རང་གི་ཞྭ་མོ་གང་ཡིན་ཤེས་ཀྱིན་མི་འདུག

བོན་པོ་ཚོས། རང་གི་ཞྭ་མོ་གང་ཡིན་ཤེས་ཀྱིན་མི་འདུག
བོན་ནག་ཚང་།

 ང་རང་བོན་པོ་ཞིག་ཡིན་པའི་ཆ་ནས་རང་ཉིད་ཀྱི་འགྲོ་འདུག་སྤྱོད་གསུམ་ཡང་དག་པའི་བོན་གཞུང་དང་མཐུན་ཞིང་ལྟ་སྒོམ་སྤྱོད་གསུམ་ཡང་བསླད་མེད་པའི་བོན་གཞུང་གི་ངོ་བོ་ནས་འགྲེང་ན་འདོད། ད་སྐབས་བོན་པོའི་དགོན་པ་ཆེ་ཤས་དང་བོན་དགོན་མཐོ་ཤས་སུ་བོན་གྱི་ཞྭ་མོ་སོགས་གཡུགས་ནས་ཞྭ་སེར་གྱོན་ཏེ་གང་སྣང་ཐམས་ཅད་རྒྱན་དུ་ཤར་བཞིན་ཡོད། བན་མིན་བོན་མིན་གྱི་དགོན་པ་རྣམས་ཀྱིས་མི་ལོ་ཁ་ཤས་ཀྱི་ཡར་སྔོན་ལ་བོན་ཞྭ་ཁ་ཤས་བཟོས་ནས་གྱོན་བཞིན་ཡོད་ལ་དེ་ནི་དེ་ལས་ཀྱང་ཟོལ་ཉམས་ལྡན་པ་ཞིག་མ་ཡིན་ལ་བོན་ཚུགས་ཤོར་བའི་རང་མཚང་ཞིག་ལྷང་ལ་བུད་པ་དེ་རེད། ད་སྐབས་བོན་གྱི་གྲྭ་བའི་དགོན་པར་ལྟོས་ན་མདོ་སྨད་མཚོ་སྔོན་ཡུལ་གྱི་བོན་པོའི་སྔགས་དགོན༼དཔོན་གྱི་དགོན་པ༽རྣམས་ཀྱིས་བོན་རང་གི་ཐུན་མིན་གྱི་གོས་ལྭ་སོགས་མནབ་ནས་བོན་ཚུགས་ཤོར་མེད། བོན་གྱི་གཞུང་ལུགས་སོགས་དར་སྤེལ་དང་རྒྱུན་འཛིན་བྱེད་པ་མང་པོ་ཡོད་ན་ཡང་ཆུང་ས་ནས་རང་ཚུགས་ཤོར་སོང་ན་ཆེ་ས་སྒྲུབ་ཀྱང་དེ་འདྲ་ཞིག་རེད། རྐྱེན་དེའི་དབང་གིས་ངས་རེབ་གོང་བོན་མང་གི་དྲ་བའི་སྟེང་དུ་དྲི་བ་འདི༼ཞྭ་སེར་༼རྔོག་ཞྭ༽འདི་ང་ཚོ་བོན་ལུགས་ཀྱི་ཞྭ་ཞིག་མ་ཡིན་པ་ང་ཚོས་ཤེས་ཟིན་པ་རེད། ཤེས་བཞིན་དུག་འཐུང་གི་བྱ་བ་ཞིག་སྒྲུབ་དགོས་པ་ཅི་ཡིན། གར་འཆམ་ལས་གྲྭ་བ་ཚོས་ཞྭ་དཀར་རྩེ་རྒྱལ་གྱོན་ཡོད་ལ་ཞྭ་སེར་རྔོག་ཞྭ་ཡང་གྱོན་ཡོད། རྒྱལ་བ་སྨན་རི་དགོན་ལས་གཞན་རྔ་ཡུལ་སྣང་ཞིག་དགོན། རང་དགོན་བོན་བརྒྱ་དགོན། ཁྱུང་ཡུལ་ཀོ་རྒྱལ་དགོན་སོགས་ན་ཞྭ་དཀར་དང་ཞྭ་སེར་བསྲེས་ནས་གྱོན་བཞིན་ཡོད། འདི་ལྟར་སོང་ཚེ་འུ་ཚོའི་མགོ་བོ་ཡང་བྱ་པུ་ཤུད་ཀྱི་མགོ་བོ་དང་འདྲ་བར་ཁྲ་བོ་ཞིག་ཏུ་གྱུར་ངེས། ང་ལ་དབང་ཆ་ཞིག་ཡོད་ཚེ་རིང་ལུགས་ཀྱི་ཞྭ་དཀར་ཁོ་ན་གོན་ངེས།༽http://www.rgbm123.com/news/407/བཀོད་པ་ཡིན། བོན་པོ་ཚོ་ངོ་གནོང་བ་དང་གང་ཡིན་མི་ཤེས་མོད་བོན་གྱི་བླ་མ་དང་དགེ་བཤེས། མཁས་དབང་་སོགས་ཀྱིས་དྲིས་ལན་བྱུང་མ་མྱོང་། ཁོ་ཚོའི་སྣང་ངོར་དེ་ནི་བྱ་བ་ཆུང་ཆུང་ཞིག་ཏུ་སྣང་ན་ཡང་་དེ་ནི་ཧ་ཅང་གི་ཆུང་བ་ཞིག་མ་ཡིན་ལ་བོན་གྱི་གཏིང་ཟབ་པའི་གཞུང་ལུགས་སོགས་ལ་འབྲེལ་བ་དམ་ཟབ་ཡོད། བོན་གྱི་གཏིང་ཟབ་པའི་གཞི་ལམ་འབྲས་གསུམ་གྱི་ངོ་བོ་མཚོན་པའི་བོན་གྱི་ཞྭ་དཀར་རྩེ་རྒྱལ་དང་པད་ཞུ་སོགས་ཞྭ་སྣ་མི་འདྲ་བཅུ་ཁ་ཞིག་ཡོད་མོད་བོན་པོ་ཚོ་དེ་ལ་ཐོགས་པ་མེད་པར་ཞྭ་སེར་གྱོན་བཞིན་ཡོད། བླ་ཆེན་གྱི་ཞྭ་བཤད་ལས་ཞྭ་སེར་རྔོག་ཞྭ་ནི་བདུད་ཞྭ་ཞིག་ཏུ་བགྲེང་ཡོད་ལ། འདི་ནི་གྲུབ་མཐའི་ཕྱོགས་ཞེན་དང་དོན་ངོ་བོའི་གནས་ཚོད་གང་ཡིན་ང་ཚོས་མི་ཤེས་ན་ཡང་བདག་ཅག་གི་སྟོན་པ་གཤེན་རབ་ཀྱི་ཐུགས་ཀྱི་ལས་དཔོན་བླ་ཆེན་དྲན་པ་ནམ་མཁའི་གསུང་ནི་བོན་པོ་ཚོ་མཚོན་ན་གཏིང་ཟབ་པའི་བོན་གཞུང་གཙང་མ་ཞིག་ཏུ་འཁུམ་དགོས་པ་ཟློག་ཏུ་མེད་པའི་བོན་ཉིད་རེད། དོན་ངོ་མ་བོན་པོ་ཚོས་རང་གི་བླ་མའི་གསུང་ལ་རྒྱབ་འགལ་བྱེད་བཞིན་བོན་བསྟན་ནུབ་པའི་ཆ་རྐྱེན་བརྩོན་ལེན་བྱེད་ཀྱིན་ཡོད་འདུག བོན་གྱི་བླ་མ་ཁ་ཤས་ཀྱིས་ཞྭ་སེར་དེ་བོན་གཞུང་དང་མཐུན་ཐབས་སྨྲར་བཞིན་ཡོད་ན་ཡང་ང་ཚོས་དགོས་ངེས་དེ་ཤེས་དགོས་རྒྱུ་གཙོ་བོ་རེད། ད་སྐབས་གྲུབ་མཐའ་གང་ཡིན་རུང་གཅིག་གཅིག་གིས་གཉའ་གནོན་ཡོད་ནི་མ་རེད། བོན་པོ་ཚོ་ཡང་རང་ས་ནས་འཕགས་ཏེ་རང་གི་གོན་པ་ལ་བདག་གཉེར་ཞིག་བྱེད་ཐུབ་ན་འགྲིག་འདུག བོན་པོའི་བོན་ཞྭ་ལ་རྒྱུས་ལོན་བྱེད་འདོད་ན་བླ་ཆེན་གྱི་ཞྭ་བཤད་པི་ཝང་དྲུག་འགྱུར་དང་སྐྱང་སྤྲུལ་ནམ་མཁའ་རྒྱལ་མཚན་གྱིས་མཛད་པའི་ལུང་རྟོགས་བོན་གྱི་ཆ་རྐྱེན་འདོད་འབྱུང་དབྱིག་གི་གབ་ཙེ། ཁྱུང་སྨོན་ལམ་ལགས་ཀྱིས་མཛད་པའི་གཡུང་དྲུང་བོན་གྱི་ཞྭ་བཤད་སོགས་ལ་གཟིགས་དང་ཐུན་མིན་གྱི་ངོ་མཚར་དེ་སོགས་ན་གསལ། འདི་ནི་བདག་གིས་བརྙས་སྨོད་བཏང་བ་་མ་ཡིན་ལ་གཞན་ཞིག་གིས་ཚིག་བརྡ་ཕུལ་བ་ལས་རང་གིས་མགྱོགས་བྲིས་བྱས་ན་ཅི་ལ་སྐྱོན། འདི་ནི་བོན་པོ་ཡིན་ཚད་ལ་འགན་ཡོད་ན་ཡང་གཙོ་བོ་དགོན་བདག་བླ་མ་དང་འབྲེལ་བ་དམ་ཟབ་ཡོད་པས་དགོན་བདག་བླ་མ་ཚོས་བསམ་གཞིག་ཡང་དག་ཞིག་གནང་རྒྱུ་མཁྱེན་མཁྱེན་ཞེས་པའི་རེ་ཞུ་སྙིང་ནས་ཕུལ་བ་ཡིན་ལགས་སོ།།

 

༢༠༡༡ ༡༢ ༡བོན་ནག་ཚང་གིས་རིག་འབྱུང་ཡུལ་ནས་བྲིས།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།