ཁྲིད་ཡིག་དམར་མོ་མཛུབ་ཚུགས་ལས་སྔོན་འགྲོའི་ཚིག་བཤད་དད་པའི་འཇུག་ངོགས་ཞེས་བྱ་བ་བཞུགས།།

༄༅།། སྔོན་འགྲོའི་ཚིག་བཤད་དད་པའི་འཇུག་ངོགས་ལས། དང་པོ་བཤེས་གཉེན་བསྟེན་ཚུལ་ནི། གང་ཞིག་བླ་མེད་བྱང་ཆུབ་སྒྲུབ་པ་རྣམས།། བཤེས་གཉེན་བླ་མ་བསྟེན་པའི་བློ་བསྐྱེད་པ།། བྱ་བ་ཀུན་གྱི་སྔོན་དུ་འགྲོ་གསུངས་ལྟར།། དགེ་བའི་བཤེས་གཉེན་བླ་མ་བསྟེན་པར་བྱ།། བླ་ན་མེད་པའི་བྱང་ཆུབ་སྒྲུབ་བྱེད་ན།། སྒྲུབ་ཐབས་རྩ་བ་གདམས་པ་ཟབ་མོ་སྟེ།། གདམ་ངག་ཐམས་ཅད་བླ་མར་རག་པས་ན།། དགེ་བའི་བཤེས་གཉེན་བླ་མར་བསྟེན་པར་བྱ།། དུས་གསུམ་རྫོགས་པའི་སངས་རྒྱས་ཐམས་ཅད་ཀྱི།། མཁྱེན་བརྩེ་ནུས་པའི་མཐུ་སྟོབས་གཅིག་བསྡུས་པ།། རྒྱལ་བའི་སྤྱི་གཟུགས་ཡིན་པར་ཤེས་པའི་ངོས།། དགེ་བའི་བཤེས་གཉེན་བླ་མར་བསྟེན་པར་བྱ།། བདག་གི་ལུས་ངག་ཡིད་དང་གསུམ་པོ་ཡིས།། ནུས་ཚད་དྲིན་མི་བགྱི་བའི་ཁོལ་བོར་བགྱིད།། འགལ་མེད་ཐུགས་ལ་ཞེན་པར་བཟུང་བྱེད་དེ།། དགེ་བའི་བཤེས་གཉེན་བླ་མར་བསྟེན་པར་བྱ།། ཤེས་རབ་ཟབ་མོ་སྟོང་བ་ཉིད་བསྒོམ་ཞིང༌།། སྤྱོད་ལམ་རྣམ་དག་ངོས་ལྐོག་མེད་པ་རུ།། འཁོར་གསུམ་ཡོངས་དག་བླ་མར་ཕུལ་ནས་སུ།། དགེ་བའི་བཤེས་གཉེན་བླ་མར་བསྟེན་པར་བྱ།། སྣོད་ཀྱི་སྐྱོན་གསུམ་དྲི་མ་དྲུག་དང་བྲལ།། ཡང་དག་གོ་ལུགས་ལྔ་ཡི་སྒོ་ནས་སུ།། ཐོས་བསམ་སྒོམ་གསུམ་བཀའ་དྲིན་ཞུ་བའི་ཕྱིར།། དགེ་བའི་བཤེས་གཉེན་བླ་མར་བསྟེན་པར་བྱ།། མཚན་དང་ལྡན་པའི་བླ་མ་དམ་པ་ལ།། སྣོད་དང་ལྡན་པའི་སློབ་མས་བསྟེན་བྱས་ན།། འདི་དང་ཕྱི་མའི་དགོས་དོན་ཀུན་འགྲུབ་པས།། དགེ་བའི་བཤེས་གཉེན་བླ་མར་བསྟེན་པར་བྱ།། དཔལ་ལྡན་བླ་མའི་རྣམ་པར་ཐར་བ་ལ།། སྐད་ཅིག་ཙམ་ཡང་ལོག་ལྟ་མི་སྐྱེ་ཞིང༌།། ཅི་མཛད་ལེགས་པར་མཐོང་བའི་མོས་གུས་ཀྱིས།། བླ་མའི་བྱིན་རླབས་སེམས་ལ་འཇུག་པར་ཤོག།། །། གཉིས་པ། དལ་འབྱོར་རྙེད་དཀའ་བ་ནི།། བླ་མེད་བྱང་ཆུབ་སྒྲུབ་པའི་རྟེན་བཟང་བོ།། དལ་བ་བརྒྱད་དང་འབྱོར་བ་བཅུ་ལ་སོགས།། ཡོན་ཏན་བཅོ་བརྒྱད་ལྡན་པའི་མི་ལུས་འདི།། ཤིན་ཏུ་རྙེད་དཀའ་བྱང་ཆུབ་བསྒྲུབ་པར་བྱ།། ཁམས་གསུམ་རིགས་