བོན་ལུགས་དང་འབྲེལ་ནས་བོད་ཀྱི་རིག་གནས་ཀྱི་ཐོག་མའི་བྱུངས་ཁུངས་ལ་དཔྱད་པ།
|
འདས་རྗེས་སྡུད་འཁོར་རྣམས་ཀྱིས་བཀའ་རྣམས་བདག་གིར་མཛད་དེ་བསྡུས། ཁྱད་པར་གདུང་སོབ་ཆེན་པོས་སློབ་ཚོགས་བསྐྱངས་པས། འཛམ་གླིང་མཁས་པ་རྒྱན་དྲུག་བྱུང༌། དེ་ནས་བཟུང་ད་ལྟའི་བར་དུ་བརྒྱུད་པ་བར་མ་ཆད་པར་བྱུང་བ་ནི། བོན་ལུགས་ཀྱི་བསྟན་འབྱུང་ལོ་རྒྱུས་རྣམས་སུ་གསལ་ལ། ཁོ་བོས་ཀྱང་ལོ་རྒྱུས་རིན་ཆེན་ཤེལ་གྱི་རྒྱང་མཐོང་ཞེས་པ་བྲིས་ཡོད་པས་འདིར་མང་དུ་དོགས། ཁྱད་པར་གངས་ཅན་བོད་ཀྱི་ཡུལ་འདིར། སྟོན་པ་གཤེན་རབ་བྱོན་ནས་རྒྱུ་བོན་གྱི་བཀའ་ལུང་གནང༌། རིག་གནས་གསར་བཏོད་མཛད་པ་གོང་ལྟར་ལ། དེའི་བཀའ་དྲིན་གྱིས་གཉའ་ཁྲི་མ་བྱོན་གོང་ནས་རྒྱུ་བོན་ལ་མཁས་པའི་ཤེས་པ་ཅན་སྐོར་བཅུ་གཉིས་བྱུང༌། སྔོན་གྱི་གདོད་མའི་བོན་གྱི་ཉེས་སྤྱོད་མི་ལེགས་པ་རྣམས་བསྒྱུར། ནང་བ་དང་མཐུན་པའི་སྐྱབས་འགྲོ་དང་ཕན་སེམས་དང་བསྔོ་སྨོན་སོགས་ཀྱིས་ཟིན་པའི་སྟོན་པའི་རྒྱུ་བོན་དར་སྤེལ་མཛད། འབྲས་བུས་བོན་དར་བར་ཐུགས་སྨོན་གནང་བས། གཉའ་ཁྲི་བྱོན་པ་དང་དུས་མཉམ་དུ་སྟོན་པའི་སློབ་མ། ལྷ་ཀླུ་མི་ཡི་གཤེན་པོ་རྣམས་ཀྱི་ཞབས་ཀྱིས་ཟིན་པའི་གཤེན་ནམ་མཁའ་སྣང་བ་མདོག་ཅན་རྒྱལ་བོའི་དབུ་བླར་བྱོན། བོད་རྒྱལ་གཉིས་པ། ལྷ་སྲས་མུ་ཁྲི་བཙད་པོ་སློབ་མའི་གཙོ་བོར་གྱུར། གསས་མཁར་རིན་པོ་ཆེ་སྤྱི་སྤུང་སྐོར་གསུམ་སོགས་གསང་བ་སྔགས་ཀྱི་བསྟན་པ་དར་སྤེལ་མཛད། མུ་ཁྲི་ནས་བཟུང་གདུང་རྒྱུད་བཅུ་གསུམ་གྱི་བསྟན་པ་དར་བ་ནི་སྤྱི་སྤུངས་བླ་བརྒྱུད་ལྟར་ལ། ད་ལྟ་བོན་ལུགས་ཀྱི་ཆོ་ག་འདོན་ཤེས་ཚད་ཀྱིས་བླ་བརྒྱུད་གསོལ་འདེབས་མ་རྒྱུད་གྲུབ་བརྒྱའི་ཕྱག་མཆོད་སོགས་འདོན་བཞིན་པ་འདི་ཕྱོགས་འཛིན་གྱི་ཆགས་སྡང་དབང་དུ་མ་སོང་ན་དད་པའི་གསོས་སུ་ཆེ་ཞིང༌། བོད་ཀྱི་ལོ་རྒྱུས་ལ་གལ་ཆེ་བར་མཐོང་ངོ༌། དེ་ལྟ་ན། དུས་སྔ་མོ་ཞང་བོད་དུ་རིག་གནས་ལྔ་བོ་དར་བ་དང་རྒྱ་གར་དུ་དར་བ་ཕན་ཚུན་བསྡུར་ན་ཅི་འདྲར་འདུག་སྙམ་ན། ཁོ་བོས་དཔྱད་ན་ཐུན་མོང་གི་སྒྲ་ཚད་སྙན་ངག་སྡེབ་སྦྱོར་ལྟ་བུ་རྒྱ་གར་དུ་དར་བ་ཤིན་ཏུ་བཟང་ལ་ནང་རིག་པ་ནི་ཞང་བོད་དུ་དར་སྔ་ཞིང༌། ཉམས་སུ་ལེན་པའི་རྣལ་འབྱོར་བ་ཤིན་ཏུ་མང་ལ་ཁྱད་པར་སྔགས་སེམས་གཉིས་ནི་དར་ཁྱབ་ཆེ་ཞིང་བརྒྱུད་པ་བར་མ་ཆད་པར་གཙང་ལ་ཞིབ་པ་སེལ་མ་ཞུགས་པར་དར། གྲི་གུམ་རིང་ཅུང་ནུབ་ན་ཡང༌། ཡུན་མ་རིང་སྟེ། གྲི་གུམ་དང་ལོ་ངམ་གཉིས་ལ་ལོ་བཅུ་དྲུག་ཙམ་སོང་ནས། ལྷ་སྲས་སྤུ་སྡེ་གུང་རྒྱལ་དང་གཅུང་ཁྲི་སྨོན་ལྷ་བཟང་བཅས་ཀྱིས། སླར་བསྟན་པ་བསྐྱངས་པས་ཞང་བོད་ཀྱི་པཎ་གྲུབ་མང་པོ་བྱོན་ནས་ཁྲི་སྲོང་གི་བར་དུ་རྒྱ་ཆེར་དར་བ་ནི་བརྒྱུད་ཁུངས་སྟོན་པ་ཡུམ་སྲས་གཤེན་གསུམ། བླ་མ་ཆེ་དྲུག གདུང་རྒྱུད་བཅུ་གསུམ། མཐུ་ཆེན་མི་དགུ མཁས་པ་མི་བཞི། ལོ་པཎ་གཤེན་བརྒྱད་ |
