|
སྣང་བ་དག་པའི་བྱིན་ཆེན་ཕོབས།།
༢༽བྱིན་འབེབས་ལོངས་སྤྱོད་ཀྱི་སྒྲུབ་པ།
ཕྱི་མཆོད་དང་པོ།
གཟུགས་ལྔ་ཁ་དོག་རྣམ་དྲུག་མཛེས་ལམ་ལམ།།
མེ་ཆུ་ས་རླུང་རྔ་གཤང་སྒྲ་སྙན་སྙན།།
ག་པུར་ཙན་དན་ཨ་གར་དྲི་ཞིམ་ཞིམ།།
ཁ་མངར་ཞལ་ཟས་རོ་བཅུད་ཡིད་ཚིམས་ཚིམས།།
ལྷབ་ལྷུབ་དར་ཟབ་རེག་འཇམ་བདེ་ལྷམ་ལྷམ།།
འདོད་ཡོན་ལྷ་མོ་དགྱེས་པའི་བྱིན་ཆེན་ཕོབས།།
ཕྱི་མཆོད་གཉིས་པ།
མཛེས་སྙན་ཞིམ་བདའི་ལོངས་སྤྱོད་སྤྲིན་སྤུངས་སྤུངས།།
འཇམ་སྡུག་འཐད་རྒུའི་དངོས་ཚོགས་ཆར་འབེབ་འབེབ།།
བསྟན་སྐྱོང་དཔལ་མགོན་མཆོད་པས་ཐུགས་དགྱེས་དགྱེས།།
དྭངས་སྙིགས་ཁུ་བ་རྩིགས་མས་མགྲོན་མཉེས་མཉེས།།
འཛད་མེད་ཡོན་ཏན་རྒྱས་པའི་བྱིན་ཆེན་ཕོབས།།
ནང་མཆོད་དང་པོ།
རི་རབ་གླིང་མཚོ་འཇིག་རྟེན་སྐར་བཀྲ་བཀྲ།།
ནང་བཅུད་གཏེར་ལྔའི་མཆོད་པ་མཚོ་འཁྱིལ་འཁྱིལ།།
ཆགས་སེམས་ཞི་བའི་ལོངས་སྤྱོད་སྤུ་གཏོར་གཏོར།།
མ་ལུས་འགྲོ་ལ་དངོས་གྲུབ་ཟས་སྦྱིན་སྦྱིན།།
ཡེ་ཤེས་རོལ་པ་ཆེན་པོའི་བྱིན་ཆེན་ཕོབས།།
ནང་མཆོད་གཉིས་པ།
ཁྲོ་ཚོགས་བྱེ་བའི་རྣམ་འགྱུར་འཇིགས་རྔམ་རྔམ།།
སྣང་ཞེན་ཕྲ་རག་སྡིག་ཚོགས་དྲི་དབེན་དབེན།།
ཤ་ལྔའི་གཏེར་མཆོད་ཞལ་དུ་གསོལ་ལ་ལ།།
གདུག་པའི་དྲེགས་ཚོགས་ཀླད་པ་འགུལ་ཤིག་ཤིག།
བདུད་ལྔ་རང་སར་གྲོལ་བའི་བྱིན་ཆེན་ཕོབས།།
ནང་མཆོད་གསུམ་པ།
དམ་རྫས་བདུད་རྩིའི་ཟིལ་ཐིག་སྐྱ་ཤར་ཤར།།
དངོས་གྲུབ་བཅུད་ཀྱི་དམུ་ཡད་གཡང་འཁོར་འཁོར།།
དུག་ལྔའི་ནད་གདོན་དྲི་མ་གཙང་སེལ་སེལ།།
མཆོད་སྦྱིན་མགྲོན་ཚོགས་ཐུགས་དམ་དགྱེས་མྱུར་མྱུར།།
མ་ཆགས་ཏིང་འཛིན་འབར་བའི་བྱིན་ཆེན་ཕོབས།།
གསང་མཆོད་དང་པོ།
སྣང་སྲིད་འཁོར་འདས་གཞི་རྩ་སྟོང་ལྷོང་ལྷོང་།།
སྟོང་པ་སྟོང་མེད་སྣང་བ་གསལ་ལྷམ་ལྷམ།།
སྣང་བ་སྣང་མེད་སྟོང་པ་དྭངས་སངས་སངས།།
གཉིས་མེད་སྙོམས་འཇུག་ཡེ་ཤེས་བདེ་ལམ་ལམ།།
ཡབ་ཡུམ་ཐབས་ཤེས་རོལ་པའི་བྱིན་ཆེན་ཕོབས།།
གསང་མཆོད་གཉིས་པ།
ཞིང་བཅུ་དགྲ་བོའི་རྟོག་ཚོགས་དཔུང་འཐུག་འཐུག།
ང་བདག་འཛིན་པའི་སྲོག་རྩ་སྲ་ཐག་ཐག།
རྣལ་འབྱོར་དགོངས་པའི་རལ་གྲི་རྔོ་རྣོ་རྣོ།།
ཀུན་རྫོབ་སྒྱུ་མའི་གཟུགས་བརྙན་གཅོད་སླ་སླ།།
སྐྱེ་ཤི་འཁོར་བ་སྒྲོལ་བའི་བྱིན་ཆེན་ཕོབས།།
ཡང་གསང་གི་མཆོད་པ།
གྲོལ་བ་གསུམ་གྱི་དགོངས་པ་སྲ་བརྟན་བརྟན།།
མཆོད་བྱ་མཆོད་བྱེད་མཆོད་ཡུལ་གཞི་སྟོང་སྟོང་།།
སྨྲ་བསམ་བརྗོད་བྲལ་ཁྱབ་བདལ་ངང་མཉམ་མཉམ།།
སྣང་གྲགས་འཁོར་འདས་མཉམ་ཉིད་རོ་གཅིག་གཅིག།
ཡང་གསང་ཕྱག་རྒྱ་ཆེན་པོའི་བྱིན་ཆེན་ཕོབས།།
༣༽འཕྲོ་འདུ་གསང་བ་འཛབ་ཀྱི་སྒྲུབ་པ།
བསྙེན་འཛབ།
འཁྲུལ་པའི་སྒྲ་དོན་འཛིན་རྟོག་ཞེ་མེར་མེར།།
ངག་བཟླས་ཡིད་བཟླས་བོན་ཉིད་ལ་བཟླ་བཟླ།།
ཚངས་པའི་གསུང་གིས་འགྲོ་དོན་མཛད་ལ་ལ།།
དེ་དག་རྟེན་འབྲེལ་བསྒྲིག་ལ་ཐབས་མཁས་མཁས།།
ལྷ་སྔགས་ཡེ་ཤེས་འཆར་བའི་བྱིན་ཆེན་ཕོབས།།
འཕྲོ་འདུ་དང་པོ།
འཕྲོ་འདུ་དྲུག་གི་ཏིང་འཛིན་ཐག་འདྲེན་འདྲེན།།
བདག་མདུན་ལྷ་ཚོགས་ཆུ་ནང་ཟླ་ཤར་ཤར།།
བཟླས་བསྙེན་ལྷ་སྔགས་ཡི་གེ་འཕྲུལ་འཁོར་འཁོར།།
འདི་སྣང་མཚན་མའི་དངོས་པོ་མར་བཞུ་བཞུ།།
སྒོ་གསུམ་སྣང་བ་དག་པའི་བྱིན་ཆེན་ཕོབས།།
འཕྲོ་འདུ་གཉིས་པ།
སྒྲུབ་གཤེན་ཆེན་པོའི་ཆ་ལུགས་སྒམ་ཁྲིགས་ཁྲིགས།།
ཏིང་འཛིན་ཡིད་ཀྱི་དམིགས་པ་གསལ་ཐག་ཐག།
རྒྱུན་མེད་ངག་གི་འཛབ་དབྱངས་འབྲུག་འུར་འུར།།
ཐུགས་དམ་བསྲུང་བའི་ཕྲེང་བ་གློག་འཁྱུག་འཁྱུག།
གསང་སྔགས་གནད་དུ་ཐིངས་པའི་བྱིན་ཆེན་ཕོབས།།
ཚོགས་མཆོད་ཀྱི་རིམ་པ།
སྟོང་གསུམ་སྣོད་ཀྱི་གཟེད་ཞལ་མཐོང་ཡངས་ཡངས།།
ཁམས་གསུམ་བཅུད་ཀྱི་རང་མདངས་གསལ་ལྷང་ལྷང་།།
དུག་གསུམ་གནས་དག་ཡེ་ཤེས་བདེ་ཆེམས་ཆེམས།།
སྲིད་གསུམ་ཚོགས་ཀྱི་མཆོད་པ་རྒྱ་ཆེ་ཆེ།།
ས་གསུམ་སྒྲོལ་སྦྱོང་མཐར་ཕྱིན་བྱིན་ཆེན་ཕོབས།།
ཚོགས་ཀྱི་རང་བཞིན་ཐབས་ཆེན་སྡེ་དྲུག་སྟེ།།
འདི་སྣང་རོལ་པ་ཆུ་ཟླའི་གཟུགས་ཤར་ཤར།།
ཐམས་ཅད་ཐབས་ཆེན་གཞི་ཡི་ཀློང་ཐིམ་ཐིམ།།
ཐབས་མཁས་ཐུགས་རྗེའི་དགོངས་པ་འོད་སྤྲོས་སྤྲོས།།
གཅིག་ལས་བཅུ་སྤྲོས་གདུལ་བྱ་འབྲུ་སྨིན་སྨིན།།
ཐབས་ལམ་ཟབ་མོ་མཐོང་བའི་བྱིན་ཆེན་ཕོབས།།
ཐབས་བཟང་ཡེ་ཤེས་རོལ་པ་ཆར་བཞུར་བཞུར།།
རྟོགས་ལྡན་ལམ་པའི་ཉམས་རྟོགས་ཉ་ལྡང་ལྡང་།།
ཐབས་མང་འཇུག་སྒོར་སྐལ་ལྡན་འབྲུ་བསྡུ་བསྡུ།།
ཡེ་ཤེས་ཚོགས་ཆེན་སྐལ་རེ་ལོན་ཤག་ཤག།
ཐབས་འཕེལ་ཤེས་རབ་རྒྱས་པའི་བྱིན་ཆེན་ཕོབས།།
འདུ་འཛི་དབེན་པའི་སྒྲུབ་གནས་བཙལ་ཤེས་ཤེས།།
རྣལ་འབྱོར་ཕོ་མོའི་དགོངས་རྟོགས་མཐོ་སེང་སེང་།
ཕུན་སུམ་ཚོགས་པའི་ཡོ་བྱད་རྫས་བསགས་བསགས།།
བསྐལ་པ་གསུམ་གྱིས་གཙང་སྨེ་སྣོད་སྦྱོང་སྦྱོང་།།
གསང་གསུམ་ཡི་དམ་འབྱོན་པའི་བྱིན་ཆེན་ཕོབས།།
ལྷ་ཚོགས་གསལ་གདབ་བརྟན་བཞུགས་ལྷ་གསོལ་གསོལ།།
སྦྱོར་སྒྲོལ་བཅོ་ལྔའི་དགོངས་པར་དབང་འབྱོར་འབྱོར།།
མཆོད་ཚོགས་བྱེ་བ་དམིགས་པས་འབུལ་ལ་ལ།།
རང་དག་རྟོག་པའི་ཉེས་ཚོགས་རྒྱུ་བཤགས་བཤགས།།
མཆོད་སྤྲིན་མི་ཟད་རྒྱན་གྱིས་བྱིན་ཆེན་ཕོབས།།
རྒྱུད་ལྔ་འགྲོ་བའི་རྣམ་ཤེས་གཞུ་བཀུག་བཀུག།
ལོག་འདྲེན་བར་ཆོད་ཐུགས་རྗེས་དགྲ་གསོད་གསོད།།
མཁའ་ཀློང་དབྱིངས་གསུམ་ལྟ་བས་རྒྱས་གདབ་གདབ།།
བརྟན་གཡོ་སྣོད་བཅུད་ཚོགས་སུ་བསྟབ་ཤག་ཤག།
ཡེ་ཤེས་རོལ་པ་ཆེན་པོའི་བྱིན་ཆེན་ཕོབས།།
ཐུགས་དམ་བརྒྱུད་ནས་བསྐུལ་བ།
ཡེ་གཞི་ཀ་དག་དགོངས་པ་དྭངས་སེ་དྭངས།།
ལམ་མཆོག་སྟོབས་ལྡན་འཛེག་སྐས་ཁྲེགས་སེ་ཁྲེགས།།
སྐུ་གསུམ་འབྲས་བུའི་ནོར་བུ་སྤུངས་སེ་སྤུངས།།
ལྷུན་འགྲུབ་རིགས་ལྔའི་ཞིང་ཁམས་ཝལ་དེ་ཝལ།།
མཆོག་ཐོབ་རིག་འཛིན་འགྲུབ་པའི་བྱིན་ཆེན་ཕོབས།།
དཔོས་གསས་རིག་འཛིན་དགྱེས་པའི་གླུ་སྙན་སྙན།།
སྤྲོ་དགའི་ཚིག་གི་རྒྱུད་མང་སྒྲ་བྲེང་བྲེང་།།
བརྩེ་བའི་སེམས་ཀྱི་དུད་པ་སྔོ་ལང་ལང་།།
དགའ་བའི་བཞིན་གྱི་འཛུམ་མདངས་རྒོད་འཚེར་འཚེར།།
སྣང་སྲིད་ཞི་བདེ་རྒྱས་པའི་ཐུགས་དམ་བསྐང་།།
༤༽ཕྱག་རྒྱ་གར་གྱི་སྒྲུབ་པ།
རྟེན་པ་སྣོད་ཀྱི་རང་བཞིན་འགྱུར་ལིང་ལིང་།།
གཡོ་བ་བཅུད་ཀྱི་འགྲོ་བ་འགུལ་ཤིག་ཤིག།
དེ་དག་གསང་གསུམ་ཕྱག་རྒྱས་གར་བསྒྱུར་བསྒྱུར།།
ངོ་བོ་རང་བཞིན་གཞི་རྩལ་ཡིན་ལ་ལ།།
ལྷུན་གྲུབ་ཡེ་ཤེས་ཆེན་པོའི་བྱིན་ཆེན་ཕོབས།།
༥༽སྐུ་མདོག་ཕྱག་མཚན་གདན་ཁྲིའི་སྒྲུབ་པ།
གསང་གསུམ་ཡི་དམ་རྒྱ་མཚོ་བདེ་ཆེམ་ཆེམ།།
མཚན་དཔེའི་ཟླ་གཞོན་མཁའ་ནས་ཉི་ཤར་ཤར།།
མཁྱེན་བརྩེའི་འོད་སྟོང་དབྱིངས་ནས་ཟེར་འཕྲོས་འཕྲོས།།
འགྲོ་བའི་དུག་གསུམ་སྨག་རུམ་སྟོང་སངས་སངས།།
ལས་བཞི་ལྷུན་གྲུབ་ཆེན་པོའི་བྱིན་ཆེན་ཕོབས།།
༦༽དོན་དམ་རྟགས་ཀྱི་སྒྲུབ་པ།
སྐྱེ་མེད་བོན་སྐུའི་རང་ཞལ་རྗེན་ལྷང་ལྷང་།།
འགག་མེད་ལྷ་སྐུ་གཞལ་ཡས་བཀྲ་ལམ་ལམ།།
གང་འདུལ་དེར་སྟོན་རྣམ་འགྱུར་མཐའ་ཡས་ཡས།།
མཚན་དཔེ་ཡོན་ཏན་ཆག་ཚད་རྫོགས་ལ་ལ།།
|
