|
མདོ། རྨ་ཆས་བཟོ་བའི་མདོ།༽ཞེས་གཡུ་ཐོག་ཡོན་ཏན་མགོན་པོའི་རྣམ་ཐར་དུ་བཤད། ཅེས་པར་དཔྱད་ན། སྐབས་དེར་གསོ་རིག་དར་ཡོད་པའི་རྒྱུ་མཚན་ཤེས། ཁྱད་པར་ལྷ་སྲས་སྟག་རི་སྙན་གཟིགས་ཀྱི་མིག་ཕྱེ་བའི་དོན་དུ་འ་ཞའི་སྨན་པ་གདན་དྲངས་པ་རྒྱལ་དབང་ལྔ་བའི་དཔྱིད་གླུ་སོགས་བན་བོན་གྱི་ལོ་རྒྱུས་ཀུན་ཞལ་མཐུན་པས། སྐབས་དེར་བོད་ཀྱི་གསོ་རིག་གི་ཡོན་ཏན་ཚད་མཐོ་བ་ངེས་པར་ཤེས་ཐུབ་བོ།།
༼༣༽སྒྲ་ཚད་རིག་པ་ནི། ཐོག་མར་སྟོན་པ་གཤེན་རབ་ཀྱིས། ཡེ་མཁྱེན་སྒྲ་ལྷའི་རྒྱལ་བོའི་དགོངས་པ་བཞིན། སྒྲ་ཚད་ཀྱི་འབུམ་གསུམ་གསུངས་པ་ནི། ལྷ་སྲིན་གྱི་འཁྲུག་འབུམ་ནག་པོ། སྒྲ་ཚད་རྩོད་འབུམ་ཁྲ་བོ། དག་པ་ལྷ་འབུམ་དཀར་བོ་གསུམ་ཡིན་ཏེ། ཐུགས་སྲས་རྨ་ལོ་རབ་ཏུ་དྭངས་པ་དང༌། གཡུ་ལོ་གཡི་ཡི་ཟུར་ཕུད་ཅན་གཉིས་ལ་གཏད། དེ་ནས་སྒྲ་སྐད་ལ་སྐད་འགྱུར་སོ་སོར་སྟོན་པའི་མདོ་དང༌། ཚད་མ་ལ་སྡེ་བདུན་བཅས་གསུངས་ནས་ཞང་བོད་ཀུན་ཏུ་དར། ཁྱད་པར་བོད་ལ་སྟོན་པ་གཤེན་རབ་དགུང་ལོ་ཉི་ཤུ་ཙམ་ན་དངོས་སུ་བྱོན་ནས། བོད་ཀྱི་སྐད་ལ་མཁོ་བའི་ཡི་གེ་མཛད་པར་འཕྲུལ་གྱི་ཡི་གེ་བཞི་ཅུ་ཞེས་དཔེ་དང་དོན་གྱིས་བསྔགས་པ་བརྗོད། ཡི་གེ་ཡོད་ན། སྒྲ་ཅི་ཐོན་ལ་ཡི་གེ་ཅི་འདོད་དུ་བྲི་མི་རུང་བས། སྐད་གང་ལ་ཡི་གེ་གང་བྲི་དགོས་པ་ཤེས་ན། ཐ་སྙད་ཕྱིན་ཅི་མ་ལོག་པར་སྟོན་ཐུབ་ལ། དེ་ནི་སྒྲ་རིག་པ་ལ་བརྟེན་ནས་འབྱུང་དགོས་པ་སྨོས་ཅི་དགོས། དཔེར་ན། ཀ་བ་བུམ་པ་ཞེས་པའི་བོད་སྐད་དེ་དུས་སྔ་མོ་ནས་ཡོད་ལ། དེ་ཡི་གེར་བྲི་ན་ཀ་བ་བུམ་པ་ཞེས་བྲིས་ན། ཐ་སྙད་ཕྱིན་ཅི་མ་ལོག་པར་སྟོན་ཐུབ་པ་དང༌། ག་བ་བུ་འབའ་ལྟ་བུ་བྲིས་ན་སྐད་ཡིག་མ་དག་པས་མི་གོ་བ་དེ་སྒྲ་རིག་པ་ཡོད་པའི་མཐུ་ཁོ་ནའོ། ཕྱིས་སུ་བྱུང་བའི་གཞུང་ནི། ཤར་རིའི་སྒྲ་མདོ། དྲན་པའི་སྨྲ་སྒོ་སོགས་བྱུང་ནས་དར་ལ། དེ་རྗེས་སློབ་དཔོན་ཐོན་མི་ནས་བཟུང༌། སུམ་རྟགས་དག་གསུམ་གྱི་བསྟན་བཅོས་གཅིག་ལས་གཅིག་ལྷག་གི་ཚུལ་བྱུང་བས། བོད་ཀྱི་སྒྲ་རིག་པ་གོང་འཕེལ་དུ་སོང་ངོ༌། ཚད་མའི་གཞུང་ལ་ཤ་རི་དབུ་ཆེན་ནམ་དཔལ་ལྡན་གསང་ཆེན་གྱིས་མཛད་པའི་གཏན་ཚིག་ངེས་པའི་གལ་མདོ། པཎ་ཆེན་ལི་ཤུས་མཛད་པའི་ཚད་མའི་རྒྱུད་གཞུང་ཆེན་མོ། དྲན་པ་ནམ་མཁས་མཛད་པའི་ཚད་མ་རྣམ་འབྱེད་འཕྲུལ་གྱི་ལྡེ་མིག་རྣམས་བྱུང་ནས་དར། ཕྱི་དར་རིང་འགྲོ་མགོན་བློ་གྲོས་ཀྱི་ཚད་མ་ཀུན་བཏུས་དང༌། རྒྱལ་བ་མཉམ་མེད་ཀྱི་ཚད་མ་འཕྲུལ་སྒྲོན་སོགས་བྱུང་ངོ༌། འོ་ན་བོད་དུའང་དུས་སྔ་མོ་ནས་རྒྱ་གར་བཞིན་ཚད་མའི་རིག་གནས་དར་སྲོལ་ཆེའམ་ཞེ་ན། ཁོ་བོའི་རྨོངས་བློར་ཤར་ཚོད་ནི། རྒྱ་གར་ལྟ་བུའི་དར་སྲོལ་མི་ཆེ་སྙམ་སྟེ། རྒྱ་གར་ནི་ཕྱི་རོལ་བ་དར་ཁྱབ་ཆེ་བའི་དབང་གིས་ཐུན་མོང་གི་རིག་གནས་དར་ཁྱབ་
|
