སྐྱབས་རྗེ་བླ་མ་བོན་བརྒྱ་དགེ་ལེགས་ལྷུན་གྲུབ་རྒྱ་མཚོའི་རང་རྣམ་བཞུགས་སོ།
|
མང་པོ་བྱུང་བའི་གནད་དོན་གང་ཡིན་པ་དང༌། བོད་ཀྱི་རིགས་གནས་ཀྱི་ཁུངས་ཆེས་སྔ་བའི་བདེན་དོན་གསལ་བཤད་དང༌། ཆོས་ལུགས་ཕྱོགས་ཞེན་དང༌། སྲིད་དབང་འཕྲོག་རྩོད་བྱས་པས། མི་རིགས་རང་ལ་ཉམས་གུད་དང་གནོད་པ་མང་པོ་བྱུང་ཚུལ་སོགས་གཟུ་བོའི་བློས་དཔྱད་དེ་རྩོམ་ཡིག་སྤེལ་ཞིང༌། འཛམ་གླིང་གི་མཁས་པ་མང་པོའི་མདུན་སར་སྤོབས་པ་ཆེན་པོས་ཞུས་པས་ཀུན་གྱིས་ཞལ་བཞེས་མཛད། ཕྱི་རྒྱལ་ན་བཞུགས་པའི་བླ་ཁྲི་མཁན་པོ་ཉི་མ་གྲགས་པ་དང༌། བྲག་དཀར་དགེ་བཤེས་ཉི་མ་རྣམ་རྒྱལ་གཉིས་ནས་སྐད་བསྒྱུར་མཛད་དེ་རང་གི་དཔྱད་རྩོམ་དེ་དག་དབྱིན་ཇིའི་སྐད་ལས་ཚོགས་འདུའི་སྟེང་གསལ་བཤད་གནང༌། འཛམ་གླིང་ན་གྲགས་ཆེ་བའི་ཨ་རིའི་མཁས་པ་ཞིག་གིས་བཀའ་གཏེར་སྙན་བརྒྱུད་ཀྱི་ཁྱད་པར་ལ་ཞིབ་འཇུག་བྱས་པར་ཁོང་གི་ཐུགས་འདུན་ལྟར་རང་ལ་རོགས་བཅོལ་བ་དང་དུ་བླང་ནས་དྲི་བ་དྲི་ལན་ལ་གསལ་བཤད་བྱས་པས་ཁོང་གི་ཐུགས་བཞེད་བསྐངས། ཀུན་ཀྱི་ཐུགས་མཉེས་པ་བྱུང༌། ཁང་དཀར་དགེ་བཤེས་སྐལ་བཟང་ཚུལ་ཁྲིམས་སོགས་མཁས་པ་མང་པོར་གཞུང་ལུགས་དང་རིག་གནས་ལོ་རྒྱུས་སོགས་ལ་བགྲོ་གླེང་མང་པོ་བྱས་པས་ཐུགས་ནང་མཐུན་པར་གྱུར། ཕན་ཚུན་མཛའ་བརྩེའི་ངང་མཁས་པའི་སྙན་གྲགས་དང་རྩོམ་ཡིག་གི་ལེགས་སྐྱེས་འབུལ་རེས་བྱས། དེ་ནས་བསམ་བློ་རི་རབ་བཞིན་བརྟན་པོའི་སྒོ་ནས་བདེ་འཇགས་ངང་རང་ཡུལ་དུ་འབྱོར་བ་ལ། རང་ཞིང་གི་རྫོང་ཁག་བརྒྱད་ན་ཡོད་པའི་སློབ་མ་དང༌། ལྷ་སྡེ་རྣམས་ཀྱི་བླ་གྲྭ་སྐྱ་སེར་སྟོང་ཕྲག་དུ་མས་དགའ་སྤྲོའི་ངང་ནས་སེར་འཕྲེང་དང་ཇ་ཐབས་ཆིབས་བསུ་སོགས་གྱ་ནོམ་པ་བྱས། |
