རྫ་བླ་མ་མཐུ་སྟོབས་རྣམ་རྒྱལ་ལ་ཕུལ་བའི་ཞུ་ཡིག།

རྫ་བླ་མ་མཐུ་སྟོབས་རྣམ་རྒྱལ་ལ་ཕུལ་བའི་ཞུ་ཡིག།
བོན་བརྒྱ་དགེ་ལེགས་ལྷུན་གྲུབ་རྒྱ་མཚོ།

༄༅།། རིག་པ་དྲི་མེད་བོན་སྐུ་མ་གཡོས་པར། ། བསྟན་པའི་སྙིང་བོ་སྤེལ་ཕྱིར་རང་ཤར་རྩལ། ། འཇིགས་མེད་སྨྲ་བའི་དབང་པོ་ཤར་རྫ་བ། ། ཀུན་མཁྱེན་མངྒ་ཝེར་ཞིས་ཤེས་པ་སྩོལ། ། གང་གི་བསྟན་པ་འཛིན་སྐྱོང་སྤེལ་བའི་མཐུ། ། སྟོབས་སུ་རྫོགས་པ་དོན་གྱི་དགེ་བའི་བཤེས། ། རྣམ་དག་ངུར་སྨུག་འཛིན་པའི་དམ་པ་མཆོག།། རྒྱལ་ཚབ་ཞབས་པད་མི་འཇིགས་གདོང་ལྔའི་ཁྲིར།། བོན་བསྟན་སྐྱོང་བའི་དགེ་སེམས་ལེགས་ན་ཡང་། ། རྒྱ་ཆེན་ཤེས་བྱའི་མཚོ་ལ་མ་ཕྱིན་པར། ། བོན་བརྒྱ་སྐྱེ་སྤྲུལ་མིང་ཙམ་སྒྲོ་བཏགས་པས། ། རྒྱ་ཆེར་འདྲིས་བཞིན་གཏམ་བཟང་མཆོད་པར་སྤྲོ། ། བསྟན་པའི་གསལ་བྱེད་ཉི་མ་རིན་པོ་ཆེས། ། གདན་སའི་ཁྲི་འཛིན་དམ་པར་མངའ་གསོལ་བ། ། ཀུན་གསལ་ལམ་ན་ལྷ་རྔས་དབྱངས་ལས་སྒྲོགས། ། འཛིན་མར་སྐལ་བཟང་མདོངས་མཐའི་སྤྲོ་བ་འཕེལ། ། འཛམ་གླིང་འཛིན་མ་མཛེས་པའི་རྒྱན་གཅིག་པུ། ། ཤར་རྫ་གཡུང་དྲུང་ལྷུན་པོ་དཔལ་གྱི་རི། ། ད་དུང་དམ་པའི་ཞབས་ཀྱིས་བཟུང་ངོ་ཞེས། ། ལག་སོར་མེ་ཏོག་སྙིང་གི་རྒྱན་དུ་བཀོད། ། རིང་མིན་གདན་ས་ཆེན་པོར་བོན་གྱི་སྒོ། ། སྒོར་བརྒྱར་ཕྱེས་ཏེ་སྐལ་བཟང་སློབ་མའི་ཚོགས། ། ཚོགས་ཀྱི་ཞིང་དུ་མངོན་སུམ་མཐོང་བའི་དཔལ། །དཔལ་ལྡན་བླ་མའི་དྲིན་ལས་བྱུང་སྙམ་མོ། ། འདི་ན་ཕྱག་རྒྱ་དང་པོའི་དོན་མཐོང་ཡང་། ། གཉིས་པ་བདེ་བར་འཛིན་པའི་རྨོངས་བློ་འཁྲུལ། ། བཞི་བ་མ་མཐོང་བདག་ཏུ་འཛིན་པ་ཡིས། ། གསུམ་པའི་འབྲས་བུ་བསྐལ་བར་རིང་བས་སྐྱོ། ། འཚམས་ཞུ། གང་ཕྱིར་གདན་ས་སྐྱོང་བའི་ནུས་མཐུ་ཅན། ། སྟོབས་བཅུ་མངའ་བས་ཁྱེད་ལ་དབང་བསྐུར་ན། ། དུས་རྣམ་ཀུན་ཏུ་དམ་བཅའ་མི་འདའ་བར། ། རྒྱལ་བ་གཉིས་པའི་རྗེས་འཇུག་ཁྱོད་ཀྱིས་སྐྱོངས། ། རྟོགས་གྲོལ་ལྡན་པའི་གདོང་ལྔ་ ཡིས། ། ལེགས་བཤད་ང་རོ་ཆེར་སྒྲོགས་ན། ། སོ་ལྡན་མཆེ་བ་རིང་ན་ཡང་། ། སྙིང་ལ་འཇིགས་པའི་འཕྲུལ་འཁོར་སྟེར། ། རྟ་བདུན་ཞོན་པའི་ལེགས་བྲིས་གཞོན་ནུ་ཞིག། དྲུག་ཟུང་ཁྱིམ་རེས་མ ? དབང་བསྒྱུར་ཏེ། ། འོད་ཞགས་མདའ་ལྟར་འཕང་ན་སྨག་རིམ་གྱི། ། སྐྱེས་བུས་འགྲན་བཟོད་མོ་གཤམ་བུ་ཡི་སྤུན། ། ལུང་གི་ཡོན་ཏན་ཆུ་གཏེར་ལས་ཀྱང་ཟབ། ། རྟོགས་པའི་ཆེ་བ་འཆི་མེད་ལམ་ལས་ཡངས། ། མཛད་འཕྲིན་སྙིང་བོ་ཉི་མའི་འོད་ལྟར་གསལ། ། དེ་ནི་བསྟན་པ་འཛིན་པའི་སྐྱེས་བུ་ལགས། ། ཟས་སྐལ་འཕྲོག་པ་ནོར་སྲུང་བུས་ཀྱང་ཤེས། ། རང་མལ་བསྲུང་བ་གཉིས་སྐྱེས་རྣམས་ཀྱང་མཁས། ། དེ་ཕྱིར་བླ་མའི་བཀའ་བཞིན་རང་གི་ཁྲིར། ། སྐྱིལ་ཀྲུང་བསྣོལ་མའི་རྒྱ་དེ་ཞིག་མི་རུང་། ། བཀའ་བཞིན་བསྒྲུབ་པའི་ཆོ་ག་ཕུལ་བ་ལ། ། མདའ་ལྔས་མ་བཟོད་རྒོལ་བའི་ལས་བྱས་ན། ། བཟོད་པའི་གོ་ཆ་བསྟན་དོན་ལྷུར་བཞེས་ཏེ། ། རྒྱལ་སྲས་དཔའ་བོའི་རུ་དར་ཕྱོར་ཅིག་ཀྱེ། ། གཡུང་དྲུང་བོན་གྱི་བསྟན་དོན། ། ཐུགས་ནང་གཤིན་པའི་བཀའ་མཆིད་ཀྱི། ། མ་ལ་ཡ་ཡི་ཙན་དན་དྲི། ། ལྷོ་རླུང་ཕོ་ཉས་སྤྲོ་བར་མཛོད། ། ཞུ་ཡིག་པུཎྜ་རི་ཀའི་འཁྲི་ཤིང་རྩེར། ། དོན་བཟང་ལང་ཚོ་སྨིན་པ་ཅན། ། སྙན་ཚིག་བུང་བའི་གླུ་དབྱངས་ལེན་མཁས་པ། ། བཤེས་གཉེན་ཁྱོད་ཐུགས་དགྱེས་པའི་མཆོད་པ་འབུལ། ། ཞེས་བོན་བརྒྱ་སྨན་རི་བཤད་སྒྲུབ་སྨིན་གྲོལ་གླིང་གི་རྩེ་ཕོ་བྲང་གཟིམ་ཆུང་ཉི་འོད་འཁྱིལ་བ་ནས་ལྷ་དར་བཅས་ཕུལ། །  ། །

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།