བོན་ལུགས་དང་འབྲེལ་ནས་བོད་ཀྱི་རིག་གནས་ཀྱི་ཐོག་མའི་བྱུངས་ཁུངས་ལ་དཔྱད་པ།
|
འབུམ་དང་ཡི་གེ་ཉུང་ངུ་གདན་དྲངས་ནས། འབུམ་གྱི་ཞབས་ནས་བག་ཙམ་ཀླུས་མ་བསྐུར་ཞེས་གྲག་གོ་ཞེས་ དང༌། བཀའ་བསྡུ་གསུམ་པ་ལ་བཤད་ཚུལ་མང་ན་ཡང༌། བུ་སྟོན་གྱིས། བསྡུ་བ་གསུམ་པ་བྱས་ནས། སོ་སོ་སྐྱེ་བོ་གཟུངས་མ་ཐོབ་པ་རྣམས་བཀའ་ལྷག་ཆད་འདོན་པ་ལས། ཐུབ་པའི་གསུངས་མི་ཉམས་པར་བྱ་བའི་ཕྱིར་གླེགས་བམ་ཡི་གེར་བཀོད་ཀྱི་དེ་ཡན་ཆད་བློ་ལ་འདོན་གྱི་ཡི་གེ་མེད་ཟེར་རོ། ཁ་ཅིག་དེ་མི་འཐད་དེ། འཇམ་དཔལ་རྩ་རྒྱུད་ལས། མ་སྐྱེས་དགྲའི་བུ་ཨུ་པ་ཞེས་བྱ་བས་སངས་རྒྱས་ཀྱི་གསུང་རབ་རྣམས་ཡི་གེར་འབྲི་བར་འགྱུར་རོ་ཞེས་བཤད་པའི་ཕྱིར་རོ་ཞེས་ཟེར་རོ། གཞན་ཡང་དྲི་མེད་འོད་ལས། བཅོམ་ལྡན་འདས་ཡོངས་སུ་མྱ་ངན་ལས་འདས་པར་གྱུར་བ་ན་སྡུད་པར་བྱེད་པ་པོ་དག་ཐེག་པ་གསུམ་གླེགས་བམ་ལ་བྲིས་ཏེ། ཞེས་གསུངས་པས་སྔར་ཡང་བྲིས་སམ་སྙམ་མོ། ཞེས་གསུངས་པ་རྣམས་སུ་བརྟག་ན། བཀའ་བསྡུ་དང་པོའི་དུས་ཡི་གེར་བྲིས་པ་མེད། བཀའ་བསྡུ་གསུམ་གྱི་གླེགས་བམ་ཡོད་ན། ལྷ་ཀླུའི་ཡུལ་ནས་སྤྱན་དྲངས་ནས་སྲོལ་ཕྱེས་པ་དང་ད་དུང་པཎྚི་ཏ་རྣམས་ཁས་མི་ལེན་པ་བྱུང་དོན་མེད་སྙམ་མོ། གསང་སྔགས་རྡོ་རྗེ་ཐེག་པའི་དུས་འཁོར་ཀྱང༌། ཕུག་ལུགས་ཐུབ་པ་མྱ་ངན་ལས་འདས་ནས་མི་ལོ་༡༨༤༨སྤྱི་ལོ་༡༩༧མེ་ཡོས་ལོར་བོད་དུ་བསྒྱུར་བས་རྒྱ་གར་དང་བོད་དུ་དར་བའི་བར་ན་ལོ་༦༠ལས་མེད་པ་དང༌། ཡང་གཙུག་ཕྲེང་གི་ཆོས་འབྱུང་ལས་དཔལ་དུས་ཀྱི་འཁོར་ལོ་ལ་རེད་མདའ་བས་སྐུར་བ་བཏབས་པའི་དོགས་པ་ཅུང་ཟད་བསལ་བར་བྱ་སྟེ་ཞེས་དང༌། ཤམ་བྷ་ལའི་ཡུལ་ཡོད་དེ༌། འཇམ་དཔལ་རྩ་རྒྱུད་ལས། ཤམ་བྷ་ལ་ཞེས་གསལ་བར་གསུངས་པའི་ཕྱིར། ཞེས་བཤད་པར་བརྟག་ན། དུས་འཁོར་དང་ཤམ་བྷ་ལར་རྩོད་པ་ཡོད་པའི་ཚུལ་ཤུགས་ལས་གོ་ཞིང་ཕྱིས་སུ་དར་ཁྱབ་ཆེ་རུ་བྱུང༌། བསྟན་པ་ཕྱི་དར་གྱི་སྐབས་སུའང༌། ཐེག་པ་ཆེན་པོ་གསར་སྔགས་བོད་དུ་དར་བ་ལྟ་བུ་འདི་ལས་ལྷག་པ་ཞིག་རྒྱ་གར་དུའང་དར་ཨེ་ཡོད་སྙམ་མོ། རྒྱུ་མཚན་ཀྱང༌། རྒྱ་གར་དུ་ཕྱི་རོལ་བའི་འཚེ་བ་ ཐེངས་མང་པོ་བྱུང་བ་དང་བོད་དུ་གྲི་གུམ་དང༌། ཁྲི་སྲོང་དང་དར་མ་སོགས་ཀྱི་རིང་ལ་འཚེ་བ་བྱུང་ཡང་གནས་སྐབས་ཙམ་མ་གཏོགས་གཏན་དུ་ནུབ་པར་མ་གྱུར། དེ་ཕྱིར་བོད་ཀྱི་རིག་གནས་ནི་ཕལ་ཆེར་ཆོས་ལུགས་དང་འབྲེལ་བས། བོད་ལ་ཆོས་ལུགས་དར་ཆེ་ཞིང༌། སྲིད་ཕྱོགས་ཉམས་ཆེ་བ་ནི། ལོ་རྒྱུས་སྨྲ་བ་ཀུན་ཀྱི་ལྟ་བ་གཅིག་མཐུན་ཡིན་སྙམ་མོ། |
