མཆོད་བསྟོད་ངག་གི་འགྱུར་ཁུགས།

མཆོད་བསྟོད་ངག་གི་འགྱུར་ཁུགས།
ཁྲི་གཡུང་དྲུང་།

མཁས་ཤིང་གྲུབ་པའི་མངའ་བདག་རྒྱལ་བ་སྨན་རིའི་ཡོངས་འཛིན་ྋསློབ་དཔོན་བསྟན་འཛིན་རྣམ་དག་མཆོག་གི་བརྒྱད་ཅུའི་དུས་སྟོན་ཆེན་མོ་ལ་ཕུལ་བའི་མཆོད་བསྟོད་ངག་གི་འགྱུར་ཁུགས།

བཙད་པོའི་སྙིང་ཁམས་བདུད་ཀྱིས་དཀྲུགས་པས་རྒྱལ་བའི་བསྟན་ལ་སྲི་ཞུ་དམན། །
ཁྱི་སྤྱང་དར་མ་ངན་འབྲེལ་བྱས་པས་གཡུང་དྲུང་ལྷ་ཡི་དབུ་འཕང་སྨད། །
ས་ཡ་དྲུག་གི་བསོད་ནམས་ཤིག་ཏུ་དམ་པ་ཁྱུང་གི་གདན་ས་ནས། །
བདེན་པའི་རྒྱལ་ཁ་སླར་ཡང་འཐོབ་ཕྱིར་རིག་པའི་དཔའ་བོ་ཁྱེད་ཉིད་འཁྲུངས། །

འཇིག་རྟེན་འཁོར་བར་ངེས་འབྱུང་སྐྱེས་ཏེ་དྲང་སྲོང་དག་པའི་རྟུལ་ཞུགས་བཟུང༌། །
དཀའ་སྤྱད་སྡུག་རུས་ཁྱད་དུ་བསད་ཅིང་གུས་རྟག་བརྩོན་འགྲུས་གྲོགས་སུ་བསྟེན། །
སྐྱེས་སྟོབས་ཤེས་རབ་མེ་བཞིན་འབར་བས་མཁྱེན་པའི་དཔལ་ལ་དོ་ཟླས་དབེན། །
སྙན་གྲགས་དབྱར་གྱི་འབྲུག་སྒྲ་ལྡིར་བས་ལུས་ཅན་ཀུན་གྱི་ཡིད་དབང་འཕྲོག །

ཚད་མའི་སྡེ་སོགས་གཞུང་པོད་ལྔ་ལ་རིག་པའི་རང་རྩལ་ཁོང་དུ་ཆུབ། །
གསང་ཆེན་ལྟ་བའི་དེ་ཉིད་གཟིགས་ཤིང་བླ་མེད་ཐེག་པའི་རྒྱལ་སར་རྩེན། །
འཁོར་བ་དུག་གི་སྐྱོན་གྱིས་མ་གོས་ན་ཚོད་པད་མའི་ལོ་འདབ་སྨིན། །
རྒྱལ་བ་སྨན་རིའི་དཔོན་སློབ་མཆོག་གི་མཚན་རྟགས་གསེར་གྱི་ཅོད་པཎ་བཞེས། །

ལྷན་སྐྱེས་ཐུགས་དགོངས་མཁའ་ལས་ཡངས་ཤིང་ཟབ་མོ་ཐབས་ཤེས་གློག་བཞིན་མྱུར། །
སྨྲ་དབང་ཁྱེད་སྐུ་ཉི་མའི་དཀྱིལ་འཁོར་འཛམ་གླིང་ཤར་ནུབ་ཀུན་ཏུ་འཛུམ། །
ཞང་བོད་རིག་གཞུང་བོན་གྱི་དགའ་ཚལ་མཐའ་ནས་རྒྱས་པའི་དན་རྟགས་ཏེ། །
གྲུབ་པའི་དབང་པོ་བླ་ཆེན་དྲན་པ་སླར་ཡང་བྱོན་ནམ་འཕྱང་མོ་ཉུག །

གངས་ཅན་མཁས་མང་བྱེ་བའི་དྲུང་དུ་ཡོན་ཏན་རིག་པའི་དབལ་ཁ་བརྡར། །
རྒྱ་གར་འཕགས་ཡུལ་ཧི་མ་ལ་ཡར་བཤད་སྒྲུབ་བསྟན་པའི་སྡེ་ཆེན་བསྐྱངས། །
ལྷོ་བལ་འཛིན་མའི་རྒྱལ་སའི་མཐའ་རུ་ཁྲི་བརྟན་ནོར་རྩེ་གསར་དུ་བསྐྲུན། །
ཡོངས་འཛིན་དམ་པའི་མཛད་རྗེས་རི་མོ་ཞྭ་དཀར་བསྟན་པའི་རྒྱན་དུ་མཛེས། །

རླབས་ཆེན་གཡུང་དྲུང་སེམས་དཔའི་སྤྱོད་པར་རིང་ནས་གོམས་པའི་དན་རྟགས་སམ། །
ངེས་མེད་འཁྱམས་པའི་དྭ་ཕྲུག་སྟོང་ལ་གཅེས་པའི་བུ་བཞིན་བརྩེ་གཟིགས་མཛད། །
རྗེ་བཙུན་དམ་པ་མི་ཡི་སེང་ཆེན་གང་འདོད་གདམས་ངག་མཛོད་བརྒྱའི་བདག །
མཁས་རློམ་སྟག་སེང་དར་མའི་ཁྱུ་ཚོགས་ཁྱོད་ཀྱི་དྲུང་ན་བ་ལང་གཟུགས། །

ཁྱེད་ཀྱི་རྟེན་འབྱུང་ལྟ་བའི་རླབས་རྒྱུན་མ་ཕམ་གཡུ་མཚོའི་དོ་ཟླར་འཁྱིལ། །
ཁྱེད་ཀྱི་རིས་མེད་བརྩེ་ཆེན་གཟེགས་མ་བྱམས་ལྡན་ཟླ་བའི་མདངས་ལ་འཁྱིལ། །
ཁྱེད་ཀྱི་གསུང་རྩོམ་ནོར་བུའི་རླབས་རྒྱུན་གངས་རི་དཀར་པོའི་དབུ་རྩེར་འཁྱིལ། །
ཁྱེད་ཀྱི་མཚན་མཆོག་བཟླས་བརྗོད་སྟོང་གིས་བརྒྱ་བྱིན་ལྷ་ལའང་ངལ་གསོ་བྱིན། །

རིག་པའི་གཞུང་གི་དཀའ་གནད་མ་ལུས་གོ་བདེའི་ཚིག་གི་ངག་ལས་དྲངས། །
ཟབ་དོན་ལུང་རིགས་མཚོན་གྱི་རྩེ་མོར་ལེགས་བཤད་གསེར་གྱི་ལྷུན་པོ་བསྐྲུན། །
འཛམ་གླིང་སྤྱི་ནོར་སྤྱན་རས་གཟིགས་དབང་ཕྱག་ན་པད་མོའི་གསེར་ཞལ་ལས། །
གངས་ཅན་བོད་ཀྱི་ཚིག་གི་མཛོད་ཅེས་བསྟོད་ཚིག་མེ་ཏོག་བསྩལ་བར་གྲགས། །

ལེགས་བྱས་རྒྱ་མཚོའི་རླབས་དང་འགྲོགས་ཏེ་བཀྲ་ཤིས་སྟོང་གི་རྟེན་འབྲེལ་ཤར། །
དགུང་གྲངས་བརྒྱད་ཅུའི་དཀར་གསལ་ཟླ་བ་གཟི་ཉམས་ངོམ་བཞིན་མཁའ་ལ་ཚེས། །
བོན་འབངས་དད་ལྡན་ཁྲི་མ་འབུམ་གྱིས་ཀི་ཀི་བསྭོ་བསྭོའི་འབྲུག་སྟོང་ལྡིར། །
རྒྱལ་བ་སྨན་རིའི་ཡོངས་འཛིན་མཆོག་གི་གྱ་སྟོན་རྟེན་འབྲེལ་དོན་དང་ལྡན། །

དམ་པ་གང་གི་གསང་གསུམ་ཡོན་ཏན་བདག་བློ་རྨོངས་པས་གཞལ་མིན་ཡང༌། །
སློབ་རྒྱུད་འཛིན་པའི་གྲལ་གྱི་མཐའ་རུ་འཚང་ཁར་ཞུགས་པའི་རིགས་ཙམ་གྱིས། །
ཡ་ཆུང་སེམས་ནས་ཐོལ་གྱིས་འཕྱུར་བའི་མཆོད་བསྟོད་ངག་གི་འགྱུར་ཁུགས་འདི། །
དགུང་གྲངས་བརྒྱད་ཅུའི་གྱ་སྟོན་ཆེན་མོར་འཚམས་འདྲིའི་སྐྱེས་སུ་དད་པས་ཕུལ། །

ཞེས་བདག་ཅག་བོན་འབངས་ཀུན་ལ་བཀའ་དྲིན་རབ་ཏུ་ཆེ་བའི་མཁས་ཤིང་གྲུབ་པའི་མངའ་བདག་རྒྱལ་བ་ྋསྨན་རིའི་ཡོངས་འཛིན་དཔོན་སློབ་བསྟན་འཛིན་རྣམ་དག་མཆོག་དགུང་གྲངས་བརྒྱད་ཅུར་སོན་པའི་གྱ་སྟོན་རྟེན་འབྲེལ་མཚོན་བྱེད་ཙམ་དུ་བོན་གྱི་རིག་གྲྭ་ཆེན་མོ་ྋདཔལ་གཤེན་བསྟན་སྨན་རིའི་གླིང་ནས་༢༠༠༤ ་ ༩ ་ ༢༨ཉིན་གུས་པས་ཕུལ་བ་ཐ་ཚན་མུ་ཙུག་སྨྲར་རོ།། །།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།