བོན་ལུགས་དང་འབྲེལ་ནས་བོད་ཀྱི་རིག་གནས་ཀྱི་ཐོག་མའི་བྱུངས་ཁུངས་ལ་དཔྱད་པ།
|
ཕྱ་རྗེ་དང་དམུ་རྗེ་གཉིས་ཕ་མ་གཅིག་པའི་སྤུན་ཡིན་པ་གོང་དུ་བཤད་པ་ལྟར་རོ། བོད་ཀྱི་རུས་རྒྱུད་ཀྱང༌། དཔྲ་སྟོན་སོགས་ཀྱིས་མཁས་པ་ སྔ་མའི་གསུང་རྒྱུན་ལྟར། དཔྲ་དང༌། འབྲུ་དང༌། སྒ་དང༌། ལྡོང་དང༌། སྒོ་དང༌། དཔའ་བདའ་རྣམས་ཡོད་ཅེས་བཤད་པ་དང་བོད་མི་ཁྲི་དོ་ཆེན་པོ་དྲུག་བྱ་བ་ལ་བུ་དྲུག་བྱུང་བ་ནི། དཔྲ་འབྲུ་ལྡོང་གསུམ་སྒ་དང་བཞི། ནུ་བོ་དཔའ་བདའ་གཉིས་དང་དྲུག ཅེས་བཤད་ཚུལ་ཕལ་ཆེར་མཐུན་ལ་ལོ་རྒྱུས་ཀྱི་ཡི་གེ་མང་བོར་གསལ་བས་འདིར་མང་དུ་དོགས། དེས་ན་བོད་མི་རིགས་ཀྱི་རིག་གནས་གསར་གཏོད་བྱེད་མཁན་ཏེ་བློ་གྲོས་ཅན་གྱི་ཐོག་མ་སུ་ཡིན་ཞེ་ན། གྲུབ་མཐའི་ཕྱོགས་འཛིན་གྱི་དབང་དུ་མ་སོང༌། རང་ཉིད་གང་ལ་དགའ་བའི་ཕྱོགས་སུ་མ་ལྷུང་བར་དྲང་བོར་དཔྱད་ན། སྟོན་པ་གཤེན་རབ་མི་བོ་ཆེ་བྱ་བ་ཡིན། འོ་ན་སྟོན་པ་གཤེན་རབ་མ་བྱོན་གོང་དུ་བོད་ན་བོན་པོ་ཡོད་ཨེ་ཡོད་ཅེ་ན་ཡོད་དེ་གདོད་མའི་བོན་ཞེས་བརྗོད་པ་དེ་ཡོད་ཀྱང་གྲུབ་མཐའི་གཞུང་ལུགས་མེད། ཡང་དག་པའི་བོན་མིན། དེ་ཕྱིར་སྟོན་པ་གཤེན་རབ་ཀྱི་བོན་ལ་གཡུང་དྲུང་གི་བོན་ཞེས་བརྗོད་ལ། སངས་རྒྱས་ཀྱི་བསྟན་པ་དང་དོན་གཅིག་པས་ན་སངས་རྒྱས་ཀྱི་བསྟན་པའི་ཐོག་མ་ཡིན། དེ་ཡང་དཔེར་ན་རྒྱ་གར་དུ་ཐུབ་པ་མ་བྱོན་གོང༌། ཆོས་ཡོད་ཀྱང༌། ཕྱི་རོལ་བའི་ཆོས་ཡིན་པས་ཡང་དག་པར་མི་འདོད། དེ་ཕྱིར་ཐུབ་པའི་ཆོས་ལ་དམ་པའི་ཆོས་ཞེས་བརྗོད་པ་ལྟ་བུའོ། དེས་ན་སྟོན་པ་གཤེན་རབ་ཀྱིས་ཞང་བོད་དུ་རིག་པའི་གནས་ཆེན་པོའི་གཞུང་ལུགས་གསར་གཏོད་གནང་བ་ནི། |
