ཡུལ་མདོ་སྨད་དུ་དབལ་རམ་འབུམ་གསུམ་གྱི་སྒྲུབ་མཆོད་འཛིན་པའི་བོན་སྡེ་ངོ་སྤྲོད།

རྩོམ་པ་པོ། རིག་པའི་ཁུ་བྱུག རྩོམ་ཁུངས། རེབ་གོང་བོན་མང་དྲ་བ།

  ༄༅།།དང་པོ་ཐོག་མའི་གླེང་བྱ།

ཞང་བོད་གངས་རིའི་ལྗོངས་འདིར་གཡུང་དྲུང་བོན་གྱི་བསྟན་པ་རིན་པོ་ཆེ་དར་རྒྱས་ཕུན་སུམ་ཚོགས་པ་བྱུང་མཚམས་བོད་རྒྱལ་གྲི་གུམ་དང་། སྲོང་བཙན་སྒམ་པོ། ཁྲི་སྲོང་ལྡེ་བཙན་སོགས་ཀྱིས་ཆབ་སྲིད་དབང་གིས་རྒྱལ་བསྟན་འཕྲུལ་ངག་གཡུང་དྲུང་བོན་ལ་གནོད་འཚེ་ཚབས་ཆེན་བཏང་། གཡུང་དྲུང་བོན་ནི་རྒྱལ་བསྟན་ཡང་དག་པའི་སྙིང་བོ་རུ་ངེས་ནའང་རྒྱལ་བོས་ཅི་མི་སྙམ་པར་བསྟན་པར་གནོད་འཚེ་བྱས་རྐྱེན་ནི་ཆབ་སྲིད་ལ་དམིགས་སྟངས་ཙམ་ལས་མ་འདས། ཕྱིས་སུ་རྒྱལ་བོ་གླང་དར་གྱིས་བསྟན་པ་སྤྱི་ལ་བཀག་འགོག་བྱེད་སྐབས་སྐྱེས་མཆོག་དམ་པ་ངོ་མོ་ཡེ་ཤེས་མཚོ་རྒྱལ་དང་ཁྱུང་བོ་ཁྱུང་དཀར་ཚངས་པ། སྤྱི་རྟིང་འཁོར་ལོས་བསྒྱུར་རྒྱལ་ཞེས་རིག་འཛིན་གྲུབ་དབང་འཁོར་བསྒྱུར་རྣམ་གསུམ་མཚོ་སྔོན་གྱི་ཡུལ་ལུང་སོ་སོར་ཕེབས་པ་དང་།   རྗེས་ནས་རེབ་གོང་དུ་རྒྱུན་བཞུགས་མཛད་ནས་གདུང་རྒྱུད་སློབ་རྒྱུད་སྤེལ་བས་རེབ་གོང་གྲུབ་ཐོབ་རྣམ་གསུམ་ཞེས་སྙན་གྲགས་ཕྱོགས་ཀུན་ཁྱབ། གདན་ས་ཤར་ཕྱོགས་དཀོན་མོ་ཉིན་དགོན། ཁྱུང་བོ་དར་ལྡིང་དགོན། དབལ་མོ་གནས་དགོན་སོགས་བསྟན་པའི་གནས་གཞི་མང་པོ་བཏབས། འབལ་ཚའི་བཙན་དུག་སྡོང་བོ་གཟུགས་མེད་སྒྲས་གྲུབ་ཐོབ་རྣམ་པ་གསུམ་གྱིས་གཅོད་པར་ཞུ་ཞེས་བསྐུལ་བས། ཡི་དམ་བསྐྱེད་རིམ་ངང་གཉན་གྱིས་གཏོར་མས་བཅད་པའི་ཤིང་གིས་ཕུར་བུ་སྟོང་ཕྲག་བཞེངས་པའི་རྟེན་འབྲེལ་གྱིས་བོན་མང་ཕུར་ཐོགས་སྟོང་དང་དགུ་བརྒྱ་བྱུང་། གཟུགས་མེད་སྒྲའི་བསྐུལ་མ་གནང་མཁན་ནི་མགར་རྩེ་སྲུང་མ་ཡིན་ཟེར་བ་མ་སྒྲ་ལྷའི་རྒྱལ་མོ་སྟག་རི་རོང་ཡིན་པར་གྲགས། གྲུབ་ཐོབ་རྣམ་གསུམ་གྱིས་དབལ་རམ་འབུམ་གསུམ་གྱི་དབང་ལུང་སྒྲུབ་རྒྱུན་སྤེལ་བ་དང་། ཐུགས་བསྐྱེད་སྨོན་ལམ་ལས་ཡི་དམ་རྣམ་གསུམ་གྱི་བོན་སྒོ་གཏེར་དུ་སྦས་མ་དགོས་པའི་བཀའ་དྲིན་བླ་མེད་ཀྱི་མཛད་རྗེས་བཞགཕྱོགས་གཞན་ནས་རིག་འཛིན་ལ་ལས་དབལ་རམ་འབུམ་གསུམ་གཏེར་དུ་སྦས་ཏེ་ཕྱིས་སུ་གཏེར་བཞེས་པའང་ཡོད་ལ། དེ་ཡང་གྲུབ་ཐོབ་སྤྱི་ཁྱུང་ངོ་གསུམ་མཚོ་སྔོན་དུ་མ་ཕེབས་གོང་ཡུལ་མདོ་སྨད་ལ་ཡི་དམ་དབལ་རམ་འབུམ་གསུམ་གྱི་བོན་སྒོ་རྒྱ་ཆེར་དར་ཡོད་དེ། ཐུབ་བསྟན་པའི་བླ་སྤྲུལ་འགས་མདོ་སྨད་དུ་བཞུགས་པའི་བོན་གྱི་བླ་མ་མེ་ཏྲི་སྟོན་པ་ཤེས་རབ་གྲགས་པ་ལ་ཕྲག་དོག་མཛད་ནས་རྒྱལ་བོ་གླང་དར་མར་སྙན་ཕྲ་གསོལ་བས་རྒྱལ་བོས་བློན་དམག་རྟ་བ་བརྒྱ་མངགས་ནས་བླ་ཆེན་མེ་ཏྲི་སྟོན་པ་ཤེས་རབ་གྲགས་པ་སྐུ་གྲོངས་པར་མཛད་ཀྱང་། གྲུབ་ཐོབ་ཁོང་ནི་དབལ་ཆེན་འབུམ་པའི་རྣལ་འབྱོར་བ་བསྐྱེད་རྫོགས་ལ་མངའ་བརྙེས་པ་ཡིན་པས་སྐུ་དགྲོང་མ་ནུས། བླ་མ་མེ་ཏྲི་ཚང་དགྲོང་ནས་དབུ་ལེན་མ་ཐུབ་ན་མཐར་རྒྱལ་བོས་བློན་པོ་བརྒྱ་ལ་སྲོག་ཆད་གཅོད་པས། བློན་དམག་བརྒྱ་ཡི་སྲོག་སྐྱོབ་ཆེད་གཞན་དོན་ཁུར་ཁྱེར་གྱི་སྙིང་རྗེ་ཆེན་པོ་མངའ་བའི་བླ་ཆེན་ཁོང་གིས་དབུ་སྦྱིན་པ་བཏང་བའི་ལོ་རྒྱུས་ལས་རྟོགས་ཐུབ་པ་ནི། བླ་ཆེན་མེ་ཏྲི་སྟོན་པ་ཤེས་རབ་གྲགས་པ་མཆོག་ནི་དབལ་རམ་འབུམ་གསུམ་བསྒྲུབས་ནས་སྒྱུ་ལུས་གྲུབ་པའི་རྣལ་འབྱོར་བ་ཡིན་ངེས་པས། བསྟན་པའི་བདག་ཉིད་བཞུགས་ཡུན་དེར་དབལ་རམ་འབུམ་གསུམ་གྱི་བསྟན་པ་དར་ཡོད་པ་ཧ་ཅང་མངོན་གསལ་ལོ།།

དེ་ལྟར་གྲུབ་ཐོབ་རྣམ་གསུམ་བྱང་ཨཀྟ་རོང་དུ་མ་ཕེབས་སྔོན་ནས་མེ་ཏྲི་སྟོན་པ་ཤེས་རབ་གྲགས་དང་སློབ་དཔོན་མཁས་ཆེན་འབྲོམ་སྟོན་ཡབ་སྲས་རིང་མདོ་སྨད་དང་ཡང་ཁྱད་ཁྲི་ཀ་རེབ་གོང་སོགས་སུ་དབལ་རམ་འབུམ་གསུམ་གྱི་སྒྲུབ་རྒྱུད་ཆེས་ཆེར་དར་ཡོད་དོ།

གླང་དར་གྱིས་ཆོས་ལུགས་པ་ཆམ་ལ་ཕབ་རྗེས་གོང་གསལ་ལྟར་རེབ་གོང་གྲུབ་ཐོབ་རྣམ་གསུམ་དང་སློབ་དཔོན་འབྲོམ་སྟོན། སློབ་དཔོན་སྟོན་སྒོམ། བྲ་བོ་རེ་རྒན་ལ་སོགས་གཤེན་བོན་གྲུབ་ཆེན་དགུ གྲུབ་པ་རྒྱ་མཚོ་དཔལ། ཁྱུང་པོ་གཡུ་ཐོག་འབར་བ། སྐྱིད་སྟོན་འཁོར་ལོ། ངོ་མོ་ཡེ་ཤེས་ཁྲོ་རྒྱལ་དང་དེ་དག་གི་ཡང་སྤྲུལ་སློབ་བརྒྱུད། རྩེ་ཞིག་བླ་རབས་དང་མཁར་ནག་བླ་རབས། བོན་བརྒྱ་བླ་རབས་རྣམས་ཀྱི་བཀའ་དྲིན་ལས་གཏེར་དུ་མ་སོང་བའི་ཡི་དམ་དབལ་རམ་འབུམ་གསུམ་གྱི་སྒྲུབ་མཆོད་རྒྱུན་མ་ཆད་པ་དང་། རིག་གསར་གོད་ཆགས་ཆེན་པོའི་མཚམས་ལ་སྙིགས་དུས་འདྲེན་སྟོན་ཆེན་པོ་རྗེ་བོན་བརྒྱ་ཐམས་ཅད་མཁྱེན་པ་བྱོན་ནས་བོན་མདོ་སྔགས་རྫོགས་གསུམ་གྱི་བཤད་སྒྲུབ་བསྟན་པའི་བཀའ་འཁོར་བསྐོར་ཏེ་བསྟན་འགྲོར་ཕན་བདེ་བླ་ན་མེད་པའི་བཀའ་དྲིན་བསམ་གྱིས་མི་ཁྱབ་པས་བསྐྱངས།

གཉིས་པ་ཡི་དམ་དབལ་རམ་འབུམ་གསུམ་གྱི་དབྱེ་བཤད།

    ཡི་དམ་དབལ་རམ་འབུམ་གསུམ་ཞེས་པ་ནི་ཡི་དམ་ཁྲོ་བོ་གསུམ་གྱི་མཚན་སྤྱི་བསྡུས་སུ་བསྟན་པ་སྟེ། ཁྲོ་བོ་དབང་ཆེན་འབུམ་པ། ཁྲོ་བོ་རམ་པ་དུག་འདུལ། ཁྲག་འཐུང་ཁྲོ་བོ་རོལ་བ་དང་གསུམ་སྟེ་ཀློང་དགུའི་ཡི་དམ་དགུ་ཡི་ནང་ཚན་ནོ།།  ཐེག་དགུ་ལས་ཨ་དཀར་ཐེག་པ་སྟེ། གསང་སྔགས་འབྲས་བུ་ཐེག་ཆེན་རྒྱུད་སྡེ་བཞི་ལས་ནང་རྒྱུད་ནང་མ་བླ་མེད་རྒྱུད། རྒྱུད་སྡེ་དེ་ལ་ཕ་རྒྱུད་མ་རྒྱུད་སྲས་རྒྱུད་གསུམ་བཞུགས་པ་ལས་གཉིས་མེད་སྲས་རྒྱུད་དོ། །སྒོ་བཞི་མཛོད་ལྔ་ལས་ཆབ་དཀར་དྲག་པོ་སྔགས་ཀྱི་བོན་སྒོའོ།།

གསུམ་པ་ཡི་དམ་དབལ་རམ་འབུམ་གསུམ་གྱི་སྒྲུབ་རྒྱུད་འཛིན་པའི་བོན་སྡེ་དང་ཚོ་བ་ངོ་སྤྲོད།

   དེ་ཡང་མཚོ་སྔོན་ཁྲི་ཀའི་ཤར་ཕྱོགས་ན་མཁས་པ་མི་བཞིའི་ནང་ཚན་སེ་བོན་ཤ་རུ་དབུ་ཆེན་གྱི་གདུང་བརྒྱུད་དང་སློབ་བརྒྱུད་ཆགས་པ་སེར་བརྒྱ་བོན་མང་ཡིན་ལ། སྡེ་བའི་ནང་ཚན་སྲོག་རྩ་མཁར་ཟེར་བའི་ཚོ་བ་ལའང་ནང་གསེས་སུ་ཡག་ཉེ་ཚོ་བ་དང་བོན་དཀར་ཚོ་བ།  བོན་ནག་ཚོ་བ་༼ སྡེ་འདིའི་བོན་དཀར་ཚོ་བ་དང་བོན་ནག་ཚང་ཟེར་བ་ཡོད་པ་ནི་སྔོན་འཇིག་རྟེན་ཆོས་བརྒྱད་ལ་དགའ་བའི་བན་དེ་བླ་མ་ཁྲི་ཀའི་རྒྱབ་ཚ་གུ་རུ་ཆོས་ལྡན་ཁོང་ལ་བསྙེན་བཀུར་བྱེད་མཁན་དག་ལ་བོན་དཀར་དང་བསྙེན་བཀུར་ཞབས་ཏོག་མི་འབུལ་བའི་བོན་ཁྱིམ་ལ་བོན་ནག་ཅེས་ཟ་འདོད་ཕོར་ཁ་ཞེན་པའི་ཆགས་སྡང་སྒོ་ནས་བཏགས་པའོ།།༽ དང་སོ་ཚང་བཅས་ཚོ་བ་བཞི་ཡོད་པའི་དུད་ཁྱིམ་བརྒྱད་ཅུ་ཙམ་གྱིས་ལོ་ལྟར་ལུགས་རྙིང་གི་ཟླ་བཞི་བའི་ཚེས་ཉེར་ལྔ་ནས་ཚེས་ཉེར་དགུའི་བར་ཁྲོ་བོ་རོལ་བ་འདོན།

མཚོ་སྔོན་རེབ་གོང་བོན་མང་ལོ་ལྟར་ལུགས་རྙིང་གི་ཟླ་དང་པོའི་ཚེས་ལྔ་ནས་ཚེས་བརྒྱད་བར་ཁྲོ་བོ་འབུམ་པའི་སྒྲུབ་ཆེན་ལ་འཚོགས་དགོས།  དེ་ལ་སྟོད་ཕྱོགས་བོན་མང་དང་སྨད་ཕྱོགས་བོན་མང་གཉིས་སུ་ཡོད་པས་སྒྲུབ་ཆེན་ཐེངས་དང་པོར་སྨད་ཕྱོགས་ནས་འཚོགས་རྗེས་ཕྱི་ལོར་སྟོད་ཕྱོགས་ཀྱི་སྡེ་བ་གཅིག་ནས་འཚོགས་དགོས།

རེབ་གོང་བོན་མང་འདུས་སྤྱི་ནས་དབང་ཆེན་འབུམ་པའི་སྒྲུབ་ཆེན་འཛུགས་སའི་བོན་སྡེ་སོ་སོ་ནི།

༡ སྨད་པ་ཁྱུང་པོ་སྡེ་བ ༼རེབ་གོང་གྲུབ་ཐོབ་རྣམ་གསུམ་གྱི་ཡ་གྱལ་ཁྱུང་པོ་ཁྱུང་དཀར་ཚངས་པའི་གདུང་རྒྱུད་དང་སློབ་རྒྱུད༽    འབུམ་པའི་སྒྲུབ་ཆེན་འཚོགས་པའི་སྡེ་བ་དང་པོ་འདི་ཡིན།

༢  ངོ་མོ་སྡེ་བ་  ༼ གྲུབ་ཐོབ་རྣམ་གསུམ་གྱི་ཡ་གྱལ་ངོ་མོ་ཡེ་ཤེས་མཚོ་རྒྱལ་གྱི་གདུང་རྒྱུད་དང་སློབ་རྒྱུད ༽     

༣ གླིང་བརྒྱ་སྡེ་བ།   

༤ ཧོར་ནག་རུ་ཞོལ་མ་སྡེ་བ།

༥  རྒྱ་མཚོ་དཔལ་སྡེ་བ༼ མཁར་གོང་སྡེ་བ་དང་མཁར་ཞོལ་སྡེ་བ། ཨརྒ་སྟེང་སྡེ་བ་གསུམ་གྱི་སྤྱི་མིང་ལ་རྒྱ་མཚོ་དཔལ་ཟེར༽

༦ དར་གྲོང་སྡེ་བ།

༧  ཧོར་ནག་སྟོང་ཆེ་སྡེ་བ།

༨ གདོང་མགོ་ཚང༼ གྲུབ་ཐོབ་རྣམ་གསུམ་གྱི་ཡ་གྱལ་སྤྱི་རྟིང་འཁོར་ལོས་རྒྱལ་བོའི་གདུང་རྒྱུད་དང་སློབ་རྒྱུད།༽

སྡེ་བ་བརྒྱད་པོ་འདི་རྣམས་ལ་རེབ་གོང་བོན་སྡེ་བཅོ་ལྔ་ཡི་སྔགས་འཆང་ལྷན་གཅིག་ཏུ་འཚོགས་ནས་འབུམ་པ་འདོན།   འདིར་སྡེ་བ་རྣམས་ཨང་རིམ་ལྟར་བཀོད་པ་ནི་ལོ་ལྟར་སྒྲུབ་ཆེན་འཚོགས་སའི་གོ་རིམ་གཏན་འཁེལ་བྱས་ཡོད་པ་ལྟར་རོ། ། བོན་སྡེ་འགའ་ཤས་ན་འབུམ་པའི་སྒྲུབ་ཆེན་མེད་པ་ནི་སྡེ་བ་དེ་དག་ན་བོན་མང་གིས་དབལ་གསས་སྒྲུབ་ཆེན་འཛིན་དགོས་པས་རེད། 

གོང་བཤད་ལྟར་ལོ་རེར་སྡེ་བ་སོ་སོར་རེས་མོས་བྱས་ནས་དབང་ཆེན་འབུམ་པ་འདོན་སྲོལ་ཡོད་འདུག

བཞི་བ་རེབ་གོང་ཕྱོགས་ནས་ཚོ་བ་སོ་སོའི་སྒྲུབ་མཆོད།

   ངོ་མོ་སྡེ་བ་ནས་དགུན་སྲུང་ལ་ལུགས་རྙིང་གི་ཟླ་བཅུ་གཅིག་པའི་ཚེས་ཉེར་ལྔ་ནས་ཚེས་ཉེར་དགུ་བར་ཁྲོ་བོ་འབུམ་པ་དང་རོལ་བ་གཉིས་ཀ་འདོན།

འགྱིང་རིའམ་གྱང་རི་ནས་ཟླ་བཅུ་གཅིག་པའི་ཚེས་གཅིག་ནས་ཚེས་བདུན་བར་འབུམ་པ་དང་རམ་པ་འདོན།༼ཉིན་དྲུག་ལ་འབུམ་པ་དང་ཉིན་རྗེས་མ་ལ་རམ་པ་འདོན།༽

ཟླ་བཅུ་གཉིས་པའི་ཚེས་ཉེར་དགུའི་ཉིན་འབུམ་པའི་ཟློག་པ་འདོན། འདི་སྔོན་ཆད་ཉིན་དུ་མ་ལ་འདོན་མོད་ད་ལྟ་ཉིན་ཟློག་བྱེད་ཟེར།

འགྱིང་རིའམ་གྱང་རི་སྡེ་བའི་འགྱིང་རི་ཞོལ་མའི་ཚོ་བའི་ཁྱིམ་གྲངས་བཅུ་བཞིས་ཁྲོ་བོ་རོལ་བ་དང་འབུམ་པ་འདོན། འདི་ཟླ་བཅུ་བ་དང་ཟླ་བཅུ་གཅིག་པ་གང་རུང་ལ་ཁོམ་སྐབས་བཙལ་ནས་འདོན་ཟེར།   ཕལ་ཆེར་ཉི་ཟློག་ལ་འཁེལ་བར་བྱེད་ཟེར།

གླིང་བརྒྱ་ནས་ལུགས་རྙིང་གི་ཟླ་བཅུ་གཅིག་པའི་ཚེས་ཉེར་གསུམ་ནས་ཉེར་དགུའི་བར་འབུམ་པ་འདོན།   སྔོན་ཆད་རམ་པ་འདོན་ཡང་དེང་སང་མི་འདོན་ཟེར།

གླིང་བརྒྱའི་དབང་ཆེན་ཚོ་བ་༼ཁྱིམ་ཁ་བཞི་བཅུ་དང་ཚེ་མཁར་ཚོ་བར་ཁྱིམ་ཁ་ཉེར་གཉིས  ༽གཉིས་ནས་ཟླ་བཅུ་གཅིག་པའི་ཚེས་བཅོ་ལྔ་དང་བཅུ་དྲུག བཅུ་བདུན་བཅས་ལ་འབུམ་པའི་རིམ་གྲོ་བྱེད།

སྨད་པ་ཁྱུང་བོ་སྡེ་བའི་མཁར་ནང་ཚོ་བ་༼ཁྱིམ་ཚང་ལྔ་བཅུ་༽ཡིས་ཟླ་བཅུ་གཉིས་པའི་ཚེས་ཉེར་གསུམ་ནས་ཉེར་དགུའི་བར་འབུམ་པ་འདོན་།

ཞོལ་འཕང་ཉིན་ཐ་༼ཁྱིམ་གྲངས་ཉེར་ལྔ་ ༽ནས་ཟླ་དང་པོའི་ཚེས་ཉེར་བདུན་ནས་ཉེར་དགུའི་བར་འབུམ་པ་འདོན།

ཟླ་བཅུ་གཅིག་པའི་ཚེས་བཅུ་གསུམ་ནས་བཅུ་བདུན་བར་འབུམ་པ་དང་རམ་པ་འདོན།

ཟླ་བཅུ་གཉིས་པའི་ཚེས་ཉེར་ལྔ་ནས་ཉེར་དགུའི་བར་འབུམ་པ་དང་རམ་པ་འདོན། ༼སྔོན་ཆད་འདིའི་སྐབས་ཁྲོ་བོ་རོལ་བ་འདོན་མོད་ད་ལྟ་མི་འདོན་ཟེར༽

དར་གྲོང་ནས་ལོ་རེར་ཟླ་བ་བཅུ་གཅིག་པའི་ཚེས་ཉེར་བདུན། ཉེར་བརྒྱད་  ཉེར་དགུ་བཅས་ལ་འབུམ་པ་འདོན།(ཁྱིམ་གྲངས་ཉི་ཤུ་ཡོད)

 དར་གྲོང་སྡེ་བའི་ཚོ་བ་ངོ་མོ་ཚང་༼ཁྱིམ་ཁ་དྲུག་ཡོད། འདི་གྲུབ་ཐོབ་ངོ་མོ་ཡེ་ཤེས་མཚོ་རྒྱལ་གྱི་རྒྱུད་ཡིན་ཟེར༽དང་སྒང་ཚོ་བ་༼ཁྱིམ་གྲངས་བཅུ་བཞི་ཡོད་༽ གཉིས་ནས་ཟླ་བཅུ་གཅིག་པའི་ཚེས་གཅིག་གཉིས་གསུམ་བཅས་ལ་ལོ་གཉིས་རེའི་འཕྲོ་ནས་འབུམ་པ་འདོན་། འབུམ་པ་དང་སྤྱི་འདུལ་གཉིས་རེས་མོས་བྱེད་པས་དེ་ལྟར་ཡིན་འདུག

སྤྱི་རྟིང་༼ཁ་སྐད་ལྟར་ན་སྐྱིད་ཚང༽གདོང་མགོ་ཚང་ནས་ལུགས་རྙིང་གི་ཟླ་བཅུ་གཅིག་པའི་ཚེས་བཅུ་དྲུག་ནས་ཚེས་ཉེར་གཅིག་བར་འབུམ་པ་འདོན།

སྤྱི་རྟིང་གད་པ་སྐྱིབ་བམ་གད་པ་སྐྱ་བོ་སྡེ་བའི་ནང་ཚན་སེར་སྲུང་༼ཁ་སྐད་དུ་སེར་གྲོང་ཚང་ཟེར། ཁྱིམ་གྲངས་བཅུ་བཞི ༽ཚོ་བས་ལུགས་རྙིང་ཟླ་བཅུ་གཅིག་པའི་ཚེས་ཉེར་ལྔ་ནས་ཉེར་བདུན་བར་ཁྲོ་བོ་རོལ་བ་འདོན།

ལུགས་རྙིང་ཟླ་བཅུ་གཅིག་པའི་ཚེས་ཉེར་ལྔ་ནས་ཉིན་གསུམ་ལ་ཨརྒ་སྟེང་མཁར་གོང་མཁར་ཞོལ་གསུམ་གྱི་སྔགས་འཆང་བཞི་བཅུ་ལྷག་གིས་ཁྲོ་བོ་རམ་པ་ཚོགས་འདོན་བྱེད།

 བོན་སྡེ་གད་པ་སྐྱིབས་སམ་གད་པ་སྐྱ་བོ  གདོང་མགོ་ཚང  མཁར་གོང་ མཁར་ཞོལ  ཨརྒ་སྟེང་ བཅས་ན་ལུགས་རྙིང་ལོ་གསར་ཚེས་དགུ་དང་བཅུའི་ཡས་མས་སུ་འབུམ་པ་འདོན་མཁན་ཁྱིམ་ཚང་མང་།

མཚོ་ལྷོ་ཆབ་ཆ་རྐ་གསར་བོན་མང་གིས་ལུགས་རྙིང་ལོ་གསར་ཟླ་བ་དང་པོའི་ཚེས་ཉེར་གསུམ་ནས་ཉེར་དྲུག་བར་ཁྲོ་བོ་དབང་ཆེན་འབུམ་པའི་སྒྲུབ་ཆེན་འཚོགས།

ཆོས་རྒྱལ་མེས་དབོན་རྣམ་གསུམ་དང་ལྷ་བླ་མ་ཡེ་ཤེས་འོད། འགྲོ་མགོན་འཕགས་པ།  རྗེ་ཙོང་ཁ་བའི་བླ་མ་ཆོས་རྗེ་དོན་གྲུབ་རིན་ཆེན། ཕ་བོང་ཁ། རྒྱལ་དབང་ལྔ་བ། འཇམ་དབྱངས་བཞད་པ་སོགས་བླ་སྤྲུལ་མང་པོ་དང་། ཙོང་ཁའི་རྒྱལ་བོ་དང་ཅོག་ཙེ་རྒྱལ་བོ་སོགས་ཡུལ་དཔོན་མང་པོས་གཡུང་དྲུང་བོན་ལ་འཚེ་བ་མང་དུ་བྱས་རྐྱེན་བོན་གྱི་ཡུལ་སྡེ་དགོན་སྡེ་ཉམས་གུད་དུ་གྱུར་ནས་ཉུང་དུ་ཕྱིན་ནའང་།རྒྱལ་དང་རྒྱལ་སྲས་རིག་འཛིན་བྱང་སེམས་མང་པོའི་ཐུགས་བསྐྱེད་སྨོན་ལམ་ལས་བསྟན་པ་རྩ་བ་ནས་ནུབ་པར་མ་གྱུར་བས། དུས་འདིར་ཅུང་ཟད་ཉག་ཕྲ་བས་གོང་གསལ་འདི་ནི་ད་ལྟའི་གནས་ཚུལ་དངོས་ལགས་པ་ཇི་བཞིན་བཀོད་པའོ།།

  འདི་ནི་བཤད་སྒྲུབ་བསྟན་པའི་ཆུ་ཀླུང་བརྡོལ་གནས་གཅིག་པུ། ལུང་རིགས་སྨྲ་བའི་བཀའ་རབ་འབྱམས་དགེ་བའི་བཤེས་གཉེན་ཆེན་མོ་འབྱུང་གནས་དཔལ་རྒྱལ་བ་སྨན་རི་བའི་གདན་སར་སྔར་འདིའི་ཐད་ཀྱི་གནས་ཚུལ་སྙན་ཞུ་བྱས་པ་ལ་སླར་མགོ་མཇུག་ཚིག་འགའ་བསྣན་པའོ།།

ཡུལ་མདོ་སྨད་དུ་དབལ་རམ་འབུམ་གསུམ་གྱི་སྒྲུབ་མཆོད་འཛིན་པའི་བོན་སྡེ་ངོ་སྤྲོད།” སྟེང་དུ་དཔྱད་མཆན 2 ཡོད།

  1. སེར་བརྒྱའི་བོན་དཀར་དང་བོན་ནག ཡག་ཉེ་སོགས་སྲོག་རྩ་༼སོག་རྩ་ཟེར་ནི་རེད།༽རུ་བསྡུ་བ་ནི་སྡེ་འདིའི་ལོ་རྒྱུས་གསལ་བོར་མ་རྟོགས་པས་རེད།སོག་རྩའི་ཚོ་བ་ནི་ད་ལྟ་ནས་བརྩིས་ཏེ་མི་རབས་གསུམ་ཙམ་གྱི་གོང་རོལ་དུ་བོན་དཀར་ཚོ་བའི་ནང་ཚན།ཕར་ཁ་ཚང་གི་སྐྱེས་ཆེན་ཞིག་ལྷ་སར་སོང་ནས་ཕྱིར་ཡུལ་ལ་ལོག་པའི་ལམ་སྐབས་སུ་སོག་ཕྲུག་ཅིག་འཁྱམས་ནས་འགྲོ་བཞིན་ཡོད་པ་ཁྲིད་ནས་ཡོང་ཏེ།ནང་གཡོག་གི་ཚུལ་དུ་ཕར་ཁ་ཚང་་གི་རྟ་རྫི་ལུག་རྫི་སོགས་བྱེད་དུ་བཅུག་ནས་ཁ་ལ་བཟའ་རྒྱུ་དང་རྒྱབ་ལ་གོན་རྒྱུའི་མཐུན་རྐྱེན་སྦྱར་ནས་སྡེ་འདིར་འཚར་ལོངས་བྱུང་བ་རེད།འདུག་ཡུན་རིང་་བ་དང་བརྩེ་བ་ཆགས་ནས་རང་གི་ཉེ་མི་བཞིན་བརྩིས་ཏེ་སོག་རྩའི་མཁར་སྐྲུན་ནས་ཁྱིམ་ཐབ་བསུས་པ་དང་།བུ་རྒྱུད་འཕེལ་ནས་ད་ལྟའི་སོག་རྩའི་ཚོ་བ་ཆགས་པ་རེད།སྤྱིར་ན་འདི་འདྲ་མཐོང་ཡང་མ་མཐོང་ཁུལ་གྱིས་བཏང་སྙོམས་སུ་བཞག་ཆོག་ཆོག་ཡིན་མོད།ཡིན་ཀྱང་འདི་ལྟར་བཞག་ན་ནི་སེར་བརྒྱ་སྡེ་བའི་ལོ་རྒྱུས་ནི་ལོ་ཉིས་བརྒྱ་ཙམ་ལས་མི་འདུག་པ་ཤེས་པས།འདིར་ཆེད་དུ་དཔྱད་མཆན་འདི་འདྲ་ཞིག་བཀོད་པའོ།།

  2. དཔྱད་མཆན་ལ་ཕུལ་བ།
    ཉིན་ཉི་ཤུ་ཙམ་གྱི་སྔོན་དུ་དྲ་ལམ་ནས་ཡིག་ཚགས་བཙལ་སྐབས། མིང་ལ་བཀྲ་ཤིས་བདེ་ལེགས་ཟེར་བ་ཞིག་གིས་དཔྱད་མཆན་བསྐྱོན་པ་མཐོང་། རང་ཉིད་ཀྱིས་མཐོང་དུས་ཁོས་དཔྱད་མཆན་བཏབས་ནས་ཕལ་ཆེར་ཟླ་དགུ་འགོར་འདུག རང་ཉིད་ལས་ཀ་ཕྲན་ཚེགས་ཞིག་གི་དོན་དུ་ཅུང་སོས་མ་དལ་བས་ལན་ཕུལ་རྒྱུ་འགོར་སོང་། ཡིན་ཙང་ཁོ་ཧ་ཅང་སྐྲག་ཆེས་ནས་རང་མིང་གསང་བ་བྱས་པ་ནི་ཆེས་སྐྱོ་ཤས་ཞིག་ཏུ་མངོན། བློ་གཟུ་བོའི་ངང་ཕན་ཚུན་དཔྱད་བསྡུར་ཁྲོད་གོ་ཐོས་འཕེལ་ཞིང་། གོ་ཐོས་ཞིབ་བསྡུར་ལས་སྔར་གྱི་བྱུང་བ་ལ་དག་ཐེར་བྱེད་པའི་ཆ་རྐྱེན་དུ་འགྱུར་ངེས་པས་དགའ་སྤྲོ་བཅས་དཔྱད་མཆན་ལ་བསྐྱར་ལན་འགོད་པ་ལ།
    དེ་ཡང་ཁྱེད་ཀྱི་འདོད་ཚུལ་དེ་ངས་སྔོན་གོ་ཐོས་མ་བྱུང་བ་མིན། སྤྱི་ལོ་༢༠༡༠ལོའི་ཟླ་བརྒྱད་པར་སྔགས་འཆང་གཡང་བྷའི་སར་དོན་ཞིག་གི་ཆེད་དུ་སོང་དུས་ཉིན་གཉིས་ཙམ་རིང་བོན་པོ་དབོ་ལུགས་སོགས་རང་སྡེ་ཚོ་བ་སོ་སོའི་བྱུང་རིམ་མང་པོ་གླེང་བྱུང་། སྐབས་ཐོག་དེར་བྱུང་བ་དེ་དག་ཐོས་པ་ནི་སྔོན་གྱི་གཏམ་རྒྱུད་རོ་བྲོ་བ་ཅིག་མྱོང་ཐུབ་པའི་ཚོར་སྣང་ཞིག་ཡིན།
    ཕྱིས་སུ་སྤྱི་ལོ་༢༠༡༦ལོའི་སྔ་ཕྱི་ཙམ་ལ་དཔལ་རྒྱལ་བ་སྨན་རི་བའི་མཁན་ཆེན་རིན་པོ་ཆེ་ཁྲི་འཛིན་སོ་གསུམ་པ་མཆོག་གི་བཀའ་དགོངས་བཞིན་དགེ་བཤེས་ཚུལ་ཁྲིམས་མཐར་ཕྱིན་ནམ་ཨ་ཁུ་བདེ་མཆོག་གི་ངག་བཅོལ་ལྟར་ཕྲན་གྱིས་ཡི་དམ་དབལ་རམ་འབུམ་གསུམ་གྱི་སྒྲུབ་མཆོད་འཛིན་པའི་བོན་སྡེ་ངོ་སྤྲོད་མདོར་བསྡུས་བྲིས་ནས་ཕུལ་བ་ན། རྒན་དགེ་བའི་བཤེས་གཉེན་མཆོག་གིས་སླར་ཡང་འདི་ལ་མགོར་མཆོད་བརྗོད་ཅིག་དང་མཇུག་རྩོམ་ཞིག་བསྣན་ནས་དྲ་ཐོག་ཏུ་སྤེལ་ན་ལེགས་ཚུལ་གསུང་། ལོ་གཅིག་གཉིས་ཙམ་འགོར་འགྱངས་ཁྲོད་ཡང་བསྐྱར་མགོ་མཇུག་གཉིས་ཅུང་ཟད་འཐུས་ཚང་ཙམ་བྱས་ནས་སྤེལ་བ་ཡིན།
    ཕྲན་ནི་རང་སྡེ་བའི་ཚོ་བའི་གྱེས་རིམ་རྒྱུས་མངའ་སྤུ་ཉག་ཙམ་མེད་པས། རང་སྡེ་ངོས་ཐད་ནས་འབྲི་སྐབས་ཚོ་བ་རྣམས་ཀྱི་མིང་ཡང་བསྐྱར་གཞན་ལ་དྲིས་ནས་རང་ཉིད་ཀྱིས་བསམ་གཞིགས་མང་པོ་བཏང་བ་ཡིན། འདིར་དཔྱད་མཆན་ལས་བཤད་པའི་ཚོ་བ་འདིའི་མིང་འབྲི་ཚུལ་ད་བར་དུ་ཡིག་ཆ་ངེས་དག་གཅིག་ཀྱང་སྟོན་རྒྱུ་མེད། ཚོ་མིང་དེ་སོག་རྩ་དང་སྲོག་རྩའམ་སོག་ཚ་གསུམ་གང་རུང་ལས་མ་འདས་སྙམ།
    དང་པོ་ཁྱོད་ཀྱི་འདོད་ཚུལ་སྤོང་བ།
    ཚོ་བ་འདིའི་མིང་ངེས་དག་མཐའ་ཆོད་དཀའ་ཏེ།ཁུངས་བརྟེན་སའི་དཔྱད་ཡིག་བྲལ་བས་སོ།མཐའ་གཅིག་ཏུ་འདི་འགྲིག་མིན་གྱི་ཁ་ཚོན་མི་ཆོད་ཀྱང་དཔྱད་པར་འོས།
    འདི་ལ་དང་པོ་ཁྱོད་ཀྱི་བསམ་ཚུལ་ལྟར་ན་སོག་རྩ་ཞེས་འབྲི་དགོས་ཚུལ་ལ་གོ་བ་ཅི་ལྟར་ལེན་དགོས། མི་རབས་གསུམ་ཙམ་སྔོན་ལ་ཕར་ག་ཚང་གི་མི་ཞིག་ལྷ་ས་ནས་ཕྱིར་ལོག་སྐབས་ལམ་ནས་སོག་ཕྲུག་ཅིག་ཁྱེར་ཡོང་བ་ནར་སོན་རྗེས་སོག་རྩ་མཁར་སྐྲུན་ཏེ་སོག་རྩ་ཚོ་བ་ཆགས་ཟེར་བ་ལ་ཡང་ཡང་དཔྱད་པ་བཏང་ན་ཡིད་བརྟན་ཡོང་བའི་རྒྱུ་མཚན་རྐང་ཉག་ཙམ་མི་འདུག སྒྲ་འགྲོས་ཙམ་གྱིས་དོན་ལ་མི་ཁེལ་པ་ཆུ་སྐྱེས་ཡིན་ན་ཆུ་ལས་སྐྱེས་པའི་མེ་ཏོག་པདྨ་གཅིག་པུ་མ་ཡིན་པ་ལྟར་རོ།
    འདིར་དྲི་ཚིག་ནི།ཕར་ཁ་ཚང་མི་རབས་གསུམ་གྱི་སྔོན་ལ་ལྷ་ས་སོང་ཚུལ་གང་ན་གསལ། སོག་ཕྲུག་ཅིག་ཁྱེར་ནས་ཡོང་ཚུལ་བདེན་དཔང་གྲུབ་བམ། མི་རབས་གསུམ་གྱི་དུས་ཡུན་ལོ་ཉིས་བརྒྱ་ཙམ་འགོར་དགོས་པ་གང་ལ་གཞི་བྱས་པ་ཡིན། ཅི་ལྟར་བརྩི་ལུགས་ཚབ་མཚོན་ཙམ་ཡང་མེད་པར་མི་རབས་གསུམ་ཟེར་ན་གཞན་གྱིས་ཡ་གི་ལབ་ན་ཡར་ཡིན་པ་དང་། མ་གི་ལབ་ན་མར་ཡིན་པར་འདོད་ན་ཡ་མ་བརླ་རུ་འགྱུར་ངེས། ཁྱོད་ཀྱིས་ཕྲན་ནས་ལོ་རྒྱུས་གསལ་བོ་མ་རྟོགས་པས་རེད་ཟེར་བ་འདིའི་ལོ་རྒྱུས་གསལ་བོ་རང་རྐྱ་ཐུབ་པ་ཁུངས་བཙན་བསྙོན་མེད་དྲི་མས་མ་གོས་པ་ཞིག་སྟོན་རྒྱུ་ཡོད་ན་བཀའ་དྲིན་ཤིན་ཏུ་ཆེ་ལ་ངག་རིག་གི་ལམ་ནས་གཏང་རག་འབུལ་ངེས། ངག་སྒྲོས་ཡོད་ཟེར་ན་ངག་སྒྲོས་ནི་རྟའི་རྔོག་མའི་རྗེས་སུ་འགྲོ་ལ། གེ་སར་སྒྲུང་རྫུན་ལྟ་བུ་མ་ཡིན་པ་ཧ་ཅང་གལ་ཆེ། མི་རབས་གསུམ་གྱི་སྔོན་ཡིན་པ་ཐག་བཅད་ནས་སྐབས་ཐོག་དེའི་མི་གཅིག་གི་མིང་མི་ཤེས་པ་ཅི་ཡིན་ནམ། མི་རབས་གསུམ་ནི་ལོ་མང་པོ་མ་སོང་བས་བྱས་རྗེས་ཆེ་བའི་མཁར་བཟོ་མཁན་འགོ་གཙོའི་མིང་ན་ཤེས་ན་འགྲིག དེ་ན་མི་རབས་གསུམ་ཟེར་བ་ཁུངས་མེད་ལ་ཁུངས་འགེབ་བྱེད་བརྡོལ་ཚིག་ཅིག་རེད་འདོད་མོད།འགལ་ན་མཐོལ་ལོ་བཤགས།
    ནང་གི་གང་ཆེ་གང་དྲགས་རྣམས་ལ་མཁར་མེད་པར་ཕྱི་ཁྲིད་གཡོག་ཕྲུག་ཅིག་ལ་མཁར་སྐྲུན་ཟེར་བ་འདིར་རང་ཉིད་ཀྱིས་དཔྱད་པ་བཏང་ན།ཕར་ཁ་ཚང་གིས་ས་མཐའ་ནས་ཁྱེར་ཡོང་བའི་སོག་ཕྲུག་གཡོག་པོ་ཅིག་ལ་མཁར་ཞིག་སྐྲུན་སྲིད་དམ། ཕར་ཁ་ཚང་གིས་རང་ལ་མཁར་མི་སྐྲུན་པར་གཡོག་ལ་མཁར་བཟོས་ཟེར་ན་དཔྱོད་པའི་འདུ་ཤེས་ལྡན་པ་རྣམས་རྣ་བ་འགས་པའི་ཧབ་ཆ་སིང་སེ་ཤོར་ངེས། མཁར་ཞིག་སྐྲུན་རྒྱུ་ལས་སླ་མོ་མ་ཡིན་ལ། དེར་མི་ཤུགས་རྒྱུ་ཤུགས་དབང་ཤུགས་གསུམ་མ་འཛོམས་ན་སྐྲུན་ཐུབ་མེད་སྙམ། གལ་ཏེ་དེ་ལྟར་ན་མཁར་དེ་འང་ཕར་ཁ་ཚང་གིས་གཙོ་བོ་བྱས་ནས་བཟོ་སྐྲུན་བྱས་པ་ཡིན་པས་ཕར་ཁ་ཚང་གི་མཁར་ཟེར་ན་རུང་བར་སྙམ། གོང་གསལ་ལྟར་མཁར་ནི་ཅུང་དབང་ཤུགས་ཆེ་བ་དག་གིས་མ་གཏོགས་སྐྲུན་ཐུབ་ཚུལ་མེད་ལ། མཁར་མིང་ལ་མིའི་མིང་འདོགས་དགོས་ཚེ་ཕར་ཁ་ཚང་གི་དབང་ཤུགས་ཆེ་བའི་མིའི་མཚན་ཐོགས་སྙམ། སྐབས་ཐོག་དེ་ནི་བྲན་གཡོག་སྤྱི་ཚོགས་ཡིན་པས་ཤེས་སླ། འོལ་ཚོད་ཀྱི་ངག་སྒྲོས་དེ་ལྟར་ན་འང་སོག་རྩ་ཟེར་བ་ལས་སོག་ཚ་བྲིས་ན་འཐད་པར་སྣང་།
    ཁྱོད་ཀྱི་བཤད་ཚུལ་ལྟར་མི་རབས་གསུམ་ཙམ་གྱི་སྔོན་ཟེར་བ་ལ། འདིར་ཁྱོད་ལ་ཙམ་སྒྲའི་བསྟན་བྱ་རྒྱུ་མ་ཕུ་འདེད་བྱས་ནས་མི་འདྲི། མི་རབས་གསུམ་ཟེར་བ་གཙིགས་སུ་བཟུང་ན། མི་རབས་གསུམ་གྱི་ཡུན་བརྩི་ལུགས་གཉིས་སྣང་བས། དང་པོ་ནི། མི་རེར་ཆ་སྙོམས་ལོ་དྲུག་ཅུ་རེ་བདུན་བརྩིས་ནས་མི་ལོ་ཉིས་བརྒྱ་དང་གཅིག་གི་སྔོན་སྤྱི་ལོ་1819ལོར་འཁེལ་དགོས། ཕྲན་གྱིས་ཚོད་དཔག་ལྟར་ན་ཁྱོད་ཀྱིས་མི་རབས་གསུམ་ཟེར་བའི་བརྩི་སྟངས་འདི་རེད་སྙམ།
    བརྩི་སྟངས་གཞན་གཅིག་ནི་ཅུང་ལོ་མང་བའི་དབང་དུ་བྱས་ན་མི་རེར་ཆ་སྙོམས་ལོ་བདུན་ཅུ་དོན་ལྔ་བསྡད་ཚུལ་ལྟར་བརྩི་ལུགས་བྱས་ན་སྤྱི་ལོ་1875ཡིན།
    ད་ལྟའི་རྒན་བགྲེས་རྣམས་ཀྱིས་བོན་ནག་ནམ་མཁའ་དབང་ལྡན་གྱི་ཡུམ་མཁའ་འགྲོ་ཨ་ནེ་འོད་ལྡན་སོྲག་རྩ་འམ་སོག་ཚའི་མཁར་ནང་དུ་རྩ་རླུང་གི་མཚམས་ལ་བཞུགས་པར་གསུང་།དེ་ལྟར་ན་མཁའ་འགྲོ་འོད་ལྡན་བཟང་མོ་མཚམས་ལ་བཞུགས་དུས་ལོ་ནི་སྤྱི་ལོ་1894ཡས་མས་ཙམ་ཡིན་པ་མངོན་གསལ་ཡིན།དེའི་བར་ཁྱད་ལ་དཔྱད་ན་ཅུང་ཁྱད་མཚར་དུ་སྣང་ལ་རྟོག་པའང་མང་དུ་འབྱུང་། གལ་སྲིད་ཁྱོད་ཀྱི་འདོད་ཚུལ་ལྟར་གཞིགས་ཚེ་མཁར་དེ་ལ་ལོ་རྒྱུས་རྒྱབ་ལྗོངས་ཉག་ཉོག་ཙམ་ལས་མེད་དོ། ཡང་ཁྱོད་ཀྱིས་ཕྲན་གྱི་འདོད་ཚུལ་ལྟར་བརྩིས་ན་རང་སྡེར་མི་ལོ་ཉིས་བརྒྱ་ཙམ་ལས་འགོར་མེད་ཟེར་བ་དགོད་བྲོ་བའི་གཏམ་དུ་ཟད་དོ།
    གཉིས་པ་རང་ཉིད་ཀྱི་འདོད་ཚུལ་འཇོག་པ།
    སྤྱིར་རང་སྡེའི་ལོ་རྒྱུས་བྱུང་རིམ་ལ་ཕྲན་རང་ཉིད་ཧ་ཅང་རྨོངས། རང་ཉིད་ཀྱི་འདོད་ཚུལ་འདི་གཞན་ངག་ལས་ཐོས་ཚུལ་མི་འདྲ་བ་གསུམ་ལས་འདོད་ཚུལ་འདི་འདེམས་པ་ལྟར། ངས་ངོ་སྤྲོད་དེའི་ནང་སྲོག་རྩ་ཞེས་བྲིས་པ་རྒྱུ་མཚན་ཉག་ཕྲ་ནའང་དེ་ནི་ཡུལ་སྐད་ཙམ་ཡིད་ལ་བཞག་ནས་བཀོད་པ་ཡིན། སོག་རྩ་འང་ཡུལ་སྐད་ལ་མི་མཐུན་པ་མེད་མོད། སོག་རྩ་ལས་སྲོག་རྩ་ཞེས་པར་གོ་བ་རྙེད་སླ། གཞན་སོག་རྩ་ལས་སོག་ཚ་བྲིས་ན་འོས་ཚུལ་སྣང་། བཤད་ཚུལ་གསུམ་ལས་དང་པོ་ནི་སོག་བཙུན་སྟོན་པ་ཡེ་ཤེས་རྒྱལ་མཚན་གྱི་སྐུ་མཆེད་པདྨ་རྒྱལ་གྱི་རུས་རྒྱུད་ལས་མཆེད་པས་སོག་ཚ་ཟེར་བར་ཐོས། བཤད་ཡམས་གཉིས་པ་ཁྱོད་ཀྱི་འདོད་ཚུལ་ལྟར་སོག་ཕྲུག་ཅིག་ཁྲིད་ཡོང་བ་ལས་སོག་ཚ་ཚོ་བ་ཆགས་ཟེར། འདོད་ཚུལ་གསུམ་པ་ནི་མིང་ཇི་ལྟར་ཐོགས་ཚུལ་མི་གསལ་ཡང་སོག་ཚ་འམ་སྲོག་རྩ་ཚོ་བ་ལས་ཚོ་བ་འགའ་ལོགས་སུ་ཆགས་པར་བཤད་ཚུལ་གསུམ་ལས་གང་ཡིན་མཐའ་གཅིག་ཏུ་ཐག་ཆོད་པ་དཀའ་མོད། འདོད་ཚུལ་སྔོན་མ་གཉིས་འཐད་ཟེར་ན་དེ་ཙམ་གྱི་རྒྱབ་བརྟེན་མེད་ལ་དཔྱད་ན་ཁུངས་དོག་སྙམ། ད་ལྟ་རིམ་གྲོ་སྤྱི་སྲུང་དེར་ཚོ་བ་འགའ་མཉམ་དུ་ཚོགས་པ་ཀུན་ལ་གསལ་བ་ལྟར་ལགས། ཕྱི་རྐྱེན་གནོད་པ་ཟློག་ཆེད་ཨ་ལགས་གཅན་ཚ་༿ མཚན་དངོས་མ་ཤེས༾ ཚང་གི་ཐུགས་བཀོད་ལྟར་རིམ་གྲོ་སྤྱི་སྲུང་ལ་ཁྲོ་བོ་རོལ་བའི་སྒྲུབ་ཆེན་དེ་བཙུགས། ཚོ་བའི་སྤྱི་སྲུང་འཛུགས་སྐབས་སྡེ་དཔོན་སུ་ཡིན་མི་ཤེས་ཀྱང་། བྱ་རྒྱའི་༿ མིང་དངོས་འབྲི་ཚུལ་མ་ཤེས༾ གཡུང་དྲུང་རྒྱལ་ཟེར་བ་ལོ་ཞེ་ལྔའི་སྟེང་ཡིན་པར་གླེང་། འདིའི་སྐབས་བཤད་འགྱུར་གྱི་སྡེ་དཔོན་ཡག་ཉེ་བཀྲ་ཁོ་དང་སློག་རྒྱའི་རྣམ་ཏོ་གཉིས་ཡིན་མིན་མི་ཤེས་ཀྱང་། མཚམས་འདིར་ཞིབ་གསལ་བྱེད་དགོས་རྒྱུ་སྣང་མོད་རེ་ཞིག་དཔྱད་དཀའ་བས་ངལ་བ་བཅས་བཏང་སྙོམས་སུ་བཞག་པར་བྱ། བྱ་རྒྱ་ ༿ མིང་དངོས་འབྲི་ཚུལ་མ་ཤེས་༾ གཡུང་དྲུང་རྒྱལ་གྱི་བུ་སློག་རྒྱའི་མཐར་ཕྱིན་རྣམ་རྒྱལ་ལམ་རྣམ་ཏོ་ལོ་ ༿ ༡༨༨༢_༡༩༦༤ ༾ བརྒྱད་ཅུ་ལྷག་བསྡད།ཁྱིམ་དུ་བླངས་པའི་བཟའ་ཟླའི་བུ་མིན་པར་བཤད། དེའི་བུ་དོན་གྲུབ་རྒྱལ་ལོ་༿༡༩༠༤_༡༩༧༦༾ བདུན་ཅུ་དོན་གསུམ་ལ་བསྡད། དེའི་བུ་ལྷ་ཆེན་རྒྱལ་ལོ་ ༿ ༡༩༢༩_༢༠༡༡༾ གྱ་གསུམ་ལ་བསྡད། དེའི་བུ་ང་ཚོའི་ཤེས་གསལ་ལྟར་ལགས། འདི་གོང་གི་བརྩི་སྟངས་རྗེས་མའི་བར་ཁྱད་ན་ལོ་བདུན་ཕྲག་གཅིག་ཡིན། ཁྱོད་ཀྱིས་ལབ་པའི་མི་རབས་གསུམ་ཟེར་བ་ནི་སློག་རྒྱའི་རྣམ་ཏོ་ཟེར་བ་ཁ་དྲག་གཏམ་གྱིས་བཙན་པ་དེ་དང་། ཡག་ཉེ་བཀྲ་ཁོ་ཟེར་བ་ཞི་དུལ་རྒྱུད་འཇམ་ལྡན་པ་གཉིས་ཀྱིས་སྡེ་བ་བསྐྱངས་ཚུལ་ཀུན་ལ་རླུང་ལྟར་གྲགས་པའི་སྐབས་ཡིན་ནམ་སྙམ་པས་དཔྱད་པ་གཏོང་ཤེས་པར་འཚལ་ཞུ།
    སྔོན་རིག་གསར་རྗེས་ལ་རྒན་རྒོན་འགའ་ཤས་རིམ་གྲོ་སྤྱི་སྲུང་དེའི་ཆེད་ཁ་རྩོད་ཙམ་ཤོར་ཡོད་པ་ལས་ཅུང་ཤེས་ཐུབ་སྟེ། འདི་སོྲོག་རྩ་ཚོ་བའི་སྤྱི་སྲུང་ཡིན་པ་ལས་བོན་དཀར་ཚོ་བ་ཁོ་ནའི་སྤྱི་སྲུང་མིན། བོན་དཀར་ཚོ་བའི་སྤྱི་སྲུང་ཡིན་ཟེར་ན་ཚོ་བ་གཞན་གྲས་སུ་མི་ཡོང་ཟེར་བ་འདི་གནད་འགག་ཅིག་རེད། སོག་ཚ་ཚོ་བ་ལས་དུད་ཁྱིམ་འགའ་ཤས་ལོགས་སུ་བཀར་བ་ཚོ་མིང་རེ་ཆགས། འདི་གཞན་ལ་རིགས་འགྲོས་བྱེད་ཤེས་ན་རྟོགས་སླ། ཕྱོགས་གཅིག་ལ་བལྟས་ཤིང་ལྷག་པར་ངག་སྒྲོས་ཐན་ཐུན་ཙམ་ལ་གཞི་བྱས་ན་འཛོལ་ཉོག་ཡོང་རེད། ཕྲན་གྱི་བཀོད་པ་ལྟར་ན་རང་སྡེ་མི་ལོ་ཉིས་བརྒྱ་ཙམ་ལས་མེད་ཟེར་བ་ཧ་མ་གོ་བའི་རྟགས་ཁོ་ན་སྟེ། གནས་འདིར་རང་སྡེ་ཆགས་ནས་ཆེས་ཉུང་ཐའང་མི་ལོ་བདུན་བརྒྱ་བདུན་ཅུ་ལྷག་འགོར་ཡོད། ཁྱོད་ལ་བསྐྱར་དུ་གསལ་གདབ་བྱས་ན། ཁྱོད་ཀྱིས་“ ཡིན་ཀྱང་འདི་ལྟར་བཞག་ན་ནི་སེར་བརྒྱ་སྡེ་བའི་ལོ་རྒྱུས་ནི་ལོ་ཉིས་བརྒྱ་ཙམ་ལས་མི་འདུག་པ་ཤེས་པས།” ཞེས་ཟེར་བ་ཚིག་ལ་གཅེས་སྤྲས་བྱེད་ཤེས་པར་གྱིས། ཚིག་ལ་གཅོད་བསྡུ་བསྣན་གསུམ་བཀོལ་དགོས་པའང་མཁྱེན་པར་མཛོད། རང་སྡེ་ལ་མ་མཐའི་ལོ་ཚིགས་རབ་བྱུང་ལྔ་བའི་སྟོད་ཡིན་པ་དཔེ་ཀློག་བྱོས་ཤིག་ཡིད་འཇགས་ཡོང་ངེས། སྦྲ་སེར་པཎྚི་ཏའི་ཞལ་ནས། སེར་བརྒྱའི་བོན་དཀར་བོན་ནག་དེ་དུས་སྲིད། ཅེས་པར་བསམ་ན་བདེན་དོན་རྙེད་ངེས། རུས་བརྒྱུད་ཀྱི་ཁུངས་དང་སའི་མིང་ལ་དཔྱད་ན་འང་ལོ་རྒྱུས་རྒྱུན་རིང་བ་ཤེས་ཐུབ་བོ་ཞེས་དཔྱད་བསྡུར་རགས་རམ་ཙམ་འདི་ལྷག་བསམ་རྣམ་དག་གིས་ཕུལ་བའོ།།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།