|
སྲོག་ལ་རྒོལ་བ་ཡ་ང་བྱུང་དང་འབྱུང་བཞིན་པ་དེ་དག་ལ་དམིགས་ཏེ། སྟོན་པ་གཤེན་རབ་ཀྱིས་མུ་སྟེགས་ཀྱི་བོན་པོ་དེ་རིགས་ཆམ་ལ་ཕབ་ཅིང་བཅོས་བསྒྱུར་གནང་སྟེ་ཐེག་པ་རིམ་དགུའི་གཡུང་དྲུང་གི་བོན་གསུངས་ཏེ་སྐྱེ་འགྲོ་ཐམས་ཅད་བདེ་ལ་བཀོད་ཚུལ་ཟིན་བྲིས་སུ་བཀོད་ཡོད། ཐེག་པ་རིམ་དགུ་ཞེས་པ་དེ་མདོར་བསྡུས་ན་རྒྱུ་ཡི་བོན་དང་འབྲས་བུའི་བོན་གཉིས་སུ་འདུས་ཤིང་། དང་པོ་དེ་ནི་ཚེ་ཐོག་འདིའི་ཕན་བདེ་ལ་ཞེན་པའི་འཇིག་རྟེན་པ་རྣམས་ལ་དམིགས་ཏེ་གསུངས་ཤིང་། གཉིས་པ་དེ་ནི་ཚེ་ཕྱི་མ་དོན་དུ་གཉེར་མཁན་རྣམས་ལ་གསུངས་པ་ཡིན། དེ་གཉིས་གང་ཡིན་ཡང་སྟོན་པ་གཤེན་རབ་ཀྱིས་གཞི་སྙིང་རྗེ་ཆེན་པོ་དེ་ཐབས་ཀྱི་གཙོ་བོར་བཞག་ཅིང་། དེ་ནས་བདག་མེད་རྟོགས་པའི་ཤེས་རབ་ལ་གདུལ་བྱའི་བློ་དང་བསྟུན་ནས་བསྟེན་དགོས་ཚུལ་གསུངས་ཡོད། དེས་ན་སྐྱེས་བུ་རབ་འབྲིང་ཐ་གསུམ་གྱི་བློ་དང་བསྟུན་ནས་ཐེག་པ་རེ་རེའི་ལྟ་ཚུལ་ཡང་མི་འདྲ་བར་གསུངས་ཡོད་པས། རེ་རེ་བཞིན་བཤད་ན་མང་འགྲོ་བས། འདིར་མདོ་སྔགས་རྫོགས་གསུམ་གྱིས་མཚོན་པའི་ཐེག་པ་མི་འདྲ་བ་འགའི་འཆམ་མཐུན་གྱི་བསམ་བློ་ལྟ་ཚུལ་རེ་བཤད་ན།
དེ་ཡང«ཐེག་པ་ཆེན་པོ་ཡུམ་གྱི་སྙིང་པོ་ཞེས་བྱ་བའི་མདོ»ལས། བོན་ཐམས་ཅད་སྲིད་པ་ལས་བྱུང་བ་དང་། རིན་པོ་ཆེ་ལས་བྱུང་བ་དང་། སྣང་བ་ལས་བྱུང་བ་དང་། སྟོང་བ་ལས་བྱུང་བ་དང་། སོ་སོ་གསལ་བ་ལས་བྱུང་བ་དང་། མཉམ་པ་ཉིད་ལས་བྱུང་བ་དང་། དེ་དག་ཐམས་ཅད་སྣང་བའམ། ཡོད་པའམ། མེད་པའམ། རྟག་པའམ། ཆད་པའམ། སྐྱེ་བའམ། འགག་པའང་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་ཐམས་ཅད་ཅིར་ཡང་མི་དམིགས་སོ། །རང་བཞིན་ཀྱང་མི་དམིགས་སོ། ། དེ་ལྟ་བས་ན་ཡེ་མ་བྱུང་མ་སྐྱེས་སྐྱེ་བ་མེད་པའོ། །སྐྱེ་བ་མེད་པ་ལ་མཉམ་པ་ཉིད་དུ་གནས་ཏེ། མ་བཅོས་པའི་ཐིག་ལེ་གཅིག་ལ་རྫོགས་སོ།། ཅེས་སོ། །འདིར་བོན་ཞེས་པ་དེ་ཆོས་ཞེས་པའི་ཐ་སྙད་ཀྱི་གོ་དོན་དང་ཡོངས་སུ་མཐུན་ཏེ། ཡོད་པ་དང་ཤེས་བྱ་སོགས་དོན་དུ་མ་འཇུག་གོ ། དེས་ན་བོན་ཐམས་ཅད་སོ་སོ་ཐ་དད་དུ་སྣང་ཞིང་བྱུང་བའི་ཁུངས་མི་གཅིག་པ་ལྟར་སྣང་བ་དང་། དེ་དག་ལ་ལ་ཞིག་འགུལ་སྐྱོད་དང་འགྱུར་ལྡོག་གི་གཤིས་སུ་གྲུབ་པ་ལྟར་སྣང་ཡང་། བོན་ཐམས་ཅད་ཀྱི་རང་བཞིན་ངོ་མ་ནི་མཐའ་ཐམས་ཅད་ལས་བྲལ་ཏེ་རང་གི་བོ་རྡུལ་ཙམ་ཡང་མ་གྲུབ་པར་སྟོང་བའི་ངང་ལ་མཉམ་པ་ཉིད་དུ་གནས་ཡོད་པར་འདོད་དོ། །དེ་ཡང་སྣང་བ་དང་སྲིད་པའི་ཤེས་བྱ་ཐམས་ཅད་བསྡུས་ན་དོན་དམ་བདེན་པ་དང་ཀུན་རྫོབ་བདེན་པ་གཉིས་སུ་འདུས་པར་བཤད་དེ། «ཐེག་པ་ཆེན་པོ་དབུ་མ་བདེན་གཉིས»ལས། ཕྱི་ནང་སྣོད་བཅུད་འཁོར་འདས་ཀུན། །འདི་ལྟར་སྣང་བའི་བོན་རྣམས་ཀུན། །བདེན་པ་གཉིས་སུ་རྣམ་པར་སྣང་། །ཤིན་ཏུ་གཅིག་མིན་ཐ་དད་མིན། །ལྡོག་པས་བྱས་མིན་རྟོགས་པ་ཡི། །ཤེས་པ་གཉིས་བལྟོས་རྣམ་པར་དབྱེ། །འཁྲུལ་བ་ཐམས་ཅད་ཀུན་རྫོབ་ལ། །དེ་ཡི་དབེན་པ་དོན་དམ་ཉིད། །ཅེས་སོ། ། དེས་ན་ཐེག་པ་འདིས་དོན་དམ་བདེན་པའི་གནས་ལུགས་འདི་མ་རྟོགས་པའི་ཕྱིན་ཆད་འགྲོ་བ་ཐམས་ཅད་ཀྱི་རྒྱུད་མ་རིག་པས་ཀུན་ནས་བསླངས་ཏེ་དུག་ལྔ་ཉོན་མོངས་ཀྱིས་ཡོངས་སུ་ཁེངས་ཏེ་མི་རང་ཉིད་དང་། ཡང་ན་མི་དང་མིའི་བར། མི་དང་ཁོར་ཡུག་བར། མི་དང་སྤྱི་ཚོགས་བར་འཆམ་མཐུན་ཡོང་མི་སྲིད་པ་དང་། རེ་ཞིག་འགྲིག་འགྲིག་མཐུན་མཐུན་ལྟར་ཡོང་བ་དེ་ཡང་ཀུན་རྫོབ་སྟེ་འཆམ་མཐུན་ལྟར་སྣང་ཙམ་ལས་མ་འདས་ཏེ། རྒྱུ་འཁྲུལ་བ་དང་ཕྱོགས་རེ་བ་དེ་ལས་དངོས་པོ་ཐམས་ཅད་མཉམ་པ་ཉིད་དུ་གནས་པའི་མཐར་མཐུག་གི་འཆམ་མཐུན་དེ་ལྟ་བུ་གཏན་ནས་ཡོང་ཐབས་མེད་པར་འདོད་དོ། ། འོ་ན་ཇི་ལྟར་ཡོང་ཞེ་ན། ཐོག་མར་ཕྱི་སྣང་བའི་བདེན་ཞེན་འདི་དག་སྒྱུ་མར་བསྒོམ་ཞིང་དེ་ནས་ཕ་རོལ་དུ་ཕྱིན་པ་དྲུག་གམ་བཅུ་ལ་སོགས་པའི་སྒོ་ནས་བློ་སྦྱངས་ཏེ་དོན་དམ་བདེན་པ་དེ་རྟོགས་ཐབས་ལ་འབད་ནས་མཐར་མིའི་བྱང་ཚད་མཐོ་ཞིང་ཞི་བདེ་ཀུན་མཐུན་དང་མཉམ་པ་ཉིད་ཀྱི་ཕུགས་བསམ་སྤྱི་ཚོགས་ཤིག་མངོན་འགྱུར་བྱེད་དགོས་པར་འདོད་དོ། ། འདི་ནི་རྒྱུ་མཚན་ཉིད་ཐེག་པའི་ལྟ་ཚུལ་ཡིན།
སྔགས་ཀྱི་ལྟ་ཚུལ་ནི། སྤྱིར་སྔགས་ལའང་རྒྱུད་སྡེ་བཞི་དང་ཕྱི་ནང་གསང་གསུམ། ཕ་རྒྱུད་མ་རྒྱུད་གཉིས་མེད་ཀྱི་རྒྱུད་ཅེས་ནང་གསེས་དབྱེ་ཚུལ་མང་ཞིང་བྱེ་བྲག་དེ་རེ་རེའི་ལྟ་ཚུལ་ཡང་མི་འདྲ་ཞིང་། དེ་ལྟར་རེ་རེ་བཞིན་བཤད་ན་མང་དོགས་ནས་འདིར་སྔགས་སྤྱི་ལུགས་ལྟར་བཤད་ན། «མ་རྒྱུད»ལས། ཡི་དམ་གནས་འགྱུར་འཕོ་བ་ཕྱི་སྣོད་འདི། །སངས་རྒྱས་ཞིང་ཁམས་ཡི་དམ་གཞལ་ཡས་ཁང་། །ནང་བཅུད་སེམས་ཅན་ཡི་དམ་རྒྱལ་བའི་འཁོར། །རང་སེམས་སྟོང་གསལ་བདེ་ཆེན་བོན་གྱི་སྐུ། །ཞེས་སྔགས་ལུགས་ཀྱིས་ཕྱི་སྣོད་ཁོར་ཡུག་ཡུལ་ལྗོངས། ཐ་ན་རི་ར་བ་ཁང་ཁྱིམ་འཛུགས་སྐྲུན་སོགས་དེང་རབས་ཀྱི་བཟོ་བཀོད་གང་ཡིན་ཡང་ཐ་མལ་དུ་མི་ལྟ་བར་ལྷའི་གཞལ་ཡས་ཁང་དང་། ནང་བཅུད་སེམས་ཅན་ཏེ་མི་དང་སྲོག་ཆགས་བྱ་བྱེའུ་འབའ་འབུ་གང་ཡིན་ཀྱང་ལྷ་དང་ལྷ་མོར་བལྟ་བ་སྟེ། ཕོ་ཐམས་ཅད་དཔའ་བོ་དང་མོ་ཐམས་ཅད་མཁའ་འགྲོ་མའི་རང་བཞིན་དུ་མཐོང་ངོ་། ། «སྣང་ལྡན་གྱི་ཐེག་པའི་རབ་དབྱེ»ལས། ཕྱིའི་ཡུལ་འཇམ་པ་དང་། རྩུབ་པ་དང་། མཐོ་བའི་རི་དང་། ནང་གི་སེམས་འདོད་ཆགས་དང་། ཞེ་སྡང་དང་། གཏི་མུག་སྟེ། ཕྱི་ནང་ལུས་དང་ངག་དང་སེམས་གསུམ་ཀ་དག་པ་གསུམ་གྱི་ལྷའི་གཟུགས་བརྙན་དུ་བལྟ་སྟེ། ཞེས་དང་། «སྡེ་སྣོད་རིན་པོ་ཆེའི་མཛོད»ལས། དེའང་ལུས་ངག་སེམས་ལྷའི་སྐུ་གསུངས་ཐུགས་ཀྱི་གཟུགས་བརྙན་དུ་བལྟ་བ་སྟེ། གཟུགས་སྣང་ཚད་སྐུ། སྒྲ་གྲགས་ཚད་སྔགས། ཡིད་ཀྱི་དྲན་བསམ་བསམ་གཏན་དུ་དག་པས་དག་པ་གསུམ་ཞེས་བྱའོ། ཞེས་སོ།། དེ་ལྟར་དུ་བོན་གྱི་མཁས་གྲུབ་རང་ཤར་རིག་གྲོལ་རྩལ་གྱིས་གསུངས་པའི་ལུས་སྦྱིན་ལས་ཀྱང་། ཨཿ རང་སེམས་མ་རིག་དབང་གིས་སྔོན་ཆད་ཀྱང་། །ཁམས་གསུམ་འཁོར་བའི་སྟོབས་ཀྱིས་ད་ལྟའི་དགྲས། །ཕ་མར་བྱས་པ་འདི་ལ་བྱམས་པ་བསྒོམ། །གནོད་སེམས་མི་རུང་དགྲ་བཟུང་འཁྲུལ་བ་ཡིན། །སེམས་ཅན་ཐམས་ཅད་བདེར་གཤེགས་སྙིང་བོས་ཁྱབ། །ལྷ་དང་ལྷ་མོའི་རང་བཞིན་ཡིན་པ་ལ། །དགྲ་ཞེས་བྱ་བའི་གཟུང་ཡུལ་ག་ལ་ཡོད། །མཉམ་པར་བསམ་ཞིང་སྟོང་ཉིད་ངང་ལ་བཞག །ཅེས་དང་། ཡང་དེ་ཉིད་ལས། མཉམ་ཉིད་ཀློང་དུ་མགྲོན་ལ་བཟང་ངན་མེད། །ཐམས་ཅད་རང་རིག་རྩལ་གྱི་ཡི་དམ་ལྷ། །ཞེས་སོ། །འདིར་འབྱུང་བའི་མགྲོན་ཞེས་པ་དེ་ནི་བོན་པོའི་ཆོས་ལུགས་ལས་སྣང་དང་མི་སྣང་བའི་སེམས་ཅན་ཡོད་དོ་ཅོག་ལ་བྱའོ། ། དེ་ལྟ་བུའི་སྔགས་ཀྱི་དག་པ་གསུམ་དང་སེམས་ཅན་ཐམས་ཅད་འདྲ་མཉམ་དུ་འདོད་པ་ལ་སོགས་ཀྱི་ལྟ་བ་དེ་ནི་མི་དང་མིའི་བར། མི་དང་ཁོར་ཡུག་བར་འཆམ་མཐུན་ཡོང་བའི་གཞི་རྩའི་ལྟ་བ་ཞིག་ལས་མ་འདས་ཏེ། ཕྱི་རོལ་ཡུལ་གྱི་སྣང་ཚུལ་མཐའ་དག་གང་ཟག་རང་གི་འདུ་ཤེས་བསྒྱུར་ཏེ་ཡག་བཙོག་དང་བཟང་ངན། སྤང་བླང་མེད་
|
