བོན་ལུགས་དང་འབྲེལ་ནས་བོད་ཀྱི་རིག་གནས་ཀྱི་ཐོག་མའི་བྱུངས་ཁུངས་ལ་དཔྱད་པ།
|
མངའ་མཛད་བཅུའམ་བཅུ་གཉིས་སོགས་བཤད་པ་དེ་དག་གི་གྲོལ་ཕུག་ཀྱང་འདི་ལ་ཐུག་གོ༽ སྲིད་པ་ཆགས་པའི་སྔོན་གྱི་ཤེད་ཅན་དང༌། ཤེད་བདག་དང་ཤེད་བུ་དང༌། ཤེད་ལས་སྐྱེས་ཏེ་བཞི་བྱུང་བ་ལས་གླིང་སོ་སོའི་མི་རྣམས་དང༌། དེ་ལས་ཀྱང༌། ཤེད་ལས་སྐྱེས་དང་ལྷ་མོ་ཡིད་གསལ་མ་གཉིས་ལ་སྲས་བཞི་བྱུང་བ་ནི། རྫུ་འཕྲུལ་ཅན་དང་སྟོབས་ལྡན་དང་འོད་ཅན་དང༌། སྒྲ་གཅན་དང་བཞི་བྱུང༌། དེའི་ནང་གི་རྫུ་འཕྲུལ་ཅན་གྱི་རྒྱུད་ལས་འཛམ་གླིང་གི་མི་རྣམས་གྲོལ་ཞེས་སྲིད་པའི་མཛོད་ཕུག་སོགས་སྟོན་པ་གཤེན་རབ་ཀྱིས་སྲས་ལུང་འདྲེན་གསལ་བ་ལ་གསུངས་པའི་སྐབས་སུ་ཏེ། སྲས་སྤྲུལ་མདོ་ལས་གསུངས་སོ། འཛམ་གླིང་གི་མི་གྲུང་ཤེས་མཆོག་ཏུ་གྱུར་བ་ནི། སྲིད་པ་ཡེ་སྨོན་འཕྲུལ་གྱིརྒྱལ་བོ༼མང་བཀུར་རྒྱལ་བོ༽དང་ཆུ་རླུང་རྫུ་འཕྲུལ་མ་གཉིས་ཀྱི་སྲས་སུ་ཕྱ་རྗེ་སྒམ་པོ་དང༌། དམུ་རྗེ་བཙན་པོ་དང༌། གཙུག་རྗེ་ཨོས་ཀོ་དང་གསུམ་བྱུང༌། ཕྱ་རྗེ་སྒམ་པོ་ལས། ཡེ་མཁྱེན་འཕྲུལ་གྱི་རྒྱལ་བོ། ཐུགས་དཀར་ཡུལ་ལྷ་གཞི་བདག་ཐམས་ཅད་གྲོལ། དམུ་རྗེ་བཙན་པོའི་གདུངས་ལས། རྒྱལ་རིགས་བྲམ་ཟེའི་རིགས། རྗེའུ་རིགས་དམངས་རིགས་བཞི་བྱུང༌། རྒྱལ་རིགས་ཀྱི་རྒྱུད་ལ། འཁོར་ལོ་དབང་བསྒྱུར། དྲུམ་ཤིང་བཅུད་འཐུང༌། མེ་ཏོག་སྦུབས་གནས། སྨྲ་མི་གྲོང་བདུན་གྱི་མི་རྣམས་བྱུང། ཚེ་ལོ་ཉི་ཁྲིའི་དུས་སུ། རྗེའི་རིགས་ཀྱི་རྒྱུད་ལ། ཞང་ཞུང༌། ཏ་ཟིག བལ་བོའི་མི་རིགས་གསུམ་བྱུང༌། བྲམ་ཟེའི་རྒྱུད་ལས་ཀྱང༌། རྒྱ་གར། ཕྲོམ། ལི་བལ་གྱི་མི་རིགས་བྱུང༌། དམངས་རིགས་ཀྱི་རྒྱུད་ལ་ཐོད་དཀར། ཟ་ཧོར། གར་ལོག་གི་མི་རིགས་བྱུང༌། ཡང་ཚེ་ལོ་ཁྲི་དང་སྟོང་གི་བར་ཙམ་ན། ཐུགས་དཀར་བུ་དགུའི་གདུང་ལས། ཐུགས་དཀར་ལ་ཁྲའི་རྒྱུད་རྒྱལ་བུ་མཐེང་གེའི་སྲས་རྒྱུད་ལ། རྒྱ་བོད་ཧོར་གསུམ་གྱི་མི་རིགས་བྱུང་ཞེས་བཤད་པ་འདིས། རྒྱ་བོད་ཧོར་གསུམ་ནི་གདུང་རྒྱུད་གཅིག་པའི་སྤུན་ཟླ་ཡིན་པ་དང༌། དུས་མཉམ་པ་དང༌། དུས་ནི་ཚེ་ལོ་ཁྲི་བ་ཞེས་པར། མཛོད་རང་ལུགས་ཀྱི་མི་ལོ་ཉིས་བརྒྱ་ནས་གཅིག་ཕྲི་བའི་དབང་དུ་བྱས་ན། མི་ལོ་ཁྲི་ཕྲག་ཉིས་བརྒྱ་སྟེ། འབུམ་ཕྲག་ཉི་ཤུ་ཙམ་ཡིན་པ་ལུང་གིས་གྲུབ་ལ། སྟོན་པ་གཤེན་རབ་ཀྱི་གསུང་ལ་ཡིད་ཆེས་ན། ཞིབ་རྩིས་མ་མཐའ་འང་རྒྱ་བོད་ཧོར་གསུམ་གྱི་མི་རིགས་འདི། མི་ལོ་འབུམ་ཕྲག་དུ་མའི་སྔོན་ནས་བྱུང་ཞིང༌། རིགས་པས་ཀྱང་རྒྱ་བོད་ཧོར་གསུམ་གྱི་མི་རིགས་འདིའི་བཞིན་རས་ལུས་ཚད་ཆེ་ཆུང༌། ས་གནས་ཀྱི་བབ་གང་ལ་བརྟག་ཀྱང་བློ་ངོར་མི་བདེ་བ་ཅི་ཡང་མེད་སྙམ་པ་ཞིག་འཆར་རོ། ཡང་བོད་སྤྱི་ནི་ཕྱ་རྗེའི་རྒྱུད་དང་བོད་ཀྱི་རྒྱལ་བོ་ནི་དམུ་རྗེ་བཙན་པོའི་གདུང་རྒྱུད་འཁོར་ལོ་དབང་སྒྱུར་གྱི་རྒྱུད་ཡིན་ཅེས་བཤད་པའང་མི་འགལ་ཏེ། |
