༄༅། །ཕྱག་དབང་སྐོར་གྱི་བྱུང་ཁུངས་གོ་དོན་བཅས་རགས་ཙམ་གླེང་བ།
|
དང་གོ་དོན་ཡང་ཅི་ལ་ཡོད་དེ་མེད་དོ།།
ཕྱག་དབང་ཞུ་བའི་ལུགས་སྲོལ་གྱི་བྱུང་བའི་ཁུངས་ནི། སྙན་རྒྱུད་ལྡེ་མིག་དགུ་སྐོར༼ག༽ལྡེབ་༥༢ནས། ཨ་ཨཱོྃ་ཧཱུྃ་རྃ་ཛ། ཐོ་ཡེ་གེ་ཙོ་རག་ཤ་ཧྲིག་ནན་དུལ་ཤག ཅེས་དང་། དང་པོ་སེམས་བསྐྱེད་ཚིག་བརྗོད་བསམ། །ཐོ་ཡེ་གེ་ཙོས་བར་ཆོད་བསལ། །གཡུང་དྲུང་གནས་བཞིར་སྐྱབས་གསོལ་ནས། །དཔོན་གསས་རྣམས་ལ་མཁྱེན་པ་གསོལ། །སོར་མོ་ལྔ་ཡི་རྩེ་མོ་ལ། །དཔའ་བོ་འབྲུ་ལྔའི་ས་བོན་ལས། །ལྷ་ལྔ་རིག་སྟོབས་ཡེ་ཤེས་བསྐྱེད། །བདག་དང་སློབ་མ་རྩེར་ཆིབ་པར། །དབང་བསྐུར་བྱིན་གྱིས་རླབས་པར་བྱའོ། །ཞེས་པ་ནས། ཨ་ཨཱོྃ་ཧཱུྃ་རྃ་ཛ་སད་སལེ་ལྷན་ནེ་འདུ། ཞེས་པའི་བར་ཚིག་བཤད་སྔགས་དང་སྦྲེལ་ནས་གསུངས་འདུག་པས། དེ་དག་གི་གོ་དོན་ནི་དབང་སྐུར་བ་པོ་དཔོན་གསས་རང་ཉིད་ཀྱིས་ལུས་ངག་ཡིད་གསུམ་གྱི་སྒོ་ནས་དབང་ཇི་ལྟར་བསྐུར་དགོས་པའི་ཚུལ་བསྟན་པ་ཡིན། ལས་ཚོགས་ཇི་འདྲ་ཞིག་ལ་འཇུག་དགོས་ཚེ་ཐོག་མར་ལས་ཚོགས་དེར་བར་ཆོད་བྱེད་པའི་གེགས་རྐྱེན་རྣམས་ངོ་ཤེས་ན་དང་པོ་ཉིད་ནས་བསལ་དགོས་པ་ཞིག་ཡིན་སྟབས་འདིར་ཡང་ཐོག་མར་མཚན་ལྡན་གྱི་བླ་མ་དེས་ཐོ་ཡེ་གེ་ཙོ་ཞེས་སྔགས་ཚིག་དང་ཉུང་དཀར་ཏིང་ངེ་འཛིན་བཅས་སྦྲགས་ཏེ་སློབ་མའི་ལུས་ངག་ཡིད་གསུམ་ལ་བར་ཆོད་བྱེད་པའི་ཕྱི་ནང་གསང་གསུམ་གྱི་དགྲ་རྣམས་ཕར་མཐར་བསྐྲད། དེ་རྗེས་སྔོན་འགྲོ་སེམས་བསྐྱེད་དམ་པས་གཞི་བཟུང་སྟེ་སློབ་མའི་གཙོར་བྱས་འགྲོ་དྲུག་གི་སེམས་ཅན་རྣམས་དམིགས་ཡུལ་དུ་བཟུང་ཞིང་ངག་གིས་ཇི་ལྟར་རྒྱལ་བ་འཕགས་པ་སོགས་སེམས་བསྐྱེད་པའི་ཚིག་བཤད་གང་ཞིག་བརྗོད། འཁོར་གྱི་སློབ་མ་ལའང་སྐྱབས་སེམས་ཀྱི་སྡོམ་པ་ཡིད་ལ་དྲན་དུ་བཅུགས་པའམ་གསལ་འདེབས་པར་བྱ། དེ་ནས་ཕྱག་དབང་གནང་པ་པོས་ཕྱག་གཡས་པའི་མཐེ་བོང་ནས་རིན་བཞིན་སོར་མོ་ལྔ་ཡི་རྩེ་མོར་དཔའ་བོ་འབྲུ་ལྔ་སྟེ་ཨ་ཨཱོྃ་ཧཱུྃ་རྃ་ཛ་བསྐྱེད། དེ་འོད་དུ་ཞུ་བ་ལས་ཨ་ལས་ལྷ་ཀུན་སྣང་ཁྱབ་པ། ཨཱོྃ་ལས་གསལ་བ་རང་འབྱུང་། ཧཱུྃ་ལས་དགེ་ལྷ་གར་ཕྱུག རྃ་ལས་བྱེ་བྲག་དངོས་མེད། ཛ་ལས་དགའ་བ་དོན་གྲུབ་དང་ལྔ་རུ་གནས་གྱུར་པར་བསམ། དེ་ཡང་སོར་མོའི་གནས་རྣམས་ནི་རིགས་ལྔའི་ཞིང་ཁམས་སྟེ། དབུས་དང་། ཤར། བྱང་། ནུབ། ལྷོ་བཅས་ཞིང་ཁམས་རྣམ་པར་དག་པ་རུ་གསལ་གདབ་སྟེ་ལྷ་དེ་རྣམས་གཙོ་འཁོར་དང་བཅས་དེ་རུ་བཞུགས་པར་བསྒོམ། དེ་ཡང་ རྒྱུད་ཏིང་མུར་གཡུ་རྩེ་༼ལྷ་སྲས་པར་མ་བཀའ་འགྱུར་སྔགས་སྡེ་ པོད་ཨང་༼༡༥༡༽ལྡེབ་༼༤༥༽ནས། རག་པར་བསྐྱེད་པའི་ལྷ་ཚོགས་ཡང་། །རྒྱུ་ལུས་བེམ་པོ་མ་ཡིན་ཆོ་འཕྲུལ་འོད་ཀྱི་གཟུགས། །འཇིགས་དང་དབལ་མེད་མ་ཡིན་ཁྲོ་གཏུམ་འབར་བའི་དབལ། །ཕན་མེད་གནོད་མེད་མ་ཡིན་མཁྱེན་བརྩེ་སྟོབས་དང་ལྡན། །ཞེས་ཁྲོ་བོའི་ལྷ་ཚོགས་ཀྱི་ངོ་བོ་ཇི་ལྟར་ཡིན་པའི་ཚུལ་གསུངས་པ་ལྟར་རིགས་ལྔའི་ལྷ་ཚོགས་འདི་རྣམས་ཀྱང་རྟོག་འཛིན་དམ་པོས་བཟུང་བའི་གདོས་བཅས་ཤ་ཁྲག་གི་གཟུགས་ཅན་ནམ་ས་རྡོ་རི་བྲག་གི་རྣམ་ཅན་ལྟ་བུ་ནི་མི་སེམས་ཏེ། སྐུ་ལོངས་སྤྱོད་རྫོགས་སྐུའི་རྣམ་ཅན་ཞི་བ་ཞལ་གཅིག་ཕྱག་གཉིས་རིགས་ཀྱི་ཁ་དོག་དང་ལྡན་པ་སྟོབས་༼བྱམས་པ། སྦྱིན་པ། ཡེ་ཤེས། ཞི་བ། ཡངས་པ་ཆེན་པོའི་སྟོབས་སོ།།༽དང་ཡེ་ཤེས་༼སྟོང་ཉིད། མཉམ་ཉིད། མེ་ལོང་། སོར་རྟོགས། བྱ་གྲུབ་ཀྱི་ཡེ་ཤེས་དང་ལྔའོ།།༽ཀྱིས་ཡོངས་སུ་ཕྱུག་པའི་སྟོང་གཟུགས་ཕྱག་རྒྱ་ཆེན་པོའི་བདག་ཉིད་ཅན་ཞིག་ཡིན་ནོ། །བླ་མས་དེ་འདྲའི་དམིགས་རིམ་དང་ལྡན་པའི་སྒོ་ནས་སློབ་མའི་མགོ་ཐོག་ཏུ་ཕྱག་བཞག་པས། བླ་མའི་ཕྱག་སོར་ལ་བསྒོམ་པའི་ལྷ་སྐུ་རིགས་སྟོབས་ཡེ་ཤེས་ཀྱི་བདག་ཉིད་དེ་ཉིད་སློབ་མའི་ལུས་ངག་ཡིད་གསུམ་ལ་ཐིམས་པ་དང་། དེ་མ་ཐག་སློབ་མ་ཉིད་ཀྱང་བླ་མའི་ཇི་ལྟར་བསྐྱེད་པའི་ལྷ་སྐུ་རིགས་སྟོབས་ཡེ་ཤེས་དེ་དག་དང་གཉིས་མེད་གཅིག་གི་བདག་ཉིད་དུ་གྱུར་པར་བསམ། སྐབས་འདིར་བླ་མས་ལྷ་སྐུ་རིགས་སྟོབས་ཡེ་ཤེས་བསྐྱེད་པའི་སྔགས་དང་ཚིག་བཤད་ཀྱང་ལྷན་དུ་བསྒྲགས་དགོས་པས་སྔགས་ཚིག་རྣམས་གཤམ་ནས་རིམ་བཞིན་འདྲེན་པར་འདོད། དེ་ལྟ་བུའི་བསྐྱེད་བསྒོམ་གྱི་དམིགས་རིམ་དང་འབྲེལ་བའི་དབང་བསྐུར་བ་ནི་གོང་དུ་དྲངས་པའི་ལུང་ལས་བདག་དང་སློབ་མ་རྩེར་ཆིབ་ཅེས་པ་དང་། དབང་བསྐུར་བྱིན་གྱིས་རློབས་ཞེས་པའི་གོ་དོན་ཚང་བ་ཡིན་པར་འདོད། ངག་གིས་བཟླ་བའི་སྔགས་དང་ཚིག་བཤད་ནི། ལུང་དེ་ཉིད་ལས། མུ་ཡེ་ཧ་ར་སད་དོ་པུ་ཏ་ར་ཨ་ཞེས་པ་ནས་སྔགས་ཕྲེང་ལྔ་དང་། ཚིག་བཤད་ཨ་ཨཱོྃ་ཧཱུྃ། མ་རིག་མུན་པའི་རྒྱུ་བསྐྱེད་པའི་ཞེས་པ་ནས་ལྷན་ནེ་འདུ་ཞེས་པའི་བར་ལེགས་སྨོན་གྱི་ཚིག་རྐང་བཅུ་དང་སྔགས་ཕྲེང་གཅིག་གིས་འགྲོ་བའི་རྒྱུད་ཀྱིས་བསྡུས་པའི་ཉོན་མོངས་དང་སྡུག་བསྔལ། ནད་དང་གནོད་པ། རྐྱེན་དང་བར་ཆོད་ཐམས་ཅད་སློབ་དཔོན་གྱིས་སྐྱེ་མེད་རོལ་པ་ཆེན་པོའི་དབྱིངས་སུ་བསྟབ་པ་སྟེ་རྒྱས་གདབ་པའམ་ཞི་བར་བྱེད་པའོ། །ཚུལ་ནི་དབང་ཞུ་བ་པོ་སློབ་མའི་རྒྱུད་ཀྱི་དད་པའི་ཨ་ལོང་དང་། བླ་མའི་ཐུགས་རྗེའི་ལྕགས་ཀྱུ་གཉིས་རྩེ་འཕྲོད་པ་ཡིན་པས་བྱིན་རླབས་རང་རྒྱུད་ལ་མི་འཇུག་པ་མི་སྲིད་དོ། །བྱིན་རླབས་ཞུགས་པའི་དོན་ནི་རྒྱུ་རྐྱེན་རྟེན་འབྲེལ་དེ་དག་ལ་བརྟེན་སློབ་མ་རང་ཉིད་གྱི་རྒྱུད་འགྱུར་བ་སྟེ། ཉོན་མོངས་པའི་རྟོག་ཚོགས་གྱི་གཡུལ་ངོ་ལ། ཡེ་ཤེས་ཀྱི་གོ་ཆ་བགོ་ཤེས་པ། འཇིག་རྟེན་ལ་ཆགས་ཞེན་བསྐྱུངས་པ། གཞན་གྱི་སྡུག་བསྔལ་ལ་དམིགས་པའི་བྱམས་དང་སྙིང་རྗེ་རང་ཤུགས་ཀྱིས་བསྐྱེད་པ། རང་རྒྱུད་དུལ་བ་སྟེ་ཐ་མལ་གྱི་ལས་སྤྱོད་རྩིང་པོའི་རྗེས་སུ་མི་འབྲེངས་བ། གཞན་རྒྱུད་འདུལ་བ་སྟེ་གཞན་དག་དགེ་བའི་ཕྱོགས་ལ་གཞོལ་བ་ལ་སོགས་པའི་ཡོན་ཏན་གྱི་ཆ་ཙམ་ཡང་རང་རྒྱུད་ལ་ནམ་སྐྱེས་པའི་ཚེ་དེ་ནི་བླ་མའི་བྱིན་གྱིས་བརླབས་པ་དང་། སློབ་མས་བྱིན་རླབས་ཐོབ་པའམ། དབང་ཐོབ་ཞེས་པའི་དོན་ཡང་ཡིན། །དེ་དག་ནི་ལེགས་སྨོན་རྟེན་འབྲེལ་གྱི་སྒོ་ནས་བྱིན་རླབས་ཕྱག་རྒྱའི་དབང་ལུས་ལ་བསྐུར་ཚུལ་བསྟན་པ་ཡིན་ནོ། ། |
