ཡང་སྟོན་ཤེས་རབ་རྒྱལ་མཚན་གྱི་རྣམ་ཐར་མདོར་བསྡུས།

མཇལ་ནས་སྔར་གྱི་ལོ་རྒྱུས་རྣམས་ཞུས་ནས་གདམས་ངག་ཞུ་བྱས་པས། བླ་མའི་ཞལ་ནས། ང་ནི་གཞོན། ཁྱོད་ནི་རྒས། སྙན་བརྒྱུད་ཀྱི་བོན་ནི་གཅིག་བརྒྱུད་མིན་པར་སྤེལ་མི་རུང་བས། ད་ཁྱོད་ལ་སྔ་བར་གྲོང་འཇུག་གི་གདམས་པ་གཅིག་བསླབ་དགོས་གསུངས་ནས་གྲོང་འཇུག་སྦྱང་དུ་བཅུག་སྟེ། ཁོང་རྣམ་གཉིས་སྐུ་ལུས་བརྗེས་ནས་གདམས་ངག་ཐམས་ཅད་བུམ་པ་གང་བྱོའི་ཚུལ་དུ་གནང༌། དེ་ཡང་སྟོན་ཆེན་པོས་ཉམས་སུ་བླངས་པས། མཆོག་དང་ཐུན་མོང་གི་དངོས་གྲུབ་ཐོབ་པ་ཡིན། དེ་ལྟར་ཐུན་མོང་གི་རིག་གནས་སྒྲ་ཚད་ཀུན་ལ་མཁས་ཤིང་ཐུན་མིན་གསང་སྔགས་ཀྱི་དོན་དང་ལྡན་ནས། བསྙེན་སྒྲུབ་མཐར་ཕྱིན་ཏེ་ཡི་དམ་ལྷ་དང་དབྱེར་མེད་པ། གཞན་སྣང་ཟིལ་གྱིས་གནོན་ཞིང་ལྷ་སྲིན་བྲན་དུ་ཁོལ་བ། བླ་མེད་རྫོགས་པ་ཆེན་པོར་ཉམས་ལེན་མཛད་ནས། མཆོག་གི་དངོས་གྲུབ་བསྙེམས་པས་འཕོ་ཆེན་གྲོང་འཇུག་གི་གདམས་པ་ཟབ་མོར་དབང་འབྱོར་ཞིང༌། མཐུ་སྟོབས་ནུས་པས་གཞན་དོན་མཛད་པའི་རིག་འཛིན་སེམས་དཔའ་ཆེན་པོར་གྱུར་པ་སྟེ་གྱིམ་ཚ་རྨ་ཆུང་དངོས་སུ་བྱོན་པར་གྲགས་སོ།།
     གསུང་སྐྱེས་ཞལ་སློབ་ལ། སྟོད་སྨད་བར་གསུམ་ན་གྱེར་གཤེན་ཆེན་པོ་བཅུ་གསུམ་ཡོད་པ་ནི། སྐལ་བཟང་མགྲིན་རྒྱན་〔སྨད་ཆ། ཤ ༢༧༠〕ལས། སྟོད་ན་སྙེལ་༼འཁྲུལ་མེད་ཞིག་པོ་༽ཁྱུང་ཏྲེ་གསུམ་དགེ་ཞིང་བཞི། །བར་ན་ལུང་སྒོམ་༼རྟོག་མེད་༽ར་སྟོན་ཉི་མ་དང༌། །འུ་སངས་སྒོམ་པ་གཉག་སྟན་གཉིས་དང་ལྔ། །སྨད་དུ་ཡ་ངལ་ལག་དང་གཡུང་པོ་རྗེ། །བྲག་གསུམ་སྒོམ་རིན་བྲུ་སྟོན་ཉི་རྒྱལ་བཞི། །མཐར་ནི་དགུང་ལོ་རེ་ལྔར་དབྱིངས་གཤེགས་སོ།། ཞེས་གསུངས་པ་ལྟར་རབ་བྱུང་དང་པོའི་ལྕགས་མོ་བྱ་༼༡༠༨༡༽གི་ལོ་ལ་དགོངས་པ་བོན་དབྱིངས་སུ་བསྡུས་པ་ལགས་སོ།། །།