རྒྱལ་བ་སྨན་རིའི་ཁྲི་འཛིན་༣༤པའི་དངོས་གཞིའི་རྟགས་སྒྲིལ་ལས་རིམ་དང་པོ།

རྩོམ་པ་པོ། དབུས་གཡུང་དྲུང་བོན་དྲ་ཚིགས་རྒྱུན་ལས་ཁང་། རྩོམ་ཁུངས། གཡུང་དྲུང་བོན་དྲ་བ།

༄༅། །བསྟན་པའི་མཆོག་གྱུར་འཁྲུལ་མེད་བོན་ལུགས་ཀྱི། །སྐྱབས་གནས་མཆོག་གྱུར་རྩ་གསུམ་མཆོག་གསུམ་དང་། །བསྟན་སྲུང་མཆོག་གྱུར་བོན་སྐྱོང་སྡེ་དྲུག་གི། །མཁྱེན་བརྩེའི་མཆོག་གྱུར་གཡེལ་མེད་འདིར་གཟིགས་ཤིག །མཁས་པའི་མཆོག་གྱུར་མཉམ་མེད་ཤེས་རྒྱལ་གྱི། །བསྟན་འཛིན་མཆོག་གྱུར་སྐྱེས་བུ་འདི་ཡིན་ཞེས། །ལུང་བསྟན་མཆོག་གྱུར་ངེས་གསལ་བསྟན་དུ་གསོལ། །ངེས་པའི་མཆོག་གྱུར་འཁྲུལ་མེད་བསྩལ་དུ་གསོལ། །

གཤེན་གྱི་འབྱུང་ལྡན་སུམ་བརྒྱ་དང་གཅིག་བོད་མེ་བྱ་ལོའི་ཟླ་བ་བཅུ་གཅིག་པའི་ཚེས་དགུ་ཉིན་ཏེ། ཕྱི་ལོ ༢༠༡༧ ཟླ་ ༡༢ ཚེས་ ༢༧ ཉིན་༧གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ༧རྒྱལ་བ་སྨན་རིའི་ཁྲི་འཛིན༣༤པ་གསར་བདམས་ཀྱི་དངོས་གཞིའི་རྟགས་སྒྲིལ་དང་པོ་བསྒྲིལ་པའི་ལས་རིམ།

གོང་ཚེས་ཉིན་གྱི་སྔ་དྲོར་ཆུ་ཚོད་བཅུ་པ་ཙམ་ནས་སྨན་རིའི་སྒྲུབ་ཁང་དབང་དྲག་འབར་བའི་ཕོ་བྲང་ནས་རྟགས་རིལ་གྱི་སྒྲུབ་བུམ་ཚོགས་ཁང་དུ་གདན་འདྲེན་ཞུས་ཤིང་བོན་སྐྱོང་མ་བདུད་བཙན་རྒྱལ་གྱི་གནད་བསྐང་སོགས་དྲག་ཏུ་བསྐུལ་བ་ལས་དངོས་གཞིའི་རྟགས་སྒྲིལ་དང་པོའི་ཁོངས་ལས་རྟགས་རིལ་གཉིས་ཐོན་པ་བྱུང་།

རྟགས་རིལ་གཉིས་དེ་སླར་ཡང་སྒྲུབ་བུམ་དུ་བཅུགས་ཤིང་སྒྲུབ་ཁང་དབང་དྲག་འབར་བའི་ཕོ་བྲང་དུ་གདན་ཞུས་ཀྱིས་ཡི་དམ་དབལ་གསས་རྔམ་པའི་སྒྲུབ་པའི་གཞུང་བསྲིང་ནས་བོན་སྐྱོང་མ་བདུད་བཙན་རྒྱལ་གྱི་ཚོགས་མཆོད་མུ་མཐུད་དུ་སྒྲུབ་གནང་མཛད་པ་དང་། ནམ་མཁའ་ལ་གཞའ་ཚོན་ཤར་བ་སོགས་རྟགས་དང་རྟེན་འབྲེལ་གྱི་མཚན་མ་ཡང་མངོན་དུ་བྱུང་།

ཕྱི་ལོ ༢༠༡༨ ཟླ་དང་པོའི་ཚེས་གཅིག་ཉིན་གྱི་ཞོགས་པར་དངོས་གཞིའི་རྟགས་སྒྲིལ་མཐའ་མ་བསྒྲིལ་ནས༧རྒྱལ་བ་སྨན་རིའི་ཁྲི་འཛིན་༣༤པ་རྒྱལ་ཁའི་ངང་ཁྲི་ལ་འགོད་འཆར་ཡིན་པ་བཅས་ཀྱི་གནས་བསྡུས་ཙམ་དུ།

༧དབུས་གཡུང་དྲུང་བོན་དྲ་ཚིགས་རྒྱུན་ལས་ཁང་ནས།

༧རྒྱལ་བ་སྨན་རིའི་ཁྲི་འཛིན༣༤པའི་དངོས་གཞིའི་རྟགས་སྒྲིལ་གྱི་ལས་རིམ་དང་པོའི་བརྙན་ཐུང་། རྒྱས་གཟིགས་འདོད་ན་གཤམ་གྱི་དྲ་གནས་འདིར་སྦྲེལ་ན་གཟིགས་ཐུབ།  http://meishevideo2.meishe-app.com/video/2017/12/27/task-1-5CBADED2-73A6-35E1-9F7D-E370B3102336.mp4?from=timeline&isappinstalled=0

དཔྱད་མཆན་སྤེལ།

ཡིག་ཟམ་ས་གནས་ཀུན་པོར་མི་བསྒྲགས། རྟགས * ཅན་ངེས་པར་དུ་བླུགས་དགོས།