འཕྲིན་ལན་མེ་ཏོག་ཆུན་པོ།

ཕྲན་ཆུང་མངའ་རིས་སུ་ཡོད་སྐབས༼༡༩༨༧༽སྐྱབས་རྗེ་རིན་པོ་ཆེ་མཚན་ནས་བརྗོད་པར་དཀའ་བ་༧བོན་བརྒྱ་དགེ་ལེགས་ལྷུན་གྲུབ་རྒྱ་མཚོ་མཆོག་གི་གསུང་འཕྲིན་གྱི་ལན་དུ་ཕུལ་བ། 

༄༅། ། ཚོགས་གཉིས་རིན་ཆེན་རྡུལ་མང་ལས་གྲུབ་པའི། །སྐུ་གཉིས་རི་རྒྱལ་ལྷུན་པོ་མངོན་མཐོའི་སྤོར། །མཁྱེན་གཉིས་ཉི་ཟླ་གསལ་བའི་དཀྱིལ་འཁོར་ལས། །བདེན་གཉིས་འོད་སྟོང་སྤྲོ་མཛད་གང་དེ་རྒྱལ། །རྣམ་མཁྱེན་རྒྱལ་བའི་བསྟན་པ་གཡུང་དྲུང་བོན། །རྣམ་གསུམ་འཁོར་ལོས་ཕྱོགས་ཀུན་སྤེལ་བ་ལ། །རྣམ་སད་གཞན་གྱིས་མཚོན་པ་ཡོངས་བཏངས་པའི། །རྣམ་འདྲེན་བླ་མ་མཆོག་གི་ཞབས་དྲུང་དུ། །མི་ཕྱེད་དད་པའི་རྒྱ་མཚོ་སྐྱོམས་པ་ལས། །ལེགས་འོངས་ཞུ་འཕྲིན་མེ་ཏོག་ཆུན་པོ་ཞིག །དལ་རྟེན་གོ་ལ་ཟླུམ་པོའི་ཡང་རྩེ་རུ། །གནས་པའི་སློབ་བུ་གྱི་ན་བ་དེས་འབུལ། །མཐོང་བ་ཙམ་གྱིས་གཞན་ཡིད་དང་བ་འདྲེན་པའི་སྐུ། །ཐོས་པ་ཙམ་གྱིས་གདུལ་བྱ་སྨིན་ཅིང་གྲོལ་བའི་གསུང༌། །མ་ལུས་ཤེས་བྱ་ཅིག་ཅར་ཉིད་དུ་མཁྱེན་པའི་ཐུགས། །ཡོན་ཏན་འཕྲིན་ལས་བཅས་པ་སྔར་བཞིན་བདེ་ལགས་སམ། །དལ་འབྱོར་ལུས་རྟེན་ངེས་མེད་ས་མཐའ་ན། །དལ་སྡོད་ངང་དུ་སྟོང་ཟད་བྱེད་པ་ལས། །དལ་བའི་ལུས་ལ་ན་བ་མ་བྱུང་བར། །དལ་རྟེན་སྔ་མཁོ་འཚོ་བཞིན་བདེ་བ་ལགས། མཚམས་ཞུ། མདོ་སྨད་ཡུལ་ན་མདོ་སྔགས་བསྟན་པའི་བདག །བརྒྱུད་འཛིན་ཚོགས་ལ་རྒྱུད་ལུང་མན་ངག་སྦྱིན། །མགོན་མེད་འགྲོ་བའི་མགོན་སྐྱབས་ཟླ་མེད་ཁྱེད། །རྒྱལ་བའི་བསྟན་ལ་རྒྱལ་བ་གཉིས་པ་བཞིན། །འཆད་པའི་ངག་གིས་སྐལ་ལྡན་ཤེས་རྒྱུད་གྲོལ། །རྩོད་པའི་ཚེ་ན་ལོག་རྟོག་དྲ་རྒྱ་གཅོད། །རྩོམ་པའི་ལེགས་བཤད་གཡུང་དྲུང་བོན་བསྟན་དཔྱིད། །སྨྲ་དབང་ཉི་མ་བསྟན་དང་འགྲོ་བའི་དཔལ། །ལུང་རྟོགས་བསྟན་པའི་གདུགས་དཀར་ལེགས་འཁྱིར་བས། །མ་རྟོགས་སེམས་ཅན་ཐར་བའི་གྲིབ་བསིལ་དུ། །བཀྲིད་ལ་མཁས་པ་ཁྱེད་ཀྱི་མཛད་བཟང་ལས། །ལྷག་པ་རྒྱལ་བ་རྣམ་ལའང་ཅང་ཡོད་དམ། །བསྟན་དང་འགྲོ་ལ་སྨན་པའི་འཁུར་བསྣམས་ཏེ། །བཤད་དང་སྒྲུབ་པའི་རྒྱལ་མཚན་མཐོར་སྒྲེང་པས། །རིས་ཅན་ཕལ་གྱི་སྙིང་ལ་གཟན་སྲིད་ཀྱང༌། །ལས་འཕྲོ་བོན་ལ་ཡོད་རྣམས་སྐལ་པ་རུ། །རྒྱལ་བ་གཉིས་པ་མཉམ་མེད་བླ་མ་ཡི། །རིང་ལུགས་འཁྲུལ་