|
ཕྱི་འབྱུང་བ་ཆུ་ཡི་དཔལ་དང་ནུས་པ་ཐམས་ཅད་རྒྱས་པས། འབྱུང་བ་ཆུ་ཡི་དྭངས་མ་ཁྲག་རྒྱས་ནས་ལུས་ཁམས་དར་ལ་ཤེད་སྟོབས་རྫོགས་པ་དང་། ལུས་ཀྱི་གཟི་དཔལ་རྒྱས་ལ་བཞིན་གྱི་བཀྲག་མདངས་འཕེལ་བའོ། ལྷག་པར་དུ་ཆུ་ལས་སུ་རུང་ན་ཆུས་མི་ཁྱེར་བ་སྟེ། ཡང་རྩེ་ཀློང་ཆེན་ལས། ལུས་སྣུམ་ལ་བཀྲེས་སྐོམ་མེད་ན་ཆུ་ལས་སུ་རུང་བའི་རྟགས། ཞེས་གསུངས་པ་བཞིན། རྟེན་འབྲེལ་གནད་ཀྱིས་དོན་སྣོད་མཁལ་མ་དང་ལྒང་བ་རྣ་དབང་བཅས་གསོ་ཞིང་། བད་ཀན་གྱི་ནད་བཅས་ལས་གྲོལ་ནུས་པའི་འབྱུང་ཆེན་ཆུ་ཡི་འཁོར་ལོའི་རིམ་གྲོའི་གནད་མིག་ཟབ་པ་ལུང་རིགས་གཉིས་ཀྱིས་གྲུབ་བོ།
འབྱུང་བ་ས་ཡི་རིམ་གྲོ།
བཞི་བ་འབྱུང་བ་ས་ཡི་རིམ་གྲོ་ནི། ས་ཚཱ་གདབ་པ། མཆོད་རྟེན་དང་། སྐུ་གདུང་། སྐུ་གཟུགས། ལྷ་ཡི་གཞལ་ཡས་ཁང་སོགས་བཞེངས་པའོ། ས་ཚཱའམ་ཚ་ཚ་གདབ་ལུགས་ནི། རབ་ན་སངས་རྒྱས་དང་བྱང་ཆུབ་སེམས་དཔའ་བླ་མ་ཁྱད་པར་ཅན་གྱི་གདུང་བསིལ་དང་སྐུ་ཤ་གདུང་རུས་མེ་གདུག་མ་དང་། དབུ་སྐྲ་དང་ཕྱག་སེན་སོགས་བྱིན་ཆེན་རིགས་ཅི་འབྱོར་ལ། རིན་ཆེན་སྣ་ལྔ་དང་སྣ་བརྒྱད་གང་དག་ལ། སྒྲུབ་གནས་རྩ་ཆེན་གྱི་ས་སྣ་དང་ཆུ་སྣ་སོགས་ཀྱིས་བགྲུས་ཏེ། མཆོད་སྡོང་ཆ་བརྒྱད་དང་ཆ་དགུ་སོགས་ཅི་རིགས་སུ་འབྱུང་བའི་བརྐོས་ཕོར་དུ་གདབ་ལ། ཆུ་ཆར་གྱིས་མི་འཇིག་པའི་གནས་ཁང་ཚ་ཁང་ངམ། ཁང་བརྩེགས་མཆོད་རྟེན་གྱི་ནང་དུ་བཤམས་ཤིང་མཆོད་པའི་རྟེན་དུ་བཤམས་ན།
ྋ ཕན་ཡོན་ནི། དེར་ཕྱོགས་སུ་འབྱུང་བ་ས་ཡི་ཁམས་ལ། ཁྱད་པར་འཕགས་པ་གང་གི་དཔལ་དང་བྱིན་རླབས་ནུས་པ་ཁྱད་པར་ཅན་ཞུགས་ནས། ས་ཕྱོགས་སུ་བཀྲ་ཤིས་པ་དང་། ཡུལ་ཕྱོགས་སུ་ལོ་ལེགས་རྩི་ཐོག་རྒྱས་པ། ལྷག་པར་དུ་དངོས་ཀྱི་བཞེངས་པ་པོ་རྣམས་ཀྱི་ནང་གི་འབྱུང་བ་ས་ཡི་དཔལ་ཉམས་པ་རྣམས་སོས། ལུས་ཕུང་ཤ་ཡི་བཀྲག་མདངས་གཟི་མདངས་རྒྱས། མཚེར་བ་དང་ཕོ་བ་ལག་པ་གཡོན་པ་རྣམས་གསོ་ཞིང་། འདུས་པའི་ནད་གདོན་སོགས་ལས་གྲོལ་བའི་རྟེན་འབྲེལ་གྱི་གནད་ཀྱིས་དངོས་པོ་ཟང་ཐལ་དུ་འབིགས་ནུས་ཤིང་། ས་ལས་སུ་རུང་ན་ལུས་ལ་ཚ་གྲང་ལ་སོགས་རེག་བྱས་མ་གནོད་པ་དང་རྡོ་ལ་ཞབས་རྗེས་བཞག་ནུས་པ་སྟེ། ཡང་རྩེ་ཀློང་ཆེན་ལས། ལུས་ཚ་གྲང་གི་རེག་པ་མི་ཚོར་ན། འབྱུང་བ་ས་ལས་སུ་རུང་བའི་རྟགས། ཞེས་གསུངས་པ་དང་། ཞུ་མདོ་པད་མ་སྤུངས་པ་ལས། ཤ་དང་མཚེར་བའི་ནད་རྣམས་ཞི། བུམ་གཏེར་ཚ་ཚ་ཁང་དང་གཙུག་ལག་ཁང་། བཞེངས་ཤིང་དུར་སྒོ་བཅད་ན་ཀེགས་ལས་ཐར། ཞེས་གསུངས་སོ།
འབྱུང་བ་ནམ་མཁའི་རིམ་གྲོ།
ལྔ་བ་འབྱུང་བ་ནམ་མཁའི་ཁམས་ཀྱི་རིམ་གྲོ་ཞེས་མིང་ཙམ་ལས། འབྱུང་བ་གཞན་བཞི་ལྟར་དམིགས་བསལ་ལོགས་སུ་བཤད་པ་ཞིག་མ་མཐོང་ཡང་། འོན་ཀྱང་ཕྱི་ཡི་འབྱུང་ཁམས་ནམ་མཁའ་དང་འབྲེལ་བའི། ནང་གི་འབྱུང་ཁམས་ཀྱི་གཙོ་བོ་སེམས་དང་། དོན་སྣོད་སྙིང་དང་བསམ་བསེའུ་ཡན་ལག་གི་དང་པོ་མགོ་དང་། དབང་པོའི་དྭངས་མ་མིག་བཅས་གསོ་ཞིང་། ལྷག་པར་དུ་འདུ་བ་རྣམས་བཞིའི་ནད་སོགས་ལས་གྲོལ་བའི་རིམ་གྲོ་གཙོ་བོ་རྣམས་ལ། ནམ་མཁའི་རིམ་གྲོའམ་བཅོས་ཀའི་གནད་མིག་ཅེས་སྨོས་ཆོག་མོད། གང་ཡིན་ཟེར་ན། དེ་དག་གཙོ་བོ་ནི་ཕྱི་ཡི་འབྱུང་བ་ནམ་མཁའི་ཁམས་དང་འབྱུང་བཞིའི་རྟེན་འབྲེལ་གྱི་ཐུན་མོང་མ་ཡིན་པའི་འཕྲོད་ལན་ཟབ་མོ་ཡོད་པའི་གནད་ཀྱིས་འགྲུབ་བོ།
དེ་ཡང་འབྱུང་བ་ས་ཆུ་མེ་རླུང་བཞིའི་རིམ་གྲོ་རྣམས་གོ་འབྱེད་ཀྱི་མཁའ་ཡི་ཀློང་དང་མ་བྲལ་བར་བསྒྲུབས་པས། གུད་དུ་འབྱུང་བ་ནམ་མཁའི་རིམ་གྲོ་ཐུན་མོང་བ་ཕན་རླབས་ཅན་ཞིག་འབྱུང་ངེས་པའོ། ཐུན་མོང་མ་ཡིན་པ་ནམ་མཁའི་རིམ་གྲོ་གཙོ་བོ་ནི། སེམས་ཀྱི་གནད་ལ་ཐུག་པས། མཐའ་བྲལ་ནམ་མཁའི་ངོགས་ལྟར་སེམས་ཀྱི་འཁྲུལ་བ་བཤིག་པའི་མན་ངག་ཟབ་མོ་གང་དག་ལ་འཇུག་ཤེས་པར་མཛོད་ཅིག དེ་ནས་ནམ་མཁའ་ལས་སུ་རུང་བས་གཞན་སྣང་མཁྱེན་པའོ་ཞེས་དང་། ཡང་རྩེ་ཀློང་ཆེན་ལས། དབུགས་ཕྱི་ནང་དུ་རྒྱུ་བ་མི་ཚོར་ན། འབྱུང་བ་ནམ་མཁའ་ལས་སུ་རུང་བའི་རྟགས། ཞེས་གསུངས་སོ།
བཞི་བ་མཐར་འབྱུང་བས་འཇིག་ཚུལ་ལ། དང་པོ་འབྱུང་ལྔས་བསྐྱེད་ཅིང་བར་དུ་བསྡུད་པའི་སྣོད་བཅུད་རྣམས་ནི། སྤྱིར་འབྱུང་བ་མེ་ཆུ་རླུང་གསུམ་གྱི་བསྐལ་པས་འཇིག་མོད། དཔེར་ན། བསམ་གཏན་དང་པོ་རྟོག་དཔྱོད་མེ་ལྟ་བུ་དེ་མ་བྲལ་བས་མཐར་མེ་ཡི་བསྐལ་བས་འཇིག བསམ་གཏན་གཉིས་པ་དགའ་བདེ་ཆུ་ལྟ་བུ་དེ་མ་བྲལ་བས་མཐར་ཆུ་ཡི་བསྐལ་བས་འཇིག བསམ་གཏན་གསུམ་པ་གཡོ་རྩོལ་རླུང་ལྟ་བུ་དེ་མ་བྲལ་བས་མཐར་རླུང་གི་བསྐལ་བས་འཇིག་པའོ། བསམ་གཏན་བཞི་བ་ཡན་ཆོད་ལ་དེ་ལྟར་གྱི་འབྱུང་བས་བསྐྱེད་བསྡུད་མེད་པས། མཐར་འབྱུང་ལྔའི་གཡར་ཁང་ངམ། ཁམས་དྲུག་ལྡན་གྱི་སྐྱེ་བོའི་གང་ཟག་བཅས་ཀྱི་ཕུང་བོ་འདི་ཉིད་ཀྱི་འབྱུང་བའི་ནུས་པའམ་ཚེ་ཡི་ཚད་རྫོགས་ན་འཆི་བའམ་འཇིག་པའོ། འཇིག་ཚུལ་ནི། ལུས་དང་པོ་ཆག་རིམ་ལྟར་དུ་འཇིག་པའོ། ལུས་གནས་ཀྱི་འབྱུང་ལྔའི་འཁོར་ལོ་ལྔ་ཡི་དང་པོ་ལྟེ་བ་ས་ཡི་འཁོར་ལོ་ཆགས་སྔ་བས་ས་ཡི་འཁོར་ལོ་ཞིག་ནས་ནུས་པ་ཆུ་ལ་ཐིམ་པའི་རྟགས་ཤར་ཏེ། ལུས་སྟོབས་ཤོར་ནས་ལྡང་མི་ནུས། བལ་འདབ་གསེར་རྡོས་མནན་པ་ལྟར་སོང་སྟེ། ང་ཐེག་ཅིག་ཟེར་བ་འབྱུང་ངོ་། དེ་ནས་ཆུ་ཡི་འཁོར་ལོ་ཞིག་ནས་ནུས་པ་མེ་ལ་ཐིམ་པའི་རྟགས་སུ། ཁ་སྣ་ཐམས་ཅད་སྐམ་ནས་སྐོམ་དད་སྐྱེས་ནས། སྐམ་པ་རྣམས་སྦངས་ནས་རློམ་དུ་མི་འགྲོ་བ་ནམ་བཞུག་ཆད་པའི་རྩ་འགབ་བརྫེས་པ་ལྟར་འབྱུང་། མེ་ཡི་འཁོར་ལོ་ཞིག་ནས་རླུང་ལ་ཐིམ་པའི་དུས། མར་མེ་འཆི་ཁ་མའི་འོད་བཞིན་དུ་ཤེས་པ་གསལ་ལམ་པ་ཞིག་འོང་པས། དེའི་དུས་སུ་འཆི་ཁའི་སེམས་བསྐྱེད་བཟང་ངན་ཡིན་ཞེས་པའི་དུས་ལ་སླེབས་པ་ཡིན་པས་དེ་ལུགས་དགོས་གསུངས། རྟགས་ནི་སྔོན་ནས་དགེ་ཤས་ཆེ་བའི་རིགས་རྣམས། ལུས་དྲོད་རྣམས་རྐང་པ་ནས་རིམ་བཞིན་ཡར་སྤྱི་བོར་ཐིམ་པའོ། སྡིག་པ་ཆེ་བའི་རིགས་རྣམས། ལུས་དྲོད་མར་ཐིམ་པའོ། དགེ་སྡིག་ཤས་མཉམ་པ་རྣམས། ལུས་དྲོད་སྙིང་ཁ་དང་ལྟེ་བར་འདུའོ། རླུང་གི་འཁོར་ལོ་ཞིག་ནས་ནམ་མཁར་ཐིམ་པའི་དུས། དབུགས་བརྩེགས་མར་འོང་ཞིང་ནང་དུ་སྡུད་མི་ཤེས་པས། མིག་གྱེན་ལ་བཟློག་སྟེ་ཧ་ཟེར་ནས་དབུགས་གཅིག་ཆར་དུ་སྡུད་པ་དང་རིམ་གྱིས་ཆད་པ་གཉིས་ཀྱིས་དབུགས་དང་སེམས་འགྲོགས་ནས། ཕོ་སེམས་ལྕེ་དང་རྐན་གྱི་བར་ནས་འབྱུང་། མོ་སེམས་སྣ་ཁུང་ནས་འབྱུང་ནས། རླུང་ནམ་མཁར་ཐིམ་མོ། ཞེས་རྫོགས་པ་ཆེན་པོ་ཡང་རྩེ་ཀློང་ཆེན་ལས་གསུངས་སོ།
མདོར་ན་གཞི་གནས་ལུགས་སྟོང་པའི་རང་གདངས་ཀྱི་རྩལ་སྒྲ་འོད་ཟེར་གསུམ་ལ་སྟོང་པའི་རང་སྒྲ་རང་འོད་རང་རྩལ་དུ་མ་ཤེས་ནས། འཁྲུལ་པའི་དབང་གིས་ཕྱི་ནང་གི་འབྱུང་བ་གདོས་བཅོས་ཕུང་བོ་དང་ནུས་ཅན་གྱི་
|
