བྱང་ཆུབ་སྒྲུབ་ཐབས་ལེགས་བཤད་ལམ་གྱི་རིམ་པའི་གཞུང་ཞེས་བྱ་བ་བཞུགས་སོ།
|
དང་སྐོགས་པ་ཆུ་དང་རྡོ།། ནེ་ཙོའི་གཏམ་བཤད་དག་དང་མཚུངས།། བསླབ་པ་གསུམ་ལ་གནས་གྱུར་ན།། འཇིག་རྟེན་ཁེ་གྲགས་ག་ལ་སྒྲུབ།། དར་དཀར་ནང་དུ་སོལ་བཏུམ་ནས།། འདི་ནི་དཀར་པོ་ཡིན་ཟེར་མཚུངས།། བྱང་སེམས་རྒྱུད་ལ་སྐྱེས་པ་ཡི།། དམ་པ་དེ་ལ་ཆགས་སྡང་མེད།། གལ་ཏེ་ཡོད་ན་ས་བརྒྱད་ལ།། གནས་ཟེར་བེར་དཀར་དག་དང་མཚུངས།། བདག་བསྟོད་གཞན་ལ་སྨོད་བྱས་ན།། དེ་ནི་སངས་རྒྱས་མི་འཐོབ་སྟེ།། གཙང་འདོད་ག་བུར་རྫི་ཕྱར་དང༌།། ལན་ཚྭ་བཀྲུ་བར་བྱེད་དང་མཚུངས། ། བདག་མེད་རྟོགས་ན་བདག་གཞན་གྱི།། འཛིན་པ་འབྱུང་བར་མི་རིགས་སོ།། དུང་ལ་དུང་དུ་མཐོང་བ་ན།། སེར་པོ་ཡིན་པར་མཐོང་མི་འགྱུར།། བྱམས་སེམས་མ་རུ་སྒོམ་པ་ལ།། བདག་གཞན་གཉིས་སུ་འཛིན་པ་འགལ།། དགྲ་ལ་ཞེ་སྡང་བསྐྱེད་བྱས་ཤིང༌།། འདི་ནི་མ་ཡིན་ཟེར་དང་མཚུངས།། བྱང་ཆུབ་སྒྲུབ་པའི་ཐབས་ཤིག་ལ།། རང་ཕྱོགས་བཟང་བར་འདོད་པ་ནི།། གསེར་བུམ་མཉམ་པོར་གཉིས་བཞག་ནས༌།། དེ་ལ་སྤོང་ལེན་བྱེད་དང་མཚུངས།། གཡུང་དྲུང་བོན་ལ་སྨོད་བྱས་ན།། བདུད་ཁ་ལྟག་པ་རལ་བྱས་གྲགས།། གཡོག་ངན་དཔོན་ལ་བསྡོས་བྱས་ན།། དེས་ནི་རང་སྲོག་གཅོད་པར་བྱེད།། དོན་བཅུ་གཅིག་པ་བསྟན་པ་ལ་གཤེ་བའི་ལོག་རྟོག་དགག་པ་བསྟན་པའོ།། སྐྱེས་བུ་དམ་པ་ཤེས་རབ་ཅན།། ཡོད་ན་དགེ་ལ་ད་འཇུག་རན།། དུས་ལ་སོ་ནམ་མ་བྱས་ན།། སྟོན་ཐོག་མི་ལོན་འགྱོད་པ་འབྱུང༌།། ད་ནི་སངས་རྒྱས་བསྟན་པའི་མཇུག། དེ་མེད་ཐར་བ་ཇི་ལྟར་སྒྲུབ།། དཔེར་ན་མུན་སྨག་འཐིབ་པ་ཡི།། ནང་དུ་གློག་འགྱུ་ཙམ་རེ་ཡིན།། དམ་པ་ལ་བརྟེན་གསུང་རབ་ཀྱི།། བཅུད་ལ་ཐོས་བསམ་སྒོམ་གསུམ་རེམས།། ཏིལ་ནི་ཅི་ཙམ་གྲངས་མང་བཞིན།། ཏིལ་མར་འབྱུང་བ་ཇི་བཞིན་ནོ།། ད་རེས་བཀའ་བཞིན་སྒྲུབ་བྱས་ན།། དེས་ནི་འབྲས་བུ་བསླུ་མི་སྲིད།། ས་བོན་འབྲས་བུ་བཏབ་པ་རྣམས།། འབྲས་བུ་གཞན་དུ་འབྱུང་མི་སྲིད།། ཀྱི་ཧུད་འཇིག་རྟེན་གྲངས་མང་ཡང༌།། བདེ་སྤྱོད་ལྡན་པ་ད་རེས་ཙམ།། ཐག་རིང་མགྲོན་པོས་ཁུར་ཁུར་ནས།། ལན་ཅིག་ལམ་ཁར་མལ་གསོ་ཙམ།། མི་ལུས་རིན་ཆེན་མ་ཐོབ་ན།། གར་སྐྱེས་དགེ་སྤྱོད་སྐལ་མི་ལྡན།། སོལ་སྡོང་དག་ནི་བཙུགས་བྱས་ཀྱང༌།། སྐྱེ་ཞིང་ལོ་འབྲས་སྨིན་མི་སྲིད།། འཇིག་རྟེན་གཞན་ན་དགེ་སྤྱོད་པས།། འདིར་ནི་ཡོན་ཏན་ལེགས་པར་གསུངས།། གནམ་བྱ་རྒྱ་ལས་ཐར་བ་ན།། དེ་ནི་ཕྱི་རྗེས་མི་ལྡོག་གོ། དེ་ལྟར་བསླབ་པ་ལ་གནས་ན།། སྒྲིབ་གཉིས་བྱང་ནས་དོན་གཉིས་འགྲུབ།། མེ་ཤེལ་སྙིང་པོའི་འོད་ཤར་བས།། གླིང་བཞིའི་མུན་པ་སེལ་བར་བྱེད།། དོན་བཅུ་གཉིས་པ་དོན་གྱི་བསླབ་བྱ་ལ་འཇུག་པ་བསྟན་པའོ། མཇུག་གི་དོན་ནི། གངས་ཅན་ཁྲོད་འདིར་སངས་རྒྱས་ཀྱི།། བསྟན་འཛིན་དམ་པར་ཁས་འཆེ་བ།། དེ་ཡི་འཕྲུལ་ངག་ལྡེ་མིག་གིས།། བདག་བློའི་ཐ་རམ་
|
