དཀར་ཆག་ཡིག་ཚགས། རྩོམ་རིག

གཡུང་དྲུང་བོན་བཤད་སྒྲུབ་སློབ་གླིང་གི་མཉམ་བྲིས་སྙན་ངག

༢༠༡༧ལོའི་གཡུང་དྲུང་བོན་བཤད་སྒྲུབ་སློབ་གླིང་གི་ཨང་དང་པོའི་སུམ་བཟང་བྱ་དགའ་ཐོབ་མཁན་ས་ལམ་གོང་མའི་འཛིན་གྲྭ།

 

༼    མཉམ་བྲིས་སྙན་ངག  ༽

 

སུམ་ལྡན་ལ་བསྟོད་དབྱངས་སུ་ཕུལ།

འཆད་པའི་འགྲན་ཟླ་བྲལ་བའི་སློབ་གྲོགས་ལ།།
རྩོད་པའི་རྨོངས་མུན་སེལ་བའི་ཤེས་རབ་འཁྲུངས།།
རྩོམ་པའི་སྙན་ཤིང་འཇེབས་པའི་ཡིད་འགུག་མཁན།།
སུམ་ལྡན་སློབ་གྲོགས་ཡོངས་རྫོགས་ངོ་མཚར་ཆེ།།

རྣམ་དཔྱོད་རྩོད་པ་ཀུན་ལས་ཁྱད་དུ་འཕགས།
ཀུན་སྤྱོད་ཡིད་འོང་ལྷ་ཡི་མཆོད་གནས་གྱུར།།
གཤིས་ཀ་འཇམ་པོའི་འོད་སྣང་དྲོད་ཁོལ་ལྡན།།
སུམ་ལྡན་སློབ་གྲོགས་ཡོངས་རྫོགས་ཨེ་མ་རྨད།།

ལི་ཤེས་རིག་དཔའ་རྒོད།

ཞིབ་ཏུ་ཀློག གཡུང་དྲུང་བོན་བཤད་སྒྲུབ་སློབ་གླིང་གི་མཉམ་བྲིས་སྙན་ངག

༧རྗེ་སྨན་རི་བ་མཆོག་འཛམ་གླིང་བོན་པོ་ཡོངས་ཀྱི་སྙིང་དབུས་སུ་གཏན་དུ་གནས་ངེས་ཡིན།

ཡིད་སྐྱོ་བའི་གནས་ཚུལ།

དེ་རིང་། ༢༠༡༧ལོའི་སྤྱི་ཟླ༡༡པའི་ཚེས་༤དང་བོད་ཟླ་༩ཚེས་༡༥ལ་འཁེལ་ཡོད་ཅིང་། གཞིས་བྱེས་བོན་པོ་ཡོངས་ཀྱིས་ཤ་ཡི་ཚ་ས་དང་རུས་ཀྱི་དུང་ས་ཞེས་པའི་དཔེ་ལྟར། རང་རང་གི་ས་ན་དད་འདུན་ཆེན་པོའི་སྙིང་སྟོབས་ཀྱི་རང་གཤིས་ཕྱི་ལ་མངོན་པར་བྱས་ཏེ། གསོལ་འདེབས་དང་སྨོན་ཚིག་གི་རླབས་སྒྲ་ས་སྒང་ཧྲིལ་བོའི་ཕྱོགས་བཞི་མཚམས་བརྒྱད་ལ་ཁྱབ་པར་བྱས། དེ་ནི་དུས་རབས་ཀྱི་ཁོར་ཡུག་དང་ལོ་རྒྱུས་ཀྱི་གཉན་འཕྲང་རིང་མོ་ཅི་འདྲ་རྒོད་ནའང་། དཀའ་སྤྱད་སྡུག་རུས་ཀྱི་བསམ་བློའི་ཐུགས་སྟོབས་ལ་འགྱུར་བ་གཏན་ནས་མེད་པ་དང་། ལག་ལེན་གྱི་སྤོབས་པའི་ངར་ཤུགས་མི་ཡུལ་གྱི་རྒྱན་དུ་བཞེངས་བསྐྲུན་མཛད་པའི་ཞི་བདེ་ཡི་སྲོག་ཤིང་ཆེན་མོ་ཞིག་སྟེ། རང་དོན་སྤུ་ཙམ་མེད་པའི་ཐོག་ནས་ཉིན་གཅིག་ལྟར་སྔ་འགྱུར་གྱེར་བསྟན་སྤྱི་ཡི་བསྟན་ཆུས་ཀྱི་བྱ་བཞག་སྙོམས་སྒྲིག་བྱེད་པ་དང་། འགྲོ་བའི་ཕན་བདེ་གཙོས་པའི་མིའི་རིགས་ཀྱི་ཡར་ཐོན་དང་སྤྱི་ཚོགས་གོང་འཕེལ་འགྲོ་བའི་ཐབས་ལམ་འབའ་ཞིག་གི་ཆེད་དུ། སྐུ་ཚེ་ཧྲིལ་བོ་གཟི་བརྗིད་ཀྱི་འོད་སྣང་ལ་བསྟིམས་པའི་མི་ཕོ་རླབས་ཆེན་ཞིག་ང་ཚོ་དང་རིང་དུ་གྱེས་ཏེ་དགུང་ཞག་ཞེ་དགུ་ཚང་བའི་ཉིན་མོ་དེ་ཡིན་པས་རེད། ཞིབ་ཏུ་ཀློག ༧རྗེ་སྨན་རི་བ་མཆོག་འཛམ་གླིང་བོན་པོ་ཡོངས་ཀྱི་སྙིང་དབུས་སུ་གཏན་དུ་གནས་ངེས་ཡིན།

རྗེས་དྲན་དད་པའི་མཆོད་ཕྲེང་།།

 

རྗེས་དྲན་དད་པའི་མཆོད་ཕྲེང་།།

 


རྒྱལ་ཀུན་མཁྱེན་པའི་ཡོན་ཏན་དཔལ་རྫོགས་བླ་མའི་བླ་མ་སྨན་རི་བ།།
མཆོག་གི་སྐུ་ཉིད་མངོན་དགའི་ཞིང་ན་ཡེ་ནས་གཤེགས་བཞུགས་མ་མཆིས་ཀྱང་།།
རྟག་འཛིན་འབངས་རྣམས་རྗེས་སུ་བཟུང་ཕྱིར་མི་རྟག་སྒྱུ་མའི་འདུ་བྱེད་ཀྱིས།།
གྱ་དགུར་བཞེས་ནས་གཟུགས་སྐུ་མཚན་དཔེ་གཞི་ཡི་ཀློང་དུ་ལྷོད་དེ་བསྡུས།།


རྣམ་འདྲེན་སྟོང་གི་བོན་སྒོ་ཕྱི་ནང་ཐུགས་ཀྱི་དཔལ་དབེའི་མཛོད་དུ་བལྟམས།།
ཐུགས་བསྐྱེད་བླ་མེད་འཁོར་ལོའི་ཤུགས་ཀྱིས་ཕན་བདེའི་འཕྲིན་ལས་མཁའ་མཐར་ཁྱབ།།
མཉམ་མེད་བླ་མའི་ཐུགས་སྒམ་གྲུབ་པའི་སྐྱབས་རྗེ་ལྷ་གཅིག་སྨན་རི་བ།།

གཡུང་དྲུང་བོན་གྱི་བསྟན་པའི་གཙུག་རྒྱན་ས་གསུམ་བླ་མ་རྗེས་སུ་དྲན།། ཞིབ་ཏུ་ཀློག རྗེས་དྲན་དད་པའི་མཆོད་ཕྲེང་།།

རྩེ་དྲུག་བསྟན་འཛིན་འོད་ཟེར་མཆོག་གི་ཐུགས་འཕྲིན།

   ༧དུས་གསུམ་རྒྱལ་བ་ཀུན་གྱི་རྒྱལ་ཚབ་སྙིག་མའི་གདུལ་དཀའ་འདུལ་བའི་འདྲེན་པ་ཆེན་པོ་དཔལ་རྒྱལ་བ་སྨན་རི་བའི་མཁན་ཆེན་དམ་པ་༧ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་བསམ་བཞིན་བསྐལ་ཁུག་བསྟན་པའི་མེ་རོ་གྱེན་དུ་སྤར་མཛད་མཚན་དཔེ་སྐུ་ཡི་བཀོད་པ་མི་མཇེད་འཇིག་རྟེན་གྱི་ཁམས་སུ་བསྟན་ནས། མཁྱེན་རྩེ་ནུས་པའི་ཡོན་ཏན་གྱི་བཀོད་པ་བསམ་མཐའ་ཡས་པར་མཛད་དེ། ཞྭ་དཀར་བོན་གྱི་བསྟན་སྲོག་དམ་དུ་འཛིན་པའི་འཕྲིན་ལས་ཟླ་མེད་མངོན་པར་འཕག་ཅིང་ལྟོས་བཅས་བུ་སློབ་དུ་མར་ཐུགས་རྗེའི་བརྩེ་བ་ཆེས་པོས་ཉེ་བར་བཟུངས་ནས་ཡངས་པའི་ཐ་གྲུ་ཀུན་ཏུ་ཞང་ཞུང་རིག་གནས་སྤྱི་དང་ཁྱད་པར་མདོ་སྔགས་བླ་མེད་ཀྱི་བསྟན་པ་རིན་པོ་ཆེ་དར་ཞིང་རྒྱས་པར་མཛད་པ་སོགས་བསམ་མི་ཁྱབ་པའི་རླབས་ཆེན་གྱི་རྣམ་པར་ཐར་པ་བསྒྲངས་ལས་འདས་པར་སྐྱོངས་ཤིང་། སྐུ་གསུང་ཐུགས་གསུམ་གྱི་མཛད་འཕྲིན་མཐའ་དག་གེགས་མེད་མཐའ་རུ་ཕྱིན་ཏེ། ཁར་སང་གདན་ས་སྨན་རི་གླིང་དུ་གཟུགས་སྐུའི་བཀོད་པ་བོན་ཉིད་ཀྱི་ཀློང་དུ་བསྡུས་པའི་གནས་ཚུལ་གོ་ཐོས་བྱུང་བར་ཡིད་ཕམ་ཚད་མེད་བྱུང་བ་མ་ཟད། དམ་པ་གང་གི་ཐུགས་ཀྱི་བཞེད་དགོངས་མཐའ་དག་གེགས་མེད་ལྷུན་གྱིས་འགྲུབ་པ་དང་། བདག་ཅག་ལྟོས་བཅས་འགྲོ་བ་ཡོངས་ཀྱི་སྐྱབས་མགོན་མཆོག་དང་དབྱེར་མི་ཕྱེད་པའི་རྗེས་འཛིན་བསྟན་འགྲོའི་དཔལ་མགོན་དམ་པ་མི་འགྱང་མྱུར་བར་བདེ་འཁོད་ཡོང་བའི་རེ་ལྟོས་ཚད་མེད་ཞུ་བ་དང་ཆབ་གཅིག   གང་གི་དགོངས་རྫོགས་སུ་རང་དགོན་གྲྭ་བཙུན་ཡོངས་དང་ཕྱོགས་དང་རིས་སུ་མེད་པའི་རང་རེའི་སློབ་འབང་ལྷ་སྡེ་མི་སྡེ་ཡོངས་ཀྱིས་མཆོད་འབུལ་ཚོགས་བསགས་དང་དགེ་སྒྲུབ་སྡིག་སྤང་སོགས་རྣམ་དཀར་གྱི་བྱ་བ་རྒྱ་ཆེར་བསྒྲུབ་སྟེ་དམ་པ་གང་གི་བླ་ན་མེད་པའི་བཀའ་དྲིན་མཚོན་པར་བྱེད་ཐོག་དུས་གསུམ་འབྲལ་བ་མེད་པར་ཐུགས་བརྩེས་རྗེས་སུ་བཟུང་བའི་གསོལ་བ་ལན་བརྒྱར་འདེབས་པ་བཅས། 

རྩེ་དྲུག་བསྟན་འཛིན་འོད་ཟེར་ནས།༢༠༡༧/༩/༡༥

སྐྱང་སྤྲུལ་ནམ་མཁའ་བསྟན་འཛིན་རིན་པོ་ཆེའི་ཐུགས་འཕྲིན།

         ཞིབ་ཏུ་ཀློག སྐྱང་སྤྲུལ་ནམ་མཁའ་བསྟན་འཛིན་རིན་པོ་ཆེའི་ཐུགས་འཕྲིན།

ཀོ་རྒྱལ་དགོན་བཤད་སྒྲུབ་འདུས་སྡེའི་སློབ་མ་དག་གིས་སྨན་རིའི་མཁན་ཆེན་རིན་པོ་ཆེ་ལ་ཕུལ་བའི་ཞབས་བརྟན་མཆོད་རྩོམ་ཕྱོགས་བསྡུས།

 

རྩོམ་ཁུངས། རེབ་གོང་བོན་མང་དྲ་བ། 

 

མཁའ་ཁྱབ་འགྲོ་རྣམས་སྡུག་བྲལ་བདེ་ལྡན་ཕྱིར། །

མཉམ་མེད་བླ་མའི་གསང་གསུམ་བསྟན་དོན་དུ། །

སྐུ་ཚེ་ཧྲིལ་པོར་བཞེངས་པའི་སྨན་རི་བ། །

ཞབས་པད་གཡུང་དྲུང་ཁྲི་ལ་རྟག་བརྟན་ཤོག །

__༡_ཧོར་རུ་དགེ་བཤེས་ཡོན་ཏན་ཕུན་ཚོགས།

 

ཟླུམ་གཟུགས་གོ་ལའི་ཡང་རྩེར་ས་ཡི་སྙིང་། །

གཤེན་བསྟན་དྲི་མེད་ལུང་དང་རྟོགས་པའི་བོན། །

བསྟན་པའི་ཉི་མ་གསལ་བྱེད་འགྲོ་ཁམས་མགོན། །

རྣམ་འདྲེན་རྒྱལ་བའི་རྒྱལ་ཚབ་རྟག་བཞུཊ་གསོལ། །

___༢_ཞང་ཞུང་ཁྱུང་ལུང་དངུལ་མཁར་བ་ཚུལ་ཁྲིམས་ཕུན་ཚོགས་ཀྱིས།

 

ཟབ་རྒྱས་ལུ༵ང་རྟོག༵ས་བོན་གྱི་འོད་སྟོང་གིས། །

རྒྱལ་གཤེན་བསྟ༵ན་པ༵འི་པད་ཚལ་རྒྱས་མཛད་པའི། །

འཛམ་གླིང་ཉི༵་མ༵་རྒྱལ་བ་སྨན་རི་བ། །

སྲིད་གསུམ་སྐྱེ་དགུའི་བླ་རུ་རྟག་བརྟན་ཤོག །

___༣_ཏི་སེའི་བུ།

 

མཆོག་གསུམ་རིན་ཆེན་རྒྱལ་བ་སྲས་བཅས་ཀྱི། །

གསང་གསུམ་ཡོན་ཏན་ངོ་བོ་གཅིག་བསྡུས་པའི། །

བསླབ་གསུམ་དབང་ཕྱུག་རྒྱལ་བ་སྨན་རི་བ། །

སྲིད་གསུམ་འགྲོ་བའི་མགོན་དུ་རྟག་བརྟན་ཤོག །

___༤_ཁམས་མེ་ཞགས། ཞིབ་ཏུ་ཀློག ཀོ་རྒྱལ་དགོན་བཤད་སྒྲུབ་འདུས་སྡེའི་སློབ་མ་དག་གིས་སྨན་རིའི་མཁན་ཆེན་རིན་པོ་ཆེ་ལ་ཕུལ་བའི་ཞབས་བརྟན་མཆོད་རྩོམ་ཕྱོགས་བསྡུས།

མི་རྟག་སྒྱུ་མའི་ཀློང་གི་རང་གཟུགས།

 

རྩོམ་པ་པོ།    ཁྲི་བློ་རྩེ།


འཇིག་རྟེན་ནི་སྟོང་བའི་ཁམས་རེད།།
སྣང་བ་ནི་སྒྱུ་མའི་གཟུགས་རེད།།
རྟག་སྣང་གི་མཐའ་ན་རྩེན་པའི།།
ཚོར་མེད་ཀྱི་ཀློང་ན་ལྷགས་ཡོད།།

ལྟ་བ་འདི་བློ་ལས་འདས་པ།།
རྒྱལ་བ་ཀུན་དགོངས་པ་མཐུན་ཀྱང་།།
བསམ་མེད་ཀྱི་སྨྱོན་པ་འགའ་ཡང་།།
ཁོ་བོ་དང་ལྷན་ཅིག་གནས་ཡོད།།

སྔོན་བསགས་ཀྱི་དགེ་བའི་ལས་དེས།།
དམ་པ་ཡི་དྲུང་དུ་བཞག་ཡོད།།
བརྩོན་སེམས་ཀྱི་དམ་བཅའ་ལྷོད་པས།།
ཤེས་རིག་གི་ཕ་མཐར་མ་སོན།།

གཞོན་ནུ་ཡི་བུམ་པའི་སྐུ་དེ།།
རང་སེམས་ལས་གཞན་ན་མེད་མོད།།
ཉོན་ཤེས་ཀྱི་ངོ་བོ་མཐུག་པས།།
ཀུན་བཟང་གི་རང་ཞལ་མ་མཐོང་།། ཞིབ་ཏུ་ཀློག མི་རྟག་སྒྱུ་མའི་ཀློང་གི་རང་གཟུགས།

ཀུན་འཁོར་ལྷ་གཤེན་མཆོད་པའི་དབྱངས།

— «སྙན་གཞུང་ཤེལ་གྱི་མེ་ལོང»གི་རྩོམ་རྒྱུགས་ཕུལ་བའི་སྐོར།

དེ་ཡང་རྒྱལ་རོང་བཤད་སྒྲུབ་སློབ་གླིང་གི་འཛིན་གྲྭ་གོང་མས་བཏོན་པའི་སྒྲ་ཡི་ཀུན་བཟང་འཁོར་ལོ་ལྷ་གཤེན་མཆོད་པའི་དབྱངས་ཞེས་པ་འདི་ནི། ཞང་བོད་ཀྱི་གྲུབ་སྒྱུར་ཆེན་པོ་གཙང་གཤེན་པི་ཝང་ཅན་པ་ཞེས་སྨྲ་དབང་ཚོགས་པའི་སྤྱི་བོའི་གཙུག་རྒྱན་གྱི་ཅོད་པན་མཐོན་པོར་ཞབས་ཀྱི་པདྨོ་ངལ་གསོ་ཐོབ་པའི་བདག་ཉིད་ཅན་གང་ལ་མཚོ་བྱུང་ཚངས་པའི་བུ་མོས་སྤྱིར་གཡུང་དྲུང་གི་བོན་རིན་པོ་ཆེ་འཕེལ་རྒྱས་བྱ་བའི་དོན་དུ་འམ་སྒོས་སུ་ཀོས་ཐག་པའི་འགྲོ་བ་རྣམས་མངོན་མཐོ་དང་ངེས་ལེགས་ཀྱི་སར་བཀྲི་བ་ལ་ཡུན་རིང་བོར་གནས་ཕྱིར་དུ་དངོས་སུ་སྩལ་གནང་བྱུང་བའི་སྙན་གཞུང་ཧྲག་བསྡུས་རྒྱན་གསུམ་གསལ་བ་ཤེལ་གྱི་མེ་ལོང་གི་གཞུང་ལས།  ཐུན་མིན་སྒྲ་རྒྱན་རིག་པའི་ལེ་ཚན་མཐར་ཕྱིན་པའི་དཔེ་བརྗོད་དམ་ཁྱད་པར་དུ་རྒྱན་གསུམ་གྱི་གཞུང་ལ་བློ་སྦྱོང་ཐོབ་པའི་རྩོམ་རྒྱུགས་སུ་ཕུལ་བའི་ཐོག་མའི་ཞབས་རྗེས་ཤིག་གམ་རང་མཉམ་གྲྭ་བཙུན་སློབ་གཉེར་བ་རྣམས་ལ་བཏེགས་ཤིང་སྙན་གཞུང་དུ་འཇུག་པའི་བཞུད་ལམ་ཁྲོད་ཀྱི་ལེགས་སྐྱེས་ཆུང་ཆུང་ཞིག་ཀྱང་ལགས་ཞེས་རྒྱལ་རོང་བཤད་སྒྲུབ་སློབ་གླིང་གི«རྒྱལ་མོ་རྔུལ་ཆུ»རྩོམ་སྒྲིག་ཚན་ཆུང་གིས་སྤྱི་ཟླ་བཞི་བའི་ཚེས་མགོར་མཚམས་སྦྱོར་དུ་སྤེལ་བའོ།། ཞིབ་ཏུ་ཀློག ཀུན་འཁོར་ལྷ་གཤེན་མཆོད་པའི་དབྱངས།

གྲྭ་རྐྱང་ཞིག་གི་ཉིན་ཐོ།

རྩོམ་པ་པོ།   ཁྲི་བློ་རྩེ།

དེ་རིང་ནི། ང་ཚོའི་མཚོ་སྔོན་ཕྱོགས་ནས་རྒྱ་རྩིས་ལྟར་ལུགས་རྙིང་གི་ཟླ་གསུམ་པའི་ཚེས་གསུམ་ཡིན་ལ། ང་ད་ནངས་སྔ་མོ་གཉིད་ལས་སད་དུས་ཆུ་ཚོད་དྲུག་དང་སྐར་མ་ལྔ་བཅུ་ལ་ཐོན་འདུག དེ་དུས་གྲྭ་ཆུང་གཉིས་སྔ་མོ་ནས་ལངས་ཏེ་སྐྱོར་སྦྱང་ལ་འགྲོ་བཞིན་འདུག ང་རང་ཡང་ཡར་ལངས་ནས་གོན་པ་སོགས་གོན། སྒོ་ལ་སོང་བ་ན་ཁ་བ་སྲབ་མོ་ཞིག་གིས་རང་དགོན་བོན་བརྒྱ་སྨན་རིའི་གླིང་འདི་ཡོངས་སུ་བཀླུབས་འདུག ངས་ཨོང་བ་འགའ་འཁྱེར་ཡོང་ནས་ལྕགས་ཐབ་ནང་གི་རྡོ་སོལ་གྱི་མེ་སྟེང་དུ་བླུགས་ཏེ་ཁ་ལག་བཀྲུས། མཆོད་ཁང་ནང་དུ་སོང་ནས་མཆོད་མེ་གཅིག་དང་སྤོས་རྐང་གཅིག་སྒྲོན་ཞིང་ཕྱག་གསུམ་འཚལ། སྔ་སྲོལ་ལྟར་ཚ་བསུར་བསྔོས་ནས་ཞལ་འདོན་བསྡུས་པ་ཞིག་འདོན་ཞོར་དུ་ཇ་བསྐོལ་བ་ཡིན། ཆུ་ཚོད་བརྒྱད་དང་སྐར་མ་བཅུ་ཡས་མས་ཤིག་ཏུ་གྲྭ་ཆུང་གཉིས་སླེབས་ནས་ངེད་ཚོས་ནངས་ཇ་འཐུང་བའི་འགོ་བརྩམས། ལྷུན་གྲུབ་དཔལ་བཟང ༼ཕ་ཡུལ་ཁྲི་ཀ   ད་ལོ་ལོ་བཅུ་བཞི་ཡིན༽ གིས་སྟོན་པ་བླ་མེད་ཅེས་པའི་ཇ་མཆོད་ཀྱི་དབུ་བཟུང་ནས་ངེད་གསུམ་པའི་ཇ་མཆོད་བཏོན་ཞིང་ཇ་འཐུང་བ་ཡིན། ཁོ་གཉིས་ཀྱིས་རྩམ་པའི་སྐྱོ་མ་རེ་ལྡག་ཅིང་གོ་རེ་ཟ་བར་འདུག་ལ་ངས་ཇ་དང་གོ་རེ་གཉིས་ལོངས་སྤྱོད་བྱས་པ་ཡིན། ཇ་འཐུང་ཚར་རྗེས་བསྟན་འཛིན་ལྷུན་གྲུབ ༼ ཕ་ཡུལ་རྩེ་ཁོག   ད་ལོ་ལོ་བཅོ་ལྔ་ཡིན  ༽  ཀྱིས་ཅ་ལག་སོགས་ལ་བདག་གཉེར་བྱས།
ཆུ་ཚོད་དགུ་བའི་སྟེང་ནམ་རྒྱུན་ལྟར་གྲྭ་ཆུང་གཉིས་སྐྱོར་སྦྱང་ལ་འགྲོ་བ་དང་ངས་རང་གི་འགན་འཁྲི་ལྟར་དཔེ་ཁྲིད་ཀྱི་འགོ་བརྩམས། ཆུ་ཚོད་དགུ་ནས་བཅུ་བའི་བར་བསྡུས་གྲྭའི་འཛིན་གྲྭ་གོང་མ་ལ་དཔེ་ཁྲིད་བྱེད་ཁུལ་བྱས་པ་ཡིན། ད་ལྟ་འཛིན་གྲྭ་འདི་ལ་གྲྭ་བ་མང་པོ་མེད་ལ་འདི་ཚོའི་གྲོགས་པོ་ཁ་ཤས་ཤིག་ད་ལོ་རང་རང་གི་འདོད་མོས་ལྟར་རང་དགོན་གྱི་ལོ་གསུམ་སྒྲུབ་གྲྭ་ལ་བཞུགས་ཡོད། ཞིབ་ཏུ་ཀློག གྲྭ་རྐྱང་ཞིག་གི་ཉིན་ཐོ།