༄༅། །ཟིན་མེད་འཁོར་མཚོར་བྱིང་པའི་ཉམས་ཐག་འགྲོ། །བརྩེ་བ་ཆེན་པོས་རྟག་ཏུ་འདོར་མེད་པ། །སྣ་ཚོགས་ཐབས་ཀྱི་ལམ་ནས་རྗེས་སུ་བཟུང་། །ཡང་དག་སངས་རྒྱས་གཤེན་རབ་མི་བོར་འདུད།།
བོད་ཡུལ་གྱི་མི་དང་གོམས་གཤིས་འདྲིས་ཆེ་བའི་བསང་གསོལ་དང་དར་ཅོག་རླུང་དར་རྡོ་བརྐོས་བཅས་ཀྱི་ཁུངས་ལུང་ནས་ཇི་ལྟར་གསུངས་པ། གཟི་བརྗིད་༼ཁ༽རོལ་རྩེད་ཀྱི་མདོ་ལས། དེ་ལ་རི་དྭགས་ཀྱི་རྒྱལ་པོས་སྨྲས་པ། དེས་ན་ཁྱེད་རྣམས་སང་ཉི་མའི་རྩེ་ལ་བཟང་བྲག་གི་ཟུར་ལ། བཟང་ཤིང་སྣ་ཚོགས་དང་། ཤ་སྣ་དང་། སྙིང་སྣ་དང་། འབྲུ་སྣ་དང་། དཀར་གསུམ་དང་། མངར་གསུམ་དང་། རྩི་སྨན་དང་། མེ་ཏོག་ལས་སོགས་ཕུན་སུམ་འཚོགས་པ་རུ་བསགས་ནས། འཇིག་རྟེན་གྱི་ཁམས་འདི་ན། སྲིད་པ་གསུམ་ལ་ཁས་དྲག་པ་དབང་ཆེ་བའི་སྒྲ་བླ་དང་། ཝེར་མ། ཅང་སེང་དང་དཔའ་ཁྲོམ་ཡིན་པས། འདི་ལ་བསང་བརྔན་དང་། མཆོད་པ་བྱེད་ནས་སྨོན་ལམ་ཐོབས་དང་། རི་དྭགས་ཀྱི་ནང་ནས་གང་དང་མི་འདྲ་བའི་སྟོབས་ཆེ་ལ་ཁས་དྲག་པ་ཞིག་འབྱུང་ཡང་སྲིད། ཅེས་དང་། ལུང་དེ་ཡི་༼ཁ༽༦༠་ནས། ད་ཡང་ཕ་མྱེས་ཀྱི་རྒྱུད་གསས་རྣམས་བདར་ཞིང་། མངའ་གསོལ་བ་དང་། སྲུང་བཙུགས་དགོས་གསུངས་ནས། རིན་པོ་ཆེའི་བྲག་ཟུར་ལ། མཁན་ཤུག་དང་། བ་ལུ་དང་། བ་སྙུག་དང་། བཟང་ཤིང་གི་ལོ་མ་བྲེག་སྟེ་སྣང་བའི་མེ་ལ་བསྲེགས་ནས། ཕྱེ་མར་འོ་ཀོན་དང་། དཀར་དམར་ཤ་ཁྲག་གིས་བསངས་ནས། བདུད་རྩི་གཡུ་འབྲང་གིས་མཆོད་ཅིང་། སྒྲ་བླའི་གོ་མཚོན་སྣ་དགུ་བསྣམས་ནས་གསུངས་པ། ཞེས་གསུངས། བཟང་ཤིང་ཞེས་པ་ནི། དཔོན་གསས་ཁྱུང་རྒོད་རྩལ་༼༡༡༩༨༽གྱིས་གཏེར་དུ་བཞེས་པའི་ཡུལ་ས་ཁོལ་སྒྲུབ་ལས། ཤར་དུ་སུ་དཀར། ལྷོ་རུ་ཤུག་པ། ནུབ་ཏུ་སྟག་པ། བྱང་དུ་ཉ་བྲེག་ཅེས་དང་། སྲུང་བཙུགས་ཞེས་བོད་ཡུལ་གཙང་གི་ཁུལ་དུ་ཡག་ཁ་སྒྲོན་ཞེས་ཕྱེ་མར་འཕྲག་པར་བྱུག་པའོ།། གཟི་བརྗིད་༼ང༽ཡེ་གཤེན་ཐེག་པའི་མདོ་༡༩༢་ནས། རྩི་ཤིང་ཞུགས་དང་གསེར་སྐྱེམས་ཡས་སྟག་རྫས། །རྒྱལ་བའི་བདེན་པ་སྨྲང་གིས་བཀྲོལ་ལ་འབུལ། །འཇིག་རྟེན་མངའ་དབང་ཅན་རྣམས་དགྱེས་པར་བྱ། །ཞེས་གསུངས། ཡང་མངའ་དབང་བདག་པོ་ས་བདག་ཀླུ་གཉན་རྣམས། །བསྟན་པ་ཇི་ལྟར་སྲུང་ཡང་ཀོ་ལོང་དམ། །ཤེས་རྒྱུད་ཇི་ལྟར་འཇམ་ཡང་ལྷ་མིན་རིགས། །དེ་ཕྱིར་ས་བདག་ཀླུ་གཉན་དཀར་གྱིས་མཆོད། །དར་དང་བལ་ཚོན་ཤོག་ཤོག་དོང་ཙེས་བརྒྱན། །ཞེས་དང་། །དཀར་གསུམ། མངར་གསུམ། ཤེལ་ཚིག ཕྱེ་མར། ཆང་ཕུད་ལས་སོགས་དམིགས་པའི་རྟེན་རྫས་ལོངས་སྤྱོད་སྣ་ཚོགས་བཤམས་ལ། ཞེས་དང་། མཁན་ཤུག་ཕྱེ་མར་ཆང་ཕུད་དང་། དཀར་མངར་དག་གི་གསུར་དུད་དང་། །ཞེས་གསུངས། རླུང་འཁོར་དང་སྦྱིན་སྲེག ཆུ་སྐོར། སྭ་ཚའམ། མཆོད་རྟེན། རླུང་དར་རམ་བ་དན་ནམ་མཁར་ཕྱར་བ་བཅས་ཀྱི་ལུང་ནི། གཟི་བརྗིད་༼ཉ༽ཀླུ་ལ་བོན་བསྟན་པའི་མདོ་༩༥་ནས། གཞན་ཡང་། ལི་ཡང་རླུང་གི་རྟ་ལ་བསྐྱོན་ནས་བསྐོར་ན། རླུང་དེ་ལ་གནས་པའི་སེམས་ཅན་རྣམས་དང་། རླུང་དེས་ཕོག་པའི་ཞིང་ཁམས་ཐམས་ཅད་ཀྱི། ཉོན་མོངས་པ་ཞེ་སྡང་གི་སྒྲིབ་པ་བྱང་བར་འགྱུར་རོ། །ཚངས་སྟངས་མེ་ཡི་མདངས་ལ་བསྐྱོན་ནས་སྦྱིན་སྲེག་བྱས་ན། མེ་དེ་ལ་གནས་པའི་སེམས་ཅན་དང་། མེ་དེའི་དུད་པས་གར་ཁྱབ་པའི་ཞིང་ཁམས་ཐམས་ཅད་ཀྱི་ཉོན་མོངས་པ་འདོད་ཆགས་ཀྱི་སྒྲིབ་པ་བྱང་བར་འགྱུར་རོ། །ཏིང་ནམ་ཆུ་ཡི་རྟ་ལ་བསྐྱོན་ནས་བསྐོར་ན། ཆུ་དེ་ལ་གནས་པའི་སེམས་ཅན་རྣམས་དང་། ཆུ་དེ་བཏུང་བའི་སེམས་ཅན་ཐམས་ཅད་ཀྱི། ཉོན་མོངས་པ་གཏི་མུག་གི་སྒྲིབ་པ་བྱང་བར་འགྱུར་རོ། །ནེ་སླས་ས་ལ་གྲུབ་པའི་མཆོད་རྟེན་བཞེངས་ནས། དེའི་ནང་དུ་བཞུགས་སུ་གསོལ་བ་དང་། རབ་ཏུ་གནས་པར་བྱས་ནས། ཕྱོགས་མཚམས་དག་ཏུ་དགོད་ན། ས་དེ་ལ་གནས་པའི་སེམས་ཅན་དང་། ས་ལས་གྲུབ་པའི་གཟུགས་བརྙན་དེ་གར་བཞུགས་པའི་ཞིང་ཁམས་ཐམས་ཅད་ཀྱི་ཉོན་མོངས་པ་འཕྲག་དོག་གི་སྒྲིབ་པ་བྱང་བར་འགྱུར་རོ། །མུ་ཡང་ནམ་མཁའ་ལ་ཕྱར་བའི་རྒྱལ་མཚན་གྱི་རྩེ་ལ་བྲིས་ནས་ཕྱར་ཏེ་བཏེགས་ན། ནམ་མཁའ་ལ་གནས་པའི་སེམས་ཅན་དང་། ནམ་མཁའ་ལ་ཕྱར་བའི་རྒྱལ་མཚན་དེ་མཐོང་བའི་ཞིང་ཁམས་ཐམས་ཅད་ཀྱི་ཉོན་མོངས་པ་ང་རྒྱལ་གྱི་སྒྲིབ་པ་བྱང་བར་འགྱུར་རོ། །གཞན་ཡང་གཙང་མའི་ཚན་སྤོས་ལ་བཏབ་སྟེ་ཁྲུས་བྱས་ན། མི་གཙང་བའི་བག་ཆགས་ཐམས་ཅད་དག་པར་འགྱུར་རོ།། གསེར་དང་ཡུངས་ཀར་ལ་བསྔགས་ཏེ་ཞིང་ཁམས་ལ་གཏོར་ན། ནད་ཡམས་དང་། འཁྲུགས་པ་དང་། མུ་གེ་རྒྱུན་ཆད་པར་འགྱུར་རོ། །ཞེས་དང་། གཟི་བརྗིད་༼ཉ༽སྲས་སྤྲུལ་མདོ་༦༤༥་ནས། སྐུ་གདུང་མཆོད་རྟེན་ཚ་ཚ་གདབ། །རབ་ཏུ་གནས་ཤིང་དབེན་པར་བསྐྱོད། །དགའ་ལྡན་དག་པའི་གནས་སུ་སྐྱེ། །ཆུ་ལས་གྲུ་འདོར་འགྲོ་བ་སྒྲོལ། །ལམ་འཕྲང་བཅོས་དང་ཉེའུ་འདོན། །དགེ་བའི་དེད་དཔོན་ཆེན་པོར་འགྱུར། །དཀྱིལ་འཁོར་དལ་འབྲི་ལྷ་ཞལ་དབྱེ། །མཆོད་སྦྱིན་གཏོར་མ་རྒྱ་ཆེར་གཏོང་། །སྒྲིབ་སྦྱངས་ཚོགས་རྫོགས་ཐར་ལམ་ཕྱེད། །ཅེས་གསུངས་སོ། །གཟི་བརྗིད་ཀྱི་བཱེཌཱུརྱ་དམ་པའི་གཟུངས་༼ཐ༽༣༩༣་ནས། གཞན་ཡང་། ཨ་ཡང་རླུང་ལ་བསྐྱོན་ཏེ་འཁོར་ལོ་བསྐོར་ནས། རླུང་དེ་ཡིས་ཁྱབ་ཚད་སེམས་ཅན་ཐམས་ཅད་ཀྱང་། ཉོན་མོངས་ང་རྒྱལ་གྱི་སྒྲིབ་པ་བྱང་ནས། ཞི་བ་ཆེན་པོའི་ཀློང་དུ་སངས་རྒྱས་པར་འགྱུར་རོ། །པུར་པ་མེ་ལས་གྲུབ་པའི་སྦྱིན་སྲེག་བྱས་ན། མེ་ཡི་དུད་པས་གར་ཁྱབ་སེམས་ཅན་ཐམས་ཅད་ཀྱང་། ཉོན་མོངས་པ་འདོད་ཆགས་ཀྱི་སྒྲིབ་པ་དག་ནས། སྦྱིན་པ་ཆེན་པོའི་ཀློང་དུ་སངས་རྒྱས་པར་འགྱུར་རོ། །ཏིང་ནམ་ཆུ་ལས་གྲུབ་པའི་ཆུ་གཏོར་བཏང་ན། ཆུ་དེ་ལ་འཐུང་ཚད་ཀྱི་སེམས་ཅན་ཐམས་ཅད་ཀྱང་ཉོན་མོངས་པ་གཏི་མུག་གི་སྒྲིབ་པ་བྱང་ནས། ཡེ་ཤེས་ཆེན་པོའི་ཀློང་དུ་སངས་རྒྱས་པར་འགྱུར་རོ། །སྲ་བརྟན་ས་ལས་གྲུབ་པའི་མཆོད་རྟེན་བཞེངས་ནས། རྟེན་དེ་དག་ལ་ཕྱག་སྐོར་དང་མོས་འདུན་བྱས་པའི་སེམས་ཅན་ཐམས་ཅད་ཀྱང་། ཉོན་མོངས་པ་འཕྲག་དོག་གི་སྒྲིབ་པ་དག་ནས། ཡངས་པ་ཆེན་པོའི་ཀློང་དུ་སངས་རྒྱས་པར་འགྱུར་རོ། །མུ་ཡངས་ནམ་མཁའ་ལས་གྲུབ་པའི་རྒྱལ་མཚན་ཕྱར་ན། ནམ་མཁས་ཁྱབ་ཚད་ཀྱི་སེམས་ཅན་ཐམས་ཅད་ཀྱང་། ཉོན་མོངས་པ་ཞེ་སྡང་གི་སྒྲིབ་པ་དག་ནས། བྱམས་པ་ཆེན་པོའི་ཀློང་དུ་སངས་རྒྱས་པར་འགྱུར་རོ། །ཞེས་གསུངས། ཡང་། མདོ་དྲི་མེད་ལས། དེ་ལྟར་གསང་བའི་གཟུངས་མཆོག་འདི། །དར་དཀར་དག་ལ་བྲིས་ནས་སུ། །མི་ནུབ་རྒྱལ་མཚན་རྩེར་ཕྱར་ན། །ཅི་བསམ་དོན་རྣམས་འགྲུབ་པར་འགྱུར། །ལམ་གྱི་འཇིགས་པ་མི་འབྱུང་ཞིང་། །ཞེས་གསུངས། དཔོན་གསས་ཁྱུང་རྒོད་ཀྱི་གཏེར་མ། གཡུང་དྲུང་གསང་གཟུངས་ལས། སྒྲིབ་སེལ་སྔགས་གཟུངས་འདི་རྣམས་དར་དཀར་ལ་བྲིས་ནས་རྒྱལ་མཚན་གྱི་རྩེ་ལ་ཕྱར་རམ། རི་བོའི་མཆོད་རྟེན་གྱི་སྒོ་ལ་བཙུག་སྟེ་ཕྱར་ན། མངོན་པར་འཚང་རྒྱའོ། །ཡང་ན་གནས་ཁང་གི་རྩེ་ལ་ཕྱར་ན། དེ་མཐོང་བའི་འོག་ཏུ་འཛུལ་ཚད་འཚང་རྒྱའོ། །ཞེས་དང་། རྟེན་འབྲེལ་གསང་བའི་གཟུངས་རིང་འདི། རིན་པོ་ཆེས་
|
