དགེ་བཤེས་ཁྱུང་དཀར་ཟླ་བ་བསྟན་འཛིན་མཆོག་སྐུ་གཤེགས་ནས་ལོ་འཁོར་གཅིག་ལོན་པའི་རྗེས་དྲན།
རྗེས་དྲན་སྐྱེ་ལྔའི་དབྱངས་སྙན། དགེ་བཤེས་ཁྱུང་དཀར་ཟླ་བ་བསྟན་འཛིན་མཆོག་ལ་རྗེས་དྲན་དུ། བརྒྱད་ཁྲི་བཞི་སྟོང་བོན་སྒོ་མཐའ་ཡས་པས།། དམ་པ་ཁྱུ༷ང་གི་སྤྲིན་རུམ་མངལ་རྒྱ་ལས། ། ཁྱུ༷ང་ཆེན་དར་མའི་གཤོག་རླབས་རིང་བསྐྱོད་པས།། འགྲན་པའི་ཟླ༷་བྲལ་བཤེས་གཉེན་དམ་པའི་གཤིས། ། རླབས་ཆེན་བསོད་ནམས་ཁྱུ༷ང་སྔོན་སྐྱེས་པ་ཡིས། ། ཁྱུ༷ང་ཕྲུག་མཁའ་ལ་ལྡིང་འདྲའི་རྣམ་དཔྱོད་ཀྱིས། ། བསྟན་ལ་གཅེས་པའི་རྩེ་མོ་དབྱིངས་སུ་མཐོ། ། གཞན་ཕན་སེམས་ཀྱི་རྩ་བ་རབ་ཏུ་བརྟན། ། ཕུན་ཚོགས་རྒྱུ་དངོས་རྩྭ་ལྟར་རིང་དུ་དོར། ། ཐོས་པའི་ཤེས་རབ་ཕྱོགས་མེད་བཙལ་བས་མཁས། ། དྲི་བྲལ་ལྟ་བས་དབྱིངས་ཤེས་མ་འགགས་མཁྱེན། ། བསྟན་གཙོ་མཐོང་ན་མི་ཕྱེད་དད་པ་བརྟན། ། དེ་ལྟར་དྲན་པའི་གདུང་བ་འབར་བའི་མོད། །
དགུན་གྱི་ཉིན་མོ་འདི་ལ། --དགེ་བཤེས་ཁྱུང་དཀར་ཟླ་བ་བསྟན་འཛིན་ཚང་རྗེས་སུ་དྲན་པ།
ནམ་མཁའི་མཐོངས་ན་སྤྲིན་པ་བྱིའུ་ཙམ་མི་འདུག། ཉི་འོད་མར་ཁུ་གྲྭ་དང་གྲུ་ལ་འཁྱིལ་འདུག། ཡིན་ཡང་སེམས་ཀྱི་ངོགས་ལ་གྲང་འདར་ཤོར་བ།། ནང་གི་ཉིན་བྱེད་ནུབ་པའི་བརྡ་རྟགས་མིན་ནམ།། འདི་ནས་འདས་པའི་འཇིག་རྟེན་ཕ་གི་ཞིག་ན།། ངོ་མཚར་མཛད་པའི་རི་མོ་དགོད་པར་ངེས་ཀྱང་།། འཆད་རྩོད་ཁྲི་འཕང་མཐོན་པོ་སྟོང་བར་ལུས་པས།། དགུན་གྱི་རླུང་བུ་ཤུར་ཤུར་སྙིང་ལ་གཡུགས་སོང་།། ཚུར་འོངས་བརྒྱ་ཡི་སྔོན་ལ་ཕར་འགྲོ་སྟོང་རེད།། ནམ་འཆིའི་དུས་ལ་འདི་ཞེས་ངེས་གཏན་མེད་ཀྱང་། གཅེས་པའི་ནོར་བུ་འཆི་བའི་རྐུན་ལ་ཤོར་བ།། རྒྱལ་བསྟན་འཕྲིན་ལས་ངོ་ལ་གྱོང་གུད་ཆེ་འདུག། ལས་ཀྱི་སྐུད་པས་རེ་ཞིག་གཅིག་ཏུ་བསྡུས་ཀྱང་།། ལེགས་བཤད་སྣང་བ་ཡིད་ལ་འདྲེན་དབང་མ་བྱུང་།། སྒྱུ་ལུས་ཕུང་བོ་འོད་དུ་ཞི་བ་ཐོས་པས།། ད་རུང་སྙིང་གི་ཁོང་ན་ཕངས་སེམས་ལྕི་འོ།། སྨྲེ་ངག་བྲག་ལ་བཏང་ཡང་ཨ་ལན་མི་ཡོང་།། འབོད་པ་ཆུ་ལ་བསྐུར་ཀྱང་ཡ་ལན་མི་འབྱུང་།། ད་ནི་དྲན་པའི་གཞུ་མོ་ནང་དུ་བཀུག་ནས།། དྭངས་པའི་ཞབས་རྗེས་མི་ཚེའི་རྒྱན་དུ་ལེན་ནོ།། བསིལ་བའི་གྲོང་ནས་ཚ་བའི་གཏེར་སྒོ་འགྲིམས་ཤིང་།། གསུང་རབ་གསེར་གྱི་གླེགས་ཐག་རིགས་པས་བཀྲོལ་ནས།། རྣམ་དཔྱོད་གྲི་རྩེ་རྨོངས་པའི་སྙིང་ལ་གཏད་པ།། མི་ཆུང་ང་ཡི་ངོ་ལ་ལྟད་མོ་ཡིན་འདུག། ཕར་ལ་རེ་བའི་གོམ་པ་ཤུགས་ཀྱིས་སྤོས་ནས།། ཚུར་ལ་འབྲས་བུའི་ལྗིད་ཀྱིས་འཛུམ་ནས་ཐོན་པ།། དུས་ཐུང་ལོ་ཡི་སྒང་ལ་རྫུ་འཕྲུལ་ལགས་པས།། ངོ་མཚར་གནས་སུ་མ་བརྩིས་ཨ་རེ་བླུན་ནོ།། བརྩེ་བའི་ཆར་སྤྲིན་ཕུང་བོ་ནང་ལ་བཀུགས་ནས།། ཟབ་དོན་བདུད་རྩའི་ཟེགས་མ་ཞིང་ལ་གཏོར་བའི།། ངེས་དོན་བདེ་བའི་ལམ་བུ་ཤུགས་ཀྱིས་འདེད་ལ།། གང་ཁྱེད་སྤྱན་རས་རྣོན་པོས་བྱ་ར་མཛོད་ཅིག། ༢༠༡༡ ༡༡ ༢༩ ཉིན་རེབ་གོང་ནས།
རྗེས་དྲན་ཡིད་ཀྱི་གདུང་དབྱངས། དགེ་བཤེས་ཁྱུང་དཀར་ཟླ་བ་བསྟན་འཛིན་མཆོག་ལ་རྗེས་དྲན་དུ། ཁྱུང་དཀར་ཟླ་བ། དམ་པ་ཁྱུ༷ང་གི་རིགས་ལས་མཆེད་པའི་སྤྲུལ་བའི་གར། ། རབ་དཀ༷ར་གངས་རིའི་ཞིང་ལ་བསྒྱུར་བའི་འཕྲིན་ལས་མཚར། ། ཟླ༷་མེད་རྒྱལ་བ༷འི་བསྟ༷ན་པ་འཛི༷ན་པའི་ངོ་མཚར་དཔལ། ། གླིང་བཞིའི་ཁྱོན་ལ་གྲགས་པ་འབར་བ་ཨེ་མ་རྨད། ། དགེ༷་ལེགས་སྣང་བ་འདྲེན་པའི་བཤེ༷ས་གཉེན་དམ་པ་གང་། ། ཁྱུ༷ང་ཕྲུག་མཁའ་ལ་རྩེན་བཞིན་རྣམ་དཀ༷ར་བོན་དབྱིངས་ལས། ། ཟླ༷་མེད་རིག་པའི་རྩལ་རྫོགས་རྒྱལ་བ༷་གཤེན་རབ་ཀྱི། ། བསྟ༷ན་པའི་རིང་ལུགས་སྲོག་ཏུ་འཛི༷ན་པའི་མཛད་བཟང་མཚར། ། འཕྲུལ་ངག་བདེན་པའི་བོན་སྒོ་བརྒྱད་ཁྲི་བཞི་སྟོང་གླུ། ། ཐོགས་མེད་གྱེར་བའི་རྣམ་དཔྱོད་རིག་པའི་རལ་གྲི་ཡིས། ། ཕ་རོལ་རྒོལ་ངན་ཚར་དུ་གཅོད་པའི་དཔའ་གདེང་ཅན། ། གློ་བུར་ཞིང་ཁམས་གཞན་ལ་བསྙེགས་པ་ཀྱེ་མ་ཧོ། ། བརྗིད་བརྗིད་ཧི་མ་ལ་ཡ་རི་བོའི་ཕ་རོལ་ནས། ། ཟབ་ཟབ་མདོ་སྔགས་རྫོགས་གསུམ་བཅུད་ལ་ངོམས་མེད་རོལ། ། ལེགས་ལེགས་རྒྱལ་ཁམས་རིག་པས་འགྲིམས་པའི་ཁྱུང་དཀར་བ། ། དྲན་དྲན་སྙིང་གི་གདུང་དབྱངས་དབང་མེད་ངག་ལས་འཆོར། ། བརྗིད་པའི་སྐུ་ལ་བྱང་སེམས་པད་མ་དཀར་པོ་འཛུམ། ། སྙན་པའི་གསུང་ལ་ལུང་རིགས་ཟེའུ་འབྲུ་བཅུད་ཀྱིས་བལྟམས། ། དཀྱེལ་ཡངས་ཐུགས་ལས་ཉེ་གནས་རྐང་དྲུག་གཞོན་ནུའི་ཚོགས། ། ལེགས་པར་སྐྱོང་མཛད་དགེ་བའི་བཤེས་ཁྱོད་ཡང་ཡང་དྲན། ། དྲན་པའི་འོ་དོད་ཇི་ལྟར་ངག་ལས་བཟློས་གྱུར་ཀྱང་། ། |
