་པ་ཤེས་པའི་རྐྱེན་གྱི་ཚོར་བ་སོགས་རྐྱེན་ཚོར་དྲུག ལྔ་བ་སའི་ཁམས་སོགས་ཁམས་ལྔ། དྲུག་པ་མ་རིག་པ་སོགས་རྟེན་འབྲེལ་བཅུ་གཉིས་རྣམས་ཏེ་དེ་དག་གི་ནང་གསེས་ནི་ཤིན་ཏུ་མང་ངོ་། གཉིས་པ་མྱང་འདས་ཀྱི་བོན་གྱི་རྣམ་གྲངས་ལ་གསུམ་ལས། དང་པོ་གོམས་བྱ་ལམ་གྱི་རྣམ་བཞག་ལ། སྤྱོད་པ་དང་ལྟ་བ་གཉིས། དང་པོ་ལ་སྦྱིན་པ་སོགས་བླ་ན་མེད་པ་ཕྱིན་པ་བཅུ། གཉིས་པ་ལ་ཕྱི་སྟོང་བ་ཉིད་སོགས་སྟོང་ཉིད་བཅོ་བརྒྱད་རྣམས་སོ། གཉིས་པ་གོམས་བྱེད་བློའི་རྣམ་བཞག་ལ་གཉིས་ལས། དང་པོ་ཐེག་དམན་དང་ཐུན་མོང་གི་རྣམ་པ་བཅུ་གཉིས་ནི་དྲན་པ་ཉེར་བཞག་བཞི། ཡང་དག་པའི་སྤོང་བ་བཞི། རྫུ་འཕྲུལ་གྱི་རྐང་བ་བཞི་རྣམས་སོ། གཉིས་པ་གཡུང་དྲུང་སེམས་དཔའ་དང་ཐུན་མོང་གི་རྣམ་པ་སོ་དྲུག་ནི་དབང་བོ་དྲུག་དང་། ཏིང་ངེ་འཛིན་ལྔ། གཤེན་རབ་ཀྱི་ལམ་བཞི། མི་འཇིགས་པའི་སྟོབས་བཅུགསུམ། ཐར་བའི་ལམ་བརྒྱད། ཕྱིར་མི་ལྡོག་པའི་འབྲས་བུ་བཅུ་དྲུག ལན་གཅིག་ཕྱིར་འོང་བའི་འབྲས་བུ་བཅུ་གཅིག རྒྱུན་དུ་ཞུགས་པའི་འབྲས་བུ་བརྒྱད་རྣམས་སོ། གསུམ་པ་གོམས་པ་མཐར་ཕྱིན་གྱི་འབྲས་བུ་ལ་བཅུ་དགུ་སྟེ། ཚད་མེད་པ་བཞི་དང་། གཡུང་དྲུང་གི་བོན་ཕྱེ་བ་མ་འདྲེས་པ་དགུ། ཡང་དག་པའི་རིག་པ་བདུན། གཤེན་རབ་ཀྱི་བདེན་པ་བཞི། སོ་སོ་ཡང་དག་པའི་རིག་པ་བཞི། མི་བསྙེལ་བའི་གཟུངས་བདུན། མཐར་གྱིས་གནས་པའི་སྙོམས་པར་འཇུག་པ་དགུ། མཚན་མ་མེད་པ་ལ་སྙོམས་པར་འཇུག་པ་བཞི། རྒྱུན་དུ་གནས་པའི་ཐུགས་རྗེ་བཞི། རྟོགས་པ་ཆེན་པོའི་ལྟ་བ་བཞི། བསྲུང་དུ་མེད་པའི་དམ་ཚིག་བཞི། ལྷུན་གྱིས་གྲུབ་པའི་ཕྲིན་ལས་བཞི། རྣམ་པར་དག་པའི་སྤྱོད་པ་བཞི། ལེགས་པར་འབྱུང་བའི་ཡོན་ཏན་བཞི། སྙོམས་པར་གནས་པའི་རང་ཉིད་བཞི། འགྱུར་བ་མེད་པའི་སྐུ་བཞི། རང་བཞིན་མེད་པའི་གསུང་བཞི། རྣམ་པར་དག་པའི་ཐུགས་བཞི། རྣམ་པ་ཐམས་ཅད་མཁྱེན་པའི་ཡེ་ཤེས་རྣམས་ཡིན་ནོ།
གསུམ་པ་སྤྱི་བསྡུས་རྟེན་འབྲེལ་གྱི་རྣམ་བཞག་གང་ལྟར་ཡིན། རྟེན་འབྲེལ་ནི་མ་རིག་པ་ནས་རྒ་ཤིའི་བར་བཅུ་གཉིས་ཏེ་མ་རིག་པ་དང་འདུ་བྱེད་དང་རྣམ་ཤེས་ནི་འཕེན་བྱེད་མིང་གཟུགས་དང་སྐྱེ་མཆེད་དང་རེག་པ་དང་ཚོར་བ་ནི་འཕང་འབྲས་དང་། སྲེད་ལེན་སྲིད་པ་གསུམ་འགྲུབ་བྱེད་དང་སྐྱེ་བ་དང་རྒ་ཤི་གཉིས་གྲུབ་འབྲས་ཏེ་ཚེ་གསུམ་ལ་སོགས་པའི་སྒོ་ནས་རྫོགས་ཤིང་འཁོར་བ་འགྲུབ་ལ་དེ་ཉིད་ལུགས་ལྡོག་གི་སྒོ་ནས་མ་རིག་པ་འགགས་ན་ཐར་བ་ཐོབ་པས་འཁོར་འདས་ཀྱི་རྣམ་བཞག་ཐམས་ཅད་བསྡུ་ན་རྟེན་འབྲེལ་རྟོགས་པ་ལ་ངེས་པར་འདུ་བས་ཅིས་ཀྱང་གལ་ཆེ་བ་ཡིན་ནོ། གསུམ་པ་ཁྱད་པར་དུ་རྒྱུ་འབྲས་བླ་མེད་ཀྱི་ཐེག་པའི་རྣམ་བཞག་གང་ལྟར་ཡིན། འདི་ལ་དབྱེ་ཚུལ་གྱི་ལུགས་མང་ཡང་འདིར་གཞུང་སྤྱིའི་དབང་དུ་བྱས་ན། རྒྱུ་མཚན་ཉིད་ཀྱི་ཐེག་པ་དང་། འབྲས་བུ་གསང་སྔགས་ཀྱི་ཐེག་པ། ཡང་རྩེ་བླ་མེད་ཀྱི་ཐེག་པ་དང་གསུམ་མཆིས་སོ། དང་པོ་རྒྱུ་མཚན་ཉིད་ཀྱི་ཐེག་པ་ལ་རྣམ་དབྱེ་ཇི་ལྟར་མཆིས། དེ་ལ་ལྷ་མི་གཞན་རྟེན་གྱི་ཐེག་པ། རང་རྟོགས་གཤེན་རབ་གྱི་ཐེག་པ། ཐུགས་རྗེ་སེམས་དཔའི་ཐེག་པ། གཡུང་དྲུང་སེམས་དཔའི་ཐེག་པ་དང་བཞིར་མཆིས་སོ། དང་པོ་ལྷ་མི་གཞན་རྟེན་
|
