ཆོས་སྲིད་ཟུང་འབྲེལ་དང་འདྲེས་མའི་འགལ་འབྲེལ་ཕན་གནོད་ཇི་ལྟར་བྱུང་ཚུལ་གྱི་ལོ་རྒྱུས་རགས་ཙམ་དཔྱད་པ།

སྲིད་པའི་ཕུན་ཚོགས་རྩྭ་ལྟར་འདོར་དགོས་ཟེར། །སྲིད་དབང་དོན་དུ་ལུས་སྲོག་འདོར་དགོས་འགལ། །ཆོས་བཞིན་སྤྱོད་ན་ཆགས་སྡང་སྤོང་དགོས་ཟེར། །ཆོས་པ་ཕྱོགས་འཛིན་ཞེན་པས་གདུངས་པ་འགལ། །ཆུ་དང་འོ་མ་བསྲེས་པ་འོ་མ་མིན། །ཆོས་དང་ཆབ་སྲིད་བསྲེས་པ་ཆོས་ལུགས་མིན། །ཆོས་སྲིད་མེ་ཆུ་སྙིམ་པས་དམ་དུ་བཟུང༌། །ཆོས་སྲིད་སྡུག་བསྔལ་སྐྱེད་བྱེད་དམ་ཆོས་གང༌། །སེམས་ཅན་ཐམས་ཅད་རིས་མེད་སྙིང་རྗེའི་ཡུལ། །ང་དང་ཁྱོད་ཅེས་ཕྱོགས་རིས་ཆགས་སྡང་བྲལ། །རང་གཞན་བདེ་བ་རྒྱལ་སྲས་ཕྱག་ལེན་བཞིན། །རྣམ་མཁྱེན་ཐོབ་འདོད་བཅོས་མིན་སྐྱེ་བར་སྨོན།། ཞེས་པའང་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་འདུ་འཇར་མན་དུ་འཚོགས་པའི་སྐབས་སུ། ཆོས་རྗེ་བོན་བརྒྱ་བའི་སྐྱེ་མིང་བ་དགེ་ལེགས་ལྷུན་གྲུབ་རྒྱ་མཚོས་འཛམ་གླིང་མཁས་པ་མང་པོའི་མདུན་སར་དཔྱད་གཏམ་དུ་སྤེལ་བ་དགེ་ཞིང་བཀྲ་ཤིས་སོ། །