དྲན་པ་ནམ་མཁའ་མཆོག་གི་རྣམ་ཐར་བསྡུས་པ་ངོ་མཚར་ཚངས་པའི་དབྱངས་སྙན།
|
ངག་མཐའ་དག་ལ་གསན་ཏེ། རྒྱ་གར་དང་ཞང་ཞུང༌། སྟག་གཟིག ཨོ་རྒྱན་སོགས་ཀྱི་དྲན་པའི་སྒྲུབ་གནས་བྱིན་རླབས་ཅན་རྣམས་ལ་འགྲིམས་ནས། སྒྲུབ་པ་ཉམས་ལེན་མཛད། ཁྱད་པར་དུ་རྒྱ་ནག་གླང་ཆེན་འགྱིང་རི་དང༌། ཏི་སེ་གངས་ཀྱི་རི་བོ། སྤོས་རི་ངད་ལྡན། གཡུང་དྲུང་སྲ་བརྟན་རི་བོ། གཤེན་རི་བདེ་ལྡན་རི་བོ། གངས་ཅན་ཕྱུག་མོ་དཔལ་རི། དུར་ཁྲོད་གནས་བརྒྱད་བཅས་ལ་ཕེབས་ནས། གསང་སྔགས་སྤྱི་སྤུངས་སྐོར་གསུམ་སོགས་ཉམས་སུ་བླངས། མཁའ་འགྲོ་ཐུགས་རྗེ་ཀུན་སྒྲོལ་ཕྱག་རྒྱའི་གྲོགས་སུ་བསྟེན་ཏེ་བསྒྲུབས་པས། འཆི་མེད་ཚེ་ལ་དབང་བའི་རིག་འཛིན་མངོན་པར་གྲུབ་ནས། བཀའ་བརྒྱུད་གདམས་པ་མ་ལུས་རང་བརྡོལ་དུ་ཤར། སྤྱན་ལྔ་སྒྲིབ་པ་མེད་པར་མངོན་པར་གསལ། འབྱུང་བ་ལྔ་ལ་རང་ དབང་བསྒྱུར། གཙོ་བོ་སྦས་པའི་རྣལ་འབྱོར་གྱི་ཚུལ་དུ་བསྟན་དང་འགྲོ་ལ་ཕྱག་རྗེས་དཔག་མེད་མཛད། ནུ་བོ་གུ་རུ་པདྨ་འབྱུང་གནས་ནི། ཡབ་ཉིད་ཀྱིས་མཐུ་རྩལ་ནུས་པའི་དབང་བསྐུར་མཛད་ནས། སྲིན་པོ་འདུལ་བའི་བཀའ་བསྒོ་མཛད། ཡུམ་གྱིས་ཨོ་རྒྱན་གྱི་ཡུལ་མཚོ་དྲི་མེད་མདངས་ལྡན་ ནང་དུ་མེ་ཏོག་པད་མའི་སྡོང་བོ་ཟེའུ་འབྲུའི་ཁར་སྲས་བཅུག་ནས་འགྲོ་དོན་ལ་ཕེབས། ༼འདི་རྫུས་སྐྱེས་སུ་བཞེད་ཀྱང་ཆོག་སྟེ། བདེར་གཤེགས་སྤྲུལ་སྐུ་རྣམས་ཀྱི་མཛད་པ་ནི་བསམ་གྱིས་མི་ཁྱབ་པར་མཐའ་གཅིག་ཏུ་ངེས་པ་མེད་པས་གང་ལྟར་བཤད་ཀྱང་མི་འགལ༽རྒྱལ་བོ་ཨིནྡྲ་བོངྷི་ལ་སྲས་མེད་སྟབས། མཆོད་རྫས་ཀྱི་མེ་ཏོག་འཐུར་འོངས་ཚེ་རྙེད་པས་སྲས་སུ་མངའ་གསོལ་ནས། རྒྱལ་བོ་བློན་ཀུན་དགྱེས་ཏེ་པད་མ་རྒྱལ་བོའམ་པད་མ་འབྱུང་གནས་ཞེས་མཚན་གསོལ་ཞིང༌། ཨོ་རྒྱན། རྒྱ་གར། བོད་ཡུལ་སོགས་གནས་བརྒྱད་དུ་སྒྲུབ་པ་མཛད་པས་མཚན་བརྒྱད་བྱུང༌། རྫོགས་པ་ཆེན་པོ་ཟབ་ལམ་སྔགས་ཀྱི་བསྟན་པ་ཕྱོགས་ཀུན་ཏུ་སྤེལ་བ་དང༌། སྡེ་བརྒྱད་བྲན་དུ་བཀོལ་ཞིང་འཆི་མེད་ཚེ་ཡི་རིག་འཛིན་མཆོག་གི་སྐུར་བརྙེས་ཏེ། ལྷོ་ནུབ་སྲིན་པོའི་ཁ་ནོན་དུ་གཤེགས། དུས་གསུམ་སུ་འཕོ་འགྱུར་མེད་པར་རྟག་ཏུ་འགྲོ་དོན་མཛད་ནས་བཞུགས་སོ།། |
