བོན་ལུགས་དང་འབྲེལ་ནས་བོད་ཀྱི་རིག་གནས་ཀྱི་ཐོག་མའི་བྱུངས་ཁུངས་ལ་དཔྱད་པ།
|
བདུད་རྩི་སྨན་གྱི་མདོ་དགུ་གསུངས་པ་ནི། བདུད་རྩི་མུ་ཏྲ་གཞུང་ཆེན་མདོ། བདུད་རྩི་འཁོར་ལོ་ཆེན་པོའི་མདོ། བདུད་རྩི་བང་མཛོད་འབུམ་བཞིའི་མདོ། བདུད་རྩི་ཡིད་བཞིན་ནོར་བུའི་མདོ། བདུད་རྩི་གཟའ་ཀླུ་བཅོས་ཐབས་མདོ། བདུད་རྩི་དམར་བྱང་ཐེམ་བྱང་མདོ། བདུད་རྩི་དཔག་བསམ་ལྗོན་ཤིང་མདོ། བདུད་རྩི་གདམས་ངག་འཕྲུལ་གྱི་མདོ་དང་དགུ་ཡིན་ལ་ད་ལྟ་ཕྲིན་ལས་འཕེལ་བཞིན་དངོས་སུ་བཞུགས་པ་ནི་བདུད་རྩི་བང་མཛོད་འབུམ་བཞི་ཞེས་སུ་གྲགས་པ་འདི་ཡིན་ཏེ། དེ་ཡང་གསོ་རིག་རྩ་བ་ཐུགས་འབུམ་ནམ་མཁའ་སྔོན་པོ་ལེའུ་བདུན། སྡུག་བསྔལ་ཞི་མཛད་གསོ་བྱེད་སྨན་འབུམ་དཀར་པོ་ལེའུ་སོ་གཅིག སྡུག་བསྔལ་ཞི་བྱེད་གསོ་ཐབས་དཔྱད་འབུམ་ཁྲ་བོ་ལེའུ་སུམ་ཅུ། སྡུག་བསྔལ་ཞི་བ་གསོ་བྱའི་ནད་འབུམ་ནག་པོ་ལེའུ་དགུ་བཅུ་རྩ་གསུམ་བཅས་གསུངས་པ་འཁོར་སློབ་མ་མང་དུ་ཡོད་ལ། གཙོ་བོ་སྲས་དཔྱད་བུ་ཁྲི་ཤེས་དང༌། ལྷའི་དྲང་སྲོང་མངོན་པར་ཤེས་པ་དང༌། བདེན་པར་སྨྲ་བ་དང༌། རིག་པར་སྨྲ་བ་དང༌། ངེས་པར་སྨྲ་བ་དང༌། ཡིད་ལས་སྤྲུལ་བ་དང་ཡིད་ལས་བྱུང་བ་དང༌། ཡིད་ལས་སྐྱེས་པ་དང༌། ཡིད་ལས་གྲུབ་པ་སོགས། དྲང་སྲོང་ཆེན་པོ་བརྒྱད་རྣམས་ལ་གཉེར་གཏད་པ་གནང་ངོ༌། དེ་ནས་སྟོན་པ་གཤེན་རབ་ཀྱིས་བོད་དུ་རྒྱུ་བོན་གྱི་བཀའ་ལུང་གནང་བས། ཤེས་པ་ཅན་བཅུ་གཉིས་ནང་གི་ཕན་ཤེས་སྨན་གསོའི་བོན་ཞེས་པ་བོད་དུ་དར་རོ། སྨན་འབུམ་བརྒྱུད་རིམ་ལས་ཀྱང་གཤེན་རབ་ཀྱིས་སྲས་དཔྱད་བུ་ཁྲི་ཤེས་ལ་གནང༌། དེས་འཛམ་གླིང་མཁས་པ་རྒྱན་དྲུག་གི་ནང་ཚན་རྟག་གཟིགས་མཁས་པ་དམུ་ཚ་ཏྲ་ཧེ་ལ་གནང༌། དེས་ཕྲོམ་མཁས་པ་གསེར་ཐོག་ལྕེ་འབྱམས་ལ་གསུངས༌། དེས་ཞང་ཞུང་མཁས་པ་སྟོང་རྒྱུང་མཐུ་ཆེན་ལ་གསུངས། དེས་ལྡེ་བོན་གྱིམ་ཚ་རྨ་ཆུང་ལ་གསུངས། དམ་པ་དེ་གསུམ་ཚེ་ཡི་རིག་འཛིན་བརྙེས་ནས་ཁྲི་སྲོང་གི་བར་དུ་བཞུགས། ཁྲི་སྲོང་དང་ཆོས་བློན་དང་རྒྱ་གར་ཨ་ཙ་ར་རྣམས་ཀྱིས་བོན་བསྣུབས་པའི་སྐབས་བཻ་རོ་ཙ་ན་ནས་རྒྱ་གར་གྱི་ཆོས་སུ་བསྒྱུར་ཅེས་བཤད། བསྟན་པ་སྔ་དར་རིང་ལ་དར་ཚུལ་དེ་ལྟར་ལ། དེ་ནས་གཏེར་ཞལ་ཕྱེས་ཏེ། རྨེའུ་མཁས་པ་དཔལ་ཆེན་སོགས་ལ་གསུངས་ནས་དར་བ་ཡིན་ལ། བརྒྱུད་ཁུངས་ལ་ལོག་ལྟ་དང་འགྲན་སེམས་མེད། གཞུང་ལུགས་ལ་བསྒྱུར་བཅོས་དང་རང་བཟོས་མ་བསླད་པས་རྒྱུན་གཙང་ཞེས། རང་ཅག་གི་བླ་མ་དགེ་རྒན་རྣམས་ཀྱི་ཞལ་ལས་ཐོས་སོ། བོད་ན་ལྷ་ཐོ་ཐོ་རིའི་རིང་ལ་སྨན་པ་བི་བྱི་དགའ་བྱེད་དང༌། བི་མ་ལྷ་དགའ་མཛེས་རྣམ་པ་གཉིས། རྒྱལ་བོའི་ཕོ་བྲང་ཡུམ་བུ་བླ་མཁར་དུ་སྤྱན་དྲངས། རིན་པོ་ཆེའི་ཁྲི་ལ་བཞུགས་སུ་གསོལ། གསེར་དངུལ་མང་པོ་ཕུལ། སྨན་པ་གཉིས་ལས་སྨན་མདོ་ལྔ་གནང༼རེག་པ་རྩ་ཡི་མདོ། འཚོ་བ་ཟས་ཀྱི་མདོ། སྦྱོར་བ་སྨན་གྱི་མདོ། གཏར་སྲེག་དཔྱད་ཀྱི་ |
