བོན་ལུགས་དང་འབྲེལ་ནས་བོད་ཀྱི་རིག་གནས་ཀྱི་ཐོག་མའི་བྱུངས་ཁུངས་ལ་དཔྱད་པ།
|
བིང༌། རིན་ཆེན་ཟུར་མང་སོགས་བཞེངས། གནམ་རུ་སྲོང་བཙན་གྱིས་བ་དམར་མོའི་འོ་མས་སྦྲུས་པའི་འཇིམ་པ་ལས་བརྩིགས་པའི། ཕོ་བྲང་ཁྲི་བརྩེགས་འབུམ་གདུགས་བཞེངས་ཞེས་རྒྱལ་དབང་ལྔ་བས་གསུངས་བ་དང༌། དེར་སྲོང་བཙན་སྒམ་པོ་ནི། ཕོ་བྲང་མི་འགྱུར་བྱམས་པ་གླིང་དུ་སྐུ་འཁྲུངས་ཞེས་བཤད་པའི་རྒྱལ་བོའི་ཕོ་བྲང་དང༌། ལྷ་ཁང་སོགས་བཞེངས་པ་རྣམས་ཀྱང༌། བོད་ཡུལ་ལ་བཟོ་རིག་དར་ནས་བཞེངས་པ་མ་གཏོགས། ཡུལ་ཁམས་གཞན་དང་མི་རིགས་གཞན་གྱི་ཡོན་ཏན་ཁོ་ནར་བརྟེན་པ་མ་ཡིན་ནོ། ཡང་འགོས་ལོ་གཞོན་ནུ་དཔལ་བས་དེབ་སྔོན་ཏུ་བོད་ཀྱི་ཡུལ་འདི་ཡང་རྒྱ་གར་དང་འདྲ་བར་བྱས་ན་ཡང༌། ལུང་དང་རིག་པས་གནོད་པ་ཅེས་པ་དེ། རྒྱལ་དབང་ལྔ་བས་དེབ་ཐེརདཔྱིད་ཀྱི་རྒྱལ་མོའི་གླུ་དབྱངས་སུ་དྲངས་པ་ལྟར་རོ། ཡང་དཔྱིད་གླུར། གྲི་གུམ་དང་ལོ་ངམ་འཐབ་པའི་སྐབས། གོ་ཁྲབ་དང་མཚོན་ཆ་གྲི་དགུ་ཟི་སོགས་ཡོད་པ་ཤུགས་ལས་བསྟན་ཅིང༌། གྲི་གུམ་བསད་པའི་རོ། ཟངས་ཀྱི་གའུར་བཅུག་ནས་ལྕགས་ཀྱི་གཟེར་བཏབ་སྟེ་ཆུ་ལ་བསྐྱུར། ཞེས་པའི་ཤུགས་ལས་ཟངས་ལྕགས་ཀྱི་ཡོ་བྱད་བཀོལ་བ་བསྟན། ཡང་དེའི་འཕྲོས། སྤུ་དེ་གུང་རྒྱལ་དང༌། རུ་ལས་སྐྱེས་དང༌། ལྷ་བུ་མགོ་དཀར་སོགས་རྒྱལ་བོ་ཡབ་སྲས་སྐུ་མཆེད་ཀྱི་རིང་ལ། སྐུ་མཁར་བཞེངས་པ། ཆུ་ཡུར་བར་དྲངས། སྤང་ཞིང་དུ་རྨོས། རྡོ་བཞུས་ནས་དངུལ་ཟགས་ལྕགས་གསུམ་བཏོན། ཆུ་ལ་ཟམ་པ་བཙུགས། ཞེས་པ་སོགས་ཀྱིས་བཟོ་རིག་དར་བའི་རྒྱུ་མཚན་ཤེས་ཐུབ་ལ། ད་ལྟ་ཆབ་མདོ་ཁ་རུབ་ཀྱི་གནའ་ཤུལ་ནས་ཐོན་པའི་གནའ་རྫས། རྡོ་ཆས་བདུན་སྟོང་དགུ་བརྒྱ་བདུན་ཅུ་དོན་བརྒྱད་དང༌། རུས་ཆས་སུམ་བརྒྱ་དྲུག་ཅུ་རེ་བརྒྱད། རྫ་མ་ཉི་ཁྲི་ལྷག་སོགས་རྙེད་པ་དང༌། བྲག་མགོའི་ཁ་ས་མཚོ་ཁའི་གནའ་དུར་ནས་ཐོན་པའི་མི་རོ་བཞི་བཅུ་ལྷག་དང༌། རྡོའི་རོ་སྒམ་དང༌། རྡོ་ཆས། རུས་ཆས། རྫ་མ། ཟངས་ཀྱི་ཅ་ལག་སོགས་དུར་རྫོངས་དང་བཅས་པ་མང་པོ་མཐོང་ཐུབ་པར་བྱུང་བ་དང༌། ལྷ་ས་ཆུ་གོང་གི་གནའ་ཤུལ་ནས། སྤྱི་ལོ༡༩༨༤ ལོར་རྙེད་པའི་གནའ་རྫས་མང་པོ་དང༌། གནའ་ཤུལ་དེའི་ནུབ་ཕྱོགས་སྤྱི་ཁྲུ་སུམ་བརྒྱ་ཙམ་ནས་དུར་ས་གསར་དུ་རྙེད་པ་ལས། བམ་རོ་སུམ་ཅུ་ལྷག་དང༌། གནའ་རྫས་ཀྱི་གྲངས་ཧ་ལམ་ཚོད་དཔག་བྱས་པ་ལྟར་ན། ངོ་གྲངས་ཁྲི་ཕྲག་ལ་ཉེ་བ་ཡོད་པར་བཤད་པ༼བོད་ལྗོངས་ཞིབ་འཇུག༽༼༡༩༩༠ལོའི་དེབ་༤བ་ལས་བཤད་པ༽ཐུབ་བསྟན་ཕུན་ཚོགས་ཀྱིས་བརྩམས་པའི། ལོ་རྒྱུས་སྤྱི་དོན་ལས་གསལ་བོར་བྲིས་ཡོད་ལ། སྐབས་དེའི་བོད་མིའི་ཤེས་རིག་ལག་རྩལ་གྱི་ཆུ་ཚད་དེ་སྐབས་དེའི་སྔོན་ཐོན་མི་རིགས་དག་ལས་མི་དམན་པ་ཞིག་བྱུང་ཡོད་པ་གསལ་ཞེས་པ་ལྟར་རོ།། |
