བསྙེན་པའི་གཞི་མ་སྒོ་དགུ་ལས་དང་པོ་སྔོན་འགྲོ་ཕྱི་ཡི་བསྙེན་པ་གསུམ་སྟེ།
༡༽དཔོན་གསས་ལྷ་ལ་བསྙེན་པ།
རྒྱུད་ལུང་མན་ངག་གསུམ་གྱིས་ཐུགས་རྒྱུད་ཕྱུག།
རིག་པའི་གནས་ཆེན་སྨྲ་ལ་ཐོགས་ཆགས་བྲལ།།
བསྡུ་དངོས་བཞི་ཡིས་འཁོར་ཚོགས་སྐྱོང་ལ་མཁས།།
ཐབས་དང་ཐུགས་རྗེས་འགྲོ་དོན་མཛད་ལ་བྲེལ།།
དཔོན་གསས་རྒྱལ་ཐེབས་བསྟེན་པའི་བྱིན་ཆེན་ཕོབས།།
༢༽མཚན་ལྡན་གྲོགས་ལ་བསྙེན་པ།
སྟོབས་ལྡན་བློ་གསལ་དད་དང་ཤེས་རབ་ལྡན།།
བཀའ་ཉན་དམ་སྡོད་རྒྱུད་ལྷོད་གཤིས་ཀ་བཟང་།།
ཚིག་གི་རྒྱུད་བཟུང་དོན་དམ་ནན་ཏན་ཆེ།།
ཤེས་རབ་གསུམ་གྱིས་བླ་མའི་ཐུགས་རྒྱུད་ཟིན།།
གོང་མའི་རྒྱལ་ཐེབས་ནུས་པའི་བྱིན་ཆེན་ཕོབས།།
༣༽རིགས་ལྡན་གནས་ལ་བསྙེན་པ།
རི་བོ་རི་ཕྲན་རྒྱ་མཚོའི་འཁྱིལ་ཆུ་འཚོགས།།
འཁོར་ལོ་རྩིབས་བརྒྱད་བཀྲ་ཤིས་རྟགས་ཀྱིས་མཛེས།།
ཉི་ཟླའི་མདངས་དང་གཟའ་སྐར་རྒྱུ་ལམ་བཟང་།།
ཞི་རྒྱས་དབང་དྲག་ལས་བཞི་བསྒྲུབ་ལ་མྱུར།།
རྨད་བྱུང་ཡོན་ཏན་རྒྱས་པའི་བྱིན་ཆེན་ཕོབས།།
གཉིས་པ་ཉེ་བ་ནང་གི་བསྙེན་པ་གསུམ་སྟེ།
༡༽ཡོ་བྱད་རྫས་ལ་བསྙེན་པ།
འཁོ་དགུའི་དམ་རྫས་རྒྱུ་མཆོག་ཕུན་སུམ་ཚོགས།།
བགོ་དགུའི་ཆས་བཟང་སྤྱད་བྱའི་ཡོ་བྱད་ལེགས།།
དམིགས་པའི་རྟེན་འཛོམ་མཆོད་པའི་སྤྲིན་ཚོགས་འཐུག།
འཚོ་བ་ཕུན་ཚོགས་གཤེན་གྱི་ཐུགས་མཆོག་མཉེས།།
རྒྱུ་རྐྱེན་རྟེན་འབྲེལ་འཛོམ་པའི་བྱིན་ཆེན་ཕོབས།།
༢༽ཐར་གླུད་སྐོང་ལ་བསྙེན་པ།
ལོ་ཟླ་ཞག་དུས་གཟའ་སྐར་དུས་ཚེས་བཟང་།།
དུག་ཚན་ཁྲུས་དང་བསང་གིས་ཡོ་བྱད་བསང་།།
བར་ཕུད་སྐྱེམས་ཀྱིས་མགྲོན་བཞི་མཉེས་པར་བྱས།།
ཐར་གླུད་སྐོང་བཤགས་ས་ཡི་ཆོ་ག་བསྙེན།།
བར་ཆོད་ལམ་སྣ་སེལ་བའི་བྱིན་ཆེན་ཕོབས།།
༣༽ཕྱི་རྟེན་སྐོས་ལ་བསྙེན་པ།
དབལ་གྱི་ཕོ་བྲང་སྒྲུབ་ཁང་བརྗིད་ལ་རྔམ།།
མདུང་དང་རྒྱལ་མཚན་པུ་ཐོ་བྱ་ཁྲ་སོགས།།
ཕྱི་རྟེན་སྐོས་ཀྱིས་སྟེང་འོག་ཕྱོགས་མཚམས་མཛེས།།
དགུ་ཁྲི་དགུ་འབུམ་ལྷ་ཚོགས་རྟེན་ལ་བསྟིམས།།
ཕྱི་ནང་གཞོམ་གཞིགས་བྲལ་བའི་བྱིན་ཆེན་ཕོབས།།
གསུམ་པ་བཅའ་གཞི་ལས་ཀྱི་བསྙེན་པ་གསུམ་སྟེ།
༡༽སྲུང་བ་མཚམས་ཀྱི་བསྙེན་པ།
ཏིང་འཛིན་སྔགས་ཚིག་རྫས་དང་ནུས་མཐུ་སྦྲགས།།
ཁྲོ་རྟགས་བརྒྱད་ཅུས་སྐུ་ཡི་ཆེ་བ་འདོན།།
གསུང་དབྱངས་དྲུག་ཅུས་གདུག་པའི་ང་རོ་འབྱིན།།
དགྲ་བགེགས་བྱད་མ་བདེན་པའི་བཀའ་ལ་བཀོད།།
གནོད་བྱེད་བར་ཆོད་སྲུང་བའི་བྱིན་ཆེན་ཕོབས།།
༢༽དཀྱིལ་འཁོར་བཅའ་གཞིའི་བསྙེན་པ།
རང་བཞིན་མཚན་མེད་དག་པའི་ཀློང་ཡངས་སུ།།
ཏིང་འཛིན་ཡིད་ཀྱི་དཀྱིལ་འཁོར་རང་ལ་ཤར།
བཅུད་དགུའི་རྫས་སོགས་མཚོན་བྱ་ལྷུན་རྫོགས་པའི།།
རྡུལ་ཚོན་དཀྱིལ་འཁོར་མ་འདྲེས་གཞི་འདིར་བཞེངས།།
གཞལ་ཡས་མཚན་ཉིད་དག་པའི་བྱིན་ཆེན་ཕོབས།།
༣༽སྒོ་དབྱེ་བསྲེ་བསྣན་གྱི་བསྙེན་པ།
དང་པོ་སྐྱབས་སུ་འགྲོ་བ།
སྐྱེ་བཞི་རྒྱུད་ལྔའི་ལས་ལ་ཡིད་སུན་སུན།།
སྡུག་བསྔལ་འཇིགས་པའི་འཕྲང་ལ་སྐྲག་སྔངས་སྔངས།།
དཀོན་མཆོག་གསུམ་གྱི་ཡོན་ཏན་དྲན་ལྷང་ལྷང་།།
འདི་ཕྱི་བར་དོའི་རེ་ལྟོས་ཞུ་ལ་ལ།།
སྐྱོབས་དང་མགོན་གྱི་དཔུང་གཉེན་བྱིན་ཆེན་ཕོབས།།
གཉིས་པ་སེམས་བསྐྱེད་པ།
ཐོག་མེད་ལས་ཀྱི་བག་ཆགས་དཔུང་འཐུག་འཐུག།
དངོས་རྒྱུད་འབྲེལ་བའི་སེམས་ཅན་མཐའ་ཡས་ཡས།།
བསམ་ཞིང་བསམ་ན་ཕན་བདེ་བསྒྲུབ་དགོས་དགོས།།
དེ་ཕྱིར་སངས་རྒྱས་བསྒྲུབ་ལ་འཇུག་མྱུར་མྱུར།།
སེམས་བསྐྱེད་འགྲོ་དོན་འགྲུབ་པའི་བྱིན་ཆེན་ཕོབས།།
གསུམ་པ་བཤགས་པ་འབུལ་བ།
ཆགས་སྡང་རྨོངས་པའི་དྲྭ་བ་རྩེད་འཐིབ་འཐིབ།།
མ་རྟོགས་ལོག་པའི་ལས་སྤྱོད་གྲངས་མང་མང་།།
དེ་དག་གནང་འགྱོད་སེམས་ཀྱིས་དྲན་ལྷང་ལྷང་།།
བདེར་གཤེགས་རིག་འཛིན་དྲུང་དུ་མཐོལ་ལ་ལ།།
མི་བྱེད་དམ་བཅའ་བརྟན་པའི་བྱིན་ཆེན་ཕོབས།།
སྒྲུབ་པའི་ཡན་ལག་བཅོ་བརྒྱད་ལས་དང་པོ་དཀྱིལ་འཁོར་གཞིའི་སྒྲུབ་པ་དྲུག་སྟེ།
༡༽བར་མཚམས་དོན་གྱི་སྒྲུབ་པ།
ཐུགས་དམ་མི་འགྱུར་ཏིང་འཛིན་སྲ་འཁྲག་འཁྲག།
ལྷ་སྣང་ང་རྒྱལ་དྲག་ཚད་རྣོ་ངར་ངར།།
ལོག་འདྲེན་བར་ཆད་རྒྱང་མཚམས་གཅོད་ཤག་ཤག།
གར་བཞུགས་སྒྲུབ་པའི་གནས་མཆོག་བདེ་ལམ་ལམ།།
མཐུ་བྱིན་མེ་དཔུང་འབར་བའི་བྱིན་ཆེན་ཕོབས།།
༢༽ཙཀ་ལི་བཀོད་པ་སྐུ་ཡི་སྒྲུབ་པ།
དང་པོ་དེ་བཞིན་ཉིད་ཀྱི་ཏིང་འཛིན།
འདི་སྣང་མཚན་མའི་སྤྲོས་པ་ཞི་ལམ་ལམ།།
བློས་བྱས་དྲི་མའི་མཁའ་གོས་གཡའ་དག་དག།
བཅོས་མེད་གཤིས་ཀྱི་རིག་པ་རྗེན་ལྷང་ལྷང་།།
ཁྱབ་བདལ་གཉུག་མའི་རང་མདངས་གསལ་ལྷམ་ལྷམ།།
རང་བཞིན་འོད་གསལ་ཆེན་པོའི་བྱིན་ཆེན་ཕོབས།།
གཉིས་པ་ཀུན་ཏུ་སྣང་གི་ཏིང་འཛིན།
མན་ངག་བདུན་གྱི་བློ་སྦྱོང་གསལ་ཁྲིགས་ཁྲིགས།།
མཐའ་ཡས་འགྲོ་ལ་གཟིགས་པའི་སྤྱན་ཟུམ་ཟུམ།།
རྣམ་བཞི་ཚད་མེད་རིག་པའི་གཞི་རླིང་རླིང་།།
འགྲོ་བའི་སྡུག་བསྔལ་ཐ་རམ་མར་ཞུ་ཞུ།།
ཀུན་སྣང་ཏིང་འཛིན་ཆེན་པོའི་བྱིན་ཆེན་ཕོབས།།
གསུམ་པ་སྤྲུལ་པ་རྒྱུ་ཡི་ཏིང་ངེ་འཛིན།
སྟོང་ཉིད་སྙིང་རྗེའི་རང་གཟུགས་བདེ་ལམ་ལམ།།
སྐྱེ་མེད་ཡི་གེའི་ས་བོན་གསལ་ལྷག་ལྷག།
ཏིང་འཛིན་འཕྲོ་འདུའི་འཇུག་པ་གློག་འཁྱུག་འཁྱུག།
བདག་མདུན་གསུམ་གྱི་ལྷ་ཚོགས་སྤྲིན་འདུ་འདུ།།
སྟོང་གཟུགས་སྒྱུ་འཕྲུལ་ཆེན་པོའི་བྱིན་ཆེན་ཕོབས།།
༣༽རང་གྲོལ་གདན་གྱི་སྒྲུབ་པ།
རིན་ཆེན་སྣ་ལྔའི་ཁྲི་འཕང་མཐོ་ལིང་ལིང་།།
ཉི་ཟླ་པད་མའི་ཞབས་གདན་མཛེས་ལམ་ལམ།།
དེ་བཞིན་གཤེགས་པའི་སྐུ་མཆོག་གསལ་ལྷང་ལྷང་།།
འགྲོ་ལ་དགྱེས་བརྩེའི་ཞལ་མདངས་འཛུམ་དམུལ་དམུལ།།
མི་འདོར་ཡུན་དུ་བཞུགས་པའི་བྱིན་ཆེན་ཕོབས།།
༤༽སྤྱན་དྲངས་ཡེ་ཤེས་ཀྱི་སྒྲུབ་པ།
བོན་ཉིད་བདེ་ཆེན་ཞིང་ཁམས་མཐོང་ཡངས་ཡངས།།
སྤོས་དཀར་དུད་པའི་སྤྲིན་ཚོགས་སྨུག་ཐུལ་ཐུལ།།
ཡེ་ཤེས་སེམས་དཔའི་སྟངས་སྟབས་གར་བསྒྱུར་བསྒྱུར།།
བྱིན་རླབས་བདུད་རྩིའི་ཟིལ་ཐིག་འོད་ཁྲོམ་ཕྲོམ།།
ཐར་པའི་ལམ་སྣ་འདྲེན་པའི་བྱིན་ཆེན་ཕོབས།།
༥༽ཕྱག་འཚལ་མོས་འདུན་གྱི་སྒྲུབ་པ།
དཀོན་མཆོག་གསུམ་གྱི་ཡོན་ཏན་དྲན་ལྷང་ལྷང་།།
བདག་སོགས་འགྲོ་བས་གུས་འདུན་ཞུ་ལ་ལ།།
ཡན་ལག་སྨད་ལྔ་ས་ལ་འཛུགས་སླ་སླ།།
སྡིག་སྒྲིབ་ཉེས་སྐྱོན་ཕྱག་མས་འདེབས་ཤག་ཤག།
ལེགས་ཚོགས་ཡོན་ཏན་འབྱུང་བའི་བྱིན་ཆེན་ཕོབས།།
༦༽ཉེས་འགལ་བཤགས་པའི་སྒྲུབ་པ།
རྩ་བ་ལོ་མའི་དམ་ཚིག་ཕྲ་ཞིབ་ཞིབ།།
སྒོ་གསུམ་སྤྱོད་པ་ཐ་མལ་ཡིན་བསམ་བསམ།།
རྩ་ལྟུང་ཉེས་པའི་དྲི་མ་འགོས་མང་མང་།།
དེ་དག་ཉེས་བཤགས་སྟོབས་བཞི་དཔུང་བསྐྱེད་བསྐྱེད།།
འཁྲུལ་རྟོག་ལོག་ཚོགས་འཇོམས་པའི་བྱིན་ཆེན་ཕོབས།།
གཉིས་པ་ངོ་མཚར་ལམ་གྱི་སྒྲུབ་པ་དྲུག་སྟེ།
༡༽གསང་མཚམས་ཉོན་མོངས་ཚར་གཅོད་ཀྱི་སྒྲུབ་པ།
གཙང་སྨེ་གཉིས་ཀྱི་རྟོག་ཚོགས་མུན་འཐིབ་འཐིབ།།
དག་དང་མ་དག་མཆོད་པ་རྫས་དབྱེ་དབྱེ།།
དེ་དག་རློམ་པའི་བར་ཆོད་དགྲ་སྡང་སྡང་།།
ད་གཟོད་གཉེན་པོའི་ཡེ་ཤེས་ལྷ་བསྒོམ་བསྒོམ།།
ཚོགས་དྲུག་
|
