བོད་ཀྱི་ཡི་གེའི་བྱུང་ཁུངས་ལ་ཞིབ་མོར་དཔྱད་པ།
|
དང་། དཔེ་རྙིང་སོགས་ན་ཞང་ཡིག་མང་དུ་ཡོད་ལ། གཏེར་ལས་ཐོན་པའི་ཡི་གེ་སྤྱོད་བཞིན་པ་འདིའོ། གཉིས་པ་ཡིན་ན། རང་གིས་མ་མཐོང་ན་མེད་པས་མ་ཁྱབ། གལ་ཏེ་མེད་པར་ཐག་བཅད་ན་ཆད་ལྟ་བ་དང་མཚུངས་སོ། ཡང་། གཟུགས་དབྱིབས་ཙམ་ཡང་མཐོང་རྒྱུ་མེད། ཅེས་པར་ཙམ་སྒྲའི་ནུས་པ་མི་ཤེས། ཡིག་གཟུགས་མཐོང་ན་གཟུགས་དབྱིབས་མཐོང་བ་ལས། མིག་གིས་མཐོང་ཚུལ་གཞན་ཅི་ཡོད། ཡང་ཤོག་ངོས་༡༡༧ན། ཐག་ལ་མདུད་པ་དང་། ཤིང་ལ་རྟགས་བུ་བཏབས་ཏེ་རྩིས་བྱེད་ཅེས་པ་ཡི་གེ་མེད་པའི་སྒྲུབ་བྱེད་དུ་མི་འགྲོ་སྟེ། མོ་རྩིས་བྱེད་ན། མདུད་པ་དང་། ཤིང་བུ་རྡེའུ་ལ་བལྟ་དགོས་པ་ད་ལྟའང་ཡོད་དེ། ཇུ་ཐིག་དང་རྩིས་རྡེའུ་ལ་བལྟས་པས་ཤེས། ཡང་ཤོག་ངོས་༡༡༨ན། བོན་དར་བའི་ཡུལ་ཡིན་ན་ཞང་ཞུང་གི་མངའ་ཁོངས་ཡིན་དགོས་ཟེར་ཚུལ་མཐོང་ཐོས་ཅི་ཡང་མ་བྱུང་སྟེ། བོད་ལ་ཐུབ་པའི་ཆོས་དར་ན་ཡང་། རྒྱ་གར་གྱི་མངའ་ཁོངས་ཡིན་མི་དགོས་པ་ལྟ་བུ་སུས་མི་ཤེས། དུས་སྔ་མོར་བོད་ལས་ཞང་ཞུང་ཁྱབ་ཆེ་ནའང་། བར་དུ་ཞང་བོད་མཉམ་འབྲེལ་ཙམ་དུ། མཐར་ཞང་ཞུང་བོད་ཀྱི་མངའ་ཞབས་སུ་ཚུད་པ་སོགས་རིམ་བཞིན་འགྱུར་ལྡོག་བྱུང་བ་ཡིན་ལ། ཞང་ཞུང་ལ་སྟོབས་ཤུགས་དེ་ཙམ་ཡོད་མྱོང་ན། བོད་ཀྱི་མངའ་འོག་ཏུ་བསྡུས་པ་མི་འཐད་ཅེས་པའང་མི་རིགས་ཏེ། མི་རིགས་དར་རྒྱས་བྱུང་ན། མི་རིགས་གཞན་ཀྱི་མངའ་འོག་ཏུ་ཚད་མི་སྲིད་ཅེས་བཤད་མི་ནུས་སོ། ཡང་དེར་སངས་རྒྱས་འཕགས་པ་ཞེས་པ་ནས། ལོ་རྒྱུས་ལ་སྐྱེ་བོ་ཕལ་བས་གཞལ་ནུས་དགོས། ཞེས་བྲིས་པ་རང་གི་ཁས་ལེན་ལ་འགལ་དགོས་ཏེ། བོད་རྒྱལ་༣༢རིང་མུན་གླིང་གི་རྒྱལ་པོར་འཐད་ཅིང་། སྲོང་བཙན་དགུང་ལོ་བཅུ་གསུམ་ཅན་གྱིས་ཐོན་མི་ལོ་བཅོ་ལྔ་ཅན་ལ་ཐུགས་བཀོད་གནང་ནས། བོད་ལ་ཡི་གེ་དགོས་པའི་ཐུགས་བཞེད་འགྲུབ་ཕྱིར་ལོ་བདུན་གྱི་ནང་ལ་རྒྱ་གར་ལ་ཕར་འགྲོ་ཚུར་འོང་ཡི་གེ་སློབ་གཉེར་དང་བཅས་པ་མཐར་ཕྱིན་པ་སོགས་ལ་གཞིགས་ན། ཅི་འདྲའི་མཁྱེན་རྩལ་ཆེ་བས་བསླབ་འབྲས་མྱུར་མོ་ཞིག་ཐོན་པ་རེད་སྙམ་དུ་ངོ་མཚར་བ་མ་ཡིན་ནམ། སྐྱེ་བོ་ཕལ་བས་གཞལ་ནུས་སམ། ཡང་ལོ་བདུན་གྱི་ནང་དུ་བོད་ཡིག་བཟོ་རྒྱུའི་ཐུགས་འདུན་ཡོད་ནའང་། སླར་བོད་དུ་ཕེབས་ནས་བོད་ཡིག་བཟོ་སྐབས་ཡི་གེ་དྲུག་མ་རྙེད་པས་བརྡ་མ་འཕྲོད་པར་ཐུགས་ཆད་དེ་ཁ་སྦུབ་ནས་བཞུགས་ཙ་ན། རྒྱུས་མེད་པའི་མི་ཞིག་གིས་ཞང་ཞུང་ནས་འོངས། ཟ་ཧོར་ལ་འགྲོ། ཅིའི་ཕྱིར། ཇ་ཉོ་རུ་ཟེར་བ་སོགས་ཀྱི་སྒྲ་དེ་ལ་བརྟེན་ནས་ཡི་གེ་དྲུག་རྙེད་ཅེས་པར་བརྟགས་ན། ཡིག་གཟུགས་མ་རྙེད་པ་མ་རེད། བོད་སྐད་ཀྱི་སྒྲ་དེ་དག་མ་རྙེད་པ་རེད་དེ། ཤོག་ངོས་༡༢༣ན་ཐོན་མིའི་མཚན་ཀུན་ཏུ་བཟང་པོ་རེད་ཅེས་བྲིས་ཡོད་པས་རང་མིང་གི་ཟ་ཡིག ཇ་ཆང་། འོ་ཞོ། ཅ་ལག ཟ་འཐུང་སོགས་ཀྱི་མིང་ལོ་བདུན་ཀྱི་རིང་ཡིད་ལ་མ་ཤར་བ་འདིར་བལྟས་ན། དུས་ཐུང་ངུའི་ནང་རྒྱ་གར་སྐད་ཡིག་བྱང་ཆུབ་པ་ཨེ་བདེན་སྙམ་ན་ཡང་། སྤྲུལ་བའི་རྒྱལ་པོས་སྤྲུལ་བའི་འཁོར་ལ་བྱ་བ་བྱས་ཚད་མང་བས། བློན་པོའང་སྤྲུལ་བའི་བློན་པོ་ཡིན་ངེས་ལ། སློབ་སྦྱོང་མྱུར་ནའང་ཐང་། ཡང་སྤྲུལ་གཞི་སྤྲུལ་བ་གཉིས་ཀས་རྒྱུས་མེད་ཀྱི་མིའི་ངག་ལ་མ་བརྟེན་པར་ཡི་གེ་དྲུག་པོ་མ་རྙེད་ཅེས་བཤད་ན་འཐད་པར་མ་མཐོང་ངོ་། ། ཤོག་ངོས་༡༡༨ན་བསྐལ་བ་ཡ་ཐོག་དང་དེའི་རྗེས་ཙམ་ལ་ཞེས་པར་བལྟས་ན། ཡ་ཐོག་བར་ཁུག་མ་ཐོག་གི་འཇོག་ཚུལ་ཙམ་ཡང་མ་ཤེས་པར་མངོན། ཤོག་ངོས་༡༡༩ན་མི་རིགས་གཅིག་ལ་ཁྱད་ཆོས་བཞི་ཚང་དགོས་པ་ཁས་བླངས་ནས། སྐད་རིགས། ཡུལ་གཞི། འཚོ་བ། སེམས་ཁམས་བཞི་དགོས་ཚུལ་བཤད། ཞང་ཞུང་ཡོད་པར་ཁས་བླངས། དེ་བོད་རིགས་ཡིན་པའི་སྒྲུབ་བྱེད་བྲིས། ཞང་ཞུང་མེད། བོད་སྐད་ཡིན། བོད་རིགས་བཞིན་དུ་སྙིང་རྗེ་ཆེ་ཟེར་བ་སོགས་ངོ་མཚར་བའི་གཏམ་སྟེ། ཞང་སྐད་དང་ཞང་ཡིག་རང་གིས་མ་མཐོང་བས་མེད་ཅེས་བཤད་པ་འདི། ད་ལྟ་བོད་ན་རྒྱ་གར་གྱི་གཟུངས་སྔགས་འདོན་པ་དང་། ལཉྫ་ཝརྟུ་སོགས་མཐོང་ཐོས་མ་མྱོང་བ་ཞིག་གིས་རྒྱ་གར་གྱི་སྐད་ཡིག་མིན་ཟེར་བ་བ་དང་མཚུངས་སོ། བོད་ཀྱི་མི་རིགས་ཡིན་མིན་སྙིང་རྗེ་ཡོད་མེད་ཀྱིས་འཇོག་ནུས་སམ། བོད་རིགས་ནང་ཁུལ་ན་ཆགས་སྡང་གིས་ཀུན་ནས་བསླངས་ཏེ་གཉའ་གནོན་གསོད་འཁྲུག་འཕྲོག་བཅོམ་བྱེད་པ་རྣམས་རྙིང་རྗེའི་མངོན་རྟགས་ཡིན་ནམ། རྒྱ་གར་ནག་སོགས་མི་རིགས་གཞན་ལ་སྙིང་རྗེ་མེད་ཟེར་རུང་ངམ། ཡང་ཁ་ཆེ་མི་རིགས་ལ་ཡི་གེ་མེད། ཞང་བོད་མི་རིགས་ལ་ཡི་གེ་མེད་ཟེར་བ་སོགས་ཀྱི་རང་གིས་ཁྱད་ཆོས་བཞི་བཤད་མ་ཐག་པའི་ཚིག་གོང་འོག་མི་འགལ་ལམ། ཤོག་ངོས་༡༢༡ན་ཤེས་དམན་ངས་མ་མཐོང་ཟེར་བར། མཁས་པ་སྔ་མ་རྣམས་ཀྱིས་གསུངས་ལ་ནང་འགལ་བྱུང་ནས་ཐག་མི་ཆོད་ན། ཤེས་དམན་ཞིག་གིས་ཇི་ལྟར་མཐོང་། ཞིབ་འཇུག་བྱེད་མཁན་དང་ཤེས་དམན་མོ་གཉིས་རྒྱུད་གཅིག་ཡིན་ན་མཚན་འགྱུར་མིན་ཕྱིན། བོན་གཞུང་ཆེན་མོ་རྣམས་ལས་གཅིག་ཀྱང་མ་མཐོང་བར་སྨྲ་བ་ཁྲོན་པའི་ལག་འགྲོའི་སྤུན་ཟླར་གྱུར་ཏོ། ཡང་ཡི་གེ་བཟོ་མཁན། འཁྲུངས་ཡུལ། རུས་རྒྱུད། དུས་རབས་གང་གི་སྐབས་སོགས་བཞག་རྒྱུ་དགོས་ཞེས་པར་གོང་དུ་བཤད་ཟིན་ཏོ། ། ད་མདོར་བསྡུས་ནས་བཤད་ན། བོད་ཀྱི་ནང་བའི་ཆོས་ཀྱི་ཐོག་མ་བོན་ཡིན་པ་དང་། བོད་ཡིག་གི་ཁུངས་ཡང་དག་བོན་གྱི་སྟོན་པ་གཤེན་རབ་ཡིན་པ་ནི། ཁོ་བོས་མགྲིན་པ་བཏེགས་ནས་སྨྲས་ཟིན་པ་ཡིན་ལ། རྒྱ་གར་གྱི་ནང་ཆོས་བོད་ལ་དར་བའི་ཐབས་སུ། བོན་ནང་ཆོས་ལས་ཕུད་འདོད་པའི་དམིགས་ཡུལ་གྱིས་ལོ་རྒྱུས། བསྟན་བཅོས། སྒྲུང་གཏམ་ཅི་རིགས་སུ་བསྐུར་འདེབས་བྱེད་ཅི་ཐུབ་དང་། དམ་ཆོས་འཛིན་ཁུལ་གྱིས་རྩོད་ཆོས་སུ་བཏང་ན། བསྟན་པ་ལ་ཞབས་འདེགས་སུ་མི་འགྱུར། ཚར་གཅོད་མི་ནུས། མི་རིགས་ནང་ཁུལ་དང་ཆོས་ལུགས་པ་ཕན་ཚུན་མི་མཐུན་པའི་དཀྲུགས་ཤིང་དུ་འགྱུར་བ་ལ་ཚེགས་མེད། རང་གི་རྒྱལ་ཁབ་དང་མི་རིགས་ལ་མཐོང་ཆུང་དང་། ཕྱིའི་རྒྱལ་ཁབ་དང་དེའི་ཆོས་ལུགས་མི་རིགས་ལ་མཐོང་ཆེན། ཐ་ན་ཅ་ལག་འཕྲུལ་ཆས་དངོས་པོ་སོགས་ལའང་། འདི་བོད་ཀྱི་རེད་ཅེས་རྩིས་མེད་དང་། འདི་ཕྱི་རྒྱལ་ནས་འོངས་པ་རེད་ཅེས་རྩིས་ཆེན་བྱེད་པའི་ངན་ཤུགས་འདིས། རྒྱལ་གཅེས་ཆོས་གཅེས་ཀྱི་བསམ་པའི་ལྡོག་ཕྱོགས་སུ་འགྱུར། མི་རིགས་རང་གི་ལོ་རྒྱུས་མཐུན་སྒྲིལ་སོགས་ཆུ་རྙོག་དཀྲུགས་པ་ལྟར་དྭངས་གཙང་འོང་མི་ཐུབ་པ་སྨོས་ཅི་དགོས། དེ་བས་ད་ལྟ་རང་རང་མི་རིགས་དང་ཆོས་ལུགས་ཀྱི་ལ་རྒྱ་འཛིན་ནས་མཐུན་སྒྲིལ་གཞི་རྩར་བཟུང་ན་སྟོབས་ཤུགས་གཅིག་བསྡུ་འོང་། སློབ་སྦྱོང་རིས་མེད་བྱས་ན་རྙིགས་འདོར་བཅུད་ལེན་ཤེས། དེ་ཕྱིར་ཆོས་ལུགས་པ་རྣམས་ཀྱང་བསྟན་པའི་ལ་རྒྱ་འཛིན་ན་སྡོམ་མགོ་ཐུབ་དགོས། བསྟན་འགྲོའི་ཕན་པ་སྒྲུབ་ན་རང་མགོ་ཐོན་དགོས། འདུས་སྡེ་དག་ནའང་སྲོག་གཅོད་ལོག་གཡེམ་མ་བྱིན་ལེན་སོགས་མི་དགེ་བཅུ་བོ་དང་དུ་བླངས་ནས། བླང་དོར་གོ་ལྡོག་པ་འདི་དག་བསྒྱུར་བཅོས་བྱེད་ཐུབ་ན། རང་གཞན་གཉིས་ཀར་ཕན། འདི་ཕྱི་ཀུན་ཏུ་བདེ། |
<< མདོ་སྨད་བྱང་བརྒྱུད་དུ་བོན་བསྟན་དར་ཚུལ་རགས་ཙམ་བརྗོད་པ་ཕན་བྱེད་སྨན་གྱི་རིལ་བུ།འབྱུང་འདུས་ལུས་ཀྱི་དཀར་ཆག >>
དཔྱད་གཏམ་ཡོངས་ལ་གཟིགས་པ།
