སྲུང་མདུད་ཀྱི་མཚོན་དོན་དང་ཕན་ནུས་སྐོར་རགས་ཙམ་གླེང་བ།

     དེ་ཡང་རང་རེའི་བོད་མི་རྣམས་ཀྱིས་སྲུང་མདུད་ཅེས་བླ་མའི་ཕྱག་ནས་བརྒྱུད་པའི་སྐུད་པ་མདུད་པ་ཅན་ཞིག་ལུས་ལ་འདོག་སྲོལ་ཡོད་པ་འདི་ནི།ཆོས་ལུགས་ཀྱི་ཕྱག་ལེན་ཞིག་གི་ཐོག་ནས་ལུགས་སྲོལ་རྒྱུན་མར་བྱུང་ཡོད་པ་ཞིག་ཡིན།ད་རེས་ངས་སྲོལ་རྒྱུན་གྱི་ལུགས་སྲོལ་འདི་ཉིད་ཇི་ལྟར་ཡིན་པའི་ཚུལ་གྱི་ལུང་རེ་འགའ་ཞིག་བཀའ་ལུང་རྣམས་ཀྱི་གསེང་ནས་ཚུར་མདུན་དུ་སྟོན་པའི་ཚུལ་བྱས་ཏེ་གསལ་བཤད་ཅུང་ཟད་རེ་བྱེད་པར་འདོད།འདི་ལ་ཡང་སྲུང་བ་གཞན་མཚུངས་ལྟར་ངོ་བོ་དང་རྣམ་པ་ཕན་ནུས་བྱེད་ལས་སོགས་ཡོན་ཏན་དུ་མ་ཞིག་གི་སྟེང་ནས་འཆད་རྒྱུ་ཡོད།དེ་ཡང་སྲུང་མདུད་ཀྱི་ངོ་བོ་ལྷ་ཡི་དམིགས་རྟེན་དུ་བཟུང་ནས་ལུས་སྲུང་ཚུལ་ཡོད་པས་དེ་ནི་ལུང་དོན་དང་སྦྲགས་ཏེ་རྗེས་སུ་རིམ་པར་འཆད་རྒྱུ་ཡིན། དང་པོ་སྲུང་མདུད་ཀྱི་རྣམ་པའི་ཐོག་ནས་བཤད་ན་དར་རས་སྐུད་པ་སོགས་གང་ཡང་རུང་བར་དགུ་མདུད་གཅིག་མདུད་ཉེར་གཅིག་གི་མདུད་པ་སོགས་མདུད་པ་གྲངས་ཅན་དང་གྲངས་མེད་སོགས་ཅི་རིགས་བྱེད་སྲོལ་འདུག ཁ་དོག་གི་ཆ་ནས་དཀར་པོ་དང་ནག་པོ་སྔོན་པོ་ཁ་དོག་རྣམ་ལྔ་གཅིག་སྒྲིལ་བྱས་པ་སོགས་ནི་རང་རེའི་གཞུང་ལས་དངོས་བསྟན་དུ་ཡོད་པ་ཞིག་ཡིན།

     གཉིས་པ་བསྲུང་བྱ་གང་སྲུང་ཞེ་ན་དེ་ནི་རང་གི་ལུས་དང་ཚེ་སྲུང་དགོས་པ་དང་། །གང་ལས་སྲུང་ན་སྲུང་ཚུལ་གྱི་ཁྱད་པར་ཏེ་ཕྱི་ཡི་དགྲ་ཇག་དང་ཁྱིམ་རྐུན། ནང་གི་ནད་དང་གནོད་པ་རྐྱེན་དང་བར་ཆོད་རྣམས་རང་ཕྱོགས་སུ་ཡོང་བར་འགོག་པར་བྱེད་པ་ཡིན། གཙོ་བོ་བྱེད་ལས་ཀྱི་ཆ་ནས་བཤད་དེ་ལུས་སྲུང་བ་དང་ཚེ་སྲུང་བ་གཉིས་ཀྱི་སྒོ་ནས་བསྟན་ཡོད། དེ་ཡང་ལུས་སྲུང་ཞེས་པ་ནི་གོང་བཤད་ལྟར་རང་གི་ལུས་ལ་གནོད་པར་བྱེད་པའི་ཕྱི་ནང་གསང་གསུམ་གྱི་བར་ཆོད་ཐམས་ཅད་འགོག་པར་བྱེད་པ་ལ་ལུས་སྲུང་ཞེས་བརྗོད། ཚེ་སྲུང་བའི་གོ་དོན་འཆད་འགྱུར་གྱི་སྐབས་སུ་འབྱུང་ངོ་།། ངས་འདི་ལྟར་བཤད་མ་ཐག་ཁ་ཤས་ཀྱིས་སྐུད་པ་ཞིག་གིས་ལུས་ཇི་ལྟར་སྲུང་ཐུབ་བམ་འདི་ནི་རྨོངས་ཞེན་མཁྲེགས་འཛིན་བྱས་པའི་ལུགས་སྲོལ་ཏེ་ཕན་ཐོགས་སྣེ་གཅིག་མེད་ཁར་མི་མང་རྣམས་མུན་པའི་སྨག་རུམ་དུ་ཁྲིད་བྱེད་གཅིག་ཏུ་ཡིན་པར་རློམ་མཁན་དང་བཤད་མཁན་ཡང་ཡོད་སྲིད། གལ་སྲིད་ཁྱོད་ཀྱིས་སྲུང་མདུད་ལ་དགོས་པའི་བདག་གཞན་གྱི་ཆ་རྐྱེན་གང་ཡང་མེད་ངོས་འདི་ལྟར་བཤད་ན་དེ་ནི་བདེན་དོན་ཞིག་ཅི་ལ་མིན་ཏེ་སྐུད་པ་མདུད་ཅན་ཞིག་ཡིན་པ་ཙམ་གྱིས་ལུས་སྲུང་མི་ཐུབ་པ་མ་ཟད་དེ་འདྲ་ནི་ཕན་མེད་ཀྱི་བྱ་སྤྱོད་ཅིག་ཏུ་བརྩིས་ནའང་མི་འགྲིགས་རྒྱུ་མེད་སྙམ། ངས་དེ་ལྟར་མི་འདོད་དེ་སྲུང་མདུད་ལ་དགོས་པའི་ཆ་རྐྱེན་དུ་མ་ཞིག་ངེས་པར་ཚང་དགོས་ལ་དེ་དག་ལ་གཞིགས་ནས་ཕན་ཐོགས་དང་མི་ཐོགས་དངོས་བྱུང་ལོ་རྒྱུས་ཀྱི་སྟེང་ནས་བསམ་ཆོག་པ་དང་། དེ་མིན་རང་གི་ལུས་ངག་ཡིད་གསུམ་ལ་རྩིས་བཤེར་བཏང་སྟེ་སྲུང་བ་མདུད་པ་པོར་རང་གི་སེམས་ཀྱིས་གདེང་འཇོག་ཇི་འདྲ་རྒྱག་གིན་ཡོད་མེད་དང་། རང་གིས་ཡིད་ཆེས་དང་བཀུར་བསྟིས་དང་ལེན་ཇི་ལྟར་ཞུ་ཐུབ་ཀྱིན་ཡོད་མེད་བཅས་ཀྱི་རྒྱ་སྲང་ལ་འདེགས་ནས་ཕན་གནོད་བཤད་དགོས་པ་ཞིག་ཀྱང་རེད། དེ་མིན་དེ་སྔོན་བཤད་སྲོལ་ཞིག་སྟེ་སྲུང་འཁོར་ཞེས་ཆོས་ལུགས་རྨོངས་དད་བྱེད་མཁན་གྱིས་ཤོག་གུ་དང་རས་ཀྱི་ཐོག་ལ་གཟུངས་སྔགས་དང་ཆོས་ལུགས་ཀྱི་མཚོན་དོན་དཔེ་རིས་སོགས་བྲིས་ནས་ལུས་ལ་འདོགས་རྒྱུ་ཞིག་གི་མིང་ཞེས་འགྲེལ་བཤད་སྐྱོན་གྱིན་ཡོད་པ་ལྟར་སྲུང་སྐུད་འདི་ཡང་ཕན་ནུས་ཀྱི་ངོ་བོ་མཚོན་མི་ཐུབ་པར་རྨོངས་དད་ཀྱི་བྱ་བ་གཅིག་པུར་ངོས་འཛིན་བྱས་ན་མི་འགྲིགས། གལ་སྲིད་ཆོས་ལུགས་དེའི་བྱེད་སྒོ་དང་ལག་ལེན་གང་ཞིག་ཡིན་རུང་དེའི་རྒྱབ་ལྗོངས་དང་ངོ་བོ་མཚོན་དོན་བཅས་གཏིང་ཚུགས་པའམ་ཕྱེད་ཙམ་མམ་ཆ་ཙམ་ཡང་མ་ཤེས་གོང་དེ་ལ་རྨོངས་དད་སོགས་ཀྱི་འགྲེལ་བཤད་རྐྱང་པ་བྱས་ན་ང་ཚོའི་བརྡ་དོན་ཐ་སྙད་གང་ཞིག་ཡིན་རུང་དེ་དག་ལ་མངོན་ལྐོག་གཉིས་དང་ཚད་མ་གསུམ་གྱི་ལམ་ནས་འགྲེལ་རྒྱུ་ཡོད་པ་སྲ་ཐག་ཐག་ཅིག་དང་འགྲིགས་ཆག་ཆག་བཟུང་དུ་ཡོད་པ་ཞིག་སུ་ལ་ཡང་མེད་ལ་སུས་རྐྱང་རྙེད་ཐུབ་མེད། དེ་ནི་རྟེན་འབྱུང་རིགས་པའི་སྒོ་ནས་བདེན་མེད་སྒྲུབ་ཚུལ་དང་མཚུངས་པ་ཡིན། ངས་གོང་དུ་འདི་ལ་དངོས་བྱུང་ལོ་རྒྱུས་ཀྱི་སྟེང་ནས་བསམ་ཆོག་ཅེས་པ་ནི་དེ་སྔོན་རང་རེའི་དཔའ་བོ་དཔའ་མོ་དུ་མ་ཞིག་གིས་སྲུང་བ་ལུས་ལ་བཅང་ནས་ཕ་རོལ་པོར་གཡུལ་འཐབ་བྱེད་སྐབས་རང་ལ་མདའ་ཚོན་ཆར་ལྟར་ཕབ་ཀྱང་ལུས་ལ་གནོད་མ་ཐུབ་པ་དང་། འགའ་ཞིག་ནི་ཕ་རོལ་པོའི་ལག་ཏུ་ཚུད་ཀྱང་སྲུང་བའི་དྲིན་ལ་བརྟེན་མཚོན་གྱིས་བྱེད་ཐབས་ཟད་ནས་མཐའ་རུ་གཡུག་པ་དང་། རྟ་ཡིས་དྲུད་པ་བྱས་ཚུལ་སོགས་འཆད་རྒྱུ་ཡོད་པ་དག་བོད་རྒན་ཕལ་ཆེར་གྱིས་ཤེས་ངེས་རེད། གཞན་ཡང་སྲུང་བའི་ནུས་པར་བརྟག་ཏེ་དུད་འགྲོ་ལ་སྲུང་བ་བཏགས་ནས་མཚོན་གྱིས་རྡེག་སྟེ་ཉམས་ཚོད་བྱས་ཀྱང་གནོད་མ་ཐུབ་ཚུལ་སོགས་ལོ་རྒྱུས་དུ་མ་ཡོད་པ་འདི་དག་གིས་སྲུང་བའི་ཕན་ནུས་ཇི་འདྲ་ཡོད་མེད་སྐོར་གྱི་བདེན་དཔང་སྟོན་ཐུབ་པ་ཡིན། བཤད་མཚམས་འདིར་སླེབས་སྐབས་ཡང་ལྐུག་རྟགས་སྟོན་མཁན་ཁ་ཤས་ཀྱིས་སྲུང་བ་འདི་ཇི་འདྲའི་ལས་སླ་བའི་ཕན་ནུས་ཆེན་པོ་ཞིག་ལ་རྩིས་ནས་རང་གི་མོས་ཁམས་དང་བླ་མའི་མཐུ་ནུས་ཀྱི་རྟེན་འབྲེལ་འགྲིག་དགོས་པར་མི་ཤེས་པའམ་དེ་དག་གང་ལ་ཡང་ཉམས་འཇོག་མི་བྱེད་པར་སྲུང་བ་སྐེ་ལ་བཏགས་ནས་དགྲ་བོའི་མཚོན་ཐོག་ཏུ་ཤར་རེར་རྒྱུག་སྲིད་པས་དེ་དག་ནི་དུས་ནམ་ཡང་འོས་སུ་མ་མཆིས་པའི་བྱེད་སྟངས་ཞིག་ཡིན་པར་བརྟེན་སྲུང་བ་འདི་དག་གིས་དེ་འདྲ་ལ་སྲུང་སྐྱོབ་བྱེད་ཐུབ་པར་ཁས་ལེན་མི་ཐུབ། གསུམ་པ་སྲུང་བ་སྒྲུབ་ཚུལ་ཡིན་པས་དེ་ལ་དམིགས་གཏད་དང་སྔགས་ཚིག་བཅས་རྣམ་པ་མི་འདྲ་བ་དུ་མ་ཞིག་ཡོད་པར་ངེས་ཏེ་མཚོན་སྲུང་བའི་ཆེད་དང་། ནད་གདོན་སྲུང་བའི་ཆེད་དང་། ཚེ་བསྲུང་བའི་ཆེད། དགྲ་ཇག་ཁྱིམ་རྐུན་སྲུང་ཆེད། ཕྱུགས་ནད་སྲུང་ཆེད་སོགས་དུ་མ་ཞིག་ཡོད་ཀྱང་སྐབས་འདིར་གོང་དུ་བཤད་པ་ལྟར་མི་ཡི་ཚེ་ལུས་གཉིས་སྲུང་ཚུལ་དང་ལྷ་མཆོག་དྲན་པའི་བརྡ་རྟགས་སམ་དམིགས་རྟེན་ཇི་ལྟར་བཟུང་ཚུལ་བཅས་ཀྱི་སྒོ་ནས་འཆད་པར་འདོད། དེ་ཡང་ལུས་སྲུང་ཐུབ་དང་མི་ཐུབ་ཅེས་པ་ནི་སྲུང་བ་མདུད་པ་པོའི་དགོངས་རྟོགས་དང་མཐུ་ནུས་ལ་རག་ལས་ལ་རང་གི་དད་གུས་ཡིད་ཆེས་ལའང་རག་ལས་ཀྱི་འབྲེལ་བ་ངེས་ཅན་ཞིག་ཡོད་དགོས། སྤྱི་ཡི་ཆ་ནས་སྲུང་བ་ཞེས་པ་འདི་མིང་ཚིག་ཅིག་ལ་འཇུག་པའི་དབང་དུ་བྱས་ན་སྲུང་སྐུད་གཅིག་པུ་ལ་འཇུག་རྒྱུ་མ་ཡིན་པར་སྲུང་འཁོར་སྲུང་རྫས་སྲུང་ཐུམ་སོགས་སྤྱི་ཡི་སྡེ་ཚན་དང་ནང་གསེས་ཀྱི་ཁྱད་པར་ཡང་མི་འདྲ་བ་སྣ་ཚོགས་ཡོད། དེ་དག་ནི་བསྲུང་བྱ་གང་ཞིག་སྲུང་བྱེད་ཡིན་པ་འདྲ་ཡང་གཟུངས་སྔགས་དང་འདོད་གསོལ་བྱེད་ཐབས་ལག་ལེན་བཅས་ཀྱི་རྣམ་པ་མི་འདྲ་བས་ཡིན།

       ད་ནི་གོང་དུ་བཤད་དམ་བཅས་པ་ལྟར་འདི་ཉིད་ཀྱི་བྱུང་ཁུངས་དང་