མཁས་ཤིང་གྲུབ་པའི་དབང་བོ་བཀྲ་ཤིས་རྒྱལ་མཚན་ལ་གསུང་གི་སྒོ་ནས་འདུད་པའི་ཚིག་ཕྲེང་ཨུདྤལ་ཆུན་པོ་བཞུགས། །

༄༅། །རྣམ་འདྲེན་བྱེ་བའི་སྐར་ཚོགས་བཀྲ་བའི་དབུས། ། མཁྱེན་བརྩེའི་འོད་དཀར་སྣང་བས་རབ་དཔག་པའི། ། གྲུབ་མཆོག་སྟོན་ཟླ་གཞོན་ནུའི་དཀྱིལ་འཁོར་ཡང་། ། སྲིད་ཞི་མགྲིན་སྔོན་གཙུག་ཏུ་བསྔགས་པར་འོས། ། བགྲང་ཡས་ཚོགས་གཉིས་ཆུ་གཏེར་འཁྱིལ་བ་ལས། ། འཁྲུངས་པའི་གཟུགས་སྐུ་ཡིད་བཞིན་ནོར་བུའི་དཔྱིད། ། མཐས་ཡས་འགྲོ་བའི་རེ་འདོད་ཀུན་བཀངས་ཀྱང་། ། ཡོན་ཏན་འཛད་མེད་ཚུལ་དེ་ཨེ་མ་རྨད། ། ྋ བློ་ལྡན་ཕལ་གྱིས་རྣམ་པར་མ་ཕྱེད་པའི། ། ཟབ་ཅིང་ཆ་ཕྲའི་ཐེག་དགུའི་རྣམ་བཞག་དག ། ཨུ་དུམ་ཝ་རའི་འདབ་མ་ཇི་བཞིན་ཏུ། ། མ་འདྲེས་གསལ་བར་ཁྱོད་ཀྱིས་བསྟན་དེ་རྨད། ། ྋ གྲུབ་སྨྲ་ཡོངས་ཀྱིས་དཔོག་པར་མ་གྱུར་བའི། ། རང་བཞིན་སྟོང་ལ་རྒྱུ་འབྲས་རུང་བ་དང་། ། རྟེན་རྣམས་སྟོང་ལ་འགལ་འདུ་མེད་པའི་དོན། ། ཚུལ་དེ་ཁྱོད་ཀྱིས་ལེགས་པར་གདམས་ལ་བསྟོད། ། ྋ ཟབ་ཕྲའི་དཀའ་གནད་ཐ་རམས་ཀྱིས་བསྡམས་པས། ། གསང་ཆེན་བོན་མཛོད་སྤྱོད་པའི་སྐབས་དབེན་ཚེ། ། རྣམ་དཔྱོད་འཕྲུལ་ལྡེས་ཕྱེས་ནས་རིམ་གཉིས་ཀྱི། ། གཏེར་དང་སྤྲད་པའི་བཀའ་དྲིན་སྙིང་ནས་དྲན། ། ྋ རྩོལ་བཅས་སྒྲུབ་པའི་གཤོག་རླབས་མ་བྲལ་བའི། ། གསང་གྲུབ་འདབ་ཆགས་སྟོང་གིས་མ་དཔོག་པའི། ། བླ་མེད་ཐེག་པ་ཀུན་གྱི་ཡང་རྩེ་མཆོག ། བཙལ་མེད་རླབས་ཀྱིས་ལྡིང་བའི་ཁྱུང་ཆེན་ཁྱོད། ། ྋ ཟབ་གསལ་རྒྱ་ཆེའི་ཤེས་རབ་མཆོག་མངའ་བའི། ། མཁས་པ་འབུམ་གྱིས་རྣམ་པར་དབྱེ་དཀའི་གནས། ། སེམས་ཀློང་མན་ངག་སྡེ་ཡི་ཁྱད་པར་གནད། ། མ་འདྲེས་ཁྱོད་ཀྱིས་གསལ་བར་བསྟན་ལ་འདུད། ། ྋ དྲི་མེད་སྡེ་གསུམ་ཆུ་གཏེར་འཁྱིལ་བ་ལས། ། མན་ངག་སྙིང་བོ་ཡིད་བཞིན་ནོར་བུའི་དཔལ། ། རང་གཞན་ཐོས་བསམ་གོམས་པའི་རྒྱལ་མཚན་རྩེར། ། དངོས་སུ་ལོངས་སྤྱོད་ཐོབ་པ་ཁྱོད་ཀྱི་དྲིན། ། ྋ ཀུན་རྫོབ་ཐིག་ལེ་ལམ་བྱེད་ལས་དཔག་པའི། ། སྣ་ཚོགས་རྩོལ་བའི་ངལ་བ་ཀུན་སྤངས་ནས། ། དོན་དམ་ཟབ་མོའི་ཐིག་ལེ་ལམ་བྱེད་འདི། ། ཁྱོད་བསྟན་གཞན་ལས་དཔག་པའི་ཁྱད་བོན་ལགས། ། ྋ རིམ་བརྒྱད་འཛིན་པ་རྣམས་ཀྱིས་ལྟ་ཅི་སྨོས། ། བླ་མེད་ཞུགས་པའི་སྐྱེས་བུ་སྟོང་གིས་ཀྱང་། ། མ་ཕྱེད་གཅིག་ཏུ་ཞེན་པ་ཟབ་ཕྲའི་གནས། ། སེམས་དང་ཡེ་ཤེས་གཉིས་ཀྱི་ཁྱད་པར་ནི། ། ྋ མིག་ལྡན་སྐྱེས་བུས་པད་མའི་འདབ་མ་ལ། ། མ་འདྲེས་སོ་སོར་མངོན་སུམ་མཐོང་ཡོད་ལྟར། ། ཁྱད་པར་གསལ་བར་ཉིད་ཀྱིས་བསྟན་པ་ན། ། ངོ་མཚར་མི་འཛིན་བློ་ལྡན་སུ་ཞིག་ཡོད། ། དེ་ལྟར་སེམས་ནི་ལམ་བྱེད་མ་ཡིན་པར། ། བློ་འདས་རིག་པ་ལམ་བྱེད་རྩལ་བཏོན་ནས། ། ཁྱོད་ཀྱི་ལེགས་བཤད་དག་ལས་བསྟན་པ་འདི། ། འགྲན་ཟླ་མེད་པའི་ཁྱད་བོན་རྨད་དུ་བྱུང་། ། ྋ རྣམ་དག་འདུལ་བའི་གཞུང་ལུགས་འཛིན་