དཀར་ཆག་ཡིག་ཚགས། དྲིས་ལན།

གྲུབ་མཐའི་ཕྱོགས་ཞེན་ཁྲོད་ཀྱི་དངངས་སྐྲག

____ བླ་བྲང་སྐལ་བཟང་དང་འོད་སྐལ་བཟང་རྡོ་རྗེ་གཉིས་ལ་དཀྱིས་གཅིག་ཏུ་ཕུལ་བ།

བོན་ནག་ཚང་ཡེ་ཤེས་བློ་གྲོས།

ཉིན་འགའ་ཤས་ཀྱི་སྔོན་ལ་བླ་བྲང་སྐལ་བཟང་དང་འོད་སྐལ་བཟང་རྡོ་རྗེ་ཟུང་གིས་མ་ཧཱ་བྷ་ར་ཏཱ་ཞེས་པའི་ཚོགས་པའི་ནང་དུ་སྐད་ཆ་མང་པོ་ཞིག་བརྗོད་བཞིན་ཡོད་ལ་མཇུག་མཐར་སྟོན་པ་གཤེན་རབ་ཅེས་པ་ཞིག་མེད་པར་བརྗོད་པ་དེ་ཡིན། དེ་ལྟར་བརྗོད་ཐུབ་པ་དེ་ནི་ཁོ་གཉིས་ལ་མཚོན་ན་ཁོ་གཉིས་ཀྱི་མི་ཚེ་ཐོག་གི་ཆེས་གཟི་བརྗིད་ལྡན་པ་དང་ཆེས་རིན་ཐང་ལྡན་པའི་གཏམ་ཞིག་ཏུ་སྣང་
བཞིན་འདུག

བོན་པོ་ཚོས་ཀྱང་སྐད་ཆ་དེ་ཐོས་རྗེས་མ་རངས་པ་དང་བཅས་ཏུང་ཧོང་གཏེར་ཡིག་ནང་གི་སྟོན་པ་གཤེན་རབ་ཅེས་པའི་ཚིག་ཁ་ཤས་རྒྱབ་རྟེན་དུ་བྱས་ཏེ་དགག་ཡིག་རེ་ཟུང་བྲིས་འདུག དོན་ལ་ཞིབ་ཏུ་བསམ་ན་འདི་གཉིས་ལ་དེ་འདྲ་གཙོ་ཆེར་བྱེད་དགོས་དོན་མི་འདུག རྒྱུ་མཚན། ལྟ་རྒྱ་དང་མཐོང་རྒྱ་གང་གིས་དབེན་པའི་རྒྱུག་ཁྱི་རེ་ཟུང་གི་ཟུག་སྐད་ཡིན་པས་རེད༼འདི་ངས་ཁོ་གཉིས་ཀྱི་མི་གཞི་ལ་ཁྱད་གསོད་བྱས་པ་མིན། དོན་དངོས་འདི་འདྲ་ཞིག་རེད༽། ཞིབ་ཏུ་ཀློག གྲུབ་མཐའི་ཕྱོགས་ཞེན་ཁྲོད་ཀྱི་དངངས་སྐྲག

མཁས་དབང་མཁར་རྨེའུ་བསམ་གཏན་ལ་བཅར་འདྲི་ཞུས་པ།

12325
གསར་འགོད་པ། དོན་འགྲུབ་བཀྲ་ཤིས།

     གསར་འགོད་པ་དོན་འགྲུབ་བཀྲ་ཤིས་ཡུ་རོབ་ནང་སྐོར་སྐྱོད་དང་བསྟུན་ཏེ་ཕྱི་ལོ་ ༢༠༡༥ ཟླ་ ༡༠ ཚེས་ ༢ ཉིན། ཧྥ་རན་སིའི་རྒྱལ་ས་ཕ་རེ་སིའི་གྲོས་ཚོགས་སྤྱི་གླིང་དུ། རྒྱལ་སྤྱིའི་བོད་རིག་པའི་ལྷན་ཚོགས་ཀྱི་ཚོགས་གཙོ་ཟུར་བ་དང་བོན་གྱི་ལོ་རྒྱུས་མཁས་པ་མཁར་རྨེའུ་བསམ་གཏན་རྒྱལ་མཚན་མཆོག་ལ། རྒྱལ་སྤྱིའི་བོད་རིག་པའི་ད་ལྟའི་གནས་སྟངས་དང་གཡུང་དྲུང་བོན་སོགས་ཀྱི་སྐོར་ལ་བཅར་འདྲི་ཞུས།

དྲི་བ། རྒྱལ་སྤྱིའི་བོད་རིག་པའི་ཚོགས་ཆེན་ལ་བོད་ཕྱི་ནང་གཉིས་སུ་གདེང་འཇོག་ཆེན་པོ་གནང་གི་ཡོད་པ་མ་ཟད། དེང་སྐབས་བོད་ཕྱི་ནང་གཉིས་དང་ཕྱི་རྒྱལ་མི་རིགས་ཁྲོད་བོད་རིག་པའི་མཁས་པའང་མང་པོ་ཞིག་ཡོང་བཞིན་ཡོད་སྟབས། ད་ལྟ་རྒྱལ་སྤྱིའི་ཐོག་བོད་རིག་པ་ཟེར་བ་འདིར་གདེང་འཇོག་དང་ངོས་འཛིན་གང་འདྲ་ཡོད་དམ། ཞིབ་ཏུ་ཀློག མཁས་དབང་མཁར་རྨེའུ་བསམ་གཏན་ལ་བཅར་འདྲི་ཞུས་པ།

ལོག་རྟོག་ཚར་གཅོད།

རྩོམ་པ་པོ།   གངས་སེང་།        རྩོམ་ཁུངས།    ཧི་མ་ལ་ཡའི་བོན།

 

འཛམ་གླིང་ས་སྒང་ཡངས་པའི་ལྟེ་བ་རུ།།
བྱམས་དང་སྙིང་རྗེའི་གཞི་བཟུང་བྱང་ཆུབ་སེམས།།
རིས་མེད་སྐྱེ་འགྲོ་ཀུན་གྱི་ཕན་བདེའི་གཞི།།
ཐོག་མར་སྐྲུན་མཛད་གཤེན་རབ་མི་བོར་འདུད།།
སྐྱ་ཀ་ཤག་ཅེས་འབོད་པའི་སྐྱེ་བོ་དེས།།
གྲུབ་མཐའི་ཆགས་སྡང་རྒྱ་ལས་མ་འདས་པའི།།
བོན་ལ་སྨོད་པའི་འཆལ་གཏམ་ཁུངས་མེད་ཅིག།
ཉེ་ཆར་དྲྭ་ལམ་རྣམས་སུ་རྡོལ་བཞིན་མཆིས།།
དེའི་ལན་བན་བོན་ཀུན་ཀྱི་ལོ་རྒྱུས་ལ།།
སྤྱན་བརྒྱ་ཡངས་པའི་ལུང་རིགས་ཚད་མའི་གཏམ།།
ཆགས་སྡང་བསྲེ་བསླད་མ་འདྲེས་བརྒལ་བརྟག་ཅིག།
གཟུ་བོའི་བློ་ཡིས་བཤད་ཀྱིན་གོ་བར་གྱིས།།

  ༼ཞང་ཞུང་ཡུལ་ལ་སྨར་ཡིག་འབྲུ་གཅིག་མེད།༽ །ཅེས་པའི་གཏམ་དེས་ཁྱོད་ཀྱི་མཐོང་རྒྱ་ནི། །ལག་མཐིལ་ཙམ་ལས་མེད་པར་ལྷང་ངེར་བུད། །བོན་གྱི་ལོ་རྒྱུས་རྒྱ་མཚོ་ལྟ་བུ་ལས། །ཆུ་ཐིགས་ཙམ་ཞིག་འདི་རུ་འགོད་ཀྱིན་ཉོན། །བརྒྱ་པའི་མགོན་པོ་གཤེན་རབ་མི་བོ་ཡིས། །དགུང་ལོ་ཉེར་ལྔར་བསྟན་པ་རྗེས་བཞག་སྐབས། །སྒོ་བཞི་མཛོད་ལྔ་ཐེག་པ་རིམ་དགུ་སོགས། །མུ་ཁྱུད་མཚོ་གླིང་དཀར་ནག་བཀྲ་གསལ་དུ། །ཀོང་ཙེ་འཕྲུལ་གྱི་རྒྱལ་པོས་ཡོན་བདག་བྱས། །གཏད་གཉེར་སློབ་མས་བཀའ་རྣམས་སོ་སོར་བསྡུས། །ཤེས་རབ་ཕུལ་གྱིས་འཕྲུལ་ཡིག་བཞི་བཅུ་ལ། །ཐབས་ཀྱི་མཆོག་གིས་ང་རོའི་དབྱངས་སུ་དྲངས། །ཐབས་ཤེས་ཟུང་དུ་འབྲེལ་བའི་བྱིན་རླབས་ལས། །མིང་དང་ཚིག་འབྲེལ་ལེའུ་བམ་པོ་ཕྱེས། །སྒོ་བཞི་མཛོད་ལྔ་གླེག་བམ་བརྒྱ་ཕྲག་བྲིས། །མ་འོངས་འདྲེན་ཕྱིར་བསྟན་པ་རྗེས་བཞག་མཛད། །དེ་ཚེ་ ཞིབ་ཏུ་ཀློག ལོག་རྟོག་ཚར་གཅོད།

བོན་གྱི་ལྟ་གྲུབ་སྐོར་འཆད་ཁྲིད་དང་། དྲི་བ་དྲིས་ལན།

བོན་གྱི་ལྟ་གྲུབ་སྐོར་འཆད་ཁྲིད་དང་། དྲི་བ་དྲིས་ལན།

རྩོམ་པ་པོ། ཁྱུང་བཙུན་གངས་ལྷ་དཀར་པོ།  རྩོམ་ཁུངས། ཧི་མ་ལ་ཡའི་བོན།

ངོ་སྤྲོད་མདོར་བསྡུས། ༼ མདའ་སྨྱུག་གླེང་སྟེགས ༽སྐད་འཕྲིན་ཚོགས་པའི་འགན་འཛིན་པས་གཡུང་དྲུང་བོན་གྱི་དགེ་བཤེས་ཆེན་མོ་ཤེས་རབ་སྦྱིན་པ་མཆོག་ཆེད་དུ་སྐད་ཚོགས་སུ་གདན་བཞུགས་གནང་སྟེ་དགེ་བཤེས་ཁོང་གིས་༼ བོན་གྱི་ལྟ་གྲུབ ༽སྐོར་དང་འབྲེལ་ཏེ་གསུང་བཤད་གནང་སྟེ་༼ མདའ་སྨྱུག་གླེང་སྟེགས༽སུ་བཞུགས་པའི་རིས་མེད་ཀྱི་ཤེས་ལྡན་མང་བོ་ལ་བོན་གྱི་སྐོར་མཚམས་སྦྱོར་གནང་ཡོད།

   མདའ་སྨྱུག་གླེང་སྟེགས་སུ་བཞུགས་པའི་བླ་མ་དགེ་བའི་བཤེས་གཉེན་དང་འདིར་ཡོད་པའི་མཁས་དབང་རྣམས་པ་ཚང་མ་ལ་ཐོག་མར་ངས་འཚམས་འདྲི་བཀྲ་ཤིས་བདེ་ལེགས་ཞུ། རང་གིས་སྐད་ཆ་ཡག་པོ་ཞིག་བཤད་མ་ཤེས་ཀྱང་འདི་འདྲ་བཤད་རྒྱུའི་གོ་སྐབས་སྟེར་བས་ཚོགས་གཙོ་མཆོག་ལ་ཐུགས་རྗེ་ཆེ་ཞུ། ང་ནི་གཡུང་དྲུང་བོན་གྱི་ཆོས་རྒྱུད་ལ་ཞུགས་པའི་དགེ་བཤེས་ཤེས་རབ་སྦྱིན་པ་ཟེར་གྱི་ཡོད། རང་གིས་གཞུང་ལུགས་སྐོར་ནས་རྒྱ་ཆེན་པོ་ཞིག་བཤད་ཤེས་ཀྱི་མེད། ཡིན་ན་ཡང་འདི་ལྟ་བུའི་གོ་སྐབས་ཞིག་རང་ལ་སྤྲད་ཡོང་དུས་བཤད་ཀྱི་མིན་ཟེར་ན་ཡག་པོ་མི་འདུག རང་གིས་འདིར་གོ་སྐབས་དེ་ཡག་པོ་ཞིག་ཡིན་པའི་བསམ་བློ་འདོན་ནས་རང་གིས་ཤེས་སྟངས་དྲན་སྟངས་ཤིག་ཁྱེད་རྣམ་པ་ལ་ཞུ་བསམ་པ་དེ་ཡིན། མ་ཤེས་པ་འདྲ་བྱུང་ན་མཁས་དབང་རྣམ་པ་ལ་མཐོལ་ལོ་བཤགས། བཀྲ་ཤིས་བདེ་ལེགས། ཞིབ་ཏུ་ཀློག བོན་གྱི་ལྟ་གྲུབ་སྐོར་འཆད་ཁྲིད་དང་། དྲི་བ་དྲིས་ལན།

མཁན་པོ་ཚུལ་བློ་ལ་རྒོལ་ལན་དུ་ཕུལ་བ་ལུང་རིག་ཚད་མའི་རྔ་སྒྲ།

རྩོམ་པ་པོ། མཁར་ནག་སྐལ་བཟང་རྒྱ་མཚོ།    རྩོམ་གྱི་ཡོང་ཁུངས།   ཧི་བོན་དྲ་བ།

དེ་ཡང་གསེར་རྟ་མཁན་པོ་ཚུལ་ཁྲིམས་བློ་གྲོས་ཀྱིས་རྒྱ་ཡིག་གི་ལམ་ནས་བོན་པོའི་ཆོས་ལུགས་མཚམས་སྦྱོར་བྱས་པའི་ནང་དུ། བོན་པོའི་ཆོས་ལུགས་སངས་རྒྱས་ཆོས་ལུགས་མིན་ཚུལ་གྱི་གཏམ་འགའ་ཡོད་པས། དེ་ལ་ཉིན་འགའི་སྔོན་དུ་བགྲོ་གླེང་གི་ཚུལ་དུ་རྩོམ་ཐུང་ཞིག་བྲིས་ནས་བོན་བརྒྱ་དགོན་པས་གཙོ་གཉེར་བྱས་པའི་དཔྱོད་ལྡན་མཆོད་པའི་མེ་ཏོག་གི་རྩོམ་སྒྲིག་པ་ལ་བསྐུར་ཟིན་མོད། འོན་ཀྱང་དེའི་རྗེས་ནས་སྣང་ཞིག་དགོན་པའི་དགེ་བཤེས་འགའ་གྲོང་ཁྱེར་ཁྲིན་འདུ་རུ་སོང་ནས་མཁན་པོ་ཁོང་དང་བགྲོ་གླེང་མཛད་ནས་ཁོང་གིས་སྔར་གྱི་རྩོམ་དེ་ལ་གསལ་བཤད་ཅིག་བྲིས་འདུག གསལ་བཤད་དེ་ཧི་མ་ལ་ཡའི་བོན་གྱི་དྲ་བ་རུ་བཀོད་ཡོད། ཡིན་ནའང་གསལ་བཤད་བྱས་པའི་བོད་ཡིག་གི་རྩོམ་དང་དེ་སྔ་རྒྱ་ཡིག་གི་རྩོམ་གཉིས་ལ་གོ་བ་ལེན་སྟངས་མི་འདྲ་ས་རེ་བྱུང་ཡོད་པས། གསལ་བཤད་བྱས་པའི་བོད་རྩོམ་དེའི་ནང་དུ་གཡུང་དྲུང་བོན་ལ་བརྟག་དཔྱད་དང་དགག་སྒྲུབ་ཅི་ཡང་མཛད་མེད་ཚུལ་དང་། ད་དུང་གྲུབ་མཐའི་བར་གྱི་རྩོད་པས་སྔར་བོད་ཁམས་ལ་འཕོང་རྐྱེན་བཟོས་པས་ད་ལྟ་དེ་ལྟར་བྱེད་མི་རུང་སོགས་མཁས་མདོག་བཙུན་མདོག་གིས་བྲིས་ཡོད་མོད། འོན་ཀྱང་ལུང་རིག་གཉིས་གའི་འཕྲང་ལ་འཕྱར་ན་དེ་ལས་སྐྱོན་མང་དུ་མཐོང་བས་ཚིག་འཁྲུལ་གྱིས་མགོ་སྐོར་བཏང་བ་ཙམ་ལས་བདེན་པ་དང་གཟུ་བོར་གནས་པའི་ཚིག་མཐོང་རྒྱུ་མེད། དེས་བས་འདི་ནས་དེ་ལ་དཔྱད་གཏམ་ཞིག་སྤེལ་རྒྱུ་སྤྲོ་བས་འཆད་པར་བྱ་བ་ལ། ཞིབ་ཏུ་ཀློག མཁན་པོ་ཚུལ་བློ་ལ་རྒོལ་ལན་དུ་ཕུལ་བ་ལུང་རིག་ཚད་མའི་རྔ་སྒྲ།

བོན་ལུགས་ལ་བླ་མ་སྤྲུལ་སྐུ་ངོས་འཛིན་བྱེད་སྟངས་ག་འདྲ་ཡིན་ནམ།

       བླ་མའི་རིགས་ལ་གདུང་བརྒྱུད་ཀྱི་བླ་མ་ནི།   དམུ་རིགས་གཤེན་ཀྱི་གདུང་བརྒྱུད་དང་།   རྒྱལ་བ་བྲུའི་གདུང་བརྒྱུད།  དབང་ལྡན་ཞུའི་གདུང་བརྒྱུད།   རྒྱལ་སྲས་སྤའི་གདུང་བརྒྱུད།  མཁས་པ་རྨེའུའི་གདུང་བརྒྱུད།   དམ་པ་ཁྱུང་གི་གདུང་བརྒྱུད།   ཞིག་པོ་བཅོ་བརྒྱད་ཀྱི་གདུང་བརྒྱུད་ལ་སོགས་དང་།   འདུལ་བརྒྱུད་ཀྱི་བླ་མ་ནི་གཙོ་བོར་ལམ་བསླབ་པ་རྣམ་གསུམ་གཙིགས་སུ་འཛིན་ཅིང་མདོ་སྔགས་སེམས་གསུམ་གྱི་གཞུང་ལུགས་ཁག་ཐོས་བསམ་སྒོམ་བསྒྲུབ་དང་དེའི་དབང་ལུང་ཁྲིད་སོགས་ཆ་ཚང་ཞིང་།   རིག་པའི་གནས་ལྔ་ལ་སོགས་སྦྱངས་འབྲས་ཚད་མཐོར་ཕྱིན་ཏེ་དགེ་བའི་བཤེས་གཉེན་ཆེན་པོའི་མཚན་བཏགས་བཞེས་་གྲུབ་རྗེས་འོས་མི་དམིགས་ཚད་ལྡན་པ་རྣམས་ལྷ་བླའི་ལུང་རྟགས་གསལ་པོར་བརྟག་པའི་སྒོ་ནས་རྟགས་རིལ་བབས་པའི་སྐྱེས་བུ་དེ་ལྷ་མི་ཀུན་གྱི་གཙུག་ཏུ་བཀུར་འོས་པའི་མཚན་ལྡན་གྱི་བླ་མར་ངོས་འཛིན་བྱེད །    བསྒྲུབ་བརྒྱུད་གྱི་བླ་མ་ནི་གདུང་བརྒྱུད་ཡོད་མིན་ལ་མ་བལྟོས་པར་མཁས་གྲུབ་ཟུང་ལྡན་གྱི་སྐྱེས་བུ་དང་།   ཉམས་རྟོགས་མངོན་དུ་གྱུར་པའི་རྟོགས་ལྡན་རྣམས་དང་།   གཞན་ཡང་ལུང་ཟིན་གྱི་སྐྱེས་བུ་དང་།  ལུང་ཟིན་མིན་ལ་མ་བལྟོས་པར་གང་ལ་གང་འདུལ་གྱི་ཚུལ་བསྟན་པའི་མ་ངེས་སྤྲུལ་སྐུ་སོགས་དུ་མ་ཡོད་པའི་ནང་ནས་གདུང་བརྒྱུད་ཁག་ནང་གཙུག་རྒྱན་དམ་པ་དམུ་རིགས་གཤེན་གྱི་གདུང་བརྒྱུད་དང་།  འདུལ་བརྒྱུད་ཀྱི་ནང་ནས་ཞྭ་དཀར་བསྟན་པའི་གཙུག་རྒྱན་རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་གཙོ་བོར་འཛིན་སྲོལ་ཡོད།   བོན་པོའི་ས་ཁུལ་ཁག་ལ་གདུང་བརྒྱུད་ཀྱི་བླ་མ་གདེང་འཇོག་ཚད་མཐོ་བྱེད་སྲོལ་ཡོད་ལ་སྤྲུལ་སྐུའི་བླ་མ་དེ་ཙམ་གཙུགས་སུ་མི་འཛིན།  ཡིན་ནའང་སྤྲུལ་སྐུ་མཚན་ཉིད་ལྡན་པ་གཙུག་ཏུ་བཀུར་ཡང་བླ་མ་གྲོངས་ཚད་ལ་སྤྲུལ་སྐུ་རེ་དང་།  ཆབ་སྲིད་དང་རྒྱུ་དངོས་ལ་དམིགས་པའི་སྤྲུལ་སྐུ་གཙིགས་སུ་འཛིན་སྲོལ་མེད་པའོ།།

འགོ་བ་དགེ་བཤེས་བསྟན་འཛིན་འབྲུག་གྲགས།

བོན་གཞུང་ཁག་གི་དབུ་ལ་ཞང་སྐད་སྨོས་དོན་དང་ཞང་སྐད་བོད་སྐད་ལ་བསྒྱུར་ཚུལ་ག་འདྲ་ཡིན་ནམ།

    སྤྱིར་གསུང་རབ་གང་ཞིག་དབུ་ལ་སྐད་རིགས་གང་སྨོས་པ་དེ་བྱུང་བའི་ཁུངས་བཙུན་པའི་སྒོ་ནས་སྨྲས་པ་གཙོ་ཆེ་ལ།  བོན་གྱི་བསྟན་པ་བྱུང་ཡུལ་གཙོ་བོ་ཞང་ཞུང་ཡིན་པའི་ཆ་ནས་བོན་གྱི་གསུང་རབ་རྣམས་ཀྱི་དབུ་ལ་ཞང་ཞུང་སྨར་གྱི་སྐད་ཅེས་བྱུང་བ་ནི་བྱུང་ཁུངས་བཙུན་པའི་དགོས་པ་རྒྱུ་མཚན་དང་།   བཀྲ་ཤིས་པའི་དོན་ཅན་གྱི་ཚུལ་དུ་སྨྲས་པ་ཞིག་གོ    བོན་རྣམས་སྒྲ་སྐད་བསྒྱུར་ཚུལ་ལ།   ལྔ་འགྱུར་དང་།  སུམ་འགྱུར།  ཉིས་འགྱུར་སོགས་ཅི་རིགས་ཤིག་ཡོད་དོ།   བོན་འགའ་ཞིག་ནི་ཀ་པི་ཏ་ལྷའི་སྐད་ལས་སཾསྐྲྀ་ཏའི་སྐད་དུ་བསྒྱུར།   དེ་སྟག་གཟིག་གི་སྐད་དུ་བསྒྱུར།   དེ་ཞང་ཞུང་གི་སྐད་དུ་བསྒྱུར།  དེ་བོད་སྐད་དུ་བསྒྱུར་ལ་ལྔ་འགྱུར་རོ།    བོན་ཁ་ཤས་ནི་སྟག་གཟིག་ནས་ཞང་ཞུང་དུ་བསྒྱུར།   ཞང་ཞུང་ནས་བོད་དུ་བསྒྱུར་བ་ལ་སུམ་འགྱུར་རོ།  བོན་ཁ་ཤས་ནི་རྒྱ་གར་དང་།   རྒྱ་ནག   སུམ་པ།   མི་ཉག་ལ་སོགས་ཅི་རིགས་བསྒྱུར་ཏེ་དབུ་ལ་སྐད་རིག་སོ་སོར་བྱུང་བས་གསལ་ལོ།   བོན་མང་ཆེ་བ་ནི་ཞང་ཞུང་སྨར་གྱི་སྐད་ལས་སྤུ་རྒྱལ་བོད་ཀྱི་སྐད་དུ་བསྒྱུར་བ་ལ་གཉིས་འགྱུར་དེ་ཁྱབ་ཆེ་བའོ།  ལོ་པན་རྣམས་ཀྱིས་ཀྱང་ཞང་སྐད་བོད་སྐད་དུ་བསྒྱུར་བའི་ཚུལ་ནི།   བདལ་འབུལ་ལས།  “ཡུལ་བྱེ་མ་གཡུང་དྲུང་དུ་ཞང་ཞུང་སྟོང་རྒྱུང་མཐུ་ཆེན་གྱིས།  བོད་ཤ་རི་དབུ་ཆེན་ལ་བོན་ཁྲི་སྡེ་བཤད་ཅིང་བསྒྱུར”ཞེས་པ་ལྟར་བོན་སྡེ་མང་ཆེ་བ་ཁོང་རྣམ་གཉིས་ཀྱིས་བསྒྱུར་བ་ཤས་ཆེ་ལ།  རྣམ་པ་གཅིག་ཏུ་ན།  ཞང་ཞུང་མཁས་པ་སྟོང་རྒྱུང་མཐུ་ཆེན་དང་།   བོད་ཀྱི་མཁས་པ་སེ་ལྡེ་མེ་གསུམ་བཅས་ལོ་པན་བྱད་དང་མེ་ལོང་གི་ཚུལ་དུ་བསྒྱུར་ཚུལ་ནི།   སྒྲ་འགྲེལ་ལས།   “ཡུལ་བྱེ་མ་ལ་གཡུང་དྲུང་།  མཁར་གད་ཀྱི་བྱི་བ་མཁར་དུ།  དཔོན་གསས་མཁས་པ་མི་བཞི་བཀའ་བགྲོས་ནས།   ཞང་ཞུང་སྐད་ལས་བོད་སྐད་དུ་བསྒྱུར་བའི་དུས་སུ་ལོ་པན་བྱད་དང་མེ་ལོང་གི་ཚུལ་གྱིས།   ལོ་པན་རྒྱུན་མི་འཆད་པའི་དོན་དུ་བསྒྱུར”ཞེས་སོགས་གསལ་བ་ལྟར་རོ།།

འགོ་བ་དགེ་བཤེས་བསྟན་འཛིན་འབྲུག་གྲགས།

བོན་གྱི་བསྟན་པ་གནས་པའི་ཡུན་ཚད་ག་ཚོད་ཡིན་ནམ།

       མདོ་གཟེར་མིག་ལས།   “སུམ་ཅུ་སྐུས་འདུལ།   སུམ་ཅུ་གསུང་གིས་འདུལ།   སུམ་ཅུ་ཐུགས་ཀྱིས་འདུལ།  དེ་ལྟར་དགུ་བཅུ་ལོན་ནས་སླད་ཀྱི་སྟོན་པ་འབྱོན”ཞེས་པ་ནི་ཚེ་ལོ་བརྒྱ་པའི་སྟོན་པ་གཤེན་རབ་ཀྱི་བསྟན་པའི་གནས་ཚད་བསྟན་ཏེ་མདོ་སྡེའི་དགོངས་དོན་ཞིབ་དཔྱད་མི་ལོ་སྟོང་ཕྲག་རེ་ལ་ཚེ་ལོ་གསུམ་རེ་བྲི་བའི་དབང་དུ་བྱས་པས་སྐུ་བསྟན་ཁྲི་གཅིག་ཡུན་ལ་ལོ་སུམ་ཅུ་འགྲོ་བས་ན་སུམ་ཅུ་སྐུས་འདུལ་གསུངས་པ་དང་།  དེ་བཞིན་གསུང་བསྟན་དང་།  ཐུགས་བསྟན་ཁྲི་རེའི་ཡུན་ལ་ལོ་སུམ་ཅུ་རེ་འགྲོ་བས་ན་སྐུ་གསུང་ཐུགས་ཀྱི་བསྟན་པའི་གནས་ཚད་མི་ལོ་ཁྲི་གསུམ་གྱི་དུས་ཡུན་ལ་ལོ་དགུ་བཅུ་འགྲོ་བས་ན་དེ་ལྟར་གསུངས། སྟོན་པ་གཤེན་རབ་འཁྲུངས་ནས་ད་ལྟ་འབྱུང་ལྡན་སུམ་བརྒྱ་གཅིག་གི་ནང་ཚན་ཉག་མ་བཅོ་ལྔ་པ་ས་ཕོ་སྟག་གི་ལོ་བར་ལ་མི་ལོ༡༨༠༡༥ཕྱིན་ལ། འབྱུང་འགྱུར་ས་ཡོས་ལོ་ནས་བཟུང་གསུང་བསྟན་མི་ལོ ༡༩༨༥ལྷག་པ་དང་། དེ་སྟེང་ཐུགས་བསྟན་མི་ལོ་ཁྲི་གཅིག་རྫོགས་པའི་ཆུ་མོ་ཕག་གི་ཧོར་ཟླ་བཅུ་གཉིས་པའི་གནམ་སྟོང་ལ་རྣམ་འདྲེན་བརྒྱད་པ་རྒྱལ་བ་གཤེན་རབ་མི་བོའི་སྐུ་གསུང་ཐུགས་ཀྱི་བསྟན་པའི་འགྲོ་དོན་མཐར་ཕྱིན་པའོ།། དེ་ནས་ཚེ་ལོ་བཅུ་པར་ཐུག་ཅིང་རྣམ་འདྲེན་དགུ་པ་གཅུང་ཤེས་པ་ཐང་མ་མེ་སྒྲོན་འབྱོན་ཏེ་དེའི་སྐུ་གསུང་ཐུགས་ཀྱི་བསྟན་པས་འགྲོ་དོན་མཛད་པའོ།།

འགོ་བ་དགེབཤེས་བསྟན་འཛིན་འབྲུག་གྲགས།

བོན་གྱི་བསྟན་སྲུང་བོན་སྐྱོང་སྲུང་མ་གཙོ་བོ་ག་རེ་ཡིན་ནམ།

སྤྱིར་ལུགས་སོ་སོའི་སྲུང་མ་དང་། ཡི་དམ་ཁག་གི་སྒེར་སྲུང་འདྲ་མིན་ཅི་རིགས་ཡོད་ཀྱང་། གཙོ་བོར་བོན་སྐྱོང་ཕོ་རྒྱུད་དང་། མོ་རྒྱུད་གཉིས་ཡོད་པའི་ཕོ་རྒྱུད་ནི། བསྟན་སྲུང་རྨ་གཉན་སྤོམ་ར་དང་། མི་བདུད་འབྱམས་པ་ཁྲག་མགོ བྲག་བཙན་ཨ་བསེ་རྒྱལ་བ། བཙན་རྒོད་ཧུར་པ་གསོད་རྐྱེན། རྒྱལ་པོ་ཉི་པང་སད། གཉེན་རྗེ་གོས་སྔོན། ནོར་བདག་ཀུ་བེ་ར། རྒྱལ་ཆེན་ཤེལ་ཁྲབ་འབར་བ། རྒྱལ་ཆེན་གྲགས་སེང་། རྗེ་ཡི་འགུལ་ལྷ་བཅུ་གསུམ་ལ་སོགས་དམ་ཅན་ཕོ་རྒྱུད་ཀྱི་སྡེ་ཚོགས་དང་། མོ་རྒྱུད་ལ། བསྟན་སྲུང་གཙོ་མོ་མ་མཆོག་སྲིད་པའི་རྒྱལ་མོ་དྲེའུ་དམར་ནག་གཉིས་དང་། སྲིད་པའི་རྒྱལ་མོ་སྡེ་དྲུག སྲིད་རྒྱལ་གྱི་སྐུ་གསུང་ཐུགས་སྤྲུལ་དབལ་མོ་ཉེར་བདུན། བཀའི་བྱ་ར་མ་གསུམ། བཀའ་བློ ན་དུས་བཞིའི་རྒྱལ་མོ་བཞི། དམ་ཅན་ཡུམ་སྲས་སྡེ་ལྔ། དམག་དཔོན་མ་དགུ སྒྲ་བླའི་རྒྱལ་མོ། བྱང་སྨན་ཀུ་མ་ར། གསང་ཡུམ་ཀླུ་མོ་འོད་འབར། ཡང་སྤྲུལ་བརྟན་མ་བཅུ་གཉིས་སོགས་དམ་ཅན་མོ་རྒྱུད་ཀྱི་སྡེ་ཚོགས་བཅས་ཡོད་པའོ།།

 འགོ་བ་དགེ་བཤེས་བསྟན་ཛིན་འབྲུག་གྲགས།

སྔར་ནས་ད་བར་བོད་ལ་ཆོས་ལུགས་ཆེན་པོ་ལྔའི་འཕེལ་རིམ་བྱུང་སྟངས་ག་འདྲ་ཡིན་ནམ།

  སྔར་ཞང་ཞུང་གི་རྒྱལ་པོ་བྱ་རུ་ཅན་བཅོ་བརྒྱད་དང་།  དེ་རྗེས་བོད་རྒྱལ་གཉའ་ཁྲི་བཙན་པོ་ནས་བཟུང་གནམ་རི་སྲོང་བཙན་བར་བོད་རྒྱལ་སོ་གཉིས་ཀྱི་རིང་ལ་བོད་གངས་ཅན་ལྗོངས་ཀུན་ལ་ཞྭ་དཀར་གཡུང་དྲུང་བོན་གྱི་ཆོས་ལུགས་འབའ་ཞིག་དར། དེ་རྗེས་བོད་རྒྱལ་སྲོང་སྒམ་པོ་ནས་བཟུང་སྔ་འགྱུར་རྙིང་མའི་ཆོས་ལུགས་དར་རྒྱས་ཕྱིན། དེ་འོག་རྒྱལ་བ་བཀའ་བརྒྱུད་པའི་ཆོས་ལུགས་དར་རྒྱས་ཆེ་བ་བྱུང་།  དེ་རྗེས་དཔལ་ལྡན་ས་སྐྱའི་ཆོས་ལུགས་འཕེལ་རྒྱས་ཕྱིན།  དེ་རྗེས་རི་བོ་དགེ་ལྡན་པའི་བསྟན་པ་དར་རྒྱས་ཕུན་སུམ་ཚོགས་པ་བྱུང་སྟེ་དེང་སྐབས་བོད་ལ་རི་བོ་དགེ་ལྡན་པའི་བསྟན་པ་དར་ཁྱབ་ཆེ་ཡོད་པ་རེད།  གང་ལྟར་ཆོས་ལུགས་དེ་དག་དུས་རབས་རིམ་བྱུང་ལྟར་འཕེལ་རྒྱས་ཕྱིན་པ་ནང་བཞིན་བོད་ཀྱི་སྲིད་དབང་དེའང་ཆོས་ལུགས་དར་རིམ་བཞིན་དུས་སྐབས་སོ་སོར་དབང་བསྒྱུར་བྱས་ཡོད་ཀྱང་དུས་ཀྱི་འགྱུར་ལྡོག་དང་སྤྱི་ཚོགས་ཀྱི་འཕོ་འགྱུར་ནི་སུས་ཀྱང་བཟློག་ཐབས་མེད་པའི་འཇིག་རྟེན་གྱི་རང་གཤིས་ཤིག་ཡིན་པར་བརྟེན་བསྟན་པ་ཆབ་སྲིད་གང་ཡིན་ཀྱང་འཕེལ་འགྲིབ་ཀྱི་རང་བཞིན་དང་འགྱུར་ལྡོག་གི་རྣམ་པ་ཅན་མ་གཏོགས་མི་འགྱུར་རྟག་པའི་རང་བཞིན་ཅན་ཞིག་ག་ལ་གནས་སྲིད།

འགོ་བ་དགེ་བཤེས་བསྟན་འཛིན་འབྲུག་གྲགས།