བྱང་ཆུབ་སྒྲུབ་ཐབས་ལེགས་བཤད་ལམ་གྱི་རིམ་པའི་གཞུང་ཞེས་བྱ་བ་བཞུགས་སོ།
༄༅།། དྲི་མེད་སྐུ་སྟེ་ཤེས་བྱ་མཁྱེན།། འཕྲུལ་ངག་བདེན་པའི་ཐར་ལམ་སྟོན།། ཉོན་མོངས་བྱང་སྦྱོང་འགྲོ་ལ་བརྩེ།། སྐྱབས་གནས་གསུམ་ལ་ཕྱག་འཚལ་ལོ།། བློ་གྲོས་ལྡན་པའི་ཤེས་རབ་ཀྱིས།། མི་ཤེས་བློ་མུན་རབ་རིབ་བསལ།། སྙན་པའི་ངག་དང་ཚིག་སྡེབ་ནས།། གཞན་ཕན་ཕྱིར་དུ་ལེགས་པར་བཤད།། ཆུ་ཤེལ་ལས་གྲུབ་བསིལ་ལྡན་པས།། ཆུ་སྐྱེས་ས་མོས་ཁ་འབྱེད་ལྟར།། སངས་རྒྱས་བཀའ་དང་དམ་པའི་ལུང༌།། དེས་ནི་བློ་གསལ་ཤེས་རབ་འབྱེད།། ཀླད་ཀྱི་དོན་བསྟན་པའོ། གཞུང་གི་དོན་བཅུ་གཉིས་ལ། ཆུ་བོ་ཆེན་པོ་བསྟེན་བྱས་ན།། སྐོམ་པའི་གདུང་བ་སེལ་བ་བཞིན།། བླ་མ་དམ་པ་བསྟེན་བྱས་ན།། གདམ་ངག་འདོད་པའི་གདུང་བ་སེལ།། ལྗོན་ཤིང་ལ་བསྟེན་དབྱི་མོང་དེ།། དེ་ཉིད་གར་སྐྱེས་དེ་ཡིས་སླེབས།། བླ་མ་ལ་བརྟེན་གང་ཟག་དེ།། ཡོན་ཏན་རིམ་པ་དེ་བཞིན་འབྱུང༌།། པདྨོའི་མཚོ་ལ་སྦྲང་རྩི་གནས།། མོས་པའི་བུང་བ་དེ་ལ་འཁོར།། སྐྱེས་བུ་དམ་པ་ཡོན་ཏན་མཛོད།། དད་ལྡན་བློ་གསལ་དེ་ལ་འཁོར།། དྲི་ཞིམ་སྨན་གྱི་སྡོང་བོ་ལ།། དྲི་ངན་ངང་གིས་མི་གནས་བཞིན།། མཚན་ཉིད་ལྡན་པའི་སྐྱེས་བུ་ལ།། གནོད་པ་ངང་གིས་མི་གནས་སོ།། དོན་དང་པོ་བླ་མ་བསྟེན་ཚུལ་བསྟན་པའོ། ཞིང་ས་བཟང་ལ་ས་བོན་ཐེབས།། སོ་ནམ་མཁས་ན་འབྲས་བུ་སྨིན།། དལ་འབྱོར་དད་པའི་ཞིང་བཟང་ལ།། ཚོགས་གཉིས་ལས་བྱས་འབྲས་བུ་སྨིན།། ལྷ་གནས་མེ་ཏོག་ཚལ་མང་ཡང༌།། ཨུད་འབར་མེ་ཏོག་སྐྱེ་བ་དཀོན།། འགྲོ་བའི་ལུས་ནི་གྲངས་མང་ཡང༌།། དལ་འབྱོར་ལུས་ཐོབ་ཤུན་ཏུ་དཀོན།། གསེར་ཟོ་མེད་ན་སེང་གེ་ཡི།། འོ་མ་ཡོད་ཀྱང་མི་ཐུབ་ལྟར།། དལ་བརྒྱད་འབྱོར་བཅུ་མ་ཐོབ་ན།། སངས་རྒྱས་འདོད་ཀྱང་སྣོད་མེད་དོ།། དོན་གཉིས་པ་དལ་འབྱོར་བསྟན་པའོ། ནམ་ཟླས་བསྐྱེད་པའི་རྩི་ཏོག་བཀྲ། དུས་འགྱུར་ཞག་གཅིག་བ་མོས་འཇོམས།། དེ་ཕྱིར་དལ་འབྱོར་ཐོབ་ན་ཡང༌།། འཆི་བའི་རྐྱེན་མང་རྟག་པ་མེད།། ཆུ་ལས་སྐྱེས་པའི་ཆུ་ལྦུ་དེ།། སྐྱེས་མ་ཐག་ཏུ་འཇིགས་པ་བཞིན།། སྣང་བ་ཐམས་ཅད་ལྟར་སྣང་ཡང༌།། རང་རང་ལས་བྱུང་རྐྱེན་གྱིས་འཇིག། ནམ་མཁའི་གཞའ་ཚོན་ཤར་བ་དེ།། བྱིས་པས་མཐོང་ན་བདེན་པར་འཛིན།། མ་གཉེན་བུ་སོགས་ནོར་རྫས་ལ།། བློ་དམན་སོ་སྐྱེས་རྟག་པར་མཐོང༌།། ལག་པ་གཡས་ཀྱི་སེན་མོའི་སྟེང༌།།རྡུལ་གནས་དེ་ནི་མི་ཆགས་ལྟར།། ལང་ཚོའི་ལྗོན་ཤིང་སྒྱུ་མ་ཡི།། གཟུགས་བརྙན་དེ་ནི་མི་རྟག་ངེས།། སྒྱུ་མ་མཁན་གྱི་རྟ་གླང་དེ།། ཡིན་པར་ཤེས་ན་མི་ཉོ་སྟེ།། འགྲོ་བ་ཀུན་གྱིས་བདེན་འཛིན་པའི།། བསླུ་བར་རྟོགས་ན་མི་ཆགས་སོ།། དོན་གསུམ་པ་མི་རྟག་པ་བསྟན་པའོ། ཆུ་བོ་དལ་དུ་འབབ་ན་ཡང༌།། ཐུར་དུ་འབབ་པ་ཁོ་ན་ལྟར།། འཁྲུལ་བའི་ལས་སྤྱོད་བཟང་མོད་ཀྱང༌།། སྡུག་བསྔལ་རྒྱུ་གསོག་ཁོ་ནའོ།། སྲོག་ཆགས་ཆུ་ལ་གནས་
|
