ཁྱུང་མོ་དགོན་པའི་མཚན་དོན་དང་དེའི་ཁྱད་པར་འགའ་ཞིག་ལ་ཞིབ་མོར་དཔྱད་པ།

གཉིས་པ། ཁྱུང་མོ་ཞེས་པའི་མཚན་ཟུར་གྱི་མོ་ཡི་གོ་དོན་དང་འབྲེལ་ཏེ་དཔྱད་པ།

         ཁྱུང་མོ་ཞེས་པའི་མཚན་ཟུར་གྱི་མོ་ཞེས་པ་འདི་བོད་ཀྱི་བརྡ་སྤྲོད་རིག་པའི་གཞུང་གི་བདག་སྒྲ་མོ་ཡིག་ཅེས་པ་དེ་ཡིན་ཏེ། པ་བ་མ་དང་པུ་བུ་འུ་གསུམ་དང༌། །པོ་བོ་མོ་དང་དགུ།༡༥ ཞེས་པའི་སྐབས་བསྟན་གྱི་མོ་ཞེས་པའི་བདག་སྒྲ་དེ་ཡིན་པའི་ཕྱིར། དོན་དུ་རུས་རྒྱུད་ཁྱུང་ཅན་ལ་རིམ་པ་བཞིན་དུ་གོང་གི་པོ་བོ་མོ་གསུམ་གྱི་བདག་སྒྲ་སྦྱར་ཏེ། ཁྱུང་པོ་དང༌། ཁྱུང་བོ། ཁྱུང་མོ་ཞེས་བྱུང་ཡོད་པ་ལས། འདིར་ཁྱུང་མོ་དགོན་པའི་མཚན་ཟུར་གྱི་ཁྱུང་མོ་ཞེས་པ་འདི་ཡང་རུས་རྒྱུད་ཁྱུང་ཅན་ལ་བདག་སྒྲ་མོ་སྦྱར་བས་ཁྱུང་མོ་ཞེས་གྲུབ་པ་དང༌། རྒྱུ་མཚན་དེའི་ཕྱིར་རུས་རྒྱུད་ཁྱུང་མོ་ཞེས་པ་འདི་ལས་དྲངས་ཏེ་བཏགས་པར་ཀུན་ནས་མཐུན་པར་སེམས་སོ། །
        གཞན་ཞིག་ཏུ་ཡང་ཁྱུང་མོ་ཞེས་པའི་མཚན་ཟུར་གྱི་མོ་ཞེས་པ་ཕོ་མོ་གཉིས་སུ་དབྱེ་བའི་མོ་ཙམ་ལ་གོ་ནས་འབྲེལ་སྟངས་ཤིག་ཀྱང་ཡོད་པར་སེམས་ཏེ། དེ་ནི་དོན་དུ་རུས་རྒྱུད་ཁྱུང་ཡིན་པ་ལ་ཕོ་ཞིག་དང༌། རུས་རྒྱུད་ཁྱུང་ཡིན་པ་ལ་མོ་ཡིན་པ་ཞིག་བཅས་རིགས་གཉིས་སུ་ཡོད་པས། རྒྱུ་མཚན་དེའི་ཕྱིར་ན། རུས་རྒྱུད་ཁྱུང་ཕོ་ལས་གྲོལ་བའི་རིགས་ལ་ཁྱུང་ཕོ་༡༦ཞེས་ཟེར། དེ་ནས་རིམ་བཞིན་དུ་འགྱུར་ཏེ་ཁྱུང་པོ་ཞེས་འབྲི་འབོད་བྱེད་བཞིན་ཡོད་པ་ལྟར་ཡིན་ཡང་སྙམ། རུས་རྒྱུད་ཁྱུང་མོ་ལས་གྲོལ་བའི་རིགས་ལ་ཁྱུང་མོ་ཞེས་འབོད་སྲོལ་ཡོད་པ་ལྟར། འདིར་ཁྱུང་མོ་ཞེས་པ་ཡང་རུས་རྒྱུད་ཁྱུང་མོ་ཡིན་པ་ལས་གྲོལ་བའི་རིགས་ཤིག་ཀྱང་ཡིན་པར་སེམས་ཏེ། སྤྱིར་སྲས་མཚན་གྱི་རུས་ཡབ་དང་མཐུན་པར་བྱེད་མོད་ཀྱང༌། སྔོན་བཙན་པོའི་སྐབས་ཤིག་ཏུ་མ་རྒྱུད་ཅེས་པ་ལས་ཕ་རུས་གཙོར་མི་འཛིན་པའི་དུས་རབས་ཤིག་ཀྱང་བྱུང་བར་མངོན།༡༧ དཔེར་ན། གནམ་གྱི་ཁྲི་བདུན་གྱི་རིང་ཡུམ་སྲས་མཚན་འབྲེལ་གྱི་སྲོལ་རྒྱུན་ཞིག་ཀྱང་འདུག་སྟེ། སྲས་ཀྱི་མཚན་དུ་སྒྲའམ་ཡིག་འབྲུ་གཅིག་ཡུམ་གྱི་མཚན་ལས་ཐད་ཀར་བླངས་ནས་བཏགས་ཡོད་སྟེ། དམུ་བཟའ་གཉའ་མཐིང་མའི་སྲས་ཀྱི་མཚན་ལ་གཉའ་ཁྲི་བཙད་པོ་༡༨དང༌། གནམ་མུག་མུག་གམ་ཡུམ་མུ་ཆོ་བཟའ་ཡི་སྲས་ལ་མུ་ཁྲི་བཙད་པོ། ས་དིང་དིང་གི་སྲས་ལ་དིང་ཁྲི་བཙད་པོ། སོ་ཐམ་ཐམ་གྱི་སྲས་ལ་སོ་ཁྲི་བཙད་པོ། དོག་མེར་མེར་གྱི་སྲས་ལ་མེར་ཁྲི་བཙད་པོ། གདགས་ལྷ་དཀར་མོའི་སྲས་ལ་གདགས་ཁྲི་བཙད་པོ། སྲིབ་ཀྱི་ལྷ་མོ་དཀར་མོའི་སྲས་ལ་སྲིབ་ཁྲི་བཙད་པོ་བཅས་ཚང་མར་ཡུམ་གྱི་རུས་མཚན་ཞིག་སྦྱར་ནས་བྱུང་ཡོད་པ་《སྐྱབས་སྟོན་ཁྲོ་འགྲེལ་》༡༩དང༌། 《ཏུན་ཧོང་ཡིག་རྙིང༌།》༢༠ 《ལེགས་བཤད་མཛོད་》༢༡སོགས་ན་གསལ་པོར་གསུངས་ཡོད་པ་ལྟར་འདིར་ཡང་རུས་རྒྱུད་ཁྱུང་ཡིན་པའི་ཡུམ་ཞིག་གི་མཚན་ཟུར་ལས་དྲས་ཏེ་སྲས་མཚན་གྱི་ཐོག་མར་ཁྱུང་མོ་ཞེས་སྦྱར་ཏེ་ཁྱབ་པ་མིན་ནམ་སྙམ་པའི་དོགས་གཞི་ཞིག་ཀྱང་འདུག་མོད། འོན་ཀྱང༌། གོང་དུ་དྲངས་པའི་རྒྱུ་མཚན་གོང་མ་དེ་ཧ་ཅང་བདེན་བློ་སྐྱེ་སླ་བ་ཞིག་འདུག་པས། དེ་ལྟར་དུ་རེད་ཅེས་ཐག་གིས་བཅད་ཀྱང་ལུང་རིག་གང་དང་ཡང་འགལ་མེད་པར་སྙམ་སྟེ་རིག་པའི་ཁྱུ་མཆོག་རྣམས་ཀྱིས་དཔྱད་མཛོད་ཞུ།

གསུམ་པ། ཁྱུང་མོ་ཞེས་པའི་རུས་མཚན་དེ་སྔར་ཡོད་བཀའ་ལུང་ཁག་ལས་དྲངས་ཏེ་བཤད་པ།

        འདིར་ཁྱུང་མོ་ཞེས་པའི་རུས་མཚན་དེ་བདག་རྐྱེན་རྫོགས་པའི་སངས་རྒྱས་ལ་བརྟེན་ནས་བྱུང་བའི་བཀའ་དང༌། དེ་འབྲེལ་གྱི་བཀའ་བརྟེན་ཁག་ལས་ཀྱང་གསལ་བར་ཡོད་པ་ལས། འདིར་དཔེ་མཚོན་ཙམ་དུ་ཁ་ཤས་དྲངས་ན་མཛད་མདོ་རྒྱས་པ་《འདུས་པ་རིན་པོ་ཆེའི་རྒྱུད་དྲི་མ་མེད་པ་གཟི་བརྗིད་རབ་ཏུ་འབར་བའི་མདོ་》ལས། ལ་ལ་ཞིག་ནི་ཁྱུང་མོ་ཡི་ལྡིང་གར་བསྒྱུར་རོ། །ལ་ལ་ཞིག་ནི་སེང་གེའི་བརྗིད་གར་བྱེད་དོ།༢༢ །ཞེས་ཁྱུང་མོ་ཞེས་པའི་ཐ་སྙད་སྔར་ནས་ཡོད་པ་དང༌། དེ་བཞིན་གསང་སྔགས་མ་རྒྱུད་ཐུགས་རྗེ་ཉི་མའི་སྒྲུབ་སྐོར་གྱི་གཞུང་ཆེན་《གསང་བ་གསང་ཆེན་གསང་སྔགས་མ་རྒྱུད་ལྷ་སུམ་བརྒྱ་དྲུག་ཅུའི་སྒྲུབ་གཞུང་》ལས་ཀྱང༌། ཁྱུང་བཟའ་དཀར་མོས་ཁྱུང་མོ་སྐྱོང༌། །འཇང་མོ་དཔལ་སྒྲོན་དངོས་གྲུབ་བསྙེམས།༢༣ །ཞེས་པས་ཁྱུང་མོ་ཞེས་པའི་རུས་མཚན་རྗེན་གཅེར་པ་ཞིག་གསལ་པོར་ཡོད།
       ད་དུང་བོན་གསང་སྔགས་ཀྱི་གཞུང་ཆེན་རྒྱལ་རིགས་བྲུ་ཡི་རིང་ལུགས་ཀྱི་ཞི་ཁྲོའི་སྒྲུབ་སྐོར་གྱི་ནང་གསེས་《གསས་མཁར་ཞི་བ་གཡུང་དྲུང་ཡོངས་རྫོགས་》ཞེས་པ་ལས། ཁྱུང་མོ་ལྡིང་སྐོར་གཡུང་དྲུང་བོན་ལ་བསྒྱུར། །རྫུ་འཕྲུལ་རླབས་ཆེན་བོན་གྱི་ཕྱག་རྒྱར་བཞེས།༢༤ །ཞེས་དང༌། 《བོན་སྒོ་གསལ་བྱེད་》ཀྱི་ནང་བརྡ་སྤྲོད་བྱེད་ཀྱི་སྐད་གཅོང་དགུ་ནི། གཡུ་འབྲུག་གི་ངར་སྐད། ཁྱུང་མོའི་འཚེར་སྐད། ངང་མོའི་བུ་སྟོར་གྱི་སྐད། རྨ་བྱའི་སྒྲོ་སྐད། ཁུ་བྱུག་གསུང་སྙན་གྱི་སྐད། ལྕོ་ཀའི་འགྱུར་སྐད། ནེ་ཙོའི་གཅོང་སྐད། ཕོ་རོག་ལྟོ་སྐད། སྟག་སྦྲང་བུའི་སྐད་དང་དགུ་༢༥བཀོད་པའི་སྐབས་ཀྱང་ཁྱུང་མོ་ཞེས་