ཡང་སྟོན་ཆེན་པོས་བླ་མ་འཚོལ་བའི་གཏམ་རྒྱུད།

 ཡང་སྟོན་ཆེན་པོས་བླ་མ་འཚོལ་བའི་གཏམ་རྒྱུད།

     ༄༅། །  དེ་ཡང་ཡང་སྟོན་ཆེན་པོ་དེ་བཤད་རྒྱུད་ཀྱི་བོན་རྣམས་ལ་ཤིན་ཏུ་མཁས་པ་ཞིག་ཡོད་པ་ལ། རེ་ཞིག་བུད་མེད་གཅིག་བྱུང་ནས། ཁྱེད་ཡོན་ཏན་ཅི་ཙམ་མཁས་ཟེར། ང་ཤིན་ཏུ་མཁས་ཞེས་པས། བུད་མེད་དེ་ངུ་ཞིང་མི་དགའ་བའི་ཚུལ་གྱིས་སོང་། དེ་བླ་མའི་ཐུགས་ལ་ང་མཁས་ཞེས་པས་ཁོང་མི་དགའ་བར་འདུག སང་ཉིན་བྱུང་ན་ཅི་ཡང་མི་ཤེས་ཟེར་དགོས་དགོངས་ནས་བཞུགས་པས། སང་ཉིན་ཡང་བུད་མེད་དེ་བྱུང་ནས་སྔར་བཞིན་ཟེར། ངས་ཅི་ཡང་མི་ཤེས། ཡོན་ཏན་འདྲ་བསླབ་རྒྱུ་འདུག་གམ་བྱས་པས། བུད་མེད་དེ་དགའ་ནས་བགད་དེ། ཁྱོད་ཀྱིས་ཡོན་ཏན་བསླབ་དགོས་ན་ཀླུ་སྲིན་གཉིས་ཀྱི་བྲག་ལ། ཉི་ཟླ་མིག་གིས་མ་མཐོང་བར། རོང་སྒོམ་རྟོག་མེད་ཞིག་པོ་བཞུགས་ནས་སྣང་། དེར་སོང་དང་ཁྱོད་ལ་ཡོན་ཏན་ཆེན་པོ་ཞིག་བསླབ་རྒྱུ་འདུག་ཟེར་ནས་སོང་། ཡང་སྟོན་ཆེན་པོས་དེ་ཐོས་པ་ཙམ་གྱིས་ཐུགས་རྒྱུད་ལ་དགའ་སྤྲོ་ཆེན་པོ་གཅིག་བྱུང་སྟེ། བླ་མ་གང་ན་ཡོད་དྲི་རྒྱུ་མ་དྲན། སང་ཡང་བུད་མེད་དེ་འོང་སྙམ་ནས་བཞུགས་པས་མོ་མ་བྱུང་། ཞག་བདུན་ལོན་པ་དང་། ད་བླ་མ་འཚོལ་དུ་འགྲོ་ན་དགའ་སྙམ་ནས་སྨད་མདོ་གམ་དུ་བྱོན་ཏེ་ལོ་གསུམ་བཙལ་བས་མ་རྙེད། དེ་ནས་ཡར་བྱོན་ནས་བར་དབུས་གཙང་དུ་ལོ་གསུམ་བཙལ་བས་མ་རྙེད། དེ་ནས་སྟོད་མངའ་རིས་སུ་ལོ་གསུམ་བཙལ་བས་ཀྱང་མ་རྙེད། དེར་ཡང་སྟོན་ཆེན་པོ་ཤིན་ཏུ་ཐུགས་ཆད་ནས་ཕྱིར་ལོག་ནས་བྱོན་པས། གློ་མོན་འདམས་རྒྱལ༼སྟོད་ཕྱོགས་ཀྱི་ས་མིང་ཞིག་ཡིན། མོན་གྱི་ས་ཕྱོགས་ལ་བཤད། སྔོན་ཆད་བོན་གྱི་འདུ་གནས་ཆེན་པོ་ཞིག་ཡིན་པར་གསལ། ༽སར་ཕྱིན་པ་དང་། ཆོ་ལོ་མཁན་མི་གཉིས་དང་འཕྲད་པས། ཆོ་ལོ་སྔགས་ལ། ཉི་ཟླ་མིག་གིས་མ་མཐོང་བའི། ། རོང་སྒོམ་རྟོག་མེད་ཞིག་པོ་མཁྱེན། ། ཟེར་གྱིན་འདུག་པ་ལ། ཡང་སྟོན་ཆེན་པོས་དེ་ཐོས་པ་ཙམ་གྱིས་ལུས་སྐྱི་བུང་གིས་སོང་། ད་བླ་མ་དང་མཇལ་དུ་ཡོད་སྲིད་སྙམ་ནས་དགའ་ནས་བགད། དེ་སྔར་ལོ་དགུར་བཙལ་ཀྱང་མ་རྙེད་པས་ད་དུང་མི་རྙེད་སྙམ་ནས་བཤུམ་སྟེ། རོང་སྒོམ་རྟོག་མེད་ཞིག་པོ་བྱ་བའི་བླ་མ་དེ་གང་ན་བཞུགས་གསུངས་པས། མི་གཉིས་ན་རེ། འདི་ནས་མར་བཞུད་དང་གློ་མོན་ཕྱོགས་སུ་ཀླུ་བྲག་གི་ལུང་བའི་ཕུ་ཀླུ་སྲིན་གཉིས་ཀྱི་བྲག་ལ། ཉི་ཟླ་མིག་གིས་མ་མཐོང་བར་བཞུགས་ཡོད་ཟེར། དེར་བྱོན་པས་བླ་མ་དང་མཇལ་ནས་སྔར་གྱི་ལོ་རྒྱུས་རྣམས་ཞུས་ནས་གདམས་ངག་ཞུ་བྱས་པས། བླ་མས་ཞལ་ནས་ང་ནི་གཞོན། ཁྱོད་ནི་རྒས། སྙན་རྒྱུད་ཀྱི་བོན་ནི་གཅིག་རྒྱུད་མིན་པར་སྤེལ་མི་རུང་བས། ད་ཁྱོད་ལ་སྔ་བར་གྲོང་འཇུག་གི་གདམས་པ་གཅིག་བསླབ་དགོས་གསུངས་ནས་གྲོང་འཇུག་སྦྱང་དུ་བཅུག་སྟེ། ཁོང་རྣམ་གཉིས་སྐུ་ལུས་བརྗེས་ནས་གདམས་ངག་ཐམས་ཅད་བུམ་པ་གང་བྱོའི་ཚུལ་དུ་གནང་། དེ་ཡང་སྟོན་ཆེན་པོས་ཉམས་སུ་བླངས་པས་མཆོག་ཐུན་མོང་གི་དངོས་གྲུབ་ཐོབ་པ་ཡིན།

 «བཀའ་ལུང་རྒྱ་མཚོ»ལས།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།