|
སྟོང་གཟུགས་སྒྱུ་འཕྲུལ་ཆེན་པོའི་བྱིན་ཆེན་ཕོབས།།
ལྷ་མཆོག་བྱེ་བའི་རྣམ་འགྱུར་གྲངས་མང་མང་།།
བདག་འཛིན་འདུལ་བའི་སྟངས་སྟབས་བདེ་ཁྱུག་ཁྱུག།
མཐའ་གཉིས་བསལ་བའི་གར་སྒྱུར་གསལ་ཁྲིགས་ཁྲིགས།།
མཚན་མ་འཇོམས་པའི་གླུ་དབྱངས་སྙན་ལྷང་ལྷང་།།
རང་བཞིན་ལྷུན་འགྲུབ་ཆེན་པོའི་བྱིན་ཆེན་ཕོབས།།
ཕུང་ཁམས་སྐྱེ་མཆེད་རྣམ་པར་ཡིད་འགྲོ་འགྲོ།།
འཁྲིག་ཚིག་རེག་འཁྱུད་བག་ཆགས་གཏིང་རིང་རིང་།།
ཡུལ་ཤེས་གཉིས་འཛིན་རྟོག་པ་དག་དཀའ་དཀའ།།
སྦྱང་བྱའི་ཐ་མལ་ཞེན་པ་དཔུང་འཐུག་འཐུག།
སྦྱོང་བྱེད་རྟོག་གྲོལ་ཆེན་པོའི་བྱིན་ཆེན་ཕོབས།།
འཕྲིན་ལས་རིགས་ལྔའི་ཡོན་ཏན་མེ་འབར་འབར།།
མི་ཟད་ཆོ་འཕྲུལ་རྣམ་པ་འཇིགས་རྔམ་རྔམ།།
ཕྱི་ནང་གསང་བའི་བར་ཆོད་དགྲ་གཞོམ་གཞོམ།།
མཚན་བྱ་མཚོན་བྱེད་གཉིས་མེད་ཟུང་འཇུག་འཇུག།
མཐུ་བྱིན་མེ་དཔུང་འབར་བའི་བྱིན་ཆེན་ཕོབས།།
གསུམ་པ་འབྲས་བུ་དབང་གི་སྒྲུབ་པ་ལ་དྲུག་སྟེ།།
༡༽དངོས་གྲུབ་ལྷ་ཡི་ཡང་སྙིང་གི་སྒྲུབ་པ།
དངོས་གྲུབ་རྫས་བཞིའི་དམུ་ཡད་མཚོ་འཁྱིལ་འཁྱིལ།།
དལ་འབྱོར་ཕུན་ཚོགས་སྒྲུབ་གཤེན་ཚེ་རིང་རིང་།།
ཡོ་བྱད་ཕུན་ཚོགས་འདོད་ཡོན་རི་སྤུངས་སྤུངས།།
མཐུ་སྟོབས་ཕུན་ཚོགས་དགྲ་བགེགས་འཁོར་བསྡུ་བསྡུ།།
མཆོག་ཐུན་བྱིན་རླབས་འཇུག་པའི་བྱིན་ཆེན་ཕོབས།།
༢༽དུས་གསུམ་འབྲལ་མེད་དམ་བཅའི་སྒྲུབ་པ།
གཞལ་ཡས་ལྷ་ཚོགས་མི་བརྗེད་ནོར་ཉར་ཉར།།
དཔོན་གསས་མཆེད་ལྕམ་མི་འབྲལ་སྲོག་གཅེས་གཅེས།།
སྣོད་བཅུད་སྙིང་པོ་ཡེ་སངས་རྒྱས་ཡིན་ཡིན།།
ཐམས་ཅད་ཡེ་གཞིའི་ཀློང་དུ་ངང་མཉམ་མཉམ།།
མི་བརྗེད་དམ་བཅའ་བརྟན་པའི་བྱིན་ཆེན་ཕོབས།།
༣༽ཕུད་གཏའ་འཛད་མེད་གཏེར་གྱི་སྒྲུབ་པ།
དམིགས་རྟེན་ཕུད་མཆོད་ཧོམ་དུ་འབྲུ་བླུག་བླུག།
འཁོར་བའི་ཕུང་ལྔ་ཕྱག་རྒྱས་ཆལ་དཀྲོལ་དཀྲོལ།།
དུག་ལྔའི་བག་ཆགས་རྩ་ཕུང་མེར་བསྲེག་བསྲེག།
མེ་མཆོད་གཏེར་གྱིས་ལྷ་མཆོག་མགྲོན་མཉེས་མཉེས།།
འབྱུང་ལྔ་དབྱིངས་སུ་དག་པའི་བྱིན་ཆེན་ཕོབས།།
༤༽དམར་ལམ་ཟོར་གྱི་སྒྲུབ་པ།
ཐུགས་རྗེའི་བསྐལ་མེ་མཁའ་ལ་མདའ་འཕེན་འཕེན།།
ཟ་ལམ་དགྲ་བོའི་ཤ་རུས་ཤིང་གསེ་གསེ།།
དམར་གསུམ་མཆོད་པ་ཕྱུག་པོས་ནོར་སྤེལ་སྤེལ།།
དབལ་གྱི་མ་ཚོགས་མཆོད་པས་ཐུགས་དགྱེས་དགྱེས།།
མཁའ་ཀློང་དབྱིངས་ཉིད་དག་པའི་བྱིན་ཆེན་ཕོབས།།
༥༽གཟིར་མནན་བྲོ་ཡི་སྒྲུབ་པ།
འཁྲུལ་རྟོག་ཉོན་མོངས་རྩ་བ་ཤ་བཅད་བཅད།།
བར་ཆད་འགབ་འདྲེ་ལྡང་མེད་དགྲ་བྲུབ་བྲུབ།།
འགུག་སྒྲོལ་སྤར་བས་ལིང་གཏོར་རོ་མནན་མནན།།
རྣལ་འབྱོར་དགྱེས་པའི་བྲོ་གར་ལྷ་འཁྲབ་འཁྲབ།།
མཐར་ཕྱིན་ལས་སྦྱོར་འགྲུབ་པའི་བྱིན་ཆེན་ཕོབས།།
༦༽དབྱེ་བསྡུ་རྒྱུན་གྱི་སྒྲུབ་པ།
རྟག་ཆད་གོལ་སའི་རྟོག་པ་ལ་བཅད་བཅད།།
བདག་མདུན་ལྷ་ཚོགས་ཆུ་བུར་ཆུ་ཐིམ་ཐིམ།།
བསྐྱེད་བསྡུ་སྤྲོས་པ་ཉི་ཟེར་མར་འདུ་འདུ།།
ཐམས་ཅད་སྐྱེ་མེད་དགོངས་གཅིག་འདྲེས་ལ་ལ།།
མཐར་ཐུག་འབྲས་རྫོགས་ཆེན་པོའི་བྱིན་ཆེན་ཕོབས།།
ཕྱྭ་ཚེ་གཡང་བླན།
སྒྲུབ་གཤེན་བསམ་པའི་ལས་དོན་ལྷ་གྲུབ་གྲུབ།།
གཡུང་དྲུང་འོད་ཀྱི་དམུ་ཐག་སྲ་འཁྲེག་འཁྲེག།
ཚེ་བསོད་དཔལ་གྱི་དམུ་ཡད་གཡང་འཁོར་འཁོར།།
ཚེ་ཡི་བུམ་པའི་བདུད་རྩི་ཆུ་འབེབ་འབེབ།།
ལེགས་ཚོགས་འགྱུར་མེད་བརྟན་པའི་བཀྲ་ཤིས་ཤོག། །།
ཅེས་པ་འདི་ཉིད་བོན་རང་ལུགས་སྔགས་ཀྱི་ཆོ་གའི་གོ་རིམ་ལྟར་བསྙེན་པའི་གཞི་མ་སྒོ་དགུ་དང་སྒྲུབ་པའི་ཡན་ལག་བཅོ་བརྒྱད་ཀྱི་གོ་དོན་རག་ཙམ་ཞིག་ཡིད་ངོར་འཆར་བ་ལྟར་གཞུང་དོན་ལ་འདྲིས་པ་དང་ཚིག་སྦྱོར་ལ་བློ་འབྱོང་བའི་ཆེད་དུ་བསྟན་འཛིན་སྦྱིན་པས་ཉིན་འགའི་ངལ་གསོ་དང་བསྟུན་ཏེ་བྲིས།། |
