དྲིས་ལན་འབེལ་གཏམ་སྐབས་ལྔ་བ་པུཎྜ་རཱི་ཀའི་ཕྲེང་བ་ཞེས་བྱ་བ་བཞུགས་སོ། །༼ལྟ་ཀློག་སྐོར ༽

གྱི་ཐེག་པའི་རྣམ་བཞག་ཇི་ལྟར་ཡིན། འདི་ཉིད་མཆོག་གསུམ་སྐྱབས་གནས་སུ་འཛིན་པས་ནང་བ་ཡིན་ཀྱང་ཐར་ལམ་དངོས་མིན་པས་མངོན་མཐོའི་ཐེག་པ་ཡིན་ལ། དེའི་ལྟ་བ་ནི་རྒྱུ་འབྲས་ཡིད་ཆེས་ཀྱི་ལྟ་བ་ཙམ་མ་གཏོགས་བདག་མེད་མ་རྟོགས། སྤྱོད་པ་ནི་མངོན་མཐོ་དོན་གཉེར་གྱི་དུས་ཁྲིམས་དང་། གཏན་ཁྲིམས་དགེ་བསྙེན་ཅི་རིགས། སྒོམ་པ་ནི་བསམ་གཟུགས་ཀྱི་ཏིང་ངེ་འཛིན་ཅི་རིགས་དང་ལྷའི་ཏིང་འཛིན་སོགས། སྒྲུབས་ཐབས་ནི་འཇིག་རྟེན་གྱི་ཁ་ན་མ་ཐོ་བ་དོར་ཞིང་དགེ་སྡིག་སྤང་བླང་ཅི་ནུས་བྱས་པས། འབྲས་བུ་ལྷ་དང་མིའི་གོ་འཕང་ཅི་རིགས་ཐོབ་པ་སྟེ། ད་ལྟར་ཡོངས་གྲགས་ཀྱི་ཕྱ་སྣང་འཕྲུལ་སྲིད་ཀྱི་ཐེག་པ་རྣམས་ཀྱང་འདིའི་ཕྱོགས་སུ་ཤས་ཆེར་གཏོགས་པར་མངོན་ནོ། གཉིས་པ་རང་རྟོགས་གཤེན་རབ་གྱི་ཐེག་པ་པའི་རྣམ་བཞག་ཇི་ལྟར་ཡིན། འདི་ལ་ནང་གསེས་རྣམ་རྩོད་ཀྱི་ཐེག་པ་དང་རང་རྟོགས་ཀྱི་ཐེག་པ་གཉིས་ལས། དང་པོ་རྣམ་རྩོད་པའི་ལྟ་བ་ནི་གཙོ་བོ་གང་ཟག་གི་བདག་མེད་རྟོགས། སྤྱོད་པ་ནི་ངེས་འབྱུང་གི་ཀུན་ནས་བསླང་བའི་སོ་ཐར་གྱི་ཚུལ་ཁྲིམས་བསྲུང་། སྒོམ་པ་ནི་ཞི་གནས་དང་ལྷག་མཐོང་གཉིས་ལ་དཔྱད་འཇོག་གིས་སྒོམས། སྒྲུབ་ཐབས་ནི་བདེན་བཞི་མི་རྟག་བཅུ་དྲུག་གཙོར་བྱས་པའི་བྱང་ཕྱོགས་སོ་བདུན་རིམ་པར་བསྒོམས་པས། འབྲས་བུ་ལམ་ལྔ་རིམ་པར་བགྲོད་ནས་ཞུགས་གནས་བརྒྱད་ཀྱི་སྒོ་ནས་རིམ་གྱིས་ལྷག་མེད་དགྲ་བཅོམ་གྱི་གོ་འཕང་ཐོབ་པའོ། གཉིས་པ་རང་རྟོགས་པའི་ལྟ་བ་ནི་གང་ཟག་གི་བདག་མེད་ཀྱི་སྟེང་དུ་གཟུང་བ་རྡུལ་ཕྲན་ཆ་མེད་རྟོགས་པའི་བདག་མེད་ཕྱེད་གཉིས་རྟོགས། སྤྱོད་པ་ནི་ཉན་ཐོས་དང་འདྲ་ལ། སྒོམ་པའང་དེ་དང་མཚུངས་པ་ལས། སྒྲུབ་ཐབས་རྟེན་འབྲེལ་ལུགས་འབྱུང་ལུགས་ལྡོག་གི་དམིགས་རྣམ་གཙོ་བོར་བསྐྱངས་པས། འབྲས་བུ་ཡང་ཟད་དང་མི་སྐྱེ་ཤེས་པའི་དགྲ་བཅོམ་པའི་གོ་འཕང་ཐོབ་པའོ། གསུམ་པ་ཐུགས་རྗེ་སེམས་དཔའི་ཐེག་པ་གང་ལྟར་ཡིན། ཐུགས་རྗེ་སེམས་དཔའི་ལྟ་བ་ནི་སྤྱིར་བདག་མེད་གཉིས་རྟོགས་ཀྱང་གྲུབ་མཐའི་དབང་གིས་གཟུང་འཛིན་གཉིས་སྟོང་གི་ཤེས་པ་དོན་དམ་དུ་འདོད། སྤྱོད་པ་ནི་གཙོ་བོར་ཐུགས་རྗེའི་སྡོམ་པ་ཇི་ཤུ་བསྲུང་བ་དང་། སྒོམ་པ་ནི་ཞི་ལྷག་གཉིས་དང་། སྒྲུབས་ཐབས་ནི་ཐེག་ཆེན་དང་འབྲེལ་བའི་བྱང་ཕྱོགས་སོ་བདུན་རྣམས་རིམ་བཞིན་ཉམས་སུ་བླང་བས་འབྲས་བུ་ནི་མི་སློབ་པའི་ལམ་ཀུན་ཏུ་འོད་ཀྱི་ས་བརྙེས་པརའདོད་དོ། བཞི་བ་གཡུང་དྲུང་སེམས་དཔའི་ཐེག་པ་གང་ལྟར་ཡིན། འདི་ལ་ནང་གསེས་སུ་སྐྱེ་མཆེད་ལྟར་སྣང་གི་དབུ་མ་པ་དང་མཚན་མེད་ཅིར་མི་གནས་པའི་དབུ་མ་པ་གཉིས་ཏེ། ལྟ་བ་ནི་མཉམ་བཞག་ཏུ་བདག་མེད་སྤྲོས་པའི་མཐའ་བརྒྱད་དང་བྲལ་བར་རྟོགས་ཀྱང་རྗེས་ཐོབ་གྲུབ་མཐའི་ཁས་ལེན་རང་རྒྱུད་ཀྱི་དམ་བཅའ་བྱེད་མི་བྱེད་སོགས་ཀྱི་ཁྱད་པར་ཡོད། སྤྱོད་པ་ནི་གཙོ་བོར་གཡུང་དྲུང་སེམས་དཔའི་བསླབ་ཚིགས་བཞི་སོགས་བྱང་སྡོམ་ལ་གནས་པ་དང་། སྒོམ་པ་དང་འབྲས་བུ་ནི་ཁྱད་པར་ཅུང་ཟད་རེ་ཡོད་པ་ལས་ཐེག་ཆེན་སྤྱི་དང་རྣམ་བཞག་ཕྱོགས་མཐུན་པ་ཡིན་ནོ། དེ་དག་སྟོན་བྱེད་ཀྱི་གཞུང་ལུགས་གང་ལྟར་མཆིས། བཀའ་དང་བཀའ་རྟེན་ལས་བྱུང་བའི་གཞུང་མང་ཡང་དེང་སང་གྲགས་ཆེ་བའི་ཕྱག་ལེན་དུ་མཚན་ཉིད་ཀྱི་གཞུང་ལྔ་པོ་ཡིན་ནོ། གཞུང་ལྔ་ཡོད་པ་དེ་དག་གང་ཡིན། བོན་སྤྱིའི་ཤེས་བྱ་ཤེས་བྱེད་ཀྱི་རྟོགས་ཚུལ་རིགས་པས་སྟོན་པ་ཚད་མ། མཁྱེན་གསུམ་སྦྱོར་བཞིའི་སྒོ་ནས་ལམ་གྱི་མངོན་རྟོགས་ཀྱི་རིམ་པ་གསལ་བར་སྟོན་པ་ཤེར་ཕྱིན། གཞི་ལམ་འབྲས་བུའི་སྒོ་ནས་ཟབ་མོ་དབུ་མའི་དེ་ཉིད་གསལ་བར་བྱེད་པ་དབུ་མའམ་ས་ལམ། སོ་ཐར་རིགས་བརྒྱད་ཀྱི་དགག་སྒྲུབ་ཀྱི་བསླབ་བྱ་ལེགས་པར་སྟོན་པ་འདུལ་བ། ཤེས་བྱ་ཐམས་ཅད་ཀྱི་རང་སྤྱིའི་མཚན་ཉིད་གསལ་བར་བྱེད་པ་སྲིད་པའི་མཛོད་ཕུག་རྣམས་སོ། གཞུང་དེ་དག་ལ་རྣམ་བཤད་ཀྱི་ཁུངས་ཅི་ལྟར་མཆིས། ཚད་མའི་བཀའ་གཞུང་སྨྲ་བའི་སེང་གེ། གངས་ཅན་གྱི་པཎྚི་ཏ་འགྲོ་མགོན་ཆེན་པོའི་ཚད་མ་ཀུན་བཏུས། ཤེར་ཕྱིན་ལ་མཁས་པ་དཔལ་ཆེན་པོའི་ཁམས་འགྲེལ། མངོན་རྟོགས་ལམ་རིམ་རྩ་བ་དང་རང་འགྲེལ། མེ་སྟོན་གྱི་དབུ་མ་བདེན་གཉིས་རང་འགྲེལ་བཅས། འགྲོ་མགོན་གྱི་ས་ལམ་རྒྱས་བསྡུས། གཉོས་རྒྱལ་གྱིས་གཞི་ལམ་འབྲས་བུའི་རྣམ་འབྱེད། ཡར་མེ་བའི་འདུལ་བ་ཆེ་ཆུང་། མཛོད་ལ་དྲན་པའི་སྒྲ་འགྲེལ་དང་གཉོས་དང་སྒ་སྟོན་གྱི་རྣམ་བཤད། མཉམ་མེད་ཀྱི་གཞུང་ཆེན་ལྔའི་ཊཱི་ཀ་འཕྲུལ་སྒྲོན་རྣམ་ལྔ་སོགས་སོ། གཉིས་པ་འབྲས་བུ་གསང་སྔགས་ཀྱི་ཐེག་པའི་རྣམ་བཞག་གང་ལྟར་ཡིན། འདི་ལ་གསང་སྔགས་བྱ་རྒྱུད་དང་། སྤྱོད་རྒྱུད་དང་ཡེ་གཤེན་གྱི་རྒྱུད་དང་། ཡེ་གཤེན་ཆེན་པོའི་རྒྱུད་དང་བཞིར་མཆིས་སོ། དང་པོ་བྱ་རྒྱུད་ཀྱི་རྣམ་བཞག་གང་ལྟར་ཡིན། བྱ་རྒྱུད་ཀྱི་ལྟ་བ་ནི་དོན་དམ་པར་བོན་ཉིད་སྤྲོས་བྲལ་གྱི་གནས་ལུགས་དང་ཀུན་རྫོབ་ཏུ་བརྟག་པའི་ལྷའི་གཟུགས་བརྙན་དུ་བལྟ་བ་དང་། སྤྱོད་པ་ནི་དཀོན་མཆོག་གསུམ་མི་སྤོང་བ་སོགས་དམ་ཚིག་དྲུག་ལ་གནས་པ་དང་། སྒོམ་པ་ནི་མཚན་མེད་སྟོང་ཉིད་དང་མཚན་བཅས་ཡི་གེ་སོགས་དྲུག་ལ་ཏིང་འཛིན་རྩེ་གཅིག་ཏུ་བསྒོམ་ཞིང་། སྒྲུབ་ཐབས་ནི་གཙང་སྦྲའི་སྒོ་ནས་བདག་དང་ལྷ་རྗེ་ཁོལ་དུ་བལྟས་ནས་བྱིན་རླབས་ཞུས་ཏེ། འབྲས་བུ་གནས་སྐབས་སུ་རིག་འཛིན་གྱི་ལུས་སོགས་དང་མཐར་ཐུག་མི་ཚེ་བདུན་ན་ཡི་དམ་ལྷའི་གོ་འཕང་ཐོབ་པའོ། གཉིས་པ་སྤྱོད་རྒྱུད་རྣམ་བཞག་གང་ལྟར་ཡིན། སྤྱོད་རྒྱུད་ཀྱི་ལྟ་བ་ནི་དོན་དམ་པར་མཚན་མ་མེད་པའི་བོན་ཉིད་དང་ཀུན་རྫོབ་ཏུ་བྱིན་རླབས་ཀྱི་རོལ་བའི་མཚན་མ་ལྷར་བལྟ་བ་དང་སྤྱོད་པ་ནི་སྤྱི་དང་ལྷ་དང་བླ་མ་སྔགས་ཕྱག་བཅས་མི་ཉམས་པར་བསྲུང་བ་དང་། སྒོམ་པ་ནི་མཚན་མེད་སྟོང་ཉིད་དང་མཚན་བཅས་གཡུང་དྲུང་གི་སྐྱེ་མཆེད་ལྔ་སོགས་བསྒོམ་ཞིང་། སྒྲུབ་ཐབས་ནི་རང་དང་ལྷ་མཆེད་གྲོགས་ལྟར་བལྟས་ཏེ་མཆོད་བསྟོད་སོགས་ཀྱིས་བསྒྲུབ་པས། འབྲས་བུ་གནས་སྐབས་སུ་ལས་དང་གྲུབ་པ་སྣ་ཚོགས་དང་མཐར་ཐུག་མི་ཚེ་ལྔ་ན་རིག་པ་འཛིན་པའི་ས་ཐོབ་པའོ། གསུམ་པ་ཡེ་གཤེན་པའི་རྣམ་བཞག་གང་ལྟར་ཡིན། ཡེ་གཤེན་པའི་ལྟ་བ་ནི་དོན་དམ་པར་ཡུལ་ཡུལ་ཅན་གཉིས་སུ་མི་འབྱེད་པར་དཀོར་བདུན་ལྷུན་གྱིས་གྲུབ་པ་དང་ཀུན་རྫོབ་སྣང་བ་ཡེ་ཤེས་ཀྱི་རོལ་བ་ལྷག་པའི་བདེན་གཉིས་དབྱེར་མེད་དུ་བལྟ་་བ་དང་། སྤྱོད་པ་ནི་རིག་ལྔ་སྤྱི་དང་བྱེ་བྲག་གི་དམ་ཚིག་ཐམས་ཅད་བསྲུང་བ་དང་། སྒོམ་པ་ནི་མཚན་མེད་སྟོང་ཉིད་དང་མཚན་བཅས་ཆོ་ག་གསུམ་དང་བཞི་སོགས་ཀྱིས་ལྷ་བསྐྱེད་ནས་ཕྱག་རྒྱ་བཞིས་རྒྱས་འདེབས་ཤིང་། སྒྲུབས་ཐབས་ནི་རང་དང་ལྷ་བཟང་ངན་མེད་པར་སྤུན་གྱི་ཚུལ་དུ་བལྟས་ནས་རང་གཞུང་ལྟར་བསྒྲུབ་ནས་དངོས་གྲུབ་ཞུས་པས། འབྲས་བུ་ཙུན་མོང་གི་གྲུབ་པ་སྣ་ཚོགས་དང་མཐར་ཐུག་མི་ཚེ་གསུམ་ན་ཡི་དམ་གྱི་གོ་འཕང་མངོན་དུ་བྱེད་པའོ། བཞི་བ་ཡེ་གཤེན་ཆེན་པོའི་རྣམ་བཞག་གང་ལྟར་ཡིན། འདི་ལ་ནང་གསེས་སུ་དབྱེ་ན་བསྐྱེད་རིམ་གཙོ་བོར་སྟོན་པ་ཕ་རྒྱུད་གསང་བ་འདུས་པ་ལྟ་བུ་དང་། རྫོགས་