དད་གདུང་གིས་སྐྱོམས་པའི་ལྷོ་མཐའི་དབྱངས་རྟ་ཐོལ་འཁྱུགས་མ།

དད་གདུང་གིས་སྐྱོམས་པའི་ལྷོ་མཐའི་དབྱངས་རྟ་ཐོལ་འཁྱུགས་མ།
ཁྲི་གཡུང་དྲུང་།

མཐོན་པོ་ཏི་ཙེ་གངས་རྒན་རྩེ་ནས་ཨག་སྐད་ཅིག་གིས་བརྡ་འཕྲིན་སླེབས། །
ཧི་མའི་རི་བོའི་ཕ་རོལ་ཞིག་ནས་མྱ་ངན་ངག་གིས་སྐད་འབོད་ཐོས། །
མ་ཕམ་མཚོ་མོའི་རླབས་སྒྲ་སྔོན་མོ་ཞེ་སྡང་དྲག་པོས་མཁའ་རུ་འཕྱོ། །
ཚུར་མཐོང་འཁོར་བའི་བུས་པ་འགའ་ཞིག་མགྲིན་པ་བརྣང་ཏེ་ཧད་ཀྱིས་ལུས། །

མི་མངོན་དག་པ་བདེ་ཆེན་ཞིང་ན་རིག་འཛིན་ལྷ་རྣམས་ཚོགས་ལ་རོལ། །
ཐུགས་རྗེ་ཡུམ་ཆེན་མཁའ་འགྲོའི་ཚོགས་རྣམས་གླུ་དང་གར་གྱི་སྟངས་སྟབས་བསྒྱུར། །
གང་ཞིག་ཞིང་གི་བཀོད་པ་བསྡུས་ནས་འགྲོ་དོན་བདེ་བའི་དབྱིངས་སུ་མཛད། །
ཁྱད་འཕགས་དམ་པའི་མཛད་པ་འདི་ཡིས་སོ་སྐྱེས་བློ་བ་བརྒྱལ་བར་བྱེད། །

བསྐལ་བ་སྟོང་གི་སངས་རྒྱས་རྣམས་ཀྱང་རྟག་ཞིང་གནས་ལ་བཞུགས་པ་མེད། །
བརྟན་བརྗིད་གྲགས་པའི་རི་རྒྱལ་ལྷུན་པོར་ཆགས་འཇིག་བསྐལ་བས་གཡོ་ཙམ་བྱུང་། །
དགུང་སྔོན་མཐོན་པོའི་ཉི་ཟླ་གཉིས་ཀྱང་འཆར་ནུབ་ལས་ལ་རྟག་ཏུ་བྲེལ། །
མི་རྟག་སྐད་ཅིག་བོན་ཉིད་དེ་ལ་སྟོན་པ་ལྷས་ཀྱང་བཟློག་ཐབས་མེད། །

རྒྱལ་བའི་མཆོག་ལ་སྐྱེ་འཆི་མེད་ཅེས་བསླུ་མེད་རྒྱལ་བའི་གསུངས་ལས་ཐོས། །
རྟག་པར་འཛིན་རྣམས་སུན་ཕྱུངས་ཕྱིར་དང་དགེ་ལ་བསྐུལ་བའི་བརྡ་ཐབས་སུ། །
འཁོར་བ་མི་རྟག་གཤིས་སུ་མཛད་དེ་མྱ་ངན་བདེ་བའི་དབྱིངས་སུ་གཤེགས། །
བྱེ་བ་ཕྲག་བརྒྱ་སྤྲུལ་བའི་སྐུ་ཡི་མཛད་པའི་གར་ལ་ངོ་མཚར་བྱུང་། །

གདོད་ནས་ཀ་དག་ལྷུན་གྱིས་གྲུབ་ནས་གཉུག་མ་རང་གསལ་རྫོགས་ན་ཡང་། །
གང་ལ་གང་འདུལ་ཐབས་སུ་དམིགས་ཏེ་ཕངས་མེད་མཛད་པ་ལྷུར་གྱིས་བཞེས། །
རེ་ཞིག་གང་སྐུ་ཉི་གཞོན་དབང་པོ་ཆུ་ལྷའི་ཕངས་སུ་ཡིབ་པ་འདིས། །
མཁར་ཁྱབ་འཁོར་འབངས་སྟོང་གི་སེམས་ལ་མྱ་ངན་སྡུག་གི་འཕར་མ་སྤྲད། །

སྨད་ཀྱང་སྐུ་ལོ་གཞའ་ཚོན་བཞིན་དུ་སོ་སོར་བཀྲ་ལ་གསལ་བ་ལྟར། །
རིས་མེད་འགྲོ་བའི་ཁམས་སུ་སྤྲོས་ཏེ་ཚད་མེད་རྣམ་བཞིའི་ཐུགས་རྗེ་ཡིས། །
ཟོ་ཆུའི་རྒྱུན་བཞིན་འཁོར་མཚོར་འཁྱམས་པའི་རིགས་ཁམས་དྲུག་གི་འགྲོ་བ་རྣམས། །
བདག་སོགས་ཉམ་ཐག་དམུན་པོ་ཡོད་རྒུ་ཚེ་རབས་ཀུན་ཏུ་རྗེས་སུ་ཟུངས། །

ཞེས་པའང་བཀའ་དྲིན་བཞི་རྫོགས་ཀྱི་དཔལ་ལྡན་རྩ་བའི་བླ་མ་དམ་པ་རྒྱ་འོབས༧ ཁྱུང་མོ་བསྟན་འཛིན་དབང་གི་རྒྱལ་པོ་མཆོག་གི་སྐུ་ཡི་བཀོད་པ་རེ་ཞིག་དབྱིངས་སུ་བསྡུས་པ་ཐོས་རྗེས་དད་འདུན་དྲག་པོས་རབ་ཏུ་གདུང་སྟེ་འཕགས་ཡུལ་རྡ་རམ་ས་ལའི་གྲོང་ཁྱེར་དུ་ཁྲི་གཡུང་དྲུང་དུ་འབོད་པའི་སྤྲང་འཁྱམས་པ་དེས་ཕྱི་ལོ༢༠༡༣.༡༡.༢༤ཉིན་གྱི་དགོང་མོར་བྲིས་པ་དགེ་གྱུར་ཅིག །

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།