༆ མ་བཅོས་རང་གདངས་ཡེ་ལྔའི་སྙིང་བོ་ཅན། །མ་སྒྲིབ་རང་གསལ་འོད་ལྔའི་དྲྭ་གུར་ཀློང་། །མ་འགག་རང་ཤར་རིགས་ལྔའི་དཀྱིལ་འཁོར་ལྷ། །མ་གྱུར་རང་གཞན་ཁམས་ལྔའི་རྟེན་ལ་བཞུགས། །མཐོ་སྒང་ཞང་བོད་གནའ་རབས་རིག་པའི་སྲོལ། །དྲུག་ལྡན་སྐྱེས་བུའི་སྲོག་ལུས་དབང་ཀླུང་དཔལ། །མི་ཉམས་མཁའ་རུ་སྤུར་བའི་བྱ་མ་རྟ། །ངོ་མཚར་འབྱུང་ལྔའི་རིམ་གྲོའི་གནད་མིག་གླེང་། །
སྐབས་འདིར་གླེང་བར་བྱ་བ་གནའ་བོའི་ཤེས་རིག་ཐུན་མོང་མ་ཡིན་པ། ཁམས་དྲུག་ལྡན་གྱི་སྐྱེས་བུའི་ཚེ་སྲོག་ལུས་དབང་། ཀླུང་རྟ། བླ་དཔལ་བཅས་ཀྱི་བཅོས་ཀའི་གནད་མིག རྟེན་འབྲེལ་འབྱུང་ལྔའི་འཁོར་ལོ་གསོ་བའི་རིམ་གྲོ་བྱེད་སྟངས་དང་། དེའི་འཕྲོད་ལན་གྱིས་ནང་གི་འབྱུང་ལྔའི་ཁམས། རྣམ་ཤེས་དང་ཤ་ཁྲག་དྲོད་དབུགས་བཅས་ཀྱི་སྐོར་ལ་ཕན་ཐོག་འབྱུང་ཚུལ་ཟུར་ཙམ་བཤད་པ་ལ།
ཐོག་མར་ཕྱི་ནང་གི་འབྱུང་ལྔའི་གྲུབ་ཚུལ་དང་། ཕྱི་འབྱུང་ལྔའི་འཕེལ་འགྲིབ་ཀྱིས་ནང་གི་འབྱུང་ཁམས་ལ་དར་རྒུད་འཕྲོད་ལན་འབྱུང་ཚུལ་སྐོར་དང་། དེར་བརྟེན་འབྱུང་བའི་རིམ་གྲོ་བྱེ་བྲག་པ་འགའ་ཞིག་ངོས་བཟུང་ནས་དེ་དག་གི་ཚུལ་དང་ཕན་ཡོན་སྐོར་སོ་སོར་བཤད་པ་དང་། མཐར་འབྱུང་བས་བསྐྱེད་པའི་ཕུང་བོ་འདི་འབྱུང་བས་འཇིག་ཚུལ་ལོ།
དང་པོ། ཁམས་དྲུག་ལྡན་གྱི་སྐྱེ་བོའི་སྣང་ཡུལ་དུ་བཏགས་པའི་འཇིག་རྟེན་གྱི་གཏན་གཞི་སྟེ། སེམས་ཅན་སྤྱི་མཐུན་གྱི་ལས་ཀྱིས་གྲུབ་པའི་ཕྱི་ཡི་འབྱུང་བ་ཆེན་པོ་ལྔ་ཡི་གྲུབ་ཚུལ་ནི། གྲུབ་མཐའ་འདྲ་མིན་གྱི་བཤད་སྟངས་མང་པོ་ཡོད་ཀྱང་། སྐབས་འདིར་ཤེས་བྱ་ཇི་བཞིན་ཉིད་ཀྱི་གཤིས་ལུགས་ཇི་བཞིན་དུ་མཐོང་བའི་རྫོགས་པ་ཆེན་པོའི་ལུགས་བཞིན་འགོད་རྒྱུ་ཡིན་བྱས་པ་ལ། ཁོ་ན་རེ། འབྱུང་བའི་རིམ་གྲོ་ལ་བརྩོན་ཅིང་ཡི་དམ་དུ་འཛིན་མཁན་ཕལ་ཆེ་བ་ནི། ཐེག་པ་ཆུང་ངུའི་ཀུན་སློང་ཅན་གྱི་གང་ཟག་རྣམས་ཡིན་པས། ཁྱོད་ཀྱིས་ཐོག་མར་འབྱུང་ལྔའི་གྲུབ་ཚུལ་འདི་རྫོགས་པ་ཆེན་པོའི་ལུགས་བཞིན་ཇི་ལྟར་བཀོད་ཅེ་ན། དངོས་པོའི་གནས་ཚུལ་མཐར་ཐུག་དེ་རྫོགས་པ་ཆེན་པོའི་ལུགས་བཞིན་དུ་ཡིན་པའི་དབང་གིས་གྲུབ་ཚུལ་དེ་ལྟར་འཆད་པའོ། དེ་ཡང་ཇི་སྟེ་ན། ཐོག་མར་གཞི་ཡི་གནས་ལུགས་སྟོང་པའི་རང་གདངས་ལས་འོད་རྣམ་པ་ལྔ་ཤར་ཏེ། རྫོགས་པ་ཆེན་པོ་ཞང་ཞུང་སྙན་བརྒྱུད་འོད་གསལ་སེམས་ཀྱི་མེ་ལོང་ལས། རིག་པའི་གདངས་ལས་འོད་ལྔ་བྱུང་ཞེས་དང་། དེ་ཡང་འོད་ལྔ་ལ་སྟོང་བའི་རང་འོད་དང་རང་ཟེར་དུ་མ་ཤེས་ནས། དངོས་པོ་མཚན་མར་བཟུང་ལ་འཁྲུལ་པའི་གཞི་བཏིང་ཞིང་། འོད་ལྔ་ལ་ཆགས་སྡང་རྨོངས་འཁྲུག་གིས་བསླངས་པས་སྣང་ཡུལ་ཇེ་རགས་སུ་སོང་ནས། འོད་ལྔའི་སྙིགས་མ་ལས་སྣང་ཡོར་ཐོགས་བཅས་ཀྱི་གཟུགས་དང་ཕྱི་ནང་གི་འབྱུང་བ་སྲ་ཐང་ངེ་བ་ཞིག་གྲུབ་པ་སྟེ། ཞང་ཞུང་སྙན་བརྒྱུད་ལྟ་བ་སྤྱི་གཅོད་མན་ངག་ལེའུ་བརྒྱད་པ་ལས། སེམས་དང་སེམས་བྱུང་ལོག་རྟོག་ཤར་བ་ཡིས། །རང་སྣང་འོད་ལྔ་གཞན་སྣང་ཡུལ་དུ་བཟུང་། །བཟུང་བས་སྣང་བ་འོད་ཀྱི་མཐའ་རལ་ནས། །འོད་ལྔ་མེ་ཆུ་ས་རླུང་ནམ་མཁར་རྟོག །སེར་པོ་སར་མཐོང་ལྗང་ཁུ་རླུང་དུ་མཐོང་། །དམར་པོ་མེར་མཐོང་སྔོན་པོ་ཆུ་རུ་མཐོང་། །དཀར་པོ་ནམ་མཁར་རྟོག་པ་ཡིན། །ཕྱིའི་འཁྲུལ་པ་མཚོ་ལ་དར་ཆགས་བཞིན། །ཞེས་གསུངས་སོ། སྒྲོན་མ་ལས། ཕྱི་སྣོད་འཇིག་རྟེན་སེམས་ལ་ཤར་ཚུལ་ནི། ནམ་མཁའི་འོད་དང་རིག་པ་འབྲེལ་བ་ལས། གྱ་གྱུ་རླུང་སྟེ་ཕྱད་དང་ཕྱོད་དུ་བྱུང་། བསྐྱོད་པའི་ཤུགས་ལས་ཚ་བའི་མེ་རུ་བྱུང་། མེ་རླུང་ཚ་གྲང་འཐབ་པས་རླན་ཏེ་ཆུ་རུ་བྱུང་། ཆུ་ཡི་བཅུད་ལས་བསྐྱེད་པའི་ས་གཞིར་གྱུར། སྣོད་ཀྱི་འཇིག་རྟེན་ཐམས་ཅད་དེ་ལས་ཆགས། རྒྱུ་ལྔ་འབྱུང་བའི་བཅུད་ལས་ཡུལ་ལྔའི་སྣང་བ་ཤར། ཞེས་གསུངས་པ་ལྟར་རོ།
ནང་གི་འབྱུང་བ་ཤ་ཁྲག་དྲོད་དབུགས་དང་སེམས་ཀྱི་ཕུང་བོ་རྣམས་ནི། དྭངས་མའི་ས་ཆུ་མེ་རླུང་ནམ་མཁའ་ལྔ་རེ་རེ་ལའང་བསྐྱེད་བྱེད་ས། སྡུད་བྱེད་ཆུ། སྨིན་བྱེད་མེ། གཡོ་བྱེད་རླུང་། གོ་འབྱེད་མཁའ་དང་འབྱུང་བ་ལྔ་ལྔ་སྟེ་ཉི་ཤུ་རྩ་ལྔའི་ཆ་ཡིས་ལུས་སེམས་བསྐྱེད་པའོ། གཟེར་བུ་ཉེར་གཅིག་ལས། རང་རིག་པའི་ཡེ་ཤེས་ཚོན་གང་ལས་སྣང་བའི་འོད་གདངས་རྣམ་ལྔ་ཤར་ཏེ། དེ་ལས་དྭངས་མ་རྣམ་ལྔ་ཤར། དེ་ལས་སྙིགས་མ་རྣམ་ལྔ་ཤར། ཉི་ཤུ་རྩ་ལྔས་ལུས་སེམས་བསྐྱེད། ཅེས་སོ།
དེ་ལྟར་ནང་གི་དོན་ལྔ། ཕྱི་ཡི་ཡན་ལག་ལྔ། དབང་བོའི་སྒོ་ལྔ། ཕུང་བོ་ལྔ། དུག་ལྔ་ལ་སོགས་ལྔ་ལྔར་འབྱུང་བ་ནི་འབྱུང་ལྔའི་རྟེན་འབྲེལ་འཁོར་ལོའི་གནད་ཀྱིས་གྲུབ་པ་སྟེ། སྒྲོན་མ་ལས། ནང་བཅུད་སེམས་ཅན་སེམས་ལ་ཤར་ཚུལ་ནི། ནམ་མཁའི་འོད་དང་རིག་པ་འབྲེལ་བ་ལས། དྲན་པའི་སེམས་དང་རྒྱུ་བའི་རླུང་དུ་བྱུང་། རླུང་སེམས་འབྲེལ་བས་གྱ་གྱུ་དབུགས་སུ་བྱུང་། དབུགས་ཀྱི་ཤུགས་ལས་དྲོད་དེ་མེ་ཡི་ཁམས། དབུགས་དྲོད་འདུས་པས་ཁྲག་སྟེ་ཆུ་ཡི་ཁམས། ཁྲག་གི་བཅུད་ལས་ཤ་སྟེ་ས་ཡི་ཁམས། ལུས་དང་སེམས་སུ་འབྲེལ་བས་དོན་སྙིང་རྣམ་ལྔར་ཆགས། འབྱུང་བ་རྣམ་པ་ལྔ་ཡི་རྟེན་དུ་བཅས། ཡན་ལག་ལྔ་ལ་འབྱུང་ལྔའི་རྩལ་ཡང་ཤར། ནང་གྲོལ་ལྔ་རུ་འབྱུང་ལྔའི་བཅུད་དུ་བསགས། དབང་པོ་ལྔ་ལ་འབྱུང་ལྔའི་སྒོ་ཡང་དོད། ཤེས་པ་ལྔ་ཡི་རྩལ་ལྔ་སོ་སོར་བསྐྱེད། ཡུལ་ལྔ་དག་ལ་སོ་སོར་སྤྱོད་ཅིང་འཛིན། ནང་བཅུད་སེམས་ཅན་སེམས་ལ་དེ་ལྟར་ཤར། འབྱུང་ལྔ་སེམས་དང་འབྲེལ་བས་ཉོན་མོངས་དུག་ལྔ་བསྐྱེད། ཅེས་གསུངས་སོ།
གཉིས་པ་ཕྱིའི་འབྱུང་བ་འཁྲུག་པ་དང་ཆ་མ་སྙོམས་པའམ་འཕེལ་འགྲིབ་བྱུང་ནས་ནང་གི་འབྱུང་ཁམས་དར་རྒུད་བྱུང་ཚུལ་ནི། དཔེར་ན། རགས་པར་མངོན་སུམ་དུ་མཐོང་བའི་མེ་ཡི་ནུས་པ་སྟེ། ཚ་བ་ཆེས་ཆེར་འཕེལ་སྐབས་སུ་རླུང་དང་ཆུ་ཡི་ནུས་པ་སོགས་ཉམས་དམའ་རུ་འགྲོ་ལ། རང་བཞིན་དུ་ནང་གི་གཡོ་བྱེད་རླུང་གི་ནུས་པ་རྒུད་པའི་རྟགས་ནི། ལུས་ལྕི་ཞིང་ཁ་སྐོམ་པ་དང་། ཕུང་ཁམས་ཉོབ་ཅིང་རིག་པ་འཐིབ་ཏུ་འགྲོ་བ་སོགས་ཀྱིས་ཤེས་ནུས་པས། གཞན་མ་རྣམས་ལའང་ཕན་ནུས་དེ་ལྟར་དུ་འབྱུང་བ་སྨོས་ཅི་དགོས། བྱེ་བྲག་ཏུ་གང་ཟག་སོ་སོའི་ཁམས་དང་འབྲེལ་བའི་རླུང་ལ་གནས་པའི་ལྷ་སོགས་ལ་ཕོག་ཐུག་ཤོར་བ་དང་། རླུང་ཆ་མ་སྙོམས་པ་དང་རྒུད་པ་སོགས་ཀྱི་རྐྱེན་གྱིས། གློ་བུར་དུ་ནང་གི་རླུང་ཁམས་ཀྱི་སྟོབས་ཤོར་ནས། རླུང་རྟ་ཉམས། སེམས་སྤོབས་ཞུམ། གཡོ་འགུལ་ནུས་པ་ཞན། བྱ་བ་ལམ་དུ་མི་འགྲོ། ལུས་ལ་ན་ཚ་ལྡང་། དབུགས་ཀྱང་མི་བདེ་བར་འབྱུང་བས་དེའི་སྐབས་སུ་ནང་གི་འབྱུང་ཁམས་དང་འབྲེལ་བའི་འབྱུང་བའི་རིམ་གྲོ་ལ་བརྩོན་ཚུལ་ནི། ཐུན་མོང་སྐྱེ་བོ་ཕལ་གྱི་བློ་ངོར་ཤོང་བའི་རིམ་གྲོའི་ལུགས་སྲོལ་བཞིན་ཚུལ་དང་མཐུན་པར་ཤེས་པར་མཛོད་ཅིག
|
