༄༅། །བསྐལ་བཟང་ཁུག་ཆེན་དོན་བཟང་དུ། །སྐལ་བཟང་འགྲོ་བ་འདྲེན་པའི་གཤེན། །བསྐལ་སྟོང་སངས་རྒྱས་སྟོང་རྩ་གཉིས། །སྐལ་བཟང་འགྲོ་བའི་དཔལ་དུ་བྱོན། །ཁྱད་པར་དམུ་སྲས་འགྲོ་བའི་མགོན། །ཁྱེད་ཉིད་ཚོགས་གཉིས་ལམ་བཟང་ལ། །བརྟེན་ནས་རྫོགས་བྱང་བརྙེས་པའི་ཚུལ། །འཆད་ལ་བླ་མས་གནང་བ་སྩོལ། །
བདག་ཅག་གི་སྟོན་པ་ཡང་དག་པར་རྫོགས་པའི་སངས་རྒྱས་རྒྱལ་བ་གཤེན་རབ་མི་བོ་དེ་ཉིད་སྔོན་རབས་སུ་རྒྱུ་སེམས་ཅན་ལས་འབྲས་བུ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པའི་ཚུལ་བསྟན་ཏེ། །དང་པོ་བསྐྱེད་པར་དཀའ་བ་བྱང་ཆུབ་མཆོག་ཏུ་སེམས་བསྐྱེད་པ་དང་། །བར་དུ་བསགས་པར་དཀའ་བ་རྒྱུ་བསོད་ནམས་ཀྱི་ཚོགས་དང་འབྲས་བུ་ཡེ་ཤེས་ཀྱི་ཚོགས་གཉིས་ཟུང་འཇུག་ཏུ་བསགས། །ཐ་མ་ཐོབ་པར་དཀའ་བ་འབྲས་བུ་རྫོགས་པའི་བྱང་ཆུབ་མངོན་དུ་བྱས་པའི་ཚུལ་རྣམས་སྟོན་པ་སངས་རྒྱས་ཀྱི་རྣམ་ཐར་རྒྱས་པ་དྲི་མེད་གཟི་བརྗིད་དང་། །འབྲིང་པོ་གཟེར་མིག བསྡུས་པ་མདོར་བསྡུས་སོགས་ལ་བརྟེན་ནས་མཛད་པའི་དཔྱད་གསུམ་དོན་ལྡན་གྱི་ལོ་རྒྱུས་ཡིག་ཆ་དུ་མ་ཞིག་མཆིས་པས། ཁོ་བོས་དཔྱད་རྩོམ་འདི་ལྟ་བུར་འབྲི་བ་དགོས་མེད་ལྟར་སྣང་རུང་། སྟོན་པ་སངས་རྒྱས་ཀྱི་ཞལ་ནས་ཡིད་ཆེས་དང་བསྐྱར་ཟློས་གཅིག་པུས་རང་རྒྱུད་ཀྱི་མ་རྟོགས་ལོག་རྟོག་ཐེ་ཚོམ་སོགས་ཀྱི་སྒྲོ་འདོགས་སེལ་བར་མི་ནུས་པ་གསུངས་པ་སྟེ། མདོ་ལས། གང་དག་བཀའ་ལས་འབྱུང་གྱུར་པ། །དེ་ཉིད་རིག་པས་གཞལ་མིན་ན། །སྙིང་པོའི་དོན་མཆིས་ག་ལ་འགྱུར། །དེ་ཕྱིར་རིག་གཞལ་དོན་ཡོད་བྱ། །ཞེས་གསུངས་པ་ལ་གཞི་བཅོལ་ཏེ་སྔོན་བྱོན་དམ་པ་གོང་མ་རྣམས་ཀྱིས་བསྟན་བཅོས་རྩོམ་ཚུལ་དང་མཐུན་པར་བདེར་གཤེགས་ཀྱི་ལུང་དང་། །དམ་པའི་མན་ངག རང་གི་རིག་པ་གསུམ་ཟུང་དུ་འབྲེལ་བའི་སྒོ་ནས་དཔྱད་རྩོམ་ཐུང་ངུ་ཞིག་སྤེལ་བར་འདོད་དོ། །
སྤྱིར་བདག་ཅག་གི་སྟོན་པ་ཡང་དག་པར་རྫོགས་པའི་སངས་རྒྱས་དེ་ཉིད་ཀྱི་སྐྱེས་རབས་ལ་ཐོག་མ་མེད་ཕྱིར་སྔོན་སོ་སོའི་སྐྱེ་བོ་གང་ཟག་གི་འཆིང་བ་ཐ་དག་དང་ལྡན་པར་རིམ་པར་བརྒྱུད་པའི་སྐྱེས་རབས་ནི་བརྗོད་ལས་འདས་པས་སྐབས་འདིར་བརྗོད་པར་མི་བྱ་ཞིང་། འདིར་ཚོགས་བསགས་ཉམས་མེད་ཀྱི་དབང་དུ་བྱས་ཏེ་སྐྱེས་རབས་མདོར་བསྡུས་སུ་གླེང་བ་ནི། སྟོན་པ་ཉིད་སྔོན་རབས་སུ་རྒྱུ་ཞེ་སྡང་དབང་གིས་དམྱལ་བའི་གྱད་བུ་ཐུང་དུ་སྐྱེས་པའི་ཚེ། དམྱལ་སྲུང་གིས་སེམས་ཅན་ཞིག་ལྕགས་ཀྱི་སོག་ལེས་དྲ་གཏུབས་བྱེད་པ་མཐོང་བས། དེ་ལ་སྙིང་རྗེ་མི་བཟོད་པ་རང་ཤུགས་ཀྱིས་སྐྱེས་ཏེ། དམྱལ་དཔོན་ལ། སྙིང་རྗེ་ཅུང་ཟད་བསྐྱེད་ཅིག་ཞུས་པས། དམྱལ་སྲུང་འཁྲོས་ནས། ཁྱོད་ཀྱང་སྲོག་གཅོད་རྣམ་སྨིན་གྱིས། །དམྱལ་བའི་གྱད་བུ་ཐུང་དུ་གྱུར། །གཅོད་གཏུབ་བྱེད་པའི་དམྱལ་བ་རྣམས། །རང་གིས་ལས་བྱས་རང་ལ་སྨིན། །ཁྱོད་ཀྱིས་སྙིང་རྗེ་ཅིའི་ཕྱིར་བསྐྱེད། །ཅེས་སྨྲས་ནས་ཐོ་བས་དབུ་བཅོམ་པས། དམྱལ་བ་ལས་ཚེ་འཕོས་པ་དང་། །ཀུན་སློང་བཟང་པོ་དེའི་དབང་གིས་དམྱལ་བ་ལས་ཐར་ནའང་། སྔོན་བསགས་འདོད་ཆགས་དབང་གིས་ཡི་དྭགས་ཀྱི་གནས་སུ་སྐྱེས། སྔོན་གྱི་ཀུན་སློང་བཟང་པོ་དེ་མ་ཉམས་པའི་དབང་གིས་རང་དོར་གཞན་གཅེས་ཀྱི་བློ་རྒྱུད་ལ་སྐྱེས་པས་བཟའ་བཏུང་ཇི་སྙེད་རོགས་ལ་བྱིན། དེ་ནས་ཚེ་འཕོས་ཏེ་རྒྱུ་གཏི་མུག་དབང་གིས་བྱོལ་སོང་གནས་སུ་སྨྲ་མཁན་ནེ་ཙོ་ཞིག་ཏུ་སྐྱེས་ཀྱང་རྨོངས་རྟུལ་གྱིས་མནར་བའི་བྱོལ་སོང་རྣམས་ལ་བྱམས་དང་སྙིང་རྗེ་བསྐྱེད། བསོད་ནམས་དེ་ཡི་ནུས་མཐུས་བྱོལ་སོང་ལས་ཐར་ནའང་། ཕྲག་དོག་དབང་གིས་མཐའ་འཁོབ་མི་ཡི་གནས་སུ་སྐྱེས། དེར་བོན་ཉན་བཤད་ཀྱི་སྐལ་པ་དང་མི་ལྡན་ནའང་། སྔོན་གྱི་ཚོགས་བསགས་ལ་བརྟེན་ནས་དད་པ་བཟང་པོ་རང་རྒྱུད་ལ་སྐྱེས་པར་གསུངས། དད་པ་བཟང་པོ་དེའི་དབང་གིས་འཛམ་གླིང་དབུས་སུ་བྲམ་ཟེའི་སྐྱེ་བ་བཞེས་པ་ནས་བཟུང་ཚོགས་བསགས་ཉམས་མེད་ཀྱི་དབང་དུ་བྱས་ན། བོན་ཉན་བཤད་འགོ་དེ་ནས་ཚུགས་པ་འདོད་དགོས་པར་སྣང་ངོ་། །རྒྱུད་ཉི་སྒྲོན་ལས། མཐའ་འཁོབ་མི་ལུས་ཞིག་ཐོབ་པ། །དད་པ་ཡོད་ཀྱང་བཤད་པ་མེད། །དད་པ་བཟང་པོའི་འཕེལ་ཤུགས་ཀྱིས། །འཛམ་གླིང་དབུས་སུ་བྲམ་ཟེ་སྐྱེས། །ཞེས་གསུངས་པས་ངེས་སོ། །དེ་ལྟར་སྟོན་པ་སངས་རྒྱས་མཆོག་སྔོན་རབས་སུ་ངན་སོང་ལས་ཐར་ཏེ། མཐོ་རིས་ཀྱི་གོ་འཕང་ཐོབ་ཚུལ་འདི་ལ་བཤད་ཚུལ་མི་མཐུན་པ་མེད་ཀྱང་། བྱང་ཆུབ་གྱི་སེམས་རིན་པོ་ཆེ་རྒྱུད་ལ་བརྙེས་ཚུལ་འདི་ལ་མི་མཐུན་པའི་བཤད་ཚུལ་ཁག་གཉིས་སུ་བྱུང་ཡོད། དང་པོ་ནི། དམྱལ་བའི་གྱད་བུ་ཐུང་གི་རྒྱུད་ལ་སྐྱེས་པར་གསུངས་ཀྱང་། དེ་ནི་སྙིང་རྗེ་དང་བྱམས་སེམས་ཀྱིས་བསྡུས་པའི་གཞན་ཕན་ཙམ་ལས་དངོས་སུ་བྱང་ཆུབ་ཀྱི་སེམས་རིན་པོ་ཆེ་ནི་ནུབ་ཕྱོགས་འཇིག་རྟེན་གྱི་ཁམས་སུ་སྟོན་པ་བསོད་ནམས་དབང་གི་མདུན་ནས་ཐེག་པ་ཆེན་པོ་བྱང་ཆུབ་སེམས་ཀྱི་སྡོམ་པ་ནོད་དེ། བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་བརྙེས་པ་མདོ་རྒྱུད་གཉིས་ཀྱི་དགོངས་པ་གཅིག་མཐུན་ཡིན། མཛད་བསྟོད་ལས། སྔོན་ཚེ་སྤྲུལ་སྐུ་བསོད་ནམས་དབང་དྲུང་དུ། །ཐུགས་མཆོག་བསྐྱེད་ནས་སྨོན་ལམ་ཆེན་པོ་བཏབ། །ཅེས་དང་། མདོ་ལས། སྟོན་པ་བསོད་ནམས་དབང་ནི་བསོད་ལྡན་ཞིང་ཁམས་དེ་རུ་བྱོན། །དེ་ལ་སེམས་བསྐྱེད་དད་པའི་སྟོབས་དང་ལྡན། །སྐྱེ་བ་གྲངས་མེད་ཚོགས་ཀྱི་ལམ་ལ་བསགས། །རྒྱལ་པོའི་སེམས་བསྐྱེད་སྐྱེས་པའི་དུས་དེ་རུ། །ཞེས་གསུངས་པས་ངེས་སོ། ། རང་ལུགས་ཕྱིས་འབྱུང་གི་ལོ་རྒྱུས་ཡིག་ཆ་ཕལ་ཆེར་ནང་དེའི་འཇུག་ཐོག་གཉིས་པར་རྒྱལ་བུ་ཤེས་རབ་ལྡན་གྱི་སྐྱེ་བ་བཞེས་པ་གསུངས་པ་ལས། རྒྱལ་བུ་ཀུན་དགའ་འོད་ཀྱི་སྐྱེ་བ་ག་དུས་བཞེས་མིན་ཁ་གསལ་དུ་བཏོན་ནས་བཤད་པའི་ལོ་རྒྱུས་ད་བར་མཐོང་ཐོས་ཀྱི་ཡུལ་དུ་མ་གྱུར། ཁོ་བོས་ལུང་དོན་ལ་དཔྱད་ན། སྟོན་པ་བསོད་ནམས་དབང་གི་མདུན་ནས་ཐེག་པ་ཆེན་པོ་བྱང་ཆུབ་སེམས་ཀྱི་སྡོམ་པ་ནོད་པ་དང་། རྒྱལ་བུ་ཤེས་རབ་ལྡན་གྱི་སྐྱེ་བ་མ་བཞེས་པའི་གོང་དུ་རྒྱལ་བུ་ཀུན་དགའ་འོད་ཀྱི་སྐྱེ་བ་བཞེས་པ་ཡིན་ཞེས་བཤད་ན་མདོ་རྒྱུད་ཀྱི་དགོངས་པ་དང་མཐུན་པར་སྣང་། དེ་ལྟར་ཡིན་པའི་ཚུལ་ནི། རྣམ་རྒྱལ་གཟུངས་ཆེན་ལས། གཡུང་དྲུང་སེམས་དཔའ་འགྲོ་བའི་དོན་དུ་ཡིད་བཞིན་ནོར་བུ་ཞུ་བར་མཁྱེན་ནས། ཞེས་པས་རྒྱལ་བུ་དེ་ཉིད་སྤྱིར་གཡུང་དྲུང་སེམས་དཔའ་ཡིན་པར་བསྟན། ཡིད་བཞིན་ནོར་བུ་ལའང་དོན་གྱི་ནོར་བུ་དང་། རྫས་ཀྱི་ནོར་བུ་གཉིས་སུ་ཡོད་ལ། འདིར་རྫས་ཀྱི་ནོར་བུ་དང་དོན་གྱི་ནོར་བུ་གཉིས་ཀ་ལོན་པར་བཞེད། དེ་ཉིད་ལས། ཡིད་བཞིན་གྱི་ནོར་བུ་དཀོན་ལ་རིན་ཐང་ཆེ་བ་དེ་ནི་འཇིག་རྟེན་འདིའི་དཔལ་ཐམས་ཅད་འགྲུབ་པ་ཧ་ཅང་ཆེ་སྟེ། མངོན་པར་རྫོགས་པའི་སངས་རྒྱས་བདག་ཉིད་རྣམ་པར་རྒྱལ་བ་ལྟ་བུའི་སྐུ་རྐྱེན་ཡིན་ནོ། །དེ་ཅིའི་ཕྱིར་ཞེ་ན། སྤྲུལ་པའི་སྐུ་གང་ཞིག་དང་པོ་སེམས་བསྐྱེད་ནས། ཞེས་གསུངས་པའི་དོན་གྱིས་གྲུབ་པ་ཡིན། དེས་ན། སྟོན་པ་སངས་རྒྱས་
|
